Коми кывтӧдӧм

Небӧгса йӧзӧдӧм:

Коми орфография правилӧяс // Коми орфографическӧй словарь. Сыктывкар: Коми книжнӧй издательство, 1985. Лб. 5-33.

КОМИ ОРФОГРАФИЯ ПРАВИЛӦЯС

Звукъяс да букваяс

1. Гласнӧй звукъяс: а, и, о, ӧ, у, ы, э. Гласнӧй звукъяс пасйыссьӧны а, я, и, і, о, ӧ, э, е, ё, у, ю, ы букваясӧн.

2. Согласнӧй звукъяс: б, в, г, д, дь, дж, дз, ж, з, зь, й, к, л, ль, м, н, нь, п, р, с, сь, т, ть, тш, ф, х, ц, ч, ш, щ. Согласнӧй звукъяс пасйыссьӧны б, в, г, д, ж, з, й, к, л, м, н, п, р, с, т, ф, х, ц, ч, ш, щ букваясӧн.

3. Дж, дз, тш звукъяс пасйӧм вылӧ коми алфавитын торъя букваяс абуӧсь, найӧ пасйыссьӧны кык букваӧн — дж, дз, тш: джодж, джадж, дзоридз, кодзув, тшӧтш, тшак. Кор кывйын орччӧн сулалӧны кык дз, сэк найӧ пасйыссьӧны ддз пыр: кыддза, соддзӧн, воддза.

4. Твёрдӧй да мягкӧй знакъясӧн некутшӧм звукъяс торйӧн оз пасйыссьыны. Найӧ вермӧны лоны и торйӧдан знакъясӧн.

Букваяслӧн гижсьӧм

5. И да і букваясӧн пасйыссьӧ ӧти и сійӧ жӧ гласнӧй звук.

і буква гижсьӧ д, з, л, и, с, т чорыд парнӧй согласнӧйяс бӧрын, медым петкӧдлыны налысь чорыдлунсӧ: ді, зі, вӧлі, сім, ті, коді, мазі, кӧні, сійӧ, муніс.

Став мукӧд согласнӧйяс бӧрын, гласнӧйяс бӧрын да кыв заводитчигӧн гижсьӧ и: ӧзим, син, ӧти, диван, видз, гид, ки, чир, дзир, иган, идзас, кӧин, воис, шуис.

6. Э буква гижсьӧ:

• а) кыв заводитчигӧн: эжа, эськӧ, эм, энька, эжӧр, эскыны;
• б) д, з, л, н, с, т чорыд парнӧй согласнӧйяс бӧрын, медым петкӧдлыны налысь чорыдлунсӧ: дэбыд, зэв, лэч, нэм, сэтӧр, тэ;
• в) ӧткымын заимствуйтӧм кывъясын гласнӧйяс бӧрын: поэт, поэма, поэзия, силуэт, аэропорт.

Став мукӧд согласнӧйяс бӧрын гижсьӧ е буква: дед, зелля, некор, сетны, кер, берд, ме, чери, дзескыд, общество.

7. ь гижсьӧ, мед петкӧдлыны д, з, л, н, с, т согласнӧйяслысь небыдлунсӧ:

• а) кыв помын: бедь, визь, сись, пель, нянь, бать;
• б) кыв шӧрын чорыд согласнӧйяс водзын: босьтны, разьны, пельса, садьмыны, паськӧм;
• в) кыв шӧрын ӧ да ы гласнӧйяс водзын: тьӧс, льӧм, ньӧв, сьӧм, ньылӧм, сьылӧм;
• г) кыв шӧрын кык разнӧй небыд согласнӧйяс костын: разьсьыны, кольча, визьнитны, мельнича, бадьсянь.

Примечаниеяс.

• 1. Кыв шӧрын кык ӧткодь небыд парнӧй согласнӧй костӧ мягкӧй знак (ь) оз гижсьы: мыссьыны, лыддьыны, быттьӧ, вевттьыны. Но ӧткымын кывйын мягкӧй знак (ь) вермӧ лоны кык небыд с согласнӧй костын, медым торйӧдны найӧс мӧд вежӧртаса кывйысь: пасьсянь ср. пассянь; косьсянь ср. коссянь.
• 2. Сть, ндз, нч сочетаниеяс костӧ мягкӧй знак (ь) оз гижсьы: мысти, вӧлисти, кындзи, тӧндзи, кринча, печенча.

8. Роч кывйын кӧ кыв помын небыд р бӧрын эм мягкӧй знак (ь), звукъяс боксянь вежсьытӧм заимствуйтӧм кывъясын мягкӧй знак (ь) гижсьӧ жӧ: секретарь, токарь, слесарь, пекарь, библиотекарь, лагерь, букварь, календарь, сентябрь, октябрь, ноябрь, но кывйывъяс да суффиксъяс водзын мягкӧй знак (ь) оз гижсьы: секретарыс, секретарӧ, секретарлы, секретаравны, лагерас, лагерын, лагерса, октябрын, ноябрын, -яс суффикс водзын мягкӧй знак (ь) гижсьӧ кыдз торйӧдан знак: секретарьяс, букварьяс, лагерьяс.

Примечаниеяс.

• 1. Звукъяс боксянь вежсьӧм важся заимствуйтӧм кывъясын р бӧрын мягкӧй знак (ь) оз гижсьы: пӧнар, звӧнар, пӧнӧмар, багатыр, манастыр, якӧр, сукар, сар, а сідзжӧ писар, пестер, лекар, лар, лодыр.
• 2. Заимствуйтӧм кывъясын кыв шӧрын небыд р пасйыссьӧ: моряк, зарядка, отряд, отряднӧй, Варя, Горький, октябрьскӧй, ноябрьскӧй, спрягайтны, прямоугольник, снаряд, порядкӧвӧй числительнӧй, но пӧдрад, пӧрадок, тэкӧд радын.

9. Заимствуйтӧм кывъясын, кодъяс помассьӧны сть вылӧ, ть звуклӧн небыдлуныс коми кывйын пыр пасйыссьӧ: область (областьын, областьсянь, областяс, областяд), промышленность, власть, вӧлӧсть, снасть.

10. Е, ё, ю, я букваяс гижсьӧны кыв заводитчигӧн, гласнӧйяс бӧрын да твёрдӧй да мягкӧй (ъ, ь) знакъяс бӧрын кык звук пасйӧм вылӧ: я — йа (яг, пиян, кӧсъя, кӧчьяс), ю — йу (юр, июль), е — йэ (ем, боец, маета, медъеджыд), ё — йо (ёль, медъён, Поёл, заём). Я буква вермӧ лоны й согласнӧй бӧрын: туйяс, войяс, сойяс, чойяс.

Тайӧ жӧ букваяс петкӧдлӧны д, з, л, н, с, т парнӧй согласнӧйяслысь небыдлунсӧ да а, о, у, э гласнӧйясӧс: дядь, нюр, нёль, тешкодь, лёк, сюмӧд.

Примечание. Заимствуйтӧм кывъясын, небыд б, в, м, п, р согласнӧйяс бӧрын, кыдзи и роч кывйын, гижсьӧны е, ю, ё, я букваяс: бюро, ковёр, знамя, пятилетка, Варя.

Ч да дз согласнӧйяс бӧрын гижсьӧны а, о, у гласнӧйяс, а оз я, ё, ю: чаг, чань, чарла, чом, чукӧр, чужӧм, дзав, дзор, кодзув, дзугны, дзоридз, дзодзӧг, кӧдза.

Примечание. Заимствуйтӧм кывъясын ч бӧрын гижсьӧ ё буква: отчёт, зачёт, учёт, счёт, учёнӧй, Чёрнӧй море, почёт, почётнӧй.

11. Торйӧдан знакъяс (ъ, ь) гижсьӧны:

• а) торйӧдан твёрдӧй знак (ъ) гижсьӧ чорыд согласнӧйяс бӧрын е, ё, ю, я букваяс водзын: козъя, исъя, тшӧтшъя, джаджъя, кӧсъя, ошъяс, медъёна, яръюгыд, медъеджыд;
• б) торйӧдан мягкӧй знак (ь) гижсьӧ небыд согласнӧйяс бӧрын я буква водзын: кӧчьяс, пиньяс, кыдзьяс, додьяс, дадьяс.

Примечаниеяс.

• 1. Роч кывъясын кӧ эмӧсь торйӧдан знакъяс (ъ, ь), коми кывйын найӧ гижсьӧны жӧ: объявление, съезд, адъютант, семья, скамья, объём, подъезд, объект, пьеса, карьер, ружье, ӧбезьяна, батальон, почтальон.
• 2. Й согласнӧй бӧрын я буква водзын торйӧдан ъ да ь знакъяс оз гижсьыны: туйяс, войяс, сойяс, чойяс.

12. Ф, х, ц, щ букваяс гижсьӧны заимствуйтӧм кывъясын: ферма, физика, флот, фотография, футбол; революция, социализм, станция, циркуль, лекция; химия, колхоз, совхоз, техникум; клещи, сдельщина, общество, ящик, пищаль, помещик, щит, Щербицкий, Щербаков, Щебенев, тьӧща, кладовщик, сплавщик, борщевик, проектировщик, овощи, барабанщик, прогульщик, сварщик, приёмщик, бомбардировщик, пӧщада, борщ, но тӧварыш.

Примечание. Звукъяс боксянь вежсьӧм важся заимствуйтӧм кывъясын ф, х, ц букваяс пыдди гижсьӧны п, к, ч букваяс: пӧнар, партук, шкап, кампет, картупель, сарапан; петук, укват, жӧник, плака, ӧклупень, кӧзяин, лӧкань, сакар, сукар, кӧть; купеч, мельнича, кузнеча, кузнеч, больнича, свинеч, ситеч, горнича, гӧбӧч, гӧснеч, дӧвеч, кӧсича, купальнича, клянича, чеп, пӧдӧнча, ножич, улича, чӧлкӧвӧй, кольча, молодеч.

Ӧткымын звукъяс шуӧм да гижӧм

13. Кыв помын да кыв шӧрын согласнӧй водзын шусьӧ да гижсьӧ в, а гласнӧйяс водзын л: ныв, нывлӧн, нылӧй; вӧв, вӧвным, вӧлӧн; сьыв, сьывны, сьылыштны.

Примечаниеяс.

• 1. Изобразительнӧй да заимствуйтӧм кывъясын вермӧны лоны согласнӧй водзын л да гласнӧй водзын в: колскыны, калскыны, равӧстны, нявӧстны, чулки, боевӧй, мелсӧ.
• 2. Прилагательнӧйлӧн -ов, -оват суффиксын гижсьӧ в согласнӧй: лӧзов — лӧзоват, гӧрдов — гӧрдоват.

14. Кыв заводитчигӧн и да е водзын шусьӧ да гижсьӧ г, а оз дь: гид, гижны, гез, но: дерт; к, а оз ть: ки, кер, кепысь.

Примечание. Тайӧ правилӧ улӧ оз пырны заимствуйтӧм да изобразительнӧй кывъяс: деньга, дивӧ, телега, телефон; теньгыны, тяпкӧдны, тювгыны, тивкъявны.

15. Кывдін помын шусьӧ да гижсьӧ дь, а оз йд: додь, бадь, садь, гадь, но: мойд, мойдны; йт, а оз ть: няйт, квайт, войт, шайт.

Примечание. Заимствуйтӧм кывъяс тайӧ правилӧ улӧ оз пырны: пӧлать, крӧвать.

16. Кывйын мӧд, коймӧд да бӧръяджык слогъясын шусьӧ да гижсьӧ ӧ, а оз э (е): воклӧн, пӧльӧ, батьӧ, пиньӧ, выльӧс, керӧс, пӧлӧн, пельӧс, майӧг, котӧрӧн, гӧгӧрвоӧдны, вайӧ, мунӧ, кайӧ.

Примечание. Сложнӧй да заимствуйтӧм кывъясын э (е) вермас лоны мӧд да бӧръяджык слогъясын: енэж, буретш, ягсер, вабергач, море, кудель, радейтӧм, поэт.

17. Кык слога кывъясын кывдін помын шусьӧ да гижсьӧ и (і), а оз ы: чери, шабді, шонді, ёді, шобді, йики; вӧсни, посни, кокни, мелі; сэні, тані, маті, сэті, таті, пыді, кӧні, кыті; бӧрти, серти, пыдди; зури-зари.

18. Кыввуж бӧрын гласнӧйяс водзын кӧ шусьӧны содтысян й, к, м, т согласнӧйяс, найӧ гижсьӧны: ошкӧс, пескыс, коскыс, мӧскыс, роскӧн; зонмыс, синмыс; зептысь, гӧптысь, шептысь; керйӧ, горйыс, чомйын, гезйӧн.

19. Кыввужйын кӧ эм й, сійӧ гижсьӧ: койис (кой-ны), вайис (вай-ны), кыйис (кый-ны).

Примечаниеяс.

• 1. Пӧим, куим, кӧин, туис, тоин кывъясын й оз гижсьы.
• 2. Кор кыввужйыс помассьӧ гласнӧйӧн да кывйылыс либӧ суффиксыс заводитчӧ гласнӧйсянь жӧ, сэк на костӧ й буква оз гижсьы: нуис (ну-ны), шуис (шу-ны), лоис (ло-ны), биа, киа.

Звукъяс аскодялігӧн кывъяс гижанног

20. Кор небыд согласнӧй аскодялӧ сы бӧрын сулалысь й согласнӧйӧс, сэк гижсьӧ кык ӧткодь небыд согласнӧй: беддя, доддя, колльӧдны, лыддьыны, мырддьыны, вевттьыны, лёддзӧн, соддзӧн.

Примечаниеяс.

• 1. Заимствуйтӧм общественно-политическӧй кывъяс да делӧвӧй гижӧдъясын паныдасьысь кывъяс гижсьӧны аскодявтӧг: правление, объявление, заседание, звание, соревнование, учреждение, занятие, предприятие, мероприятие, орудие, судья.
• 2. Звукъяс боксянь вежсьӧм заимствуйтӧм бытӧвӧй кывъяс гижсьӧны аскодялӧмӧн: зелля, каллян, ускӧттьӧ, пӧпуттьӧ, угоддьӧ, платтьӧ, печенньӧ, варенньӧ, жалованньӧ, рӧзӧренньӧ, вӧскресенньӧ.

21. Кор бӧрын сулалысь согласнӧй аскодялӧ водзын сулалысь согласнӧйӧс, сэк гижсьӧ сэтшӧм жӧ согласнӧй, коді должен лоны кыввужъяс либӧ кывдінас. Тайӧс позьӧ тӧдмавны кыввуж либӧ кывдінас гласнӧйӧн заводитчысь кывйывъяс либӧ суффиксъяс вайӧдӧмӧн, например: вӧтчыны (вӧтӧдны), сотчыны (сотӧ), вотчыны (вотӧс), кытчӧ (кыті), содтыны (содӧ), велӧдчыны (велӧдӧ), пӧрӧдчыны (пӧрӧдіс), кылӧдчыны (кылӧдіс).

Кыввуж либӧ кывдін вежӧртас сертиыс кӧ оз тӧдчы, кутшӧм согласнӧй должен лоны кыввужъяс либӧ кывдінас, сэк гижсьӧ кык ӧткодь согласнӧй: чеччыны, мыччыны, шойччыны, кольччыны, тувччыны, орччӧн, пӧрччысьны, мӧрччыны.

Примечание.

• 1. Заимствуйтӧм кывъяс гижсьӧны аскодявтӧг: кажитчыны, надейтчыны, бритчыны, рисуйтчыны, пилитчыны, докладчик, лётчик, разведчик, пулемётчик.
• 2. Кор роч кывъяс заводитчӧны сб, сд, сг букваясӧн сочетаниеяссянь, сэк заимствуйтӧм кывъяс гижсьӧны рочын моз жӧ: сберкасса, сберкнижка, сбор, сдача, сдельщина, сдельнӧй, сдайтны, сгӧдитчыны, сгинитны, сгущённӧй йӧв.

Существительнӧйяс гижанног

22. -ыд, -ыс, -ным, -ныд, -ныс морта суффиксъясын шусьӧ да гижсьӧ ы, а оз и: батьыд, батьыс, батьным, батьныд, батьныс.

23. Существительнӧйяслӧн босьтан (—лысь), сетан (-лы), ина (-ын, -аным, -аныд, -аныс), петан (-ысь, -сьым, -сьыд, -сьыс, -сьыным, -сьыныд, -сьыныс) кывйывъясын гижсьӧ ы, а оз и: школасьыным, школасьыныд, школасьыныс, керкааным, керкааныд, керкааныс.

24. Кывдінъяслӧн мӧд слогын чорыд согласнӧйяс бӧрын шусьӧ да гижсьӧ ы, а оз и: эшкын, вурыс, гӧгыль, кусынь, пелысь, тамыш, кӧртым, но ӧшинь, берин.

25. Кывдінъяслӧн мӧд слогын, им, ин, ис сочетаниеясын, небыд согласнӧйяс бӧрын шусьӧ да гижсьӧ и, а оз ы: нёкчим, козин, сунис.

26. Кывдінъяслӧн мӧд слогын, идз, ич, ик сочетаниеясын, шусьӧ да гижсьӧ и, а оз ы: пыридз, дзоридз, саридз, ӧмидз, пилич, калич, вирич, курич, лабич, лудік, сӧнік, кучик.

27. Овъяс, нимъяс да вичьяс официальнӧй (делӧвӧй) гижӧдъясын гижсьӧны рочын моз жӧ: Маяковский, Горький, Алексей, Дмитрий, Космодемьянская, Иван Грозный, Илья, Игорь, Дарья, Ильич, Парасковья, Лукерья, Агафья, Валерьян, Демьян, Лазарь, Любовь, Ульяна, Наталья, Татьяна.

Примечание. Художественнӧй произведениеясын нимъяс вермӧны гижсьыны сідз, кыдз шусьӧны коми сёрниын: Ӧльӧш, Ӧльӧксан, Ӧстап, Митрей, Пролӧ, Ладимер, Ӧсип, Ӧгаш, Ӧнись, Ӧпрӧсся, Анӧ, Парась, Ӧгрӧ.

28. Книгаяслӧн, газетъяслӧн, журналъяслӧн, совхозъяслӧн да с. в. нимъяс босьтсьӧны кавычкаяс пытшкӧ: «Алӧй лента» роман, «Югыд туй» газет, «Сыктывкарскӧй» совхоз, «Войвыв кодзув» журнал.

Примечание. Нима кыв дырйи предприятиеяслӧн, учреждениеяслӧн, совхозъяслӧн да с. в. нимъяс кавычка пытшкӧ оз босьтсьыны, например: В. И. Ленин нима Коми республиканскӧй библиотека.

29. Книга, газет, журнал, совхоз да мукӧд нимъяскӧд падеж кывйывъяс да морта суффиксъяс гижсьӧны ӧтлаын: «Правдаысь», «Войвыв кодзулын», «Югыд туйысь».

30. Заимствуйтӧм сложносокращённӧй кывъясын, кодъяс лыддьыссьӧны буква нимъяс серти, падеж кывйывъяс да суффиксъяс гижсьӧны чёрточка пыр: СССР-са, КПСС-лӧн, ЦК-ын, РСФСР-ын, Коми АССР-ын.

31. Заимствуйтӧм существительнӧйясын кӧ орччӧн сулалӧны кык ӧткодь согласнӧй, найӧ гижсьӧны кыкнанныс, например: класс, металл, вӧжжи, сессия, коммунизм, килограмм, грипп.

Примечание. Кор падеж кывйывъяс содтігӧн орччӧн лоӧ куим ӧткодь согласнӧй, сэк гижсьӧ кык ӧткодь согласнӧй, например: классянь, металлӧн.

32. Ин (-ін), лун, пи (пиян), тор, пу, шой, улов, ног, пом, кодь кывъяс кӧ мунӧны суффиксъяс пыдди, гижсьӧны ӧтлаын: косін, васӧдін, ворсанін, оланін; бурлун, ёнлун, кыпыдлун, сюсьлун, коланлун, кужанлун, гажлун, мичлун, томлун; кӧчпи, сирпи; буртор, лёктор, унатор, ватор, йӧвтор; моньпу, зятьпу, дӧрӧмпу; пасьшой, дӧрӧмпу; зонулов, томулов; керпом (чурбан), гезпом (обрывок веревки); оланног, оласног, гижанног, артманног; грездкодьнас, семьякодьнас.

33. Ув, дор, выв, сай, берд, дін, йыв, пом, весьт, шӧр, кост, бок, водз, пытш (пытшк-) кывъяс, кор найӧ сулалӧны существительнӧйяс бӧрын, гижсьӧны торйӧн *: пызан ув, пызан дор, пызан выв, керка дор, пывсян сай, вӧр берд, пу дін, пу йыв, чунь пом, пу кост, керка водз, туй бок, вой бок, ю шӧр, джодж шӧр, юр весьт, керка пытшкӧс, ю сай видзьяс, вӧр дор муяс, лыа выв керъяс, яг выв рыжик, град выв пуктас, ӧшинь ув йӧр, туй выв морт, горт дор удж.

* Лыддьӧдлӧм кывъясыс нимтан да керан падежъясын лоӧны существительнӧйясӧн, мукӧд падежъясын — кывбӧръясӧн.

Примечаниеяс.

• 1. Войвыв, рытыввыв, асыввыв, лунвыв, подув, мортув, пудовняув, додюв (видз), кобув, рӧдпом, кипом (удж), казьтыланпом, вадор кыдзи сложнӧй кывъяс гижсьӧны ӧтлаын.
• 2. Сикт нимъясын ув, дор, выв, дін, пом, йыв кывъяс гижсьӧны ӧтлаын: Емдін, Помӧсдін, Кырув, Кӧдзвыв, Вичкодор, Шыладор, Проньдор, Межадор, Сордйыв, Катыдпом, Кывтыдпом.

34. Существительнӧйяс кывбӧръяскӧд гижсьӧны торйӧн: пызан вылын, вӧр дорын, туй кузя, кыр йывсянь, ӧшинь пыр, ты дорын, юр весьтын, керка джуджда, ош кодь, ош моз, дум вылӧ, нянь сорӧн, бӧрдӧм сорӧн, корӧм сорӧн, морӧс выйӧн, пидзӧс выйӧдз, Иван ног, праздник дырйи.

Существительнӧй вежӧртаса прилагательнӧйяс бӧрын кывбӧръяс гижсьӧны торйӧн жӧ: бур вылӧ, бур водзӧ, бур кузя, бур туйӧ, лёк водзӧ, лёк туйӧ, лёк кузя, лёк вылӧ, важ моз, важ бӧрын, важ вӧсна, важ вылӧ, важ дорысь, важ дырйи, важ серти, выль дырйи, выль вылӧ, ӧнія моз, ӧнія кодь, тӧрытъя моз, тӧрытъя пыдди, тӧндзия моз, тӧрытъя кодь, кӧдзыд дырйи, карса моз, карса кодь.

35. Джын, джынъя, джынйӧн кывъяс существительнӧйясысь гижсьӧны торйӧн: ведра джын, ведра джынъя, ведра джынйӧн, ар джынъя.

Кор джынйӧн кыв сулалӧ -ӧн кывйыла существительнӧй бӧрын, сэк сійӧ гижсьӧ черточка пыр: ведраӧн-джынйӧн, арӧн-джынйӧн, литрӧн-джынйӧн, метрӧн-джынйӧн.

36. Петан да пыран падежъясын орччӧн сулалысь существительнӧйяс гижсьӧны торйӧн: пуысь пуӧ, майӧгысь майӧгӧ, арысь арӧ, кадысь кадӧ, садйысь садйӧ, воысь воӧ, лунысь лунӧ.

37. Существительнӧйяс лоӧны сложнӧйясӧн:

• а) кор ӧти либӧ кыкнан юкӧныс гӧгӧрвотӧмӧсь да торйӧнсӧ сёрниын оз нин шусьывны: дозмук, понпир, понпуш, зарава, нырбук, синкым, вотшлы, малямуш, калябеч, кикар, тшайпод, кӧнтар, киняув, сэрапом, кодзувкот, кӧнтусь, пивер, корадодь, сунлабич, ордлы, кӧндозмӧр, палюр;
• б) кор кыкнан юкӧныс кутӧны переноснӧй вежӧртас да артмӧдӧны выль кыв: шырби, кӧктоин (быдмӧг ним), кӧчвӧнь (быдмӧг ним), сьӧлаоз (вотӧс ним), балябӧж (юр мыш), турипув (вотӧс ним), ошчӧд (вотӧс ним), кӧкакань (быдмӧг ним), пончӧд (вотӧс ним), ужпинь (сю шептын сьӧд тусьяс), зӧртусь (кучикын чорыд йӧнгыль), ыжнёнь (быдмӧг ним), урбӧж (быдмӧг ним), войтӧв (войтӧв кокӧс кыскис), нырагез, кӧчйӧла (тшак ним), кыввуж, кывдін, кывйыв (грамматикаын торъя кыв юкӧнлӧн нимъяс), нырвизь.

Вермас юкӧн нимӧн шусьыны предметыс ставнас: сьӧдбӧж (зверь ним), вирсин (чери ним), шомкор (быдмӧг ним), гӧрдъюр, лапкор (быдмӧг нимъяс).

Примечание. Кыв сочетаниеяс, кӧні ӧти юкӧныс (частӧджык мӧдыс) кутӧ переноснӧй вежӧртас, гижсьӧны торйӧн: турун юр, керка юр, гӧр юр, куран юр, сапӧг юр, чӧрс юр, шабді юр, ді юр, булавка юр, пыж бӧж, додь бӧж, чер бӧж, син бӧж, ид бӧж, ді бӧж, лыа бӧж, моль бӧж, карті син, ботан син, тыв син, картупель син, пыж ныр, чер ныр, картупель ныр, ид ныр, зорӧд пинь, куран пинь, чарла пинь, гу вом, пищаль вом, жыннян кыв, ключ тош, чер тош, чайник сюр, ки пыдӧс, кок пыдӧс, юр пыдӧс, шыд пыдӧс, рок пыдӧс, зорӧд пыдӧс, тӧлысь пыдӧс, гыж туй, чунь туй, писти туй, вурыс туй, сос туй, рана туй, лук гум, кок гум, сой гум, зэр тусь, гормӧг пуртӧс, пошта куд, син гуран, син акань, чери борд, шаньга ку, пызан йӧр, турун чир, дӧрӧм тув, ва нидзув, ва пытш, ва шыр, вӧр кань, ва тар, ныр чужва, юр бурлак, юр пинь, биа из.

• в) кор ӧти либӧ кыкнан юкӧныс воштӧмаӧсь асшӧр либӧ переноснӧй вежӧртассӧ: чуньлыс, лысва, бипур, тывкӧрт, мусин (почва), мусюр, уджйӧз, серпас, понтшак, арлыд, синчӧж, рӧдвуж, синва, чужва, дышпоз, сойборд, нырборд, морӧспань, аньбаба, мырпом (вотӧс ним), пельпом, катшасин (быдмӧг ним), пидзӧсчань, сикӧтш, водзир, морттуй, номдӧра, пызандӧра.

38. Парнӧй существительнӧйяс гижсьӧны черточка пыр:

• а) кор кык кыв ӧткодь либӧ матын вежӧртасаӧсь: вын-эбӧс, чужӧм-рожа, олӧм-вылӧм;
• б) кор кык кыв паныд вежӧртасаӧсь: лун-вой, рыт-асыв, пырӧм-петӧм, пырысь-петысь, мунӧм-локтӧм;
• в) кор -а суффиксъяса кык кыв петкӧдлӧны ӧтвыв босьтӧм кык предмет: чоя-вока, ая-пиа, эня-ныла, ныла-зонма;
• г) кор кык кыв сетӧны собирательнӧй (ӧтувтан) либӧ паськыдджык вежӧртас: чой-вок, ныв-зон, ай-мам, ки-кок, сёян-юан, нянь-сов, дӧрӧм-гач, керка-карта, ныр-вом, ты-мус, видз-му, пуля-порок, ус-тош, вӧр-ва, вир-яй, чай-сакар, тасьті-пань.

39. Асыв-войвыв, асыв-лунвыв, рытыв-войвыв, рытыв-лунвыв существительнӧйяс гижсьӧны черточка пыр.

Прилагательнӧй гижанног

40. Прилагательнӧйлӧн -ӧсь кывйылын да суффиксын гижсьӧ ӧ: бурӧсь, мичаӧсь, пызьӧсь, няйтӧсь, ёнӧсь.

41. Прилагательнӧйлӧн -ыд суффиксын гижсьӧ ы: кокньыд, векньыд, посньыд, лӧсьыд.

42. -ик, -ник, -иник (-іник), -ндзи, -индзи (-індзи) суффиксъясын гижсьӧ и, а оз ы: мичаник, дзоляник, томиник, косіник, ичӧтик, омӧлик, небыдик, кокньыдик, дзоляндзи, косіндзи.

43. Прилагательнӧйлӧн сравнительнӧй степень артмӧдысь суффиксын гижсьӧ —джык, а оз —жык: мичаджык, гырысьджык.

44. Заимствуйтӧм прилагательнӧйясын гижсьӧны -ӧй, -овӧй да -евӧй: великӧй, сӧветскӧй, средньӧй, трудӧвӧй, классӧвӧй, передӧвӧй; боевӧй, строевӧй.

45. Неыджыд степень петкӧдлысь кодь суффикс прилагательнӧйяскӧд гижсьӧ ӧтлаын: мичакодь, гажакодь, лӧсьыдкодь, ёнкодь, кӧдзыдкодь, руакодь, тӧлакодь, выякодь, госакодь, сиракодь, турунакодь, вутшкӧськодь.

Примечание. Существительнӧй пыдди мунысь прилагательнӧйяскӧд кодь кыв лоӧ сравнительнӧй кывбӧрӧн да гижсьӧ торйӧн: тӧрытъя кодь (ср. тӧрытъя лун кодь), карса кодь (ср. карса морт кодь), коркӧя кодь (ср. коркӧя олӧм кодь).

46. Мед кыв, коді петкӧдлӧ превосходнӧй степень, прилагательнӧйяскӧд гижсьӧ ӧтлаын, абу кӧ торйӧдӧма частицаӧн (мед на шань), а медся кыв — торйӧн: медбур, медмича, медъён, медыджыд; медся бур, медся муса, медся ыджыд.

47. Зэв, сап, вель, дзурс, чим, вывті да с. в. степень петкӧдлысь наречиеяс прилагательнӧйяскӧд гижсьӧны торйӧн: зэв ыджыд, вывті мича, сап пемыд, вель ыджыд, дзурс пемыд, чим гӧрд, чим сьӧд.

48. Прилагательнӧйяс, кодъяс петкӧдлӧны рӧм либӧ рӧмлысь оттенокъяс, гижсьӧны ӧтлаын: алӧйгӧрд, пемыдгӧрд, кельыдвиж, пемыдлӧз, югыдгӧрд, яръюгыд, еджговлӧз, турунвиж, кольквиж.

Примечание. Существительнӧйяс, кодъяс сулалӧны прилагательнӧйяс водзын да ёнджыка тӧдчӧдӧны признаксӧ, гижсьӧны торйӧн: би гӧрд кыа, вир пасьтӧм, лым еджыд дӧрӧм, вир йӧй, са сьӧд.

49. Прилагательнӧйяс, кодъяс артмӧмаӧсь аслыс местоимениеысь сяма, ныра, нога, сикас, руа, пӧлӧс кывъясӧн, а сідзжӧ ас местоимениеысь ныра, руа кывъясӧн, гижсьӧны ӧтлаын: аслыссяма, аслысныра, аслыснога, аслыссикас, аслыспӧлӧс, аслысруа, асныра, асруа.

50. Прилагательнӧйяс, кодъяс артмӧмаӧсь существительнӧйысь суффикс пыдди мунысь вывса, увса, бердса, дорса, дінса, весьтса, бокса, йывса, водзса, костса, помса, пӧлӧнса, сайса, бӧрса, шӧрса, гӧгӧрса, пытшса, пытшкӧсса, чӧжся, дырся, водзвывса, бӧрвывса кывъясӧн, гижсьӧны ӧтлаын: мувывса, вӧрбердса, вӧршӧрса, гожводзса, гӧрабокса, гӧраувса, йӧзкостса, карвесьтса, кырйывса, тӧвсайса, челядьдырся, берегпӧлӧнса, вочӧжся, праздникводзвывса, съездбӧрвывса.

Примечание. Собственнӧй нимъяскӧд, личнӧй да ас местоимениеяскӧд бердса, дорса, бокса да с. в. кывъяс гижсьӧны торйӧн: Сыктывкар бердса, Эжва дорса, Иван дінса, ас гӧгӧрса, миян дорса, ме бердса, сы дінса, ас костса.

51. Прилагательнӧйяс, кодъяс артмӧмаӧсь существительнӧйысь либӧ прилагательнӧйысь жӧ суффикс пыдди мунысь -вевъя кывйӧн, гижсьӧны ӧтлаын: зӧрвевъя, идвевъя, козвевъя, гӧрдвевъя, лӧзвевъя.

52. Ыджыд степень петкӧдлігӧн кыкысь шуӧм прилагательнӧйяс гижсьӧны черточка пыр: ыджыд-ыджыд, мича-мича, посни-посни, ёнысь-ён, бурысь-бур, гырысьысь-гырысь, выльысь-выль.

53. Парнӧй прилагательнӧйяс гижсьӧны черточка пыр, кор найӧ петкӧдлӧны:

• а) ӧтвыв босьтӧм кык признак: лӧза-гӧрда, сьӧда-еджыда, чера-пищаля, уска-тошка, киа-кока, китӧм-коктӧм, лӧддза-номъя;
• б) ӧткодь либӧ матын вежӧртаса признакъяс: помтӧм-дортӧм, гуранӧсь-гӧптӧсь, сюрӧсь-пельӧсь, лыдтӧм-тшӧттӧм;
• в) собирательнӧй да паськыдджык вежӧртаса признакъяс: выль дӧрӧм-гача, вир-яя, ён ки-кока, мича ныр-вома.

Числительнӧйяс гижанног

54. Числительнӧйяс, кодъяс петкӧдлӧны тыр дасъяс да сёяс, гижсьӧны ӧтлаын: сизимдас, кӧкъямысдас, ӧкмысдас, кыксё, куимсё, нёльсё, витсё, квайтсё, сизимсё, кӧкъямыссё, ӧкмыссё, а став мукӧд числительнӧйяс гижсьӧны торйӧн: дас ӧти, дас вит, кызь сизим, ӧкмысдас вит, кыксё дас, ветымын вит да с. в.

55. Приблизительнӧй лыд петкӧдлігӧн количественнӧй числительнӧй сы водзын сулалысь существительнӧйысь гижсьӧ торйӧн: лун кык, керка дас, во куим, ар ветымын кымын, недель кык, а порядкӧвӧй числительнӧй — черточка пыр: лун-мӧд, морт-мӧд, час-мӧд-коймӧд, кыв-мӧд-коймӧд.

56. Порядкӧвӧй числительнӧйяслӧн -ӧд суффикс цифраяскӧд гижсьӧ черточка пыр: 5-ӧд, 30-ӧд, 1974-ӧд.

57. Приблизительнӧй лыд петкӧдлігӧн орччӧн сулалысь кык количественнӧй числительнӧй гижсьӧны черточка пыр: кык-куим лун, нёль-вит морт.

Примечание. Орччӧн сулалысь кык количественнӧй числительнӧй костын эм кӧ ӧ частица, сэк черточкаыс лоӧ ӧ частица водзас и бӧрас: вит-ӧ-квайт керка, нёль-ӧ-вит морт.

58. -ным, -ныд, -ныс морта суффиксъяса собирательнӧй числительнӧйясын гижсьӧ кык н: кыкнанным, кыкнанныд, кыкнанныс.

59. Числительнӧйяс кывбӧръяскӧд гижсьӧны торйӧн: кык дінӧ, сё гӧгӧр, вит вылӧ, дас сайӧ, вит кымын, дас пӧв, кык кымын пӧв, кык пӧрйӧ, кык кымын пӧрйӧ, нёль пельӧ, дас ногӧн, кык мында, куим пӧвста, кыкысь кымын.

Местоимение гижанног

60. Неопределённӧй местоимениеяс артмӧдысь кӧ, сюрӧ суффикс пыдди мунысь частицаяс да не- приставка гижсьӧны ӧтлаын: кодкӧ, кодъяскӧ, кутшӧмкӧ, мыйкӧ, мыйӧнкӧ, мыйлакӧ, кымынкӧ; мыйсюрӧ, кодсюрӧ, кодсюрӧлы, кутшӧмсюрӧ; некымын, некымынӧн.

Примечание. Кӧ частица гижсьӧ торйӧн, кор местоимение да частица костас эм кывбӧр: код вылӧ кӧ, мый йылысь кӧ, код вӧсна кӧ.

61. Отрицательнӧй местоимение артмӧдысь не- приставка гижсьӧ ӧтлаын: некод, некодлы, некодсянь, некоднанным, некутшӧм.

62. Обобщительнӧй да указательнӧй местоимениеяскӧд суффикс пыдди мунысь тор кыв гижсьӧ ӧтлаын: быдтор, ставторсӧ, мукӧдтор, сэтшӧмтор, татшӧмтор, этатшӧмтор.

63. Указательнӧй местоимениеяскӧд суффикс пыдди мунысь -ин (-ін) кыв гижсьӧ ӧтлаын: татшӧмин, сэтшӧмин, этатшӧмин.

64. Взаимно-личнӧй местоимениеяс гижсьӧны черточка пыр: ӧта-мӧдӧс, ӧта-мӧднымӧс, мӧда-мӧднымӧс.

65. Сійӧ, найӧ, эсійӧ, тайӧ, этайӧ личнӧй да указательнӧй местоимениеясын гижсьӧ ӧ, а оз е либӧ я.

66. Местоимениеяс кывбӧръяскӧд гижсьӧны торйӧн: ме дінӧ, тэ дорын, сы вӧсна, ас йылысь, ас ногӧн, тэ ног, мукӧд ногӧн, кымын ногӧн, сэтшӧм ногӧн, кутшӧм ногӧн, на кодь, эта ыджда, кодкӧ вӧсна, став понда, кымын пӧв, кымынкӧ пӧрйӧ, миян дінын, тіян дорысь, некымын пӧвстӧн, ме бердса, миян дінса, миян весьтса, ас гӧгӧрса.

67. Прилагательнӧйӧс вежысь местоимениеяскӧд суффикс пыдди мунысь кодь кыв гижсьӧ ӧтлаын: кутшӧмкодь, татшӧмкодь, сэтшӧмкодь, этатшӧмкодь, эсытшӧмкодь.

Глаголъяс гижанног

68. Первой колян када глаголъяслӧн морта кывйывъясын гижсьӧ и (-і), а оз ы: муні, мунін, муніс, мунім; лыдди, лыддин, лыддис, лыддим.

69. Глаголъяслӧн кывйывъясын да суффиксъясын гижсьӧ ы:

а) неопределённӧй формаа глаголъяслӧн суффиксын: мунны, мыссьыны, велӧдчыны, вайны;

б) ӧнія, локтан да колян када, мӧд да коймӧд морта, уна лыда кывйывъясын: гижанныд, гижӧны, гижасны, гижинныд, гижисны, гижӧмныд;

в) мӧд колян када, мӧд морта, ӧтка лыда кывйывъясын: гижӧмыд, мунӧмыд;

г) ӧтка лыда отрицательнӧй глаголъяс помӧ орчча согласнӧйяс бӧрын: ог лыддьы, он лэччы, оз пуксьы, эг колльы;

д) ӧнія, локтан да колян када отрицательнӧй глаголъяслӧн коймӧд морта, уна лыда кывйывъясын: оз гижны, эз гижны;

е) мӧд колян када, мӧд морта, ӧтка лыда отрицательнӧй глаголъяслӧн кывйывъясын: абу гижӧмыд, абу локтӧмыд;

ё) мӧд морта, ӧтка лыда повелительнӧй наклонениеа глаголъяс помӧ орчча согласнӧйяс бӧрын: пуксьы, мыссьы, чеччы, лыддьы;

ж) -ышт-, -лывл-, -ывл- суффиксъясын: гижыштны, сёйлывлыны, пуктывлыны.

70. Мӧд морта, уна лыда глаголъясын гижсьӧ -нн-: велӧдчанныд, гижанныд, мунінныд.

71. Первой колян када отрицательнӧй вспомогательнӧй глаголъясын гижсьӧ э, а оз и: эг гиж, эг мун, эз куж.

72. Возвратнӧй глаголъясын д, т бӧрын гижсьӧ ч, а оз сь: велӧдчӧ, пӧрӧдчӧ, купайтчӧ, стрӧитчӧ, славитчӧ, а страдательнӧй вежӧртаса возвратнӧй глаголъясын д, т, дз да ч бӧрын гижсьӧ сь: выль магистральяс нуӧдсьӧны, школа стрӧитсьӧ, сӧптыс шыбитсьӧ, лымйыс зыртсьӧ, картупель босьтсьӧ, косаыс тӧчитсьӧ, сю кӧдзсьӧ, уджыс вӧчсьӧ, списокъяс лӧсьӧдсьӧны.

73. Глаголъяс, кодъяс артмӧмаӧсь изобразительнӧй кывъясысь мунны, видзны, вартны, кывны, керны, сидзны, вӧчны суффиксъяс пыдди мунысь глаголъяс отсӧгӧн, гижсьӧны ӧтлаын: зильмунны, шковмунны, колсмунны; сярвидзны, жуйвидзны; пасьвартны, чашвартны; кышакывны, клёнакывны; шлочкерны; тіньсидзны, черӧбсидзны; пурк-парквӧчны, рус-расвӧчны, пусь-пасьвӧчны.

74. Именнӧй кыв сочетаниеясысь да кывбӧра сочетаниеясысь артмӧм глаголъяс гижсьӧны ӧтлаын, кор бӧръя кывныс суффиксъяс отсӧгӧн пӧрӧ глаголӧ да воддза кывйыс бӧръяыскӧд оз кут йитчыны вежӧртас сертиыс: чер тыш — чертышкавны, пинь туй — пиньтуявны, кок туй — коктуявны, кок чунь — кокчунясьны, лун тӧв — лунтӧвтны, вой тӧв — войтӧвтны, син бӧж — синбӧжавны, лэч туй — лэчтуясьны, кык мында — кыкмындаавны, кык пӧвста — кыкпӧвставны, кык ног — кыкногасьны.

Глаголыс гижсьӧ торйӧн, воддза кывйыскӧд кӧ вежӧртас серти йитчӧмыс кольӧ: кучик сапӧгасьны, кӧч ку шапкаасьны, галифе гачасьны, выль шоныд дӧрӧмасьны.

75. Суффикс пыдди мунысь кодь кыв глаголъяскӧд, причастиеяскӧд да деепричастиеяскӧд гижсьӧ ӧтлаын: вешйыштіскодь, муныштіскодь, вӧрзьыштіскодь, гӧрдӧдӧмкодь, повзьӧмакодь, тэрмасьӧмакодь, измӧмакодь, повзьӧданакодь, дӧзмӧмӧнкодь, повзьӧмӧнкодь.

76. Мед частица глаголъяскӧд гижсьӧ торйӧн: Мед дзирдалас шонді! Мед олас миян Рӧдина!

77. Глаголъяс гижсьӧны черточка пыр:

а) кор найӧ паныд вежӧртасаӧсь: кывтны-катны, пырны-петны, мунны-локны;

б) кор найӧ петкӧдлӧны матысса действиеяс: пуны-пӧжавны, сёйны-юны, гӧрны-кӧдзны, кӧмасьны-пасьтасьны;

в) кор найӧ ӧткодь либӧ матын вежӧртасаӧсь: керны-вӧчны, овны-вывны, содны-быдмыны:

г) кор найӧ ӧтпомся шусьӧны кык пӧв: котӧртіс-котӧртіс дай уси; мунӧ-мунӧ, а туй абу (пыж).

78. Изобразительнӧй глаголъяс прӧстӧй глаголъяскӧд, кор найӧ петкӧдлӧны ӧти действие да глаголъясыс ӧткодь кывйылаӧсь, гижсьӧны черточка пыр: жбыръявны-лэбавны, камгыны-дорны, тёпкыны-виявны, гигзьыны-серавны, варгыны-пуны, шливгыны-зэрны, дзольгыны-визувтны, шуньгыны-мунны, зёльмунны-жугавны, пасьвартны-жугӧдны, куткырвидзны-пукавны, жбыракылісны-лэбалісны, грымакыліс-муніс.

Примечание. Кылӧ кывйӧн артмӧм изобразительнӧй глаголъяс гижсьӧны ӧтлаӧ, а найӧ прӧстӧй глаголъяскӧд гижсьӧны торйӧн: грымкылӧ уси, швачкылӧ поті, жбыркылӧ лэбзис, шковкылӧ лыйис, буз-базкылӧ пуджисны.

79. Изобразительнӧй глаголлӧн парнӧй кывдінъяс гижсьӧны черточка пыр: тринь-троньмуні, гыма-гамакылӧ, пусь-пасьмуні, швуч-швачкерис.

80. Глагольнӧй фразеологизмӧ пырысь кывъяс гижсьӧны торйӧн: син вежны, юр сиравны, сьӧлӧм сетны, кыв кӧртавны, чунь пыр видзӧдны, сьӧлӧм вылӧ воны, пель сьӧдмӧдны, стенӧ кайны, ӧшкамӧшка петкӧдлыны, кыв вуджны, тӧв чужъявны, кыв сетны, кыв песны, кыв кутны, син пӧртны.

81. Причастие артмӧдысь -ысь суффиксын шусьӧ да гижсьӧ ы, а оз и (і): мунысь морт, йирсьысь вӧв, бӧрдысь кага, лыддьысьысь детинка.

82. Мед кыв, коді петкӧдлӧ превосходнӧй степень, причастиеяскӧд гижсьӧ ӧтлаын, а медся кыв — торйӧн: медколана, медтыдалана, медбӧрдысь; медся нималана.

83. Причастие бӧрын сулалысь выйын, выйӧдз, выйӧ кывъяс гижсьӧны торйӧн: кулан выйын, быран выйын, усян выйын, жугалан выйын, эштан выйын, лӧсталана выйӧдз, бӧрддзан выйӧдз, тӧдтӧм выйӧдз, тыдалан выйын, позьтӧм выйӧдз, лыян выйӧ.

84. Деепричастие артмӧдысь -иг (-іг), -игӧн (-ігӧн) суффиксын шусьӧ да гижсьӧ и, а оз ы: мунігӧн, велӧдчигӧн, ворсігӧн.

85. -иг суффикса деепричастиеяс суффикс пыдди мунысь тыр, тырйи, моз, чӧж, кості, кежлӧ, сор кывъяскӧд гижсьӧны ӧтлаын: сьылігтырйи, мунігмоз, сёйигчӧж, сёйигкості, водігкежлӧ, синва чышкигсор.

86. -мӧн суффикса деепричастие бӧрын выйын, выйӧдз, выйӧ, мында кывбӧръяс гижсьӧны торйӧн: тыдавмӧн выйын, лыймӧн выйӧ, усьмӧн выйӧдз, шыбитмӧн выйӧдз, сёймӧн мында.

Наречиеяс гижанног

87. Наречиеяс гижсьӧны ӧтлаын, кор артмӧмаӧсь:

а) существительнӧйысь суффикс пыдди мунысь быд, йыв, выв кывъясӧн: войбыд, тӧвбыд, арбыд, рытывбыд, асывбыд, дзирйыв, бӧрвыв, водзвыв, боквыв, бӧжвыв, кивыв, помвыв, дорышвыв, мышвыв.

Примечание. Йыв да выв суффиксъяс пыдди мунысь кывъяс оз ков сорлавны кывбӧръяскӧд да фразеологическӧй сочетаниеясӧ пырысь выв, йыв кывъяскӧд, кодъяс гижсьӧны торйӧн: усьны боквыв — бок вылын куйлыны, мышвыв чеччыштны — мыш выяӧ лэптыны, дзирйыв восьтыны — дзир йылӧ лӧсьӧдны; уджйӧз выв вӧйны, лад выв пуксьыны, серам выв лэптыны, зык выв пырны, пинь выв пырны, лёк дӧра выв усьны, арлыд выв воны, ум выв пуксьыны, кок йыв лэптыны, борд йыв кыпавны.

б) прилагательнӧйысь суффикс пыдди мунысь выв (вылыс, вывнас, вывсьыс), дор (дорыс, дорнас, дорӧдз), йылысь (йывсьыс) кывъясӧн: аръявыв, аръявылыс, аръявывнас, бӧръявылыс, бӧръявывнас, рытъявыв, рытъявылыс, тулысъявывнас, веськыдвыв, шуйгавыв; выльвывсьыс, свежӧйвывсьыс, пӧсьвывсьыс, ловъявывсьыс, кынвывсьыс, ичӧтвывсяньыс; асъядор, рытъядорнас, асъядорӧдз; тшыгйывсьыс, пӧсьйывсьыс, скӧрйывсьыс;

в) причастиеысь суффикс пыдди мунысь дор (дорыс, дорнас, дорӧдз), вылысь (вывсьыс), йылысь (йывсьыс) кывъясӧн: пемдандорыс, югдандорыс, чеччандор, водандор; скӧрмӧмвылысь, скӧрмӧмвывсьыс, повзьӧмйывсьыс, мудзӧмйывсьыс;

г) прилагательнӧйысь, причастиеысь да наречиеысь суффикс пыдди мунысь пырысь кывйӧн: лёкпырысь, кокньыдпырысь, сьӧкыдпырысь, збойпырысь, гажапырысь; чуймӧмпырысь, полӧмпырысь, эскытӧмпырысь, кулитанапырысь, ошканапырысь; дышапырысь, сьӧкыдапырысь, кӧдзыдапырысь, долыдапырысь, нимкодьпырысь, веськодьпырысь, окотапырысь, жальпырысь, радпырысь;

д) кык либӧ некымын кывйысь: талун, гӧгӧрбок, рытсёр, войдӧрлун, лунтыр, матігӧгӧр, кыккирудз, рытгорув, вомгорулын, весьшӧрӧ, тырвыйӧ, джынвыйӧ, шӧрвыйӧ, кызмырдӧн, ӧтвыв, ӧтмоз, ӧттшӧтш, ӧтвылысь, ӧтсор, ӧтмында.

88. Неопределённӧй наречиеяс артмӧдысь кӧ, сюрӧ суффикс пыдди мунысь частицаяс да отрицательнӧй наречие артмӧдысь не- приставка гижсьӧны ӧтлаын: кӧнкӧ, кыськӧ, кысянькӧ, коркӧ, кытчӧкӧ, кыдзкӧ, кутшӧмакӧ, мыйтакӧ, мыйтӧмкӧ; корсюрӧ, кытчӧсюрӧ, кӧнсюрӧ, кыдзсюрӧ; некор, некыдз, некӧн, некытчӧ, некытысь.

89. Степень петкӧдлысь кодь кыв наречиеяскӧд гижсьӧ ӧтлаын: ӧдйӧкодь, матынкодь, ылынкодь, ёнакодь, буракодь, дышакодь.

90. Мед кыв, коді петкӧдлӧ превосходнӧй степень, наречиеяскӧд гижсьӧ ӧтлаын: медъёна, медлӧсьыда, медылӧ, медвылӧ, медбура, медматын, а медся кыв — торйӧн: медся бура, медся ёна, медся чӧскыда.

91. Гласнӧй звукъяс вежсьӧмӧн мӧд пӧв шусян изобразительнӧй наречиеяс гижсьӧны черточка пыр: зиль-зёль, тур-тар, шкув-шков, туп-тап, чуж-чаж, гульс-гольс.

92. Изобразительнӧй наречиеяс глаголъяскӧд гижсьӧны торйӧн: грым уси, жбыр лэбзис, шков лыйис, звирк чеччыштіс.

93. Степень петкӧдлысь зэв, вель, вывті да с. в. наречиеяс мукӧд наречиеяскӧд гижсьӧны торйӧн: зэв лӧсьыда, вывті уна, вывті гырыся, вель ылын.

94. Кор кык орчча наречие паныд, матын либӧ ӧткодь вежӧртасаӧсь, кык пӧв шуӧм наречиеяс, а сідзжӧ наречиеяс пыдди мунысь парнӧй кывъяс гижсьӧны черточка пыр: ӧтарӧ-мӧдарӧ, бӧрӧ-водзӧ, улӧ-вылӧ, лючки-ладнӧ, кыдзкӧ-мыйкӧ, сідз-тадз, сьӧрсьӧн-бӧрсьӧн, вылӧ-вылӧ, ылын-ылын, ӧдва-ӧдва, ӧдйӧ-ӧдйӧ, параӧн-параӧн, чукӧрӧн-чукӧрӧн, стаяӧн-стаяӧн, радӧн-радӧн, пырысь-пыр, коркӧ-коркӧ, коркӧ-некоркӧ, лун-лун, рыт-рыт, вой-вой, лунысь-лун, воысь-во.

95. Наречиеяс кывбӧръяскӧд гижсьӧны торйӧн: сэк кості, дыр бӧрын, регыд кежлӧ, недыр мысти, мырдӧн моз, сэн дорысь, дыр кежлӧ пыдди, сэн моз, тані моз, подӧн сорӧн, мырдӧн сорӧн, гусьӧн сорӧн, гусьӧн моз, пӧперег ног, вомӧн ног.

Кывбӧръяс гижанног

96. Кывбӧръяс существительнӧйяскӧд, местоимениеяскӧд, числительнӧйяскӧд, деепричастиеяскӧд да наречиеяскӧд гижсьӧны торйӧн: ӧшинь дорын, йӧр сайын, туй помын, бать туйӧ, ош кодь, во чӧж, Сыктывкар бердса, на дінса, ме сайса, ас кежысь, тэ ног, ме ногӧн, кык дінӧ, кык пельӧ, кык пӧрйӧ, кык кымын, тэрмасьӧмӧн моз, корӧмӧн сорӧн, регыд кежлӧ, водзӧ кежлӧ, пумӧн мында, недыр мысти.

Примечаниеяс.

• 1. Водзвылын, бӧрвылын сложнӧй кывбӧръяс гижсьӧны ӧтлаын: ме водзвылын, сы бӧрвылын, на бӧрвывса, съезд водзвылын, съезд бӧрвылын.
• 2. -ла суффикса кыв бӧрын сулалысь дор кывбӧр гижсьӧ ӧтлаын: гортладорас, вӧрладорсяньыс, войвывладорас, пӧрысьладорыс, куланладорыс, кыкнанладорсяньыс, меладорса, миянладорын, сыладорын, таладорас, асланымладорын, шуйгаладорас, веськыдладорас, гугладорас, рытладорыс.

Союзъяс гижанног

97. Составнӧй союзъяс гижсьӧны торйӧн: сы вӧсна мый, сы понда мый, кӧть и, не сӧмын… но и, не то… не то.

А союзнӧй частица гижсьӧ черточка пыр: Ог тӧд, зэрас оз, кымӧртчис тай-а. Гымыштіс-а, эз и зэр. Эз волы, кори тай-а.

Сідзжӧ соединительнӧй союз гижсьӧ ӧтлаын (вежӧртасыс сылӧн и союзлӧн кодь). Сійӧс оз ков сорлавны сідз наречиекӧд, код бӧрын эм жӧ частица: Писатель гижліс висьтъяс, кывбуръяс, сідзжӧ поэмаяс. Ме уджала сідз жӧ, кыдзи тэ.

Кӧ союз гижсьӧ торйӧн: Сідз кӧ шуис, локта.

Частицаяс гижанног

98. Нӧ, жӧ, но, да, и, тай, кӧ, пӧ, ӧмӧй, ли, на, нин, инӧ частицаяс гижсьӧны торйӧн; а ӧ да а частицаяс — черточка пыр: дыр-ӧ, сійӧ кӧ-а, муніс кӧ-а, ог жӧ кӧ пӧ ӧд-а.

Примечание. Кӧ частица порядкӧвӧй числительнӧйяскӧд гижсьӧ черточка пыр, предложениеын кӧ найӧ лоӧны вводнӧй кывъясӧн: мӧд-кӧ, коймӧд-кӧ.

99. Не частица гижсьӧ торйӧн: не бать, не ме, не тадз, не мунны, не быдӧн, не кык, не сэтшӧм.

Не прилагательнӧйяскӧд да наречиеяскӧд гижсьӧ ӧтлаын, кор найӧс позьӧ вежны ӧткодь либӧ матын вежӧртаса мӧд кывйӧн (синонимӧн). Сэк сійӧ лоӧ приставкаӧн: неыджыд, негырысь, недыр, неважӧн, неылын, неуна.

Междометиеяс гижанног

100. Кык-ӧ-куимысь шуӧм междометиеяс гижсьӧны черточка пыр: ой-ой-ой, ок-ок-ок, ха-ха-ха, крав-крав, ку-ку.

101. Фразеологизмӧ пырысь междометнӧй вежӧртаса кывъяс гижсьӧны торйӧн: сё мокасьт, сё дивӧ, сё ей бог, сё морӧ, сё майбыр, сё мат, сё збыль, ад горш, антус пызь, синтӧм гут, куран кок, макар лямпа.

Ыджыд буква гижӧм

102. Текст заводитчигӧн первой кывйыс гижсьӧ ыджыд буквасянь.

103. Предложение помӧ сувтӧдӧм точка, многоточие, восклицательнӧй да вопросительнӧй знакъяс бӧрын быд выль предложение заводитчӧ ыджыд буквасянь.

Примечание. Веськыд сёрни бӧрын авторлӧн кывъяс гижсьӧны ичӧт буквасянь, например: «Лагерад он мун?» — юаліс Сеня.

104. Двоеточие бӧрын ыджыд буквасянь гижсьӧны:

а) веськыд сёрниысь первой кывныс: Гриша юаліс: «Кажитчӧ тэныд миян уджыс?»

б) цитатаысь первой кывныс, мунӧ кӧ цитатаыс кыдзи торъя предложение: Коммунистическӧй партия подув пыдди босьтӧ В. И. Ленинлысь гениальнӧй формула: «Коммунизм — сійӧ эм Сӧветскӧй власть да странаӧс электрифицируйтӧм».

Примечание. Цитатасӧ кӧ пыртӧма предложение пытшкӧ предложениесӧ водзӧ нуӧдӧм могысь, сэк сійӧ гижсьӧ ичӧт буквасянь.

105. Ыджыд буквасянь гижсьӧны:

а) йӧзлӧн нимъяс, вичьяс, овъяс, прӧзвищеяс, псевдонимъяс: Иван Алексеевич Куратов, Нёбдінса Виттор, Йӧрш Ёгор, Кӧч Закар;

б) животнӧйяслӧн кличкаяс: Рыжко (вӧв), Буско (пон), Визянь (мӧс), Серӧд (мӧс);

в) географическӧй нимъяс, площадьяслӧн, уличаяслӧн нимъяс: Европа, Азия, Дальньӧй Восток, Великӧй Устюг, Вылыс Чов, Улыс Чов, Атлантическӧй океан, Каспийскӧй море, Уральскӧй гӧраяс, Сыктывкар, Эжва, Сӧветскӧй улича, Краснӧй площадь (океан, гӧра, улича, площадь да с. в. нарицательнӧй существительнӧйяс гижсьӧны ичӧт буквасянь);

г) газетъяслӧн, журналъяслӧн, книгаяслӧн, печатнӧй органъяслӧн нимъяс: «Правда» газет, «Югыд туй» газет, «Войвыв кодзув» журнал, «Молодая гвардия» издательство;

д) астрономическӧй нимъяс: Му, Шонді, Тӧлысь, Венера, Марс, Юрйыв кодзув, Сизима кодзув да с. в. (му, шонді, тӧлысь кывъяс кӧ оз лоны планеталӧн астрономическӧй нимӧн, гижсьӧны ичӧт буквасянь: Регыд мысти петіс шонді. Кымӧръяс костті мыччысис тӧлысь).

106. Став кывйыс гижсьӧ ыджыд буквасянь:

а) Сӧветскӧй Союзса высшӧй партийнӧй, правительственнӧй да профсоюзнӧй организацияяслӧн да учреждениеяслӧн нимъясын (партия да йӧз кывъясысь кындзи):Сӧветскӧй Союзса Коммунистическӧй партия, КПСС ЦК-лӧн Политбюро, Сӧветскӧй Союзса Коммунистическӧй партиялӧн Центральнӧй Комитет, Том йӧзлӧн Ставсоюзса Ленинскӧй Коммунистическӧй Союз, СССР-са (РСФСР-са, Коми АССР-са да мукӧд республикаясса) Верховнӧй Сӧвет, СССР-са Верховнӧй Сӧветлӧн Президиум, СССР-са (РСФСР-са, Коми АССР-са да мукӧд республикаясса) Министръяслӧн Сӧвет, Профессиональнӧй Союзъяслӧн Ставсоюзса Центральнӧй Сӧвет;

б) высшӧй государственнӧй должностьяслӧн да высшӧй почётнӧй званиеяслӧн нимъясын:СССР Верховнӧй Сӧвет Президиумса Председатель, СССР Министръяслӧн Сӧветса Председатель, Сӧветскӧй Союзса Маршал, Сӧветскӧй Союзса Герой, Социалистическӧй Уджвывса Герой;

в) государствояслӧн, союзнӧй да автономнӧй республикаяслӧн официальнӧй нимъясын:Сӧветскӧй Социалистическӧй Республикаяслӧн Союз, Российскӧй Сӧветскӧй Федеративнӧй Социалистическӧй Республика, Коми Автономнӧй Сӧветскӧй Социалистическӧй Республика;

г) государствояслӧн, республикаяслӧн да мукӧд территориальнӧй единицаяслӧн паськыда шусян неофициальнӧй нимъясын:Сӧветскӧй Союз, Казахстан, Подмосковье, Заполярье;

д) орден нимъясын (орден да степень кывъясысь кындзи):Ленин орден, Октябрьскӧй Революция орден. Отечественнӧй война I степеня орден.

107. Ыджыд буквасянь гижсьӧ первой кывйыс:

а) министерствояслӧн, партийнӧй да сӧветскӧй организацияяслӧн, научнӧй учреждениеяслӧн, учебнӧй заведениеяслӧн, предприятиеяслӧн, промышленнӧй да тӧргӧвӧй предприятиеяслӧн да организацияяслӧн да с. в. нимъясын: Иностраннӧй делӧяс кузя министерство, Высшӧй да средньӧй специальнӧй образование кузя министерство, Высшӧй школаясын да научно-исследовательскӧй учреждениеясын уджалысьяслӧн профессиональнӧй союз. Культура кузя министерство, Просвещение кузя министерство, Видз-му овмӧс кузя министерство, Педагогическӧй наукаяс академия, КПСС Интинскӧй горком, Коми государственнӧй педагогическӧй институт, Коми книжнӧй издательство, Ухтинскӧй индустриальнӧй институт, Сыктывкарскӧй лесопромышленнӧй комплекс, Сыктывкарскӧй вӧр пилитан да обработайтан комбинат, Государственнӧй универсальнӧй магазин.

Ӧти ним составын водзсяньыс вермӧны лоны букваясӧн артмӧм кыв (аббревиатура), собственнӧй ним либӧ мукӧд учреждениеяслӧн да организацияяслӧн нимъяс, кодъяслӧн торйӧн гижигӧн первой кывйыс либӧ став кывъясыс гижсьӧны ыджыд буквасянь: В. И. Ленин нима Москваса государственнӧй университет, СССР-лы 50 во нима Сыктывкарса государственнӧй университет, СССР-са Видз-му овмӧс министерство, СССР-са Просвещение министерство, РСФСР-са Педагогическӧй наукаяс академия, Коми АССР-са Государственнӧй безопасность комитет, СССР Наукаяс академиялӧн Коми филиалса Кыв, литература да история институт, СССР Министръяслӧн Сӧвет бердса Центральнӧй статистическӧй управление, СССР Министръяслӧн Сӧвет бердса Наука да техника кузя государственнӧй комитет;

б) рубежсайса политическӧй партия нимъясын: Польскӧй объединённӧй рабочӧй партия, Болгарскӧй коммунистическӧй партия;

в) крайяслӧн, областьяслӧн, округъяслӧн, районъяслӧн нимъясын: Ставропольскӧй край, Московскӧй область, Архангельскӧй область, Ненецкӧй национальнӧй округ, Сыктывдінскӧй район;

г) революционнӧй праздникъяс да тӧдчана датаяс нимъясын: Победа лун, Конституция лун, Нывбабаяслӧн международнӧй лун, Выль во, Стрӧительяслӧн лун, но Май Первой лун. Ыджыд историческӧй событиеясӧн кык нимын первой кык кывйыс гижсьӧ ыджыд буквасянь: Великӧй Октябрьскӧй социалистическӧй революция, Великӧй Отечественнӧй война;

д) религиознӧй праздник нимъяс гижсьӧны ичӧт буквасянь, абу кӧ первой кывйыс собственнӧй ним: ыджыд лун, масленича, рӧштво, ноПетыр лун, Иван лун;

е) собственнӧй географическӧй нимысь -са суффиксӧн артмӧм прилагательнӧйяс гижсьӧны ыджыд буквасянь, найӧ кӧ пырӧны предприятиеяс, организацияяс да учреждениеяс ним составӧ: Москваса тракторнӧй завод, Сыктывкарса медицинскӧй училище; а абу кӧ собственнӧй ним составын — ичӧтсянь: сыктывкарса лыжникъяс;

ж) кавычкаяс босьтӧм книга, газет, журнал, печатнӧй органъяс нимъясын первой кывйыс гижсьӧ ыджыд буквасянь, ыджыд буквасянь жӧ гижсьӧны найӧ составӧ пырысь собственнӧй нимъяс: В. Юхнинлӧн «Алӧй лента» роман, «Югыд туй» газет, «Войвыв кодзув» журнал, «Молодая гвардия» издательство, «Партизан Ваньӧ» висьт.

108. Учреждениеяслӧн да организацияяслӧн собственнӧй нимъясысь артмӧм сложносокращённӧй кывъяс гижсьӧны ыджыд буквасянь: Госплан, Моссӧвет, Госстрой, Госполитиздат, Уралмаш.

Нарицательнӧй нимъясысь артмӧм сложносокращённӧй кывъяс гижсьӧны ичӧт буквасянь: обком, райком, облисполком, профсоюз, пединститут, местком, стенгазет.

109. Собственнӧй нимъясысь артмӧм сложносокращённӧй кывъяс, кодъяс лыддьыссьӧны буква нимъяс серти, гижсьӧны ыджыд букваясӧн: РСФСР, СССР, КПСС, ЦК.

Нарицательнӧй нимъясысь артмӧм сложносокращённӧй кывъяс, кодъяс лыддьыссьӧны звукъяс серти (а оз буква нимъяс серти), гижсьӧны ичӧт буквасянь: вуз, роно, дзот, дот, нэп.

Строкаысь строкаӧ кыв вуджӧдӧм

110. Ӧти строкаысь мӧд строкаӧ кыв вуджӧдсьӧ слогъяс серти. Слогъяс вылӧ юксьӧмыс мунӧ согласнӧй водзті, коді сулалӧ гласнӧй водзын, да гласнӧйяс костті: шко-ла-ын, ве-лӧд-чы-ны, бӧр-йысь-ны, гиж-ны, вӧ-рын, ту-рун, го-жӧм, ад-дзы-ны, сёй-ны, дор-йы-ны, мы-йысь, ва-йим, кый-ны, сёй-ны, во-им, во-ис.

111. Торъя буква строкаысь строкаӧ вуджӧдны оз позь, кӧть и сійӧ лоӧ слогӧн.

112. Орччӧн кӧ сулалӧ кык ӧткодь согласнӧй, ӧтиыс кольӧ воддза строкаас, а мӧдыс вуджӧдсьӧ: мас-са, чеч-чӧ, кольч-чыны, клас-сӧ.

113. Кывйын кӧ орччӧн сулалӧ куим согласнӧй, кык воддза согласнӧйыс оз торйӧдлы: ворс-ны, пырт-ны, берт-ны, верд-ны.

114. Ъ, ь букваяс на водзвывса согласнӧйясысь оз позь торйӧдны: понъ-яс, торъ-явны, кӧчь-яс.

em

Небӧгса йӧзӧдӧм:

Мошегова А. Т. Орфографическӧй правилоэз // Грибанов С. Ф. Коми-пермяцкӧй орфографическӧй словарь. Кудымкар: Комипермгиз., 1945. Лб. 6-40.

ОРФОГРАФИЧЕСКӦЙ ПРАВИЛОЭЗ

I. Букваэз да нійӧ гижӧм.

§ 1. Коми-пермяцкӧй алфавитӧ пырӧны то кытшӧм букваэз:

Аа, Бб, Вв, Гг, Дд, Ее, Жж, Зз, Ии, Йй, Кк, Лл, Мм, Нн, Оо, Пп, Рр, Сс, Тт, Уу, Фф, Хх, Цц, Чч, Шш, Щщ, ъ, Ыы, ь, Ээ, Юю, Яя, Ёё, і, Ӧӧ.

§ 2. Шыэз сьӧрті коми-пермяцкӧй кыв торйӧтсьӧ то кыдз:

• 1) Тыргортӧм шыэз: б, в, г, д, ж, з, к, л, м, н, п, р, с, т, ф, х, ц, ч, ш, щ, дз, дж, тш. Нія торйӧтсьӧны то кытшӧм группаэз вылӧ:

а) Парнӧй тыргортӧм шыэз (д, т, з, с, л, н) вермӧны лоны чорытӧн, например: дӧра, дуга, тор, туй, зон, замок, сад, сук, лым, лог, ныв, нора, и небытӧн, например: дядь, тять, кузя, сяркан, пуля, нянь.

б) Чорыт непарнӧй тыргортӧммез (б, в, г, ж, к, м, п, р, ф, х, ц, дж, тш) быд положеннёын чорытӧсь, например: баб, вӧр, гу, жонь, кушак, мӧс, пурт, фартук, джодж, тшын.

в) Небыт непарнӧйез (ч, щ, дз) быд положеннёын небытӧсь, например: чань, чунь, чожа, чер, площадь, ящик, щука, дзодзог, дзут, дзав, кӧдзис, дзӧдзыв, дзир.

• 2) Тыргора шыэз: а, и, і, о, у, ы, э, ӧ.
• 3) Джынгора шы: й.

§ 3. Букваэз ё, я, ю гижсьӧны:

• 1) Кыв пондӧтчикӧ, медбы мыччавны йотируйтӧм тыргора шыэз (йо, йа, йу), например: ёг, ён, юр, юкмӧс, яй, яг.

Примечаннё: Буква ё вылӧ точкаэз колӧ сувтӧтны быд пораӧ.

• 2) Кыв шӧрын слог пондӧтчикӧ, медбы петкӧтны йотируйтӧм шыэз, например: заём, приём, пиян, тіян, кыян, лыян, сёян, коян.

Примечаннё 1: Мукӧд заимствованнӧй кыввезын тыргора шыэз бӧрын ё местаӧ колӧ гижны йо, например: район, майор, а ь бӧрын гижны о, например: батальон, бульон.

• 3) Небыт парнӧй тыргортӧм букваэз бӧрын (д, з, с, л, н, т), медбы мыччавны нылісь небытсӧ, например: сёйны, лён, кузя, тӧвся, сюр, нюр, дядь, нять, син, нёль.

Примечаннё 1: Небыт непарнӧй тыргортӧм букваэз ч, щ, дз, дзз бӧрын гижсьӧны а, о, у, например: чаг, чужӧм, чожа, Щорс, площадь, лэдза, дзодзог, одзза, дзав, дзольгӧ, дзуртӧ.

Примечаннё 2: Но заимствованнӧй кыввезын гижны сідз: Чёрнӧй море, щётка, брошюра, парашют, жюри.

§ 4. Буква е гижсьӧ:

• 1) Кыв пондӧтчикӧ, медбы мыччавны йотированнӧй тыргортӧм шы, например: ем, етша, ешта, Егор, Ермаков, единӧй, единица.
• 2) Небыт парнӧй тыргортӧммез бӧрын (д, т, з, с, л, н бӧрын), медбы мыччавны нылісь небытсӧ, например: пионер, неделя, зеп, сетны, некӧр, телега, телефон.
• 3) Быдӧс непарнӧй тыргортӧм шыэз бӧрын, например: бедь, вевт, гез, кер, шеп, пель, велӧтісь, торрез, пӧввез. 

§ 5. Буква э гижсьӧ:

• 1) Слог пондӧтчикӧ, медбы мыччавны нейотируйтӧм е шысӧ, например: эз, эта, эттшӧм, этадз, эстӧн, эг, эн, эшӧ.
• 2) Кыв шӧрын тыргора шыэз бӧрын, медбы мыччавны нейотируйтӧм шы э, например: поэт, поэма, ваэз, киэз, юэз.
• 3) Чорыт парнӧй тыргортӧммез бӧрын, например: сэт, лэдз, зэр, лэбны, тэныт, зэлыт, ёрттэз, кӧззэз, мӧссэз, журналлэз, годдэз, воннэз.

§ 6. Буква і гижсьӧ, медбы мыччавны шы и чорыт парнӧй тыргортӧммез бӧрын, например: зіль, нія, сі, зі, сылісь, тӧдіс, локтіс, сім, вӧлі, ӧні, олі, куті.

§ 7. Буква и гижсьӧ:

• 1) Слог пондӧтчикӧ, медбы мыччавны нейотируйтӧм и шы, например: изны, идзас, ид, иган.
• 2) Кыв шӧрын тыргора шыэз бӧрын, медбы мыччавны нейотируйтӧм и, например: пуис, нуис, юис, туис, кӧин, пӧим.
• 3) Небыт парнӧй тыргортӧммез бӧрын (д, т, з, с, л, н бӧрын), медбы мыччавны нылісь небытсӧ, например: ним, син, козин, ӧзим, коли, диво, дисциплина, типография.
• 4) Быдӧс тыргортӧммез бӧрын, например: пинь, видз, гижӧт, би, ки, кино, гири.

§ 8. Буква й гижсьӧ:

• 1) Кыв пондӧтчикӧ букваэз и, ӧ, ы одзын, медбы мыччавны нылісь йотациясӧ, например: йиджны, йи, йӧн, йӧв, йыв, йылісь.
• 2) Кыв шӧрын чорыт тыргортӧммез бӧрын, медбы мыччавны йотация букваэз и, ӧ да ы одзын, например: бӧрйыны, дорйыны, гарйи, бӧрйӧ, новйӧ, дорйӧ.
• 3) Кыв конецын тыргора букваэз бӧрын, медбы мыччавны дженыт й, например: вай, сёй, мый, туй, яй, рой, советскӧй, боевӧй.

Примечаннё: Буква й кольччӧ ӧ, ы, и одзын, кӧр й сулалӧ кыв основаын, например: вайӧ, вайис, яйӧн, яйын, кыйӧ, кыйис, но: сёй— сёя, вай— вая, лый— лыя.

§ 9. Буква ӧ гижсьӧ, медбы мыччавны шӧрӧт рядісь шӧрӧт подъёма тыргора шы, например: гӧгӧр, уджалӧны, тӧдны, ӧні, велӧтӧ, мунӧ, локтӧ, ӧм, котӧртӧ.

§ 10. Буква ь гижсьӧ:

• 1) Кыв конецын, медбы небзьӧтны сы одзся парнӧй тыргортӧм шысӧ, например: кузь, бедь, гадь, челядь, нёль, пель, нять, кӧть, юсь, усь, порсь.
• 2) Кыв шӧрын, медбы небзьӧтны парнӧй тыргортӧмсӧ, например: инька, вильса, узьны, разьны, кольны, асьным, пасьта.
• 3) Кыв шӧрын ӧ да ы букваэз одзын, медбы небзьӧтйы ны одзись парнӧй тыргортӧмсӧ, например: сьӧд, ньыв, кольӧм, лӧсьӧтны, пуксьыны, шырсьыны.
• 4) Кыв конецын сулалӧ кӧ парнӧй тыргортӧм шы, а сы бӧрын мунӧ кывйыв либо суффикс, например: кульсьӧ, нильзьӧ, куньсьӧ, разьсьӧ.

Примечаннё. Кӧр ордчӧн сулалӧны кык ӧткодь парнӧй тыргортӧм шы, сэк первӧй тыргортӧмыслӧ небытыс некыдз оз мыччассьы (буква ь сэк гижны оз ков), например: доддя, полля, вевттьыны, мырддьыны.

§ 11. Янсӧтан знаккез:

• 1) Буква ъ гижсьӧ, кыдз янсӧтан знак, чорыт парнӧй тыргортӧммез бӧрын я, е, ё, ю букваэз одзын, например: гозъя, розъя, изъя, адъютант, асъя, лӧсъя, съезд, съёмка, банъяв.
• 2) Заимствованнӧй кыввезын ъ гижсьӧ и мӧдік тыргортӧммез бӧрын, например: объект, объявленнё, объясненнё, объём.
• 3) Буква ь, кыдз янсӧтан знак, гижсьӧ непарнӧй тыргортӧммез бӧрын, а заимствованнӧй кыввезын сэтчин жӧ, кытӧн и русскӧй кылас, например: ловья, увья, шогья, кыкьямыс, пыжьян, чышьян, Дарья, семья, мырья, дорья, бӧрья, сырьё.

§ 12. Дж сочетаннё обозначайтӧ гора шипящӧй африкат, например: джодж, джадж, ыджыт, йиджны, удж.

§ 13. Дз сочетаннё обозначайтӧ небыт свистящӧй африкат, например: дзут, идзас, кыдз, видзны, кӧдзыт.

§ 14. Тш сочетаннё обозначайтӧ гуся шипящӧй африкат, например: нитш, тшын, тшӧтш, кытшӧм, ытшкыны.

Примечаннё: Ежели кык африкат сулалӧны ордчӧн, то гижсьӧны сочетаннёэз: джж, дзз, тшш, например: уджжез, джыджжез, джоджжез, кыдззез, видззез, адзза, вӧрӧдззис, нитшшез, потшшез.

§ 15. Букваэз ф, х, ц, щ гижсьӧны заимствованнӧй кыввезын, например: фронт, телефон, колхоз, совхоз, воздух, станция, центнер, улица, огурец, общество, площадь, ямщик, совещаннё.

ІІ. Шыэз аскодялӧм.

§ 16. Ежели кылын одзланься тыргортӧм шыыс аскодялӧ ас бӧрсис тыргортӧм шысӧ, колӧ адззыны кылыслісь вужсӧ либо основасӧ. Ежели адззӧм вужыс либо основаыс лоасӧ быдса значеннёаӧсь, сэк кылыс гижсьӧ аскодявтӧг (без уподобления), например: вӧтча (вӧт — вӧта), чорытжык (чорыта — чорытӧсь), шедтыны (шедіс — шедас), вежтыны (вежа — вежис), серӧмтчыны (серӧмтӧт).

§ 17. Ежели суффикс бердісь либо кывйыв бердісь торйӧтӧм кывлӧн вужыс ӧштіс ассис значеннёсӧ, сэк кылыс гижсьӧ аскодялӧмӧн, например: кольччыны, чеччыны, мыччыны, пӧрччасьны, тальччыны, курччавны, шоччисьны, адззыны (кыввез: кольч, чеч, мыч, пӧрч, тальч, курч, шоч, адз озӧ мыччалӧ некытшӧм значеннё).

§ 18. Быд небыт тыргортӧм шы аскодялӧ ас одзсис йотсӧ и медбы этӧ мыччавны, гижикӧ сувтӧтсьӧны кык буква ӧткодьӧсь, например: воть — воття, додь — доддя, киль — килля, поль — полля.

§ 19. Заимствованнӧй кыввезын, кӧднаын основаыс кончайтчӧ буква н вылӧ, аскодялӧмсӧ мыччалӧны кык н гижӧмӧн, например: собраннё, заседаннё, правленнё, совещаннё.

Примечаннё: Нія кыввез, кӧдналӧн основаыс оз кончайтчы буква н вылӧ, гижсьӧны русскӧй орфография сьӧрті, например: Илья, Ильич, эскадрилья, судья, условие, наречие.

§ 20. Уналыда эманиммезын быдӧс тыргортӧммез, кӧдна сулалӧны суффикс одзын, гижсьӧны кыкпӧв, например: кок — коккез, вӧв — вӧввез, вон — воннэз, шыр — шыррез, тетрадь — тетраддез, жонь — жоннез, кыдз — кыдззез.

§ 21. Глагол основаын буква ш аскодялӧ одзсис йотсӧ и гижсьӧ кыкпӧв, например: пышшыны, вешшыны, кошшыны.

§ 22. Мукӧд пораӧ коми-пермяцкӧй кыввезын овлӧ кыкпӧвса аскодялӧм: чорыт парнӧй тыргортӧм шы аскодялӧ одзсис йотсӧ и сы влияннё увтын небзьӧ ачыс. Эта овлӧ кываркмӧтан глагольнӧй суффикссэз дырни, а сідзжӧ мукӧд наречиеэзын, сэк гижсьӧны кык буква ӧткодьӧсь да ны бӧрын гижсьӧ ь либо буква я, например: мырддьыны, мырддьӧны, лыддьыны, лыддьӧны, лыддя, пессьыны, пессьӧны, песся, вевттьыны, вевттьӧны, ӧння, ӧддьӧн, джыння, тӧння, талуння, ашыння.

ІІІ. Диалекттэзын шыэзлӧн чередованнё.

§ 23. Буква л, кӧда мыччалӧ чорыт шы л, гижсьӧ то кӧр:

• 1) Кыв шӧрын тыргора шыэз одзын, например: вӧлыс, уджалӧ, пукала, ветлі, полӧ, кылыс, кылӧ, талун.
• 2)  Кыв пондӧтчӧмын то кытшӧм коми-пермяцкӧй кыввужжезын: лаб, лаж, ланьтны, лӧдз, ло, лов, лок, лонт, лӧг, лӧз, лӧнь, луд, лун, лы, лый, лым, лыс, лысьт, лабич, лайкыт, лапыт, лог, лонтны, лоп, лыд, лэб, лэдз, лэчыт, лӧсйи, лӧсьыт, лӧсьӧт.
• 3) Заимствованнӧй кыввезын буква л гижсьӧ сэтчин жӧ, кытӧн и русскӧй кыввезын, например: солдат, чулки, дело, полоз, журнал, прогул, металл, квартал.

§ 24. Кыв конецын, кыв шӧрын тыргортӧм шыэз одзын, й одзын да уна лыд мыччалан суффикс одзын гижсьӧ буква в, например: ныв, кыв, сьыв, пӧв, кӧв, вӧвныс, нывнат, кывкӧт, ловйӧн, ловья, ныввез, вӧввез, пӧввез.

§ 25. Коми-пермяцкӧй кыввезын первӧй слогын букваэз е да и одзын быд пораӧ гижсьӧны букваэз г да к, например: керку, кепись, гез, гид, гижны, но заимствованнӧй кыввез гижсьӧны то кыдз: техника, телеграф, типография, деньга, дисциплина, дело, диво.

IV. Шыэз йылісь мукӧд правилоэз.

§ 26. Кыввуж бӧрын, кӧда кончайтчӧ чорыт тыргортӧм шыӧн, буква я-сянь пондӧтчан суффикссэз одзын мукӧд пырся гижсьӧ ь, а букваэз ӧ, ы, и одзын гижсьӧ й, например: лов — ловья, ловйӧн, кор — корья, гар — гарья, гарйӧ, гарйы, гарйи; дор — дорья, дорйы, дорйи. Этадз гижсьӧ то кытшӧм кыввужжеза кыввезын: бан, быг, гаг, гар, гез, гоз, гыж, гыр, дзир, доз, зор, зыр, зуд, ид, из, кор, дор, куд, кыв, кӧв, кӧз, лов, лым, мыльк, мыр, ньӧр, нӧк, пож, поз, пруд, пуж, пыж, пӧрт, роз, сыр, сюр, сяр, таг, тор, тув, ув, чаг, чуж, тшыг, тшын.

Примечаннё: Кыввезӧ, кӧдна кончайтчӧны буква в вылӧ, ь да й колӧ гижны только то кытшӧм формаэзын: лов— ловья, ловйӧн, тув — тувйын.

§ 27. Буква и бӧрын суффикссэз гижны а, о буквасянь, например: би — биасьны, чери — чериавны, чериок, ки — киас, киок.

§ 28. Гижны буква й-тӧг кыввез: кӧин, тоин, пӧим, куим, баит, туис.

§ 29. Ежели ордчӧн сулалӧны кык небыт тыргортӧм буква, сэк небзьӧтӧмсӧ мыччалӧны только мӧдыслісь, например: килля, аттестат, лыддьыни, кузница, Абиссиния, уннявны, степь, стекло.

Примечаннё 1: л небзьӧтӧмсӧ мӧдік небыт тыргортӧммез одзын колӧ непременно мыччавны, например: больница, кольть, кольччыны.

Примечаннё 2: Парнӧй тыргортӧммезлісь небзьӧтӧмсӧ колӧ мыччавны и вежан кывйыввез одзын, кӧдна пондӧтчӧны небыт тыргортӧмсянь, например: дадьсис, кольтьсис, польсис, дадьсим, дадьсянь, дадься.

V. Кыдз гижны заимствованнӧй кыввез.

§ 30. Русскӧй кылісь заимствованнӧй кыввезын, географическӧй терминнэзын да асниммезын колӧ гижны букваэз: ф, х, ц, щ сідз жӧ, кыдз русскӧй кылас, например: фонарь, сарафан, фабрика, ферма, профсоюз, Франция, Анфиса, Фёдор, хозяин, сахар, пароход, колхоз, совхоз, стахановец, химия, Архангельск, Захар, центр, партиец, комсомолец, колхозница, ударница, щётка, щука, щит, ямщик, площадь, вещество, общество, совещаннё.

§ 31. Ежели заимствованнӧй кыв конецын непарнӧй тыргортӧм бӧрын сулалӧ небыт знак, сэк эна кыввес гижсьӧны русскӧй орфография сьӧрті, например: молодёжь, степь, дробь, вещь, тушь, сентябрь, октябрь, ноябрь, букварь, фонарь, слесарь, токарь, Сибирь.

Примечаннё 1: Кыв шӧрын буква р бӧрын небыт знакыс сідзжӧ кольччӧ, например: Харьков, Горький, сентябрьскӧй, октябрьскӧй, декабрьскӧй.

Примечаннё 2: Ежели кылын нимтан вежанын буква р бӧрын эм небыт знак, сэк сія кольччӧ и мукӧд вежаннэзын, например: сентябрьын, фонарьӧн, букварьын, Сибирьӧ, букварьлӧ, Сибирьсянь. Но кыввезын р букватӧг небыт знак оз кольччы, например: молодёжлӧн, степсянь, дробтӧг, вещлӧн, тушсӧ.

§ 32. Кӧр заимствованнӧй кыввезын букваэз б, в, г, м, п, ф, р бӧрын сулалӧны я, е, ю, сэк и коми-пермяцкӧй кылын гижсьӧны эна жӧ букваэз и буква ё весьтын кӧть кӧр сувтӧтчӧны точкаэз, например: бюро, ряд, обязательство, пятилетка, знамя, рюмка, Гюго, Вячеслав, Фёдор, Боря.

§ ЗЗ. Заимствованнӧй кыввезын ж да ш букваэз бӧрын гижсьӧ и и коми-пермяцкӧй кылын, например: мужик, машина, ворошиловец.

§ 34. Ежели русскӧй кылын гижӧма буква о, сэк и коми-пермяцкӧй кылын гижсьӧ буква о, например: совет, пароход, паровоз, сапог, колхоз, солдат, диво, полоз, но ягӧд, гӧсь.

§ 35. Буква э-ӧн заимствованнӧй кыввез гижсьӧны русскӧй орфография сьӧрті, например: эвакуация, электричество, эпоха, экипаж, Энгельс, поэт, этаж.

§ 36. Ордчӧн сулалан кык ӧткодь буква коми-пермяцкӧй кылын гижсьӧны сідз жӧ, например: класс, касса, масса, Одесса, металл, аттестат, кристалл, грамм, грамматика.

Примечаннё: Кӧр кык ӧткодь тыргортӧм дынӧ содтісьӧ куимӧт сэтшӧм жӧ тыргортӧм, сэк ӧткодь букваэс гижсьӧны кыка, а не куима, например: классянь, металлӧн.

§ 37. Русскӧй кылісь заимствованнӧй кыввез, кӧдналӧн кывйылыс ий, ия коми-пермяцкӧй кылын гижсьӧны русскӧй орфография сьӧрті, например: сценарий, Везувий, Горький, Василий, революция, армия, Мария.

Примечаннё: Сэтшӧм эманиммезын, кӧдна русскӧй кылын овлӧны ӧтдруг и тӧдчанниммезӧн, коми-пермяцкӧй кылын кывйылыс лоӧ — ӧй, кыдз и тӧдчанниммезлӧн, например: рабочӧй, служащӧй.

§ 38. Кыввез, кӧдналӧн кывйылыс русскӧй кылын лоӧ сть, коми-пермяцкӧй кылын гижсьӧны сідз жӧ, например: промышленность, ведомость, область, власть, часть, но коми-пермяцкӧй кылын гижсьӧ гӧсь (а не гость).

§ 39. Кыввез: метр, километр, кубометр, сантиметр, литр, грамм, килограмм гижсьӧны русскӧй орфография сьӧрті.

VI. Кыдз гижсьӧны сложнӧй кыввез. 

§ 40. Сложнӧй кыввез гижсьӧны ӧтлаын то кӧр:

• 1) Кӧр ӧтыс либо кыкнан составнӧй частьыс ӧштісӧ самостоятельнӧй значеннё, например: синкым, чальпод, понпуш, паськӧм, вунданпод, сюпод, рудзӧгпод, горпод, кепись, кокшы, кӧмкӧт, нёльподӧн, ловпу, пипу, нинпу, жовпу, льӧмпу, тӧдвылын.
• 2) Кӧр кык кыв ӧтлаын сетӧны паськытжык понятие либо мӧдік понятие, например: нырӧм, аймам, тымус, кикок, вирветлӧм, виркисьтӧм, кикутӧм, кайпоз, совдоз, порохдоз, чайдоз, турунчир, вугыршать, кокпыдӧс, кипод, кисадь, пельсадь, коксадь, кидолонь, капустайӧр, карчйӧр, горӧм, горлыс, шӧмйӧв, рисьва, няньшӧм, кӧрттуй, кӧрттув, черинянь, кӧртзыр.

Примечаннё: Гижны торйын: зӧр йӧр, рудзӧг йӧр, пар йӧр.

• 3) Кӧр кык кылісь лоӧ мӧдік значеннёа кыв, например: бипур, даркаюр, капустаюр, осьтаӧм, пышкай, упышму, турунюр, пӧттурун, ситурун, ошсьӧктан, ошпу, йӧвтурун, чераньвез, юракыв, эманим, тӧдчанним, нимвежтас, лыданим, кывбӧр, кыввуж, кывйыв, енӧшка, порськок, йӧвтшак, черива, гуяма, черигадя, зуси, кайварыш, курӧгварыш, ойтӧв, биаиз, вӧрмӧс, кӧзъягӧд, озъягӧд, гуткулантшак, пельпон, шырби, урбӧж, туримоль, синва, бикыв, юрси, сьӧдкай, сьӧдрака, бабапель, кӧрымкай, пуягӧд.
• 4) Кыввез, кӧдна мыччалӧны профессияэз либо социальнӧй категорияэз, например: вӧркералісь, вакыскалісь, вакайӧтлісь, вановйись, мууджалісь, мууджалӧм, подавӧдитісь, бикерись, матегпуись, матегпуӧм, одзынмунісь, гортэчись, подӧнмунісь, мошвӧдитӧм, мошвӧдитісь, черикыйись, черикыйӧм, сапогвурись, порсьвӧдитӧм, подавӧдитӧм, смолапуӧм, смолакерӧм, вурунвартісь, няньпӧжалӧм.

Примечаннё: Ежели эттшӧм кыввез дынын эм тӧдмӧтан кыв, сэк колӧ гижны нійӧ торйын, например: бур сапог бурись, но знатнӧй вӧркералісь.

• 5) Кывбӧррез вежан кывйыввезкӧт нимтан да керӧтан вежаннэзын гижсьӧны ӧтлаын, например: кыкпӧв, кырасйыв, кокувт, почваувт, ойшӧр, вавыв, васай, туйтор, пуйыв, лунтыр, додьтыр, косви, пидзӧсви.
• 6) Тӧдчанниммез, кӧдна аркмӧны эманиммезісь, нимвежтассэзісь, лыданиммезісь да мӧдіккезісь кывбӧррезкӧт сетӧны мӧдік оттенок, сідзжӧ гижсьӧны ӧтлаын, например: ваувтся, вавывся, керӧсдорся, лунодзся, васайся, вашӧрся, керкудынся, вавесьтся, мукӧдпырися, мукӧдпырись, мукӧдпыр, куимӧтпырся, вапанытся, ваньылатся, сьӧдвевья, сьӧдсора, ӧтпӧвса, куимпӧвса.
• 7) Наречиеэз, кӧдна аркмӧны глагольнӧй эманимись, тӧдчанниммезісь кывбӧррезкӧт: увья, сорӧн, пӧвсӧн гижсьӧны ӧтлаын, например: горзӧмувья, радувья, ӧтпӧвсӧн, куимпӧвсӧн, горзӧмсорӧн, видӧмсорӧн.
• 8) Кывбӧр сувда, кӧр мыччалӧ этажжез, гижсьӧ ӧтлаын, например: ӧтсувда, кыксувда, куимсувда, но гижны торйӧн: морт сувда, керку сувда, метр сувда.
• 9) Тӧдчанниммез, кӧдна аркмисӧ эманиммезісь, тӧдчанниммезісь да наречиеэзісь ӧтлаын причастиекӧт, гижсьӧны ӧтлаын, например: вӧрпилитан, шучтыдалан, бельвидзӧ, сьӧдвидзӧ, виркисьтан, синбытшкан, шучадззись, шучнӧбӧтана, кучиккеран, викеран.
• 10) Тӧдчанниммез, кӧдна сулалӧны ордчӧн да мыччалӧны рӧм да оттеноккез, гижсьӧны ӧтлаын, например: вежчочком, югытвеж, сьӧдсера, сьӧдлӧз.
• 11) Тӧдчанниммез, кӧдна аркмӧны ас нимвежтасісь кыввезкӧт: коддя, сяма, ныра, гижсьӧны ӧтлаын,например: аскоддя, ассяма, асныра.
• 12) Кывбӧр кодь тӧдчанниммезкӧт, глаголлэзкӧт, причастиеэзкӧт да наречиеэзкӧт гижсьӧ ӧтлаын, например: ыджыткодь, сёркодь, висьталіскодь, пӧдналӧмкодь.
• 13) Кывбӧр моз глаголлэзкӧт да наречиеэзкӧт, кӧдна аркмӧны тӧдчанниммезісь, гижсьӧны ӧтлаын, например: мунісмоз, важмоз, одззамоз, горӧтісмоз.
• 14) Наречиеэз да тӧдчанниммез ӧт основакӧт гижсьӧны ӧтлаын, например: ӧтмоз, ӧтчожа, ӧтвына.
• 15) Кӧр кыв джын сулалӧ эманим бӧрын, сэк гижсьӧ ӧтлаын, например: годджын, листджын, кругджын, но гижсьӧ торйын то кӧр: джын километр.

Примечаннё: Колӧ гижны ведраджыння чугун.

• 16) Кыв пиян гижсьӧ ӧтлаын то кытшӧм кыввезын: каньпиян, ошпиян, порсьпиян, но морт пиян.

§ 41. Сложнӧй кыввез гижсьӧны дженыт кырӧлӧн то кӧр:

• 1) Вынӧнжык висьталан значеннёын повторяйтчан кыввез, например: рядӧн-рядӧн, рыт-рыт, чукӧрӧн-чукӧрӧн, ылын-ылын, матын-матын, лун-лун.
• 2) Синонимическӧй парнӧй кыввез, например: ветлӧ-мунӧ, мунӧ-локтӧ, пырӧ-петӧ, сьывны-модьны, лэдзчӧ-кайӧ.
• 3) Сложнӧй кыввез, кӧдналӧн кыкнан частяс суффикссэз а-я, например: мама-ныла, ая-зона, соя-вона, чаня-вӧла.
• 4) Сёрникосткыв значеннёа парнӧй кыввез, кӧдна шыэз сьӧрті ӧтамӧд дынӧ матынӧсь, например: дзиль-дзоль, туп-тап, рез паз, нюв-няв, сюр-сяр, чукыль-мукыль.
• 5) Кыввез, кӧдна мыччалӧны неопределённӧй количество, например: куим-нёль, вит-квать, морт-мӧд, вӧв-мӧд, лунмӧд.

VІІ. Эманим.

§ 42. Тӧдмӧтантӧм вежлалӧм.

Субъектно-объектнӧй вежаннэз. 

• 1. Нимтан (именительный). Кин? Мый? ки, вӧр, дадь.
• 2. Асалан (родительный). Кинлӧн? Мыйлӧн? килӧн, вӧрлӧн, керкулӧн.
• 3. Босьтан (притяжательный). Кинлісь? Мыйлісь? вӧрлісь, бадьлісь.
• 4. Сетан (дательный). Кинлӧ? Мыйлӧ? Мӧслӧ, колхозлӧ, дадьлӧ.
• 5. Керӧтан (винительный). Кинӧс? Мыйӧс? вонӧс, вӧлӧс, ошӧс.
• 6. Керан (творительный). Кинӧн? Мыйӧн? киӧн, вӧрӧн, дадьӧн.
• 7. Ӧтлаӧтан (соединительный). Кинкӧт? Мыйкӧт? шыркӧт, колхозкӧт, вонкӧт.
• 8. Эмтӧмтан (лишительный). Кинтӧг? Мыйтӧг? китӧг, вӧртӧг, дадьтӧг.
• 9. Ордчалан (сравнительный). Кинся? Мыйся? кися, вӧрся, ошся.
• 10. Локтан (достигательный). Кинла? Мыйла? вӧрла, мӧсла, пиканла.

 Внутриместнӧй вежаннэз.

• 11. Инса (местный). Кинын? Мыйын? Кытӧн? киын, колхозын, вӧрын, керкуын.

• 12. Петан (исходный). Кинісь? Мыйись? Кытісь? киись, колхозісь, вӧрись, керкуись.
• 13. Пыран (вступительный). Кинӧ? Мыйӧ? Кытчӧ? киӧ, вӧрӧ, колхозӧ, муӧ.

Внешнеместнӧй вежаннэз.

• 14. Сибӧтан (приблизительный). Кинлань? Мыйлань? килань, вӧрлань, вонлань.
• 15. Ылынтан (отдалительный). Кинсянь? Мыйсянь? Кысянь? кисянь, вӧрсянь, вонсянь.
• 16. Вуджан (перехедный). Кинӧт? Мынӧт? (кыті), киӧт, вӧрӧт, туйӧт.
• 17. Тӧдмӧтан (предельный). Кинӧдз? Мыйӧдз? Мыйви? (кытчӧдз) вӧрӧдз, вонӧдз, пидзӧсви.

§ 43. Тӧдмӧтантӧм вежлалӧмӧн эманиммезлӧн эм эшӧ тӧдмӧтана-асалан вежлалӧм, кӧда мыччалӧ, что предметыс тӧдса ни, сы йылісь висьталӧм ни либо эта предметыс кытшӧм-либо лицолӧн, например: киӧ, кокӧ, сойӧ, айним, мамныт, вонныс, киӧттям, вонсиным.

§ 44. Сложносокращённӧй кыввезын, кӧдна аркмӧмась медодзза букваэзісь, а сідзжӧ условнӧй ниммезын, кӧдна босьтсьӧны кавычкаэзӧ, вежан кывйыввес гижсьӧны дефис-пыр, например: СНК-лӧн, МТС-лісь, СССР-ись, Окроно-ӧдз. 

Мукӧд сложносокращённӧй кыввезын вежан кывйыв гижсьӧ ӧтлаын: вузлӧн, риклісь, райкомын.

§ 45. Уналыда эманиммезлӧн суффикссэз ез да эз сувтӧтсьӧны основа бӧрын асалан суффикссэз да вежан кывйыввез одзын.

Суффикс эз гижсьӧ то кӧр:

• 1) Кыввезын, кӧдналӧн конецас тыргора шы, например: киэз, керкуэз, пимиэз, туриэз, фабрикаэз, семьяэз, собраннёэз, революцияэз.
• 2) Эманиммезын, кӧдналӧн конецас чорыт парнӧй тыргортӧм шы и эта шыыс шусьӧ кыкпӧв: воннэз, городдэз, саддэз, докладдэз, вопроссэз, мӧссэз, колхоззэз, морттэз, журналлэз, курссэз, совхоззэз.

Суффикс ез гижсьӧ то кӧр:

• 1) Эманиммезын, кӧдналӧн конецас тыргортӧм шы и эта шыыс шусьӧ кыкпӧв, например: доддез, беддез, тетраддез, полаттез, воттез, вӧввез, шыррез, ошшез, коккез, видззез, джоджжез, потшшез.
• 2) Эманиммезын, кӧдналӧн конецас й, например: туйез, кайез, сарайез, санаторийез.

§46. Эманиммезлӧн кываркмӧтан суффикссэз:

• 1. Ас — вердас, быдмас, петас, шебрас, висьтас, вежӧртас.
• 2. Ӧт — гижӧт, йӧртӧт, юкӧт, кӧртӧт.
• 3. Ись — вурись, гӧрись, велӧтчись, узись, гижись.

Примечаннё: Чорыт парнӧйез бӧрын суффикс гижсьӧ сідз — ісь, например: велӧтісь, уджалісь.

• 4. Ӧм — велӧтчӧм, велӧтӧм, вурӧм, аско- дялӧм.
• 5. Ан — юан, вартан, вежан.

Примечаннё: Кыввезын, кӧдналӧн конецас сулалӧ й, гижсьӧ суффикс ян, например: сёян, кыян.

• 6. Тор — йӧвтор, яйтор, няньтор, сёрнитор.
• 7. Ин — керӧсаин, пожумаин, мунанін.
• 8. Ӧс — пуртӧс, пытшкӧс, шӧмӧс.
• 9. Ка — зонка, инька, нывка, ичмонька, айка.
• 10. А, я — кузя, вылына, пасьта, ыжда, кыза.
• 11. Ок— мӧсок, вӧлок, керкуок, кагаок.

Примечаннё: Кыввезын, кӧдналӧн конецас сулалӧ ь либо й, суффикс лоас ёк, например: дадёк, порсёк, панёк, каёк, туёк.

• 12. Жуг — мӧсжуг, понжуг, керкужуг.
• 13. Иньӧй — вӧриньӧй, ыбиньӧй, но вӧліньӧй, ёртіньӧй, мӧсіньӧй.
• 14. У — ю— вону, бабу, деду, Маню, сою.
• 15. Заимствованнӧй кыввез гижсьӧны русскӧй орфография сьӧрті, например: коммунист, комсомолец, ударник, богатство.

§ 47. Сочетаннёэз эманимись эманимкӧт жӧ, кӧр первӧйыс лоӧ тӧдмӧтан кылӧн, гижсьӧны торйын, например: пызан кок, мӧс сюр, пон бӧж, нянь зыр, вӧр утка, баня гор, бадь лист, керку крыша.

VIII. Тӧдчанним.

§ 48. Сложнӧй тӧдчанниммез, кӧдна мыччалӧны ӧтік цвет, гижсьӧны ӧтлаын, например: кельыдлӧз, югытгӧрд, кельыдвеж, чимсьӧд, бельчочком, югытлӧз, пемытрусӧй.

Примечаннё 1: Кык ӧткодь тӧдчанним, кӧдна употребляйтчӧны ыджыт значеннё мыччалӧм понда, гижсьӧны кырӧлокӧн, например: ыджыт-ыджыт, вына-вына, вылын-вылын, ыджытся-ыджыт, вылынся-вылын.

Примечаннё 2: Кывторрез вель, зэв, дзирс, дзар, медся, стрась, куш тӧдчанниммезкӧт гижсьӧны торйын, например: дзар югыт, вель бур, дзирс, пемыт, зэв вына, медся бур, стрась ыджыт, куш чочком.

§ 49. Суффикс кодь тӧдчанниммезкӧт гижсьӧ ӧтлаын, например: ыджыткодь, гӧрдкодь, вежкодь, зелёнӧйкодь.

§ 50. Ас нимвежтасісь да коддя, ныра, сяма кыввезісь аркмӧтӧм тӧдчанниммез гижсьӧны ӧтлаын, например: аскоддя, асныра, ассяма.

§ 51. Тӧдчанниммезлӧн кываркмӧтан суффикссэз:

• 1)  Ӧв — лӧз — лӧзӧв — лӧзӧвӧсь, гӧрд — гӧрдӧв — гӧрдӧвӧсь, сьӧд — сьӧдӧв — сьӧдӧвӧсь.

Примечаннё: Эна кыввезын л да в оз чередуйтчӧ, быдлаын гижсьӧ в.

• 2) Жык — кузьжык, буржык, басӧкжык.
• 3) Ыник — гажыник, кӧсыник.
• 4) Ик — лажмытик, векнитик, кокнитик.
• 5) Ыт — курыт, дженыт, кӧдзыт.
• 6) А, я — гажа, ловья, мырья, изъя, увья.
• 7) Том — пурттӧм, сапогтӧм, китӧм.
• 8) Ся — гожумся, тулысся, тӧвся, арся.
• 9) Ӧвӧй — пуовӧй, пӧловӧй, кыдзовӧй.
• 10) Ӧсь — няньӧсь, нятьӧсь.

§ 52. Заимствованнӧй кыввезын тӧдчанниммезлӧн кывйылыс лоас ӧй, например: советскӧй, культурнӧй, Краснӧй Армия, социалистическӧй, чугуннӧй, стальнӧй.

§ 53. Суффикссэз: вывся, гӧгӧрся, костся, увтся, дорся, бокся, бердся, пытшкся, сайся гижсьӧны ӧтлаын, например: туйвывся, годгӧгӧрся, сыкостся, ваувтся, туйдорся, вӧрбердся, вапытшкся.

§ 54. Суффикссэз: вевья, пӧвса, сора гижсьӧны ӧтлаын, например: гӧрдвевья, сьӧдвевья, ӧтпӧвса, кыкпӧвса, куимсора, нёльсора.

IX. Лыданим.

§ 55. 1) Лыданиммез кыкдасӧдз, а сідзжӧ десятоккез, сотняэз гижсьӧны ӧтлаын, например: даснёль, дассизим, даскыкьямыс, кыкдас, нёльдас, ӧкмысдас, кыксто, куимсто, нёльсто, сизимсто.

2) Сэтшӧм лыданиммез, кӧдна сулалӧны сёрникузяас эманимтӧг, вермӧны вежласьны вежаннэз сьӧрті сідз жӧ, кыдз и эманиммез, например: асалан вежанын — пельлӧн, нёльӧлӧн, нёльытлӧн.

Примечаннё: Кӧр лыданимыс сулалӧ ордчӧн эманимкӧт, сэк сія оз вежлась, а вежлалӧ ассис кывйывсӧ только эманимыс, например: асалан вежанын лоас — квать книгалӧн, тӧдмӧтанын — квать книгаӧдз.

§ 56. Лыданиммез, кӧдна мыччалӧны приблизительнӧя лыдсӧ, гижсьӧны кырӧлокӧн, например, кык-куим морт, нёль-вит книга, морт нёль-вит, вӧв кык-куим, сотня кык-куим потш, книгаэс, сотня куим-нёль.

Примечаннё 1: Мукӧд тӧдмӧтантӧм лыданиммез гижсьӧны торйын, например: дас мымда, вит кынымись, керку кыкын.

Примечаннё 2: Порядковӧй лыданиммез, кӧдналӧн медбӧрья кылыс сотӧй, тысячнӧй, миллионнӧй, миллиарднӧй, гижсьӧны ӧтік кылӧн, например: кыксотӧй, кватьтысячнӧй, нёльмиллионнӧй, стокыкдасмиллиарднӧй.

Лыданиммезлӧн суффикссэз:

• 1) Ӧт — нёльӧт, витӧт, сто кыкдас кватьӧт.
• 2) А-я — нёля, вита, кыка, кватя.
• 3) Ӧн — нёльӧн, витӧн, кватьӧн.

Асалан суффикссэз: нам, нат, нас — витнам, кватьнат, сизимнас.

Чукӧртан лыданимлӧн суффикссэз: нанным, нанныт, нанныс. — Кыкнанным, нёльнанным, куимнанныс.

X. Нимвежтас.

§ 57. Ӧтка лыдын куимӧт лицоа личнӧй нимвежтассэзлӧн нимтан да керӧтан вежаннэзын основаыс лоас сі, а мӧдік вежаннэзын — сы, например: сылань, сылісь, сыӧн, сытӧг, сыись.

§ 58. Личнӧй нимвежтассэзлӧн уна лыдын первӧй да мӧдік лицоын вежан кывйыв одзын содтіссьӧ суффикс ян, например: миянӧс, тіянӧс, миянӧн, тіянӧн, миянлань, тіянсянь, тіянтӧг, миян, тіян.

§ 59. Иньдӧтан нимвежтассэз: этія, сія, нія косвеннӧй вежаннэзын вежласьӧны кыдз личнӧй нимвежтассэз: сія, нія, а эта, эна, этна нимвежтассэзын вежан кывйылыс сувтӧтсьӧ нимвежтас бердӧ, например: этналӧ, этасянь, этнакӧт.

Примечаннё: Керӧтан вежанын лоас: этӧ, энӧ. Нимвежтассэзлӧн основаэз сы, ны гижсьӧны кыввезкӧт торйын, например: сы одзын, сы моз, ны коласын, ны книгаӧн.

§ 60. Суськисян нимвежтассэз не кывторкӧт гижсьӧны ӧтлаын: некин, некытшӧм, некытӧн.

§ 61. Тӧдтӧмтан нимвежтассэз кӧ кывторкӧт гижсьӧны ӧтлаын, например: кинкӧ, кытшӧмкӧ, кынымкӧ, кынымӧткӧ, кӧдакӧ.

ХІ. Глагол.

§ 62. Ӧння кадісь да лоан кадісь глаголлэзлӧн кывйыввес то кытшӧмӧсь:

• ӧтка лыдын 1-ӧй лицолӧн:а, я — муна, коля, вая, уна лыдын —ам, ям— мунам, колям, ваям;
• ӧтка лыдын 2-ік лицолӧн ан, ян — мунан, колян, ваян, уна лыдын — ат, ят — мунат, колят, ваят;
• ӧтка лыдын 3-ӧт лицолӧн — ӧ — мунӧ, кольӧ, вайӧ, уна лыдын — ӧны — мунӧны, кольӧны, вайӧны;
• лоан кадісь ӧтка лыдын 3-ӧт лицолӧн — ас, яс — мунас, коляс, ваяс, уна лыдын — асӧ, ясӧ — мунасӧ, колясӧ, ваясӧ.

Примечаннё: Сэтшӧм глаголлэз, кытӧн основа конецас сулалӧ й, гижсьӧны то кыдз: вая, кыя, лыя.

§ 63. Син одзын чулалӧм кадісь глаголлэзлӧн кывйыввес то кытшӧмӧсь: ӧтка лыдын — коли, вайи, муні; колин, вайин, мунін; колис, вайис, муніс, уна лыдын: колит, вайит, муніт; колисӧ, вайисӧ, мунісӧ.

§ 64. Тшӧктан формаа глаголлэзлӧн ӧтка лыдын кывйылыс лоас ы, например: пуксьы, вурсьы, пессьы, гижсьы.

Примечаннё: Тшӧктан формаа глаголлэз овлӧны и кывйывтӧг, например: гиж, кый, лый, вай, мун, пет, рисуйт; уна лыдын — мунӧ, петӧ, пырӧ, гижӧ, лыддьӧтӧ.

§ 65 Безличнӧй глаголлӧн суффикс, кӧда мыччалӧ, что действиеыс кончайтчӧ ни, лоӧ — сь, например: петсьӧ, мунсьӧ, уджавсьӧ.

§ 66. Невуджан глаголлӧн суффиксыс д да т бӧрын дз — ч, а мӧдік букваэз бӧрын сь, например: купайтчӧ, велӧтчӧ, лэдзчӧ, но — миссьӧ, кыссьӧ, вежсьӧ, вурсьӧ.

§ 67. Бертан глаголлӧн суффиксыс ись — кутчисьны, шоччисьны, мыччисьны.

§ 68. Унаись керӧм мыччалан суффикс  —  лывл — гижсьывліс, сьывлывліс, ветлывліс.

§ 69. Глаголлэзын: шуны, пуны, нуны, юны, некӧр оз содтісь л, а быд производнӧй формаын лоас: шуа, пуа, нуа; шуис, пуис, нуис; шуӧны, пуӧны, нуӧны.

§ 70. Тӧдмӧтантӧм формаа глаголлӧн кывйыв ны, например: мунны, пыравны, котӧртны, осьтны, босьтны, ветлыны, гижсьыны, рисуйтчыны, серӧмтчыны.

§ 71. Глаголісь аркмӧм ниммезлӧн суффикссэз то кытшӧмӧсь: ись (ісь), ӧм, тӧм, ан (ян), например: уджалісь морт, велӧтӧм морт, гижтӧм письмо, юан ва, вурсян ем.

§ 72. Кодь, жык и моз глаголлэзкӧт гижсьӧны ӧтлаын, например: муныштісмоз, юыштіскодь, серӧмтчыштіскодь, коласжык.

Примечаннё 1: Быдкодь оттенок сетан кыввез гижсьӧны глаголлэзкӧт торйын, например: бель видзӧ, сьӧд тыдалӧ, дзар югдіс, дзар керис, гым-йирк пырис.

Примечаннё 2: Глагол керны, кӧда употребляйтчӧ мӧдік глаголлэз бӧрын, пыр гижсьӧ кырӧлокӧн, например: уджаліс-керис, уджалӧв-керис, сёйис-керис, сёйӧв-керис.

§ 73. Сэтшӧм глаголлэзын, кӧдна кончайтчӧны буква т вылӧ, эта букваыс кольччӧ быд кылын, кӧр мӧдкодьсьӧтамӧ кывсӧ, например: осьт, осьта, осьті, осьтыштны, осьтышті; босьт, босьта, босьті, босьтыштны, босьтышті; кисьт, кисьта, кисьті, кисьтыштны, кисьтышті, мунышт, муныштны, мунышта; видзӧтышт, видзӧтыштны, видзӧтышта; гижышт, гижыштны, гижыштышта.

ХІІ. Причастие.

§ 74. Ӧння када причастиеэз аркмӧны суффикссэзӧн: ись (ісь), ан (ян), например: уджалісь морт, сёйись вӧв, косьман турун, лыддьӧтан книга.

§ 75. Чулалӧм када причастиеэз аркмӧны суффиксӧн -ӧм, например: уджалӧм му, косьмӧм турун, лыддьӧтӧм книга.

§ 76. Суськисян формаа причастиеэз аркмӧны кывторрезӧн не, абу да суффиксӧн тӧм, например: Мортыс сія не кольччись. Пызаныс абу краситӧм. Велӧтчытӧм морт — топ синтӧм.

§ 77. Причастие одзын эм кӧ вежӧртӧтан кыв, сэк кывтор не гижсьӧ торйын. Например: Омӧн сулаліс зелёнӧй, эшӧ пилаӧн не павкӧтӧм вӧр.

§ 78. Причастие одзын вежӧртӧтан кылыс кӧ абу, сэк кывтор не гижсьӧ ӧтлаын. Например: Пызан вылын куйліс непӧдналӧм книга.

§ 79. Кӧр причастие лоӧ висьтасӧн, кывтор не гижсьӧ торйын. Например: Муыс эшӧ не гӧрӧм.

XIII. Деепричастие.

§ 80. Деепричастиеэз аркмӧны то кытшӧм суффикссэзӧн:

• икӧ (ікӧ), например: мунікӧ, уджалікӧ, быдмикӧ, дорсикӧ, кайикӧ;
• тӧн, например: мунтӧн, уджавтӧн, быдмытӧн, дорсьытӧн, кайтӧн;
• тӧдз, например: мунтӧдз, уджавтӧдз, быдмытӧдз, дорсьытӧдз, кайтӧдз;
• тӧг, например: мунтӧг, уджавтӧг, быдмытӧг, дорсьытӧг, кайтӧг;
• ӧмӧн, например: мунӧмӧн, уджалӧмӧн, быдмӧмӧн, дорсьӧмӧн, кайӧмӧн
• мӧн, например: ваймӧн, сёймӧн.

§ 81. Деепричастиеэзкӧт кывтор не гижсьӧ торйын. Например: Старик не тэрмасьӧмӧн петіс керкуись.

§ 82. Кыввез: моз, коста, дырни деепричастиеэзкӧт гижсьӧны ӧтлаын, например: мунікмоз, гижиккоста, гӧриккоста, велӧтчикдырни.

XIV. Наречие.

§ 83. А суффикса тӧдчанниммезісь аркмӧм наречиеэзын гижсьӧ аа, например: гажаа, мичаа.

§ 84. Эманиммезісь аркмӧм наречиеэзын кыввез: быд, тыр, йыв, кузь гижсьӧны ӧтлаын, например: ойбыт, тӧвбыт, китыр, содзтыр, лунтыр, кокйыв, кузьой, кузьлун.

§ 85. Тӧдчанниммезісь аркмӧм наречиеэзын кыввез: кузя, шогӧн, пырись, увья гижсьӧны ӧтлаын, например: буркузя, лёкшогӧн, лёккузя, кокнитпырись, полӧмпырись, смевпырись, повзьӧмувья, горзӧмувья.

§ 86. Лыданиммезісь аркмӧм наречиеэзын кыввез: пӧв, пырья, пырись гижсьӧны ӧтлаын, например: кыкпӧв, нёльпӧв.

§ 87. Кыв кодь наречиеэзкӧт гижсьӧ ӧтлаын, например: ылынкодь, матынкодь.

§ 88. Ӧт да мӧд основакӧт наречиеэз гижсьӧны ӧтлаын, например: ӧтпырись, мӧдпырись, ӧтвылісь, ӧтмоз, мӧдмоз, ӧтнёж, ӧткоста.

XV. Кывбӧррез.

§ 89. Эманиммезкӧт, тӧдчанниммезкӧт, лыданиммезкӧт да нимвежтассэзкӧт кывбӧррез кӧть кӧр гижсьӧны торйын, например: керку дынын, ӧшин увтын, пызан вылын, ю сайын, тэ дынын, сы ордын, куимсто витдас гӧгӧр.

§ 90. К ывбӧррез ви, пӧв, етш гижсьӧны ӧтлаын, например: пидзӧсв/stroemngи, унапӧв, грамметш.

§ 91. Кывбӧр пыр гижсьӧ кырӧлокӧн, например: стена-пыр, би-пыр.

Примечаннё: Но кывбӧррез виӧн, пырйӧт гижсьӧны торйын, например: кос виӧн, ва пырйӧт.

§ 92. Кывбӧррез, кӧдна аркмӧтӧны мӧдік кыввезкӧт виль кыввез либо лоӧны суффикссэзӧн, гижсьӧны ӧтлаын, например: ӧтмоз, мӧднёж, тӧдвылын, вадор, одззамоз, ӧтпасьтаӧсь.

XVI. Кывторрез.

§ 93. Кывтор кӧ тӧдтӧмтан нимвежтассэзкӧт да наречиеэзкӧт гижсьӧ ӧтлаын и сетӧ нылӧ тӧдтӧмтан значеннё, например: мыйкӧ, кинкӧ, кытшӧмкӧ, кытчӧкӧ, кыткӧ, кынымкӧ, кӧркӧ.

Примечаннё: Вводнӧй кыввезкӧт эта кывторыс гижсьӧ сідзжӧ ӧтлаын: сідзкӧ, кыдзкӧ.

§ 94. Условнӧй значеннёын кывтор кӧ гижсьӧ торйын, например: мунан кӧ, локтан кӧ, гижан кӧ, лыддьӧтін кӧ, вурин кӧ.

§ 95. Кывторрез: пӧ, тай, ли, ни, эд, инӧ, да, и, я, жӧ, а, вӧлись, бы гижсьӧны торйын, например: тэ пӧ локтін ни; локтан жӧ; гижин ни эд.

§ 96. Эманиммезкӧт, лыданиммезкӧт да глаголлэзкӧт кывтор не кӧть кӧр гижсьӧ торйын, например: не пызан, а джек; не кык, а куим; не петӧмыт, а пырӧмыт.

§ 97. Суськисян нимвежтассэзкӧт да суськисян наречиеэзкӧт кывтор не гижсьӧ ӧтлаын, например: некин, некытӧн, некӧр, некытчӧ, некытісь, некытшӧм, некӧда.

§ 98. Кывтор не тӧдчанниммезкӧт да наречиеэзкӧт гижсьӧ ӧтлаын сэк, кӧр нія эта кывторкӧт аркмӧтӧны ӧтік вежӧртӧм (понятие) и этӧ виль кывсӧ позьӧ вежны сы кодь жӧ значеннёа мӧдік кылӧн, например: нылӧн неыджыт (учӧтик) керкуок; неылын (матын) кыліс сьылӧм.

Примечаннё: Ежели эта вежӧртӧмлӧ сувтӧтсьӧ паныта вежӧртӧм, сэк кывтор не гижсьӧ тӧдчаннимкӧт либо наречиекӧт торйын, например: нылӧн не ыджыт, а учӧтик керкуок. Матын, а не ылын сьылӧны.

§ 99. Кывтор мед тӧдчанниммезкӧт да наречиеэзкӧт гижсьӧ ӧтлаын сэк, кӧр сія мыччалӧ степень, например: медыджыт, медбур, медъён, медбура.

Примечаннё: Оз ков соравны кывтор мед целевӧй союзкӧт мед, кӧда гижсьӧ торйын, например: мед бура уджавны, колӧ тӧдны уджсӧ.

§ 100. Кывторрез ко, нибудь (ненабудь), либо гижсьӧны кырӧлокӧн, например: мун-ко, сет-ко, мый-нибудь, кытшӧм-либо, кытӧн-нибудь, кытчӧ-либо.

§ 101. Кывторрез неужели, сётаки, сёжӧ, мыйнӧ, ножӧ, некӧ гижсьӧны ӧтік кылӧн.

XVII. Йитӧттэз.

§ 102. Йитӧттэз да, а, и, но, мый, мед, медбы пыр гижсьӧны торйын, например: ыджыт да бур; ми бура уджалім, а нія эшӧ буржыка.

§ 103. Йитӧттэз медбы, кӧбы, нето, тожӧ, сідзжӧ, сідзкӧ гижсьӧны ӧтік кылӧн.

§ 104. Сложнӧй йитӧттэз сійӧн что, сійӧн мыля, сійӧн медбы, сідз кыдз, сідз что, сэк кӧр кӧть кӧр гижсьӧны торйын.

XVIII. Кыввез вуджӧтӧм.

§ 105.

• 1) Ӧтік строчкаись мӧдік строчкаӧ кыввез вуджӧтікӧ, колӧ нійӧ вуджӧтны слоггез сьӧрті, например: ка-ран-даш, кер-ку, заводсянь, са-мо-лё-тын.
• 2) Ӧтік буква озӧ кольӧ и озӧ вуджӧтӧ мӧдік строчкаӧ, например: ре-во-лю-ция, а не ре-во-лю-ци-я.
• 3) Кыввез вуджӧтӧм дырни й оз позь торйӧтны сы одзся тыргора буква бердісь, например: вай-ны, сёй-ны, кай-ны, лый-ны. Ежели й одзын сулалӧ тыргортӧм буква, сэк мӧдік строчкаӧ вуджӧтӧм дырни й оз позь торйӧтны сы бӧрся тыргора бердісь, например: дор-йы-ны, бӧр-йы-ны, гар-йы-ны, дор-йис, бӧр-йис.
• 4) Букваэз ь да ъ оз позь торйӧтны ны одзся буква бердісь, например: подъ-езд, пась-тась-ны, кӧ-мась-ны.
• 5) Кык ӧткодь буква, кӧдна мыччалӧны тыргортӧм шыэз, вуджӧтікӧ колӧ торйӧтны, например: мас-са, кас-са, кол-лек-тив, шин-ня-лӧ, пес-сис, вон-ныс.

Примечаннё: Сочетаннёэз: дз, дж, тш, дзз, джж, тшш вуджӧтікӧ оз торйӧтсьӧ, например: видз-сӧ, джыдж-лӧ, пытш-кас, джы-джжез, ни-тшшез, ви-дззез.

• 6) Сложнӧй джендӧтӧм кыввез вуджӧтікӧ колӧ торйӧтны сідз, медбы строчкаас кольччис значитан частьыс быдсӧн, а мукӧдсӧ вуджӧтны мӧдік строчкаӧ, например: Окр-испол-ком, Сверд-пище-трест.
• 7) Оз позь вуджӧтны мӧдік строчкаӧ:
• а) Суффикссэз: ӧдз, ӧт, ись, ісь, кӧдна сулалӧны цифраэз бӧрын: 48-ӧдз, 5-ӧт, 4-ись, 50-ісь.
• б) Суффикссэз, кӧдна сулалӧны абревиатураэз бӧрын: СССР-ись, Окроно-лӧ, ЦК-ись, МТС-ӧдз.

• Öнія орфография туйдöд (2008, зыран коми)
• Öння орфография туйдöт (1992, перем коми)

• 1985′ вося орфография туйдöд, зыран коми
• 1975′ вося орфография туйдöд, зыран коми (Сахарова М. А.)
• 1966′ вося орфография туйдöт, перем коми (Ботева Е. В.)
• 1959′ вося орфография туйдöд, зыран коми (Сахарова М. А.)
• 1955′ вося орфография туйдöт, перем коми
• 1953′ вося орфография туйдöд, зыран коми (Подорова А. И.)
• 1945′ вося орфография туйдöт, перем коми (Мошегова А. Т.)
• 1942′ вося орфография туйдöд, зыран коми
• 1939′ вося орфография туйдöд, зыран коми
• 1938′ вося орфография туйдöт, перем коми
• 1937′ вося орфография туйдöд, зыран коми (Туркин К. И., Нечаев Г. А.)
• 1936′ вося орфография вöзйöд, зыран коми
• 1934′ вося орфография туйдöд, кыкнан коми
• 1933′ вося орфография вöзйöт, перем коми
• 1930′ вося орфография туйдöд, зыран коми  (Разманов И. И.)

• Орфодискуссия