Коми кывтӧдӧм

Ӧшмӧс:

Коми орфографическӧй словарь начальнӧй, неполнӧй средньӧй да средньӧй школалы / Коми научно-исследовательскӧй институт. Сыктывкар: Коми госиздат, 1939. Лб. 5-29.

ОРФОГРАФИЧЕСКӦЙ ПРАВИЛӦЯС

I. Алфавит да букваясӧс употребляйтӧм.

§ 1. Коми алфавитӧ пырӧны татшӧм букваяс: Аа, Бб, Вв, Гг, Дд, Ее, Жж, Зз, Ии, Йй, Кк, Лл, Мм, Нн, Оо, Пп, Рр, Сс, Тт, Уу, Фф, Хх, Цц, Чч, Шш, Щщ, Ъъ, Ыы, Ьь, Ээ, Юю, Яя, Ёё, Іі, Ӧӧ (35 буква).

 

§ 2. Звукӧвӧй состав коми кывлӧн татшӧм:

1) Согласнӧй звукъяс: б, в, г, д, ж, з, к, л, м, н, п, р, с, т, ф, х, ц, ч, ш, щ, дз, дж, тш.

Найӧ торъялӧны татшӧм группаяс вылӧ: парнӧйяс, чорыд непарнӧйяс и небыд непарнӧйяс.

а) Парнӧй согласнӧйяс (д, т, л, н, с, з) вермӧны лоны чорыдӧн, например: дар, тор, тыр, зон, зарава, сад, сай, лок, нӧб, ныр, и небыдӧн, например: дядь, тюни, кузя, сям, вӧля, ним.

б) Чорыд непарнӧйяс (найӧ быд положениеын чорыдӧсь): б, в, г, ж, к, м, п, р, ф, х, ц, ш, дж, тш, например: вӧр, гор, кок, мӧс, пыр, джодж, тшын.

в) Небыд непарнӧйяс (найӧ быд положениеын небыдӧсь): ч, щ, дз, например: чань, чужӧм, чожа, чер, Щорс, площадь, лэдза, дзуг, дзав, дзескыд, дзонь.

2) Гласнӧй звукъяс: а, и (і), о, у, ы, э, ӧ.

3) Полугласнӧй (неслогӧвӧй) – й.

 

§ 3. ё. я, ю букваяс употребляйтчӧны:

1) Кыв водзвылын, мед петкӧдлыны йотированнӧй гласнӧй звукъяс (йо, йа, йу). Например: ёг, ёкмыль, ёма, ён, яг, яй, яд, янас, югыд, юкмӧс, юр.

Примечание. Ё вылӧ точкаяс пуктыссьӧны быть.

2) Кыв шӧрын гласнӧй букваяс бӧрын, мед петкӧдлыны йотированнӧй звукъяс, например: Поёл (село ним), заём, приём, наян, ваян, пиян, тіян, виян, коян, кыян, лыян, діюр.

Примечание. Заимствованнӧй кывъясын гласнӧйяс бӧрын ё местаӧ позьӧ гижны йо, например: район, майор, а ь знак бӧрын позьӧ гижны ё местаӧ о, например: батальон, бульон и с. в.

3) Небыд парнӧй согласнӧйяс бӧрын (д, з, л, н, с, т), мед петкӧдлыны налысь небыда шусьӧмсӧ, например: дядь, лыддя, кузя, розя, позяс, лёк, ляк, ляпкыд, лючки, нёль, нянь, сёй, сям, сюр, сюмӧд, тяпка, тюни, тюрик.

Примечание. Небыд непарнӧй согласнӧйяс ч, щ, дз бӧрын гижсьӧ а, о, у (а оз я, ё, ю), например: чаг, чужӧм, чожа, площадь, Щорс, Щукин, аддза, лэдза, дзоля, дзуртӧ.

 

§ 4. Буква е употребляйтчӧ:

1) Кыв водзвылын, мед петкӧдлыны йотированнӧй гласнӧй звук (йэ), например: егыр, Емдін, еджыд, ем.

2) Небыд парнӧй согласнӧй бӧрын (д, т, з, л, н, с), мед петкӧдлыны налысь небыда шусьӧмсӧ, например: пионер, дерт, зеп, некор, телега, сетӧ, тешкодь.

3) Став непарнӧй согласнӧйяс бӧрын, например: бедь, вевт, гез, жеб, кер, мегыр, петны, регыд, буретш, чер, шеп, тшем, дзескыд, джек.

 

§ 5. Буква э употребляйтчӧ:

1) Кыв водзвылын, мед петкӧдлыны йотируйттӧм звук э, например: этша, эбӧс, эзысь, этатшӧм, эн и с. в.

2) Кыв шӧрын гласнӧй буква бӧрын, мед петкӧдлыны йотируйттӧм звук э, например: муэтш, киэтш, поэт, поэма и с. в.

3) Чорыд парнӧй согласнӧйяс бӧрын (д, з, л, н, с, т), мед петкӧдлыны налысь чорыдсӧ, например: зэр, зэв, зэлыд, лэч, лэбач, лэччӧ, нэм, енэж, сэтӧр, сэтӧн, тэ, тэныд, тэрыб.

 

§ 6. Буква і употребляйтчӧ, мед петкӧдлыны звук „и“ чорыд парнӧй согласнӧйяс бӧрын (д, з, л, н, с, т). Например: ді, дін, шабді, шонді, зіль, зі, зіб, кулі, вӧлі, ӧні, муні, сім, сісь, ворсі, ті, соті, ӧзті, кыті, куті.

 

§ 7. Буква и употребляйтчӧ:

1) Кыв водзвылын, мед петкӧдлыны йотируйттӧм и, например: изны, ин, ид, из, илалӧм.

2) Кыв шӧрын гласнӧй букваяс бӧрын, мед петкӧдлыны йотируйттӧм и, например: пуис, юис, нуис, туис, кӧин, пӧим, куим.

3) Небыд парнӧй согласнӧйяс бӧрын (д, т, з, с, н, л), мед петкӧдлыны налысь небыдсӧ, например: ним, син, кули, коли, козин, ӧзим, дисциплина, дивӧ, типография и с. в.

4) Став непарнӧй согласнӧйяс бӧрын, например: пинь, видз, гижны, ори, би, ки, сдельщина, чипсан, дзир.

 

§ 8. Буква й употребляйтчӧ:

1) Кыв заводитчигӧн и, ӧ, ы водзвылын, мед петкӧдлыны налысь йотациясӧ, например: йиджны, йи, йизьӧма, йӧн, йӧв, йыв.

2) Кыв шӧрын чорыд согласнӧйяс бӧрын, мед петкӧдлыны йотациясӧ бӧрын мунысь и, ӧ, ы гласнӧйяслысь.

Например: бӧрйыны, дорйыны, кодйыны, вонйын, бонйӧн, гезйӧн, керйӧн, бӧрйис, пасйисны.

3) Кыв помын гласнӧй букваяс бӧрын, мед петкӧдлыны краткӧй й, например: вай, сёй, мый, туй, яй, рой, сӧветскӧй, боевӧй.

Примечание. Й буква сохраняйтчӧ ӧ, ы, и водзын й вылӧ помасьысь быд производнӧй основаа кывъясын.

Например: вай, вайӧ, вайис; яй, яйӧн, яйын; кый, кыйӧ, кыйис; но: сёй – сёя, вай – вая, яй – яя, вый – выя, аймам – ая-мама, рой – роя, ной – ноя.

 

§ 9. Дж сочетание обозначайтӧ гора шипящӧй аффрикат, например: джодж, джуджыд, уджавны; тш обозначайтӧ гортӧм (глухӧй) шипящӧй аффрикат, например: тшак, тшын, кутшӧм; дз сочетание обозначайтӧ небыд свистящӧй аффрикат, например: дзуг, дзескыд, кыдз.

 

§ 10. Мед петкӧдлыны небыда шусьӧмсӧ парнӧй согласнӧйяслысь, употребляйтчӧ мягкӧй знак (ь) татшӧм случайясын:

1) Кыв помын:

Например: гадь, бедь, челядь, кузь, розь, нёль, пель, нянь, рысь, кось, порсь, кӧть, выть.

2) Кыв шӧрын чорыд согласнӧй водзвылын, например: узьны, разьны, кольны, вильдыны, инька, асьныс, корсьны, усьны, пасьта.

3) Кыв шӧрын небыд согласнӧйяс водзвылын:

а) л бӧрын, например: кольччыны, кӧлӧкӧльчик, мельнича.

б) Кывдін помын, кор сійӧ помасьӧ небыд парнӧй согласнӧй вылӧ, водзӧ кӧ мунӧ кывйыв либӧ суффикс, кодъяс заводитчӧны небыд согласнӧйсянь.

Например: додьсьыс, кульсьӧ, нильзьӧ, куньсьӧ, няньсьыс, пельсьыс, пызьсьыс и с. в.

Примечание. Кор радӧн мунӧ кык ӧткодь парнӧй согласнӧй, сэк первой согласнӧйыслӧн небыда шусьӧмыс гижӧмын некыдз оз отмечайтчы (мягкой знак на костӧ оз гижсьы).

Например: доддя, колльӧдны, соссьыны, кырссьыны, быттьӧ, вевттьыны, мырддьыны, пессьӧм и с. в.

4. Ӧ, ы букваяс водзвылын, мед петкӧдлыны небыдсӧ водзын сулалысь парнӧй согласнӧйыслысь, например: сьӧд, ньӧв, ньыв, пуксьыны.

 

§11. Торйӧдан знакъяс.

1) Чорыд согласнӧйяс да я, е, ё, ю букваяс костын, кор найӧ шусьӧны торйӧн, гижсьӧ твердӧй знак (ъ), например: гозъя, асъя, розъялӧ, ловъя, кодъя, пышъя, кокъяс, керъяс, ӧшъяс, ошъяс, кытшъяс, медъён, медъеджыд, объект, объявление, съезд, адъютант, но: морковьяс, дробьяс.

2) Тайӧ жӧ случайӧ небыд согласнӧйяс бӧрын гижсьӧ мягкӧй знак (ь).

Например: пиньяс, кизьяс, вӧньяс, кӧчьяс, видзьяс, бедьяс, а сідзжӧ заимствованнӧй кывъясын: сырьё, семья, Дарья, Марья и с. в.

 

ІІ. Звукъясӧс аскодялӧм.

§ 12. Кывйын бӧрын сулалысь согласнӧйыс аскодялӧ кӧ воддзасӧ, сэк колӧ корсьны кыввуж либӧ кывдін. Аддзӧм кыввуж либӧ кывдін лоасны кӧ полнозначнӧйӧн, сэк гижсьӧ аскодявтӧг (без уподобления), например: вӧтчӧ (вӧт-вӧта), велӧдчӧ (велӧд-велӧда).

 

§ 13. Кор кывйывсьыс либӧ суффикссьыс торйӧдӧм кыввужйыс воштӧма самостоятельнӧй значениесӧ, сэк аскодялӧм отмечайтчӧ, мӧд ногӧн кӧ шуны, гижсьӧ кык ӧткодь буква, например: дорччӧ, шойчча, курччасьӧ, мыччысьӧ, орччӧн, мӧрччӧ, кольччис, чеччис и с. в.

 

§ 14. Быд небыд согласнӧй аскодялӧ бӧрын мунысь йотсӧ, и сэки гижсьӧ кык ӧткодь буква.

Например: додь – доддя, киль – килля, коль – колля и с. в.

Примечание. Кор ӧтлаасьӧны кык дз, сэк колӧ гижны ддз, например: аддза, кыддза, воддза, гырддза.

 

III. Диалектъясын звукъяслӧн чередование.

§ 15. Кор мунӧ чередование л да в согласнӧйяслӧн, сэк кыв помын, кыв шӧрын, согласнӧйяс, й да ь водзвылын, колӧ гижны в, а гласнӧй водзвылын л.

Например: вӧв, вӧвным, вӧвлы, вӧлӧн; кыв, кывны, кывтӧг, кывйӧн, кыла, кылас; сьыв, сьывны, сьылӧ, сьыліс.

 

§ 16. Кор разнӧй диалектъясын (либӧ весиг ӧти диалектын) первой слогын и да е водзвылын шусьӧ к и т, г и д (шуӧны кер и тер, гез и дез, гид и дид, ки и ти), сэк колӧ гижны к и г, а оз т и д.

Например: керка, кепысь, кежны, ки, киссьӧм, гид, гижӧм, гежӧд.

Примечание. Тайӧ кывъяс гижанногсьыс сӧмын торъялӧ «дерт» кыв да рочысь пырӧм кывъяс: телега, техника, дивӧ, деньга.

 

§ 17. Некымын коми диалектъясын мӧд и бӧръя мукӧд слогъясын литературнӧй ӧ пыдди шуӧны э, но быд татшӧм случайясын колӧ гижны ӧ, а оз э.

Например: кодӧс, вӧлӧс, понйӧс, пыжӧс, коскӧс и с. в.

 

§ 18. Кор разнӧй диалектъясын ӧти кывйын шусьӧ йт и ть (шайт – шать, няйт – нять, квайт – квать), сэк колӧ гижны йт сочетание, а оз ть: няйт, квайт, шайт. А кор шусьӧны йд и дь, сэк колӧ гижны дь: бадь, бедь, кодь (а абу байд, бейд, койд).

 

§ 19. Разнӧй диалектъясын шуӧны лыа и лыва, нуа и нува, лоӧ и ловӧ, но колӧ гижны вставочнӧй в-тӧгыс, например: нуа, кыа, лыа, лоӧ и с. в.

 

IV. Заимствованнӧй кывъясӧс гижанног.

§ 20. Роч кывъяс, интернациональнӧй кывъяс, а сідзжӧ географическӧй нимъяс, собственнӧй нимъяс да терминъяс нимтан падежын гижсьӧны сідз жӧ, кыдзи и роч кывйын.

Например: общество, фабрика, коммунист, бюро, партия, революция, Финляндия, Англия, колхоз, социализм, стахановец, ударница, командир, химия, вещество, заседание, собрание, Мария (Марья), Горький, октябрь, январь, лагерь, степь, Салтыков-Щедрин, Джек Лондон и с. в.

Примечание. Исключениеӧн лоӧны рочысь важӧн пырӧм кывъяс.

Например: пӧнар, сарапан, партук, кӧзяин, больнича, улича, кузнеч, кӧть и с. в.

 

§ 21. Кывъясын, кодъяс помасьӧны сть вылӧ (промышленность, область, власть), т бӧрын мягкӧй знак сохраняйтчӧ быд падеж формаын, ина падежын II да III морта формаысь ӧтдор.

Например: область, областьын, областьсянь, но: областяд, областяс, областювса.

 

§ 22. Литр, метр, километр, театр кывъяс помын а оз гижсьы, абу литра, метра и с. в., а литр, метр, но: секунда и минута.

 

§ 23. Роч нимъясын и овъясын кывйывъяс гижсьӧны сідз жӧ, кыдзи и рочӧн.

Например: Василий, Жуковский, Горький.

 

§ 24. Кык ӧткодь согласнӧй букваа кывъяс (класс, грамм, металл) став падежын гижсьӧны кык согласнӧйӧн.

Например: класс, классын, классӧ, классянь, классъяс, грамм, граммӧн, металлӧн и с. в.

 

V. Сложнӧй кывъясӧс гижанног.

§ 25. Сложнӧй кывъяс гижсьӧны ӧтлаӧ:

1) Кор ӧтикыс либӧ кыкнан юкӧныс, кодъяс артмӧдісны сложнӧй кывсӧ, воштӧмаӧсь ассьыныс самостоятельнӧй значениенысӧ.

Например: понпуш, зарава, кикар, коляоз, бакамач, тшайпод.

2) Кор сложнӧй кыв, коді артмӧма сочетание ногӧн, ӧтлаын сетӧ выль, паськыдджык понятие.

Например: нырвом (лицо), аймам (родители), тымус (внутренность), лысьӧм (костяк), видзму (земельные угодья), нывзон (молодежь).

3) Кор кык кыв ӧтлаасьӧмӧн сетӧны выль понятие.

Например: синва, сьӧлаоз, коктуй, гыжтуй (царапина), кокшы, кипыдӧс, кӧрттуй, кӧрттув, пиньтуй (огрызок), войшӧр, чужва, лунтӧв, войтӧв, турипув, вабергач, ваболь, уртшак, миртуй, юрси.

4. Кор кык кылысь артмӧ переноснӧй значениеа выль кыв.

Например: балябӧж (затылок), шырби (светлячок), катшасин (ромашка), пельпом (плечо), урбӧж (хвощ).

5) Кор кык кылысь артмӧ выль термин.

Например: юриндалысь (оглавление), водзкыв (предисловие), водзынмунысь (передовой), бӧрӧкольччысь (отстающий).

6) Кор кык кывйысь артмӧ профессиялӧн либӧ социальнӧй категориялӧн ним.

Например: вӧрлэдзысь (лесоруб), няньпӧжалысь (пекарь), скӧтвидзысь (скотовод).

Примечание. Тайӧ жӧ кывъясыс вермасны гижсьыны торйӧн, эм кӧ первойя кыв юкӧдыслӧн водзвылас определение: еджыд нянь пӧжалысь (но знатнӧй вӧрлэдзысь).

7) Кор уна кыла определительнӧй сочетаниеяс петкӧдлӧны собственнӧй географическӧй нимъяс каръяслысь, сиктъяслысь, пӧчинӧкъяслысь, юяслысь, тыяслысь, шоръяслысь да торъя местаяслысь (урочищеяслысь).

Например: Важгорт, Важкуръя, Бояркерӧс, Кыркӧтшкерӧс, Мырпонаыб, Карвуджӧм, Понгорттуй, Чубвомдор, Лундіюр, Лопъюбӧж, Войвож, Ыджыдшор, Карашор, Ёль, Ёльдор, Йӧкӧсъёльдор, Няйтшордор, Амбараёльвомдор, Тывиска, Евты, Кузьвидз, Кытшылькось.

Примечание 1. Кор географическӧй ним петкӧдлан сочетаниеыс артмӧма кык, куим да унджык собственнӧй нимъясысь, сэк сійӧ гижсьӧ дефис пыр, например: Ванька-Иван, Илья-Васьӧпи, Вась-Степорд, Иён-Иван-Ваньӧ и с. в.

Примечание 2. Кор географическӧй ним артмӧма прилагательнӧйысь да собственнӧй ним петкӧдлан существительнӧйысь, сэк гижсьӧ торйӧн, например; Верхнее Бугаево, Иванъёль Большой, Большой Руч, Малый Руч, Улыс Идзасъю, Ыджыд Пожӧг и с. в.

8) Словообразовательнӧй кывъяс ув, выв, дор, водз, сай, берд существительнӧйяскӧд нимтан да керан падежын гижсьӧны ӧтлаӧ, а мукӧд падежъясын гижсьӧны торйӧн.

Например: ӧшиньвыв, ывлавыв, туйвыв, ӧшинюв, посув, керкаув, гумладор, керкадор, васай, ваберд, но: ӧшинь улын, ва сайын и с. в.

9) «Джын» (половина) кыв существительнӧйяскӧд гижсьӧ ӧтлаӧ: воджын, лунджын, листджын, ведраджын.

10) Кор «джынъя» кыв сулалӧ существительнӧй бӧрын и ӧтлаын сыкӧд вӧчӧ прилагательнӧй, сэк гижсьӧ ӧтлаӧ.

Например: ведраджынъя чугун, арджынъя кага, но: джынъя чугун, ведраӧй джынъя.

 

§ 26. Дефисӧн гижсьӧны сложнӧй кывъяс: 1) Кор мӧд кылыс содтӧ воддзаыслысь значениесӧ: лун-лун, рыт-рыт, бурысь-бур, выльысь-выль, ылын-ылын, визьӧн-визьӧн, радӧн-радӧн, чукӧрӧн-чукӧрӧн.

2) Ӧтсяма вежӧртаса парнӧй кывъяс: олан-вылан, ветлан-мунан, керӧм-вӧчӧм, чукыль-мукыль, сідз-тадз.

3) Паныда вежӧртаса да совместность петкӧдлысь кывъяс: бӧра-водза, луна-воя, киа-кока, кузя-дженьыда, ая-мама, ныла-зонма, чоя-вока, ая-пиа.

4) Междометие значениеа парнӧй кывъяс: зиль-зёль, сюв-сявмуні, гыма-гама, сюр-сяр.

5) Кор «джынйӧн – джынйӧна» кыв сӧгласуйтчӧ водзвылас сулалысь существительнӧйяскӧд падежын: ведраӧн-джынйӧн, воӧн-джынйӧн, арӧн-джынйӧна, но: во джынйӧн ыджыдджык, ведра джынйӧн унджык.

 

§ 27. Кывъяс, кодъяс оз сетны выль понятие, а лоӧны определительнӧй словосочетаниеясӧн, гижсьӧны торйӧн.

Например: пыж ныр, ӧшинь тас, пызан кок, мӧс сюр, нянь зыр, кӧрт пач, пожӧм пу, кыдз пу, льӧм пу.

Примечание. Ӧтлаӧ гижсьӧны татшӧм сочетаниеяс: ловпу, пипу, жовпу.

 

ТОРЪЯ КЫВСИКАСЪЯСЛӦН ГИЖАННОГ.

VI. Существительнӧй.

§ 28. Диалектъясын разнӧя шуигӧн кык слога согласнӧй вылӧ помасян кывъясын кыв шӧрӧ гижсьӧ ы, а кыв помын век гижсьӧ и (і).

Например: шонді, ёді, шабді, часі, чери, тури, сёрни, но: тупыль, мегыр, рыныш, тулыс.

 

§ 29. Сложносокращённой кывъясын, кодъяс артмӧмаӧсь медводдза букваясысь, а сідзжӧ условнӧй нимъясын, кодъяс босьтсьӧны кавычка пытшкӧ, падежнӧй кывйывъяс гижсьӧны дефис пыр.

Например: ВЦИК-лӧн, СНК-лӧн, «Коми комсомолец»-ын.

Мукӧд сложносокращённӧй кывъясын падежнӧй кывйыв гижсьӧ ӧтлаӧ: вузлӧн, риклӧн, райкомын.

 

§ 30. Существительнӧйяслӧн «яс» уна лыда суффикс кывдін помса согласнӧй букваысь век торйӧдчыссьӧ разделительнӧй ъ либӧ ь знакӧн. Ь знак гижсьӧ небыд парнӧй согласнӧйяс бӧрын, а сідзжӧ ч и дз бӧрын.

Например: паньяс, кольяс, додьяс, кӧчьяс, кыдзьяс, а став мукӧд случайӧ гижсьӧ твёрдӧй знак (ъ).

Например: козъяс, вужъяс, рӧдъяс вӧвъяс.

 

§ З1. Существительнӧйяскӧд став падежъясас ӧтлаӧ гижсьӧны выв, ув, дор, сай, туй, водз, тор, берд, весьт, йыв, пи, лун, ин (ін), пу кывъяс, кор найӧ шусьӧны кывартмӧдысь суффиксъяс пыдди:

а) выв: войвыв, лунвыв, рытыввыв, войвылӧ, лунвывсянь, рытыввылын и с. в.

б) йыв: кокйыв, кийыв, но: пу йыв, вӧр йыв.

в) ув (юв): подув (основа), гонюв; подулӧ, подувсянь, подувті.

г) дор: вадор (берег), вадорын, вадорысь.

д) туй: морттуй, киподтуй, аньтуй, пиньтуй (огрызок), киподтуйӧн, морттуйсӧ, морттуйӧн и с. в.

е) водз: посводз, пачводз, асывводз, посводзӧ, посводзысь и с. в.

ж) сай: гожсай, тӧвсай, верӧссай, гожсайын, тӧвсайӧ, верӧссайын.

з) тор: йӧвтор, выйтор, унатор, буртор, йӧвторла, выйторйысь, бурторсӧ и с. в.

Примечание. „Тор» суффикс босьтӧ уменьшительнӧй и отвлечённӧй вежӧртас.

и) берд: ваберд, муберд, вабердӧ, му бердын,

к) весьт: мувесьт, юрвесьт, юрвесьтын,

л) пи: кӧчпи, каньпи, сирпи, кӧчпиӧс, сирпилы,

м) лун: озырлун, долыдлун, озырлунӧн, -ысь,

н) ин (ін): велӧдчанін, пожӧмаин, мунанін,

о) пу: гӧтырпу, дӧрӧмпу, черпу.

 

§ 47. Существительнӧйяслӧн суффиксъяс:

а) ас (яс): пуктас, дӧмас, тэчас, коляс,

б) ӧд: гижӧд, кӧртӧд, дӧмӧд,

в) ӧм: велӧдчӧм, гижӧм, узьӧм,

г) ысь: вурысь, гижысь, уджалысь,

д) ан (ян): кокан, вартан, сёян,

е) ук (юк): пиук, Васюк, конюк.

 

VII. Прилагательнӧй.

§ 32. Сложнӧй прилагательнӧйяс, кодъяс петкӧдлӧны ӧти цвет, гижсьӧны ӧтлаӧ.

Например: кельыдлӧз, югыдгӧрд, яръюгыд, турунвиж, кольквиж.

 

§ 33. «Кодь» прилагательнӧйяскӧд гижсьӧ ӧтлаӧ (сравнительнӧй суффикслысь значение кутӧмӧн)

Например: ыджыдкодь, гӧрдкодь, вижкодь, вакодь (влажный), но: ва кодь сӧдз, ош кодь ён, гыр кодь кыз.

 

§ 34. Прилагательнӧйяс, кодъяс артмӧмаӧсь существительнӧйысь увса, вывса, бердса, дорса, чӧжся суффиксъясӧн гижсьӧны ӧтлаӧ.

Например: областювса, съездвывса делегатъяс, районувса, ставмувывса, вабердса туй, карбердса овмӧс, юдор видз, асдорса олысь, аскостса сёрни, вочӧжся удж, нюрвыв турун.

 

§ 35. Паныда вежӧртаса прилагательнӧйяс гижсьӧны дефис пыр.

Например: лӧза-гӧрда, сьӧда-еджыда, гырыся-посниа, пӧрыся-тома.

 

§ 36. Прилагательнӧйяслӧн суффиксъяс: а (я), ан (ян), ов (ёв), оват, ник, иник, ыд, ыдик.

Например: биа, киа, чериа, яя, выя, вартан (машина), сёян (нянь), лӧзов, лӧзоват, пинёв, дубов, дубоват, ичӧтик, томиник, мичаник, ляпкыдик, паськыдик, векньыд, кокньыд, но: посни, векни.

 

§ 37 «Мед» частица прилагательнӧйяскӧд гижсьӧ ӧтлаӧ.

Например: медъён, медбур, медыджыд, но: медся ён.

 

§ 38. Рочысь босьтӧм прилагательнӧйяс помӧ гижсьӧ „ӧй“.

Например: рабочӧй, большевистскӧй, колхознӧй, трудӧвӧй.

 

§ 39. Степень петкӧдлана кывъяс – сап, дзурс, чим – прилагательнӧйяскӧд гижсьӧны торйӧн, например: сап пемыд, чим сьӧд, дзурс ва.

 

VIII. Числительнӧй.

§ 40. Тыр дасъяс и сёяс гижсьӧны ӧтлаӧ, а став мукӧд числительнӧйяс гижсьӧны торйӧн.

Например: комын, квайтымын, кӧкъямысдас, кыксё, куимсё, ӧкмыссё, дас ӧти, дас вит, кызь квайт, нелямын вит, кык сюрс.

 

§ 41. Числительнӧйяс, кодъяс петкӧдлӧны приблизительнӧй лыд, гижсьӧны дефис пыр.

Например: кык-куим морт, нёль-вит вӧв, сё-мӧд-коймӧд потш, морт мӧд-коймӧд,

но: морт нёль-вит, вӧв кык-куим, сё кык-куим.

Примечание. Числительнӧйяс, кодъяс петкӧдлӧны приблизительнӧй лыд и йитчӧмаӧсь ӧ частицаӧн, гижсьӧны кык дефисӧн: нёль-ӧ-вит, кык-ӧ-куим, вит-ӧ-квайт.

 

§ 42. Порядкӧвӧй числительнӧйяслӧн «ӧд» суффикс цифраяскӧд гижсьӧ дефис пыр. Например: 5-ӧд, 6-ӧд, 20-ӧд.

 

§ 43. Личнӧй формаа собирательнӧй числительнӧйын гижсьӧ кык н.

Например: кыкнанным, кыкнанныд, кыкнанныс, но: ӧтнаным.

 

IX. Местоимение.

§ 44. Ӧтка лыда коймӧд морта личнӧй местоимениеяслӧн кывдіныс, нимтан, керан падежъясысь ӧтдор, лоӧ сы, а не сі.

Например: сыӧн (а не сіӧн), сылань, сылысь, сытӧг, сыӧдз и с. в.

 

§ 45. Личнӧй местоимениеясын уна лыдын первой да мӧд мортаын падежнӧй кывйыв водзвылас содтыссьӧ суффикс ян.

Асалан падежын тайӧ суффиксыс лоӧ кывйылӧн (кодлӧн? – тіян).

Например: миянӧс, тіянӧс, миянӧн, тіянӧн, миянлань, миянсянь, тіянсянь, тіянтӧг, миян, тіян и с. в.

 

§ 46. Уна лыда коймӧд морта личнӧй местоимение найӧ, а абу ная, керан падежын найӧс, а став мукӧд падежас кывйывъяс содтысьӧны „на“ кывдін бердӧ.

Например: наӧн, наысь, натӧг, налӧн, насянь и с. в.

 

§ 47. Указательнӧй местоимениеяс нимтан падежын гижсьӧны: тайӧ, этайӧ, эсійӧ.

Указательнӧй местоимениеясын тайӧ и этайӧ падежнӧй кывйывъяс содтысьӧны та либӧ тайӧ, эта либӧ этайӧ кывдін бердӧ.

Например: талань, тасянь, такӧд, таӧдз, таӧдзыс, этасянь, этасяньыс, этатӧг, эталы, тайӧс, тайӧясысь, тайӧн, этайӧыс, этайӧяс.

Примечание. Керан да керанторъя падежын гижсьӧны: этайӧс, тайӧн, этайӧн.

 

§ 48. Местоимениеяслӧн эсы, сы да на кывдінъяс мукӧд кывъяскӧд век гижсьӧны торйӧн.

Например: эсы ордын, сы моз, сы кодь, сы мында, сы водзын, сы книгаӧн, на гижӧдысь, на моз и с. в.

 

§ 49. Ас да аслыс местоимение основаясысь артмӧм сложнӧй кывъяс гижсьӧны ӧтлаын.

Например: аслыснога, аслыссяма, аслыспӧлӧс, асныра, аснога, аслысруа, ассяма.

 

§ 50. Тэа-меа гижсьӧ дефис пыр.

 

§ 51. Отрицательнӧй местоимениеяс частица «не«-кӧд гижсьӧны ӧтлаӧ: некӧн, некод, некутшӧм.

 

§ 52. Неопределённӧй местоимениеяс частица «кӧ«-кӧд гижсьӧны ӧтлаӧ: кӧнкӧ, мыйкӧ, кутшӧмкӧ, кымынкӧ, кодкӧ.

 

X. Глагол.

§ 53. Ӧтка лыда коймӧд морта ӧнія када глаголын гижсьӧ ӧ: мунӧ, гижӧ, вайӧ, а оз мунэ, гижэ.

Уна лыдаын -ӧны: мунӧны, гижӧны, а оз мунэны, гижэны.

 

§ 54. Первой колян када первой морта ӧтка лыда глаголын гижсьӧ и (і): гижи, муні, вайи; мӧд мортын – ин (ін): гижин, мунін, вайин; коймӧд мортын – ис (іс): гижис, муніс, вайис.

 

§ 55. Ӧтка лыда тшӧктан формаа глаголын век гижсьӧ -ы (пуксьы, ветлы, вешйы), уна лыдаын -ӧй (пуксьӧй, ветлӧй, вешйӧй).

Примечание. Тайӧ глаголъяссӧ эн сорлалӧ колян када первой лыда ӧтка морта татшӧм глаголъяскӧд: пукси, ветлі, вешйи и с. в., кӧні гижсьӧ и (і).

 

§ 56. Действительнӧй залога возвратнӧй формаа глаголын д и т бӧрын гижсьӧ ч, а страдательнӧй залогын и став неопределённӧй глаголъясас – сь.

Бергӧдчӧ – бергӧдсьӧ, стрӧитчӧ – стрӧитсьӧ, зыртчӧ – зыртсьӧ, орӧдчӧ – орӧдсьӧ, горӧдчӧ – горӧдсьӧ, куртсьӧ, петсьӧ, велӧдчӧ – велӧдсьӧ, купайтчӧ – купайтсьӧ.

 

§ 57. Уменьшительнӧй суффикс глаголлӧн – ышт: велӧдышт, сёйышт, мунышт.

 

§ 58. Глаголъясын, кодъяс петкӧдлӧны унаысь вӧчлӧм, употребляйтчӧ суффикс лывл.

Например: гижлывліс, сьывлывлам, ветлывлам, волывлӧ.

 

§ 59. Муні, кылӧ, вартіс, видзӧ глаголъяс изобразительнӧй кывъяскӧд гижсьӧны ӧтлаӧ.

Например: зёльмуні, сявмуні, зилякылӧ, гымакылӧ, жервидзӧ и пасьвартіс.

Примечание. Тыр значениеа глаголъяс изобразительнӧй глаголъяскӧд гижсьӧны торйӧн: сювсявкылӧ зэрмис, зёльмуні жугаліс, грыммуні уси.

 

§ 60. Глаголлӧн отрицательнӧй частица гижсьӧ торйӧн:

а) Первой морта ӧнія када да локтан када – ог, мӧд морта – он, коймӧд морта – оз (ог мун, он мун, оз мун).

б) Колян када первой морта – эг, мӧд морта – эн, коймӧд морта – эз (эг ветлы, эн ветлы, эз ветлы).

 

§ 61. Глаголъяскӧд «кодь» частица гижсьӧ ӧтлаӧ.

Например: вӧрзьыштіскодь, вешйыштіскодь, банйыштіскодь.

 

§ 62. Глаголъяс, кодъяс артмӧмаӧсь числительнӧйысь, гижсьӧны ӧтлаӧ.

Например: кыкмындаавны (но: кык мында), кыкпӧвставны.

 

§ 63. Глагол кывдінысь артмӧм причастиеясын век гижсьӧ ысь, а оз ись.

Например: мунысь морт, йирсьысь вӧв, сёйысь мӧс, бӧрдысь кага, лыддьысьысь детина.

 

XI. Наречиеяс.

§ 64. Гижсьӧны ӧтлаӧ:

а) Наречиеяс, кодъяс артмӧмаӧсь существительнӧйысь быд, тор, йыв кывъясӧн.

Например: войбыд, арбыд, китыр, лунтыр, кокйыв, тшынйыв.

б) Наречиеяс, кодъяс артмӧмаӧсь прилагательнӧйысь пырысь, кузя, ногӧн кывъясӧн.

Например: бурпырысь, лёккузя, долыдпырысь, лёкногӧн.

в) Наречиеяс, кодъяс артмӧмаӧсь числительнӧйысь, пӧв, пӧрйӧ кывъясӧн.

Например: кыкпӧв, нельпӧрйӧ, витпӧв.

 

§ 65. Частица «кодь» наречиеяскӧд гижсьӧ ӧтлаӧ: ылынкодь, матынкодь, важӧнкодь, ёнакодь.

 

§ 66. Ӧт кывдінъя сложнӧй наречиеяс гижсьӧны ӧтлаын: ӧтпырйӧ (одновременно), ӧттшӧтш (совместно, одновременно), ӧтвылысь (заодно, сообща), ӧтмоз (одинаково) и с. в.

 

§ 67. Иг (іг) суффиксӧн артмӧм отглагольнӧй наречиеясын гижсьӧ и (і), а оз ы.

Например: муніг, мунігӧн, локтігмоз, сёйигчӧж, пукалігтырйи, а абу муныгӧн, сёйыгӧн и с. в.

 

§ 68. Иг (іг) суффикса наречиеяс тыр, тырйи, моз, чӧж, кості, кежлӧ кывъяскӧд гижсьӧны ӧтлаын.

Например: мунігмоз, йӧктігтырйи, сьылігтырйи, локтігчӧж, сёйигчӧж, сёйигкежлӧ, сёйигкості.

 

ХІІ. Кывбӧръяс.

§ 69. Кывбӧръяс существительнӧйяскӧд, местоимениеяскӧд да числительнӧйяскӧд век гижсьӧны торйӧн.

Например: ва паныд, тӧв ньылыд, керка дорӧдз, туй кузя, из сьӧкта, пу судта, керка ыджда, ме дорын, сы сайын, ме кодь, тэ дінын, на ордӧ, кык дорӧ, куимсё саяс, ветымын гӧгӧр, нёль пыдди, ветымын дінӧ и с. в.

 

XIII. Частицаяс.

§ 70. Частицаяс кӧ, пӧ, тай, нин, ӧмӧй, ли, ӧд, нӧ, на, инӧ, да, эськӧ, кӧть гижсьӧны дефистӧг (торйӧн).

Например: он жӧ пӧ мун, важӧн ӧд нин мунісны, коркӧ пӧ тай вола.

Частица а, ӧ гижсьӧны дефис пыр, например: тэныд-ӧ тайӧ? гажа-ӧ вӧлі? гортас кӧ-а.

 

§ 71. Частица кӧ относительнӧй местоимениеяскӧд да наречиеяскӧд гижсьӧ ӧтлаӧ.

Например: кодкӧ, мыйкӧ, кутшӧмкӧ, кыдзкӧ, кыткӧ, коркӧ, сідзкӧ, гашкӧ, буракӧ.

Примечание. Вводнӧй кывъяскӧд тайӧ частицаыс гижсьӧ ӧтлаын жӧ.

Например: кыдзкӧ, вӧлӧмкӧ, быттьӧкӧ.

 

§ 72. Частица не существительнӧйяскӧд, числительнӧйяскӧд, глаголъяскӧд век гижсьӧ торйӧн.

 

§ 73. Частица не прилагательнӧйяскӧд гижсьӧ ӧтлаӧ сэк, кор прилагательнӧйыс „не“-нас артмӧдӧ ӧти понятие, например: неыджыд.

 

§ 74. Не отрицательнӧй местоимениеяскӧд и наречиеяскӧд гижсьӧ ӧтлаӧ.

Например: некод, некутшӧм, некымын, некор, неважӧн, неуна, недыр, некыдз, некыт и с. в.

 

§ 75. Не гижсьӧ торйӧн, паныд вежӧртас петкӧдлігӧн.

Например: не ылын, а матын; не дыр, а регыд; не тадз, а сідз и с. в.

 

XIV. Строкаысь строкаӧ кыв вуджӧдӧм.

§ 76. Мед вуджӧдны кыв ӧти строкаысь мӧд строкаӧ, колӧ кывсӧ торйӧдлыны слогъяс вылӧ.

Например: ве-лӧд-чам, бу-ра, гиж-ны.

 

§ 77. Слог кӧ артмӧма ӧти гласнӧй букваысь, сэк сійӧ гласнӧйсӧ оз позь торйӧдны воддза либӧ бӧръя слогъяссьыс.

Например: Аме-рика, уна-ысь, мичаа, кыа, кер-каӧд, а абу А-мерика, у-наысь, мича-а и с. в.

 

§ 78. Строкаысь строкаӧ вуджӧдігӧн й оз торъяв водзын сулалысь гласнӧйсьыс.

Например: кый-ны, сёй-ны, вай-ны.

Й водзвылын кӧ сулалӧ согласнӧй буква, сэк строкаысь строкаӧ вуджӧдігӧн й оз торъяв бӧрын мунысь гласнӧйсьыс.

Например: дор-йыны, кӧс-йыны.

 

§ 79. Кык ӧткодь букваяс, кодъяс петкӧдлӧны согласнӧй звукъяс, строкаысь строкаӧ вуджӧдігӧн век торъялӧны.

Например: мас-са, кольч-чӧ, клас-сын, Донбас-сын.

 

§ 80. Кывйын кӧ радӧн сулалӧ куим согласнӧй, сэк позьӧ вуджӧдны кыкног.

Например: вор-сны, ворс-ны, пырт-ны, пыр-тны.

Примечание. Дз, дж, тш сочетание строкаысь строкаӧ вуджӧдігӧн оз торъявны.

Например: видз-сӧ, кы-дзи, потш-сӧ, нитш-ла, ни-тшын, ву-джӧ.

 

§ 81. Сложносокращённӧй кывъяс строкаысь строкаӧ вуджӧдігӧн торъялӧны значимӧй юкӧдъяс вылӧ: окр-испол-ком, мясо-трест, загот-зерно и с. в.