1942′ вося орфография индӧдъяс

Ӧшмӧс:

Коми орфографическӧй словарь начальнӧй, неполнӧй средньӧй да средньӧй школалы : Исправитӧм да дополнитӧм 2-ӧд издание / Коми научно-исследовательскӧй институт. Сыктывкар: Коми государственнӧй издательство,1942.

 

ОРФОГРАФИЧЕСКӦЙ ПРАВИЛӦЯС.

Алфавит.

Звукӧвӧй состав.

2. Гласнӧй звукъяс: а, и (і), о, у, ы, э, ӧ.

3. Полугласнӧй: й.

Примечание. Кор э, у, а, о звукъяс шусьӧны ӧтлаын на водзын сулалысь полугласнӧй й-кӧд, сэк артмӧны йотированнӧй гласнӧй звукъяс. Найӧ пасйыссьӧны е, ю, я, ё букваясӧн.

4. Согласнӧй звукъяс: б, в, г, д, ж, з, к, л, м, н, п, р, с, т, ф, х, ц, ч, ш, щ, дз, дж, тш.

Чорыдлун да небыдлун боксяньыс тайӧ согласнӧй звукъясыс торъялӧны татшӧм куим группа вылӧ:

а) Парнӧй согласнӧй звукъяс: д, з, л, н, с, т.

Найӧ вермӧны лоны чорыдӧн и небыдӧн: сад — садь, зэр — зеп, лок — лёк, нӧб — ньӧб, сам — сям, туг — тюни.

б) Чорыд непарнӧй согласнӧй звукъяс: б, в, г, ж, к, м, п, р, ф, х, ц, ш, дж, тш. Найӧ пыр чорыдӧсь: вӧр, гор, кок, мӧс, пыр, джодж, тшын.

в) Небыд непарнӧй согласнӧй звукъяс: ч, щ, дз. Найӧ пыр небыдӧсь: чань, чужӧм, чож, чер, кӧч, Щорс, площадь, ящик, кӧдза, дзуг, дзав, дзескыд, дзор, кыдз.

Букваяс гижанног.

5. ю, я, ё букваяс гижсьӧны:

а) Кыв водзын да гласнӧй букваяс бӧрын, мед петкӧдлыны йу, йа, йо йотированнӧй гласнӧй звукъяс: ён, заём, яг, ваявны, югыд.

Примечание. Некымын заимствуйтӧм кывъясын ё местаӧ гижсьӧ йо, например, йот, район, майор, а ь бӧрын ё местаӧ гижсьӧ о: батальон, бульон и с. в.

б) Небыд парнӧй согласнӧй бӧрын, мед петкӧдлыны налысь небыдлунсӧ: дядь, зять, лёк, лючки, нёль, нюр, сёй, сюр, тюни, тюрик.

в) Небыд непарнӧй согласнӧйяс ч, щ, дз бӧрын гижсьӧ у, а, о, а оз ю, я, ё : чаг, чужӧм, чожа, площадь, Щорс, Щукин, дзав, дзоля, дзуртны.

Примечание.

1. Ӧткымын заимствуйтӧм кывъясын ч да щ букваяс бӧрын гижсьӧ ё буква: сокращённӧй, учёнӧй.

2. ё вылӧ точкаясыс пуктыссьӧны быть: пулемёт, отчёт, распространённӧй.

6. е буква гижсьӧ:

а) Кыв водзын, мед петкӧдлыны йотированнӧй гласнӧй звук (йэ): егыр, еджыд, ем.

б) Небыд парнӧй согласнӧйяс бӧрын, мед петкӧдлыны налысь небыдлунсӧ: дерт, зеп, некор, тешкодь.

в) Став непарнӧй согласнӧйяс бӧрын: бедь, вевт, гез, жеб, кер, мегыр, петны, чер, шеп, тшем, дзескыд, джек.

7. Э буква гижсьӧ:

а) Кыв водзын да гласнӧй букваяс бӧрын, мед петкӧдлыны йотируйттӧм э звук: эжа, поэт, поэма.

б) Чорыд парнӧй согласнӧйяс бӧрын: дэбыд, зэв, лэч, нэм, сэтӧр, тэ.

8. и буква гижсьӧ:

а) Кыв водзын да гласнӧй букваяс бӧрын: изны, ид, юис, туис, воис, куим.

б) Небыд парнӧй согласнӧйяс бӧрын, мед петкӧдлыны налысь небыдлунсӧ: дивӧ, ӧзим, личыд, ним, син, типография.

в) Став непарнӧй согласнӧйяс бӧрын: пинь, видз, гижны, ори, би, ки, дзир.

9. Буква і гижсьӧ сӧмын чорыд парнӧй согласнӧйяс бӧрын: ді, зіль, вӧлі, сэні, сійӧ, куті.

10. й буква гижсьӧ:

а) и, ы, ӧ водзвылын, мед петкӧдлыны налысь йотациясӧ: йир, йӧв, йыв, дырйи, керйӧн, дорйыны.

б) Кыв помын да согласнӧйяс водзвылын, мед петкӧдлыны краткӧй и (й): вый, яй, выйсӧ, яйтӧ.

11. ь гижсьӧ, мед петкӧдлыны парнӧй согласнӧйяслысь небыдлунсӧ:

а) Кыв помын: бедь, визь, рысь, нёль, нянь, бать.

б) Чорыд согласнӧйяс водзвылын: разьны, босьтны, кольмыны.

в) ӧ, ы букваяс водзвылын: сьӧд, ньӧв, сьывны, ньыв.

г) Кывдін помын небыд согласнӧйяс водзвылын: кольччыны, мельнича, визьнитны, разьсьыны, пасьнитны.

Примечание:

1. Кык ӧткодь небыд парнӧй согласнӧйяс костӧ ь оз гижсьы: колльӧдны, быттьӧ, мыссьыны, доддявны.

2. сть, ндз да нч сочетаниеяс костӧ ь оз гижсьы: мысти, вӧлисти, верстьӧ, кындзи, тӧндзи, кринча, пӧдӧнча.

12. Разделительнӧй знакъяс (ъ, ь) гижсьӧны:

а) Торйӧдан твёрдӧй знак (ъ) гижсьӧ чорыд согласнӧйяс да е, ю, я, ё букваяс костын, кор найӧ шусьӧны торъялӧмӧн: асъя, керъяс, ошъяс, медъён, медъеджыд, яръюгыд.

б) Торйӧдан мягкӧй знак (ь) гижсьӧ небыд согласнӧйяс да е, ю, я, ё букваяс костын, кор найӧ шусьӧны торъялӧмӧн: пиньяс, кизьяс, вӧньяс, кӧчьяс, кыдзьяс.

в) Заимствуйтӧм кывъяс, кӧні эм ъ да ь, гижсьӧны роч кывйын моз жӧ: сырьё, семья, Марья, Дарья, ружьё, съезд, объявление, морковъяс, дробьяс, букварьяс.

Звукъяслӧн аскодяссьӧм.

13. Медым тӧдмавны, кутшӧм буква гижны звукъяс аскодяссигӧн, колӧ кывсӧ вежны сідз, медым аскодялӧм согласнӧй бӧрас лоис гласнӧй звук: вӧтчыны — вӧтіс, вӧтӧдны, велӧдчыны — велӧдіс, велӧдыштны; сотчыны — сотас, сотыштны.

14. Сэтшӧм кывъясын, кӧні аскодялӧм согласнӧй бӧрас гласнӧйсӧ оз позь сувтӧдны, колӧ гижны кык ӧткодь согласнӧй: мыччыны, дорччыны, тувччыны, шойччыны, кольччыны, чеччыны и с. в.

Диалектъясын кывъяслӧн шусьӧм да найӧс гижанног.

15. л да в чередуйтчигӧн кыв помын, кыв шӧрын согласнӧй водзын гижсьӧ в, а гласнӧйяс водзын — л. Например: вӧв, вӧвным, вӧвлы, вӧлӧн; кыв, кывны, кывйӧн, кывъяс, кыла, кыліс; сьыв, сьывны, сьылӧ, сьыліс.

Примечание. Исключениеӧн лоӧны заимствуйтӧм кывъяс да ӧткымын коми кывъяс: колхоз, чулки, колснитны, варов, варовитны, варовӧсь и с. в.

16. Первой слогын е да и водзвылын гижсьӧ

г и к, а оз т и д: гид, гез, гижны, ки, кер, кежны, киссьӧм.

Примечание. Тайӧ правилӧ улӧ оз пырны дерт кыв да заимствуйтӧм кывъяс: телега, дивӧ, деньга.

17. йт да дь пыдди шуӧны ть да йд: няйт пыдди нять, войт пыдди воть, додь пыдди дойд, садь пыдди сайд. Тайӧ случайясын колӧ гижны йт да дь: шайт, войт, няйт, додь, садь, бадь.

Примечание. Исключениеӧн лоӧны мойд кыв да заимствуйтӧм кывъяс: крӧвать, пӧлать.

18. Мӧд да мукӧд слогъясын гижсьӧ ӧ, а оз е (э): гӧрӧд, вӧтчӧм, котӧртӧмӧн, пельӧс, мунӧ, найӧ, майӧг, вольӧс.

Примечание. Тайӧ правилӧ улас оз пырны сложнӧй кывъяс, кодъяслӧн мӧд кыввужъяс вӧлӧма е либӧ э, да заимствуйтӧм кывъяс: ягсер, вӧрлэдзысь, буретш, море, пионер, кӧлеса, ӧбед, радейтӧм, поэт.

19. Мӧд да коймӧд слогъясын гижсьӧ ы, а оз и (і).

а) -ыш да -ыд сочетаниеяс дырйи: кырныш, варыш, вильыш; кӧдзыд, пемыд, шыльыд.

б) -ым, -ын, -ыр, -ыс, -ыль, -ынь, -ысь сочетаниеяс дырйи чорыд согласнӧй бӧрын: ордым, кӧрым; ӧжын, эшкын; вугыр, котыр; тулыс, вурыс; чукыль, ёкмыль; кымынь, вежынь; кепысь, пӧрысь, но: берин, ӧшинь, кысіль.

20. Мӧд да коймӧд слогъясын гижсьӧ и (і), а оз ы:

а) —иг, -ик, -идз, -ич, -иник сочетаниеяс дырйи: пыриг; лудік, сӧвик; дзоридз, ӧмидз; вирич, палич; рудіник, косіник, но: асык.

б) -им, -ин, -ир, -ис, -иль, -ись сочетаниеяс дырйи небыд согласнӧй да гласнӧй бӧрын: яндзим, нёкчим, пӧим, куим; козин, тоин, кӧин; визир; сунис, туис; кӧчиль, ручиль; вӧлись.

в) Кыв помын: вӧсни, посни, сэні, чери, кості, шабді, шонді да с. в.

Примечание. Правилӧяс улӧ оз пырны сложнӧй кывъяс, падежъяслӧн да глаголъяслӧн формаяс.

21. Разнӧй диалектъясын шуӧны лыа и лыва, нуа и нува, лоӧ и ловӧ, воис и войис, нуис и нуйис, но гижигӧн в да й оз гижсьыны, кор кыввужъяс найӧ абуӧсь: лыа, нуа (нуны), лоӧ (лоны), воис (воны), нуи (нуны), но кыввуж помын й сохраняйтчӧ, кор кыввужъяс сійӧ эм: сёйис (сёйны), вайис (вайны), лойис (лойны).

Заимствуйтӧм кывъяс гижанног.

22. ф, х, ц, щ букваяса заимствуйтӧм кывъясын гижсьӧны сійӧ жӧ букваясыс, а оз п, к, ч, тш букваяс: фабрика, февраль, флот, революция, фронт, химия, колхоз, свинец, перец, Щукин, ящик.

Примечание. Важӧн заимствуйтӧм либӧ ёна вежсьӧм кывъясын гижсьӧны п, к, ч букваяс: пӧнар, сарапан, партук, кӧзяин, больнича, улича, кузнеча, кольча, кампет, кӧть.

23. Заимствуйтӧм кывъясын мягкӧй знак сохраняйтчӧ: степь, речь, октябрь, октябрьскӧй, букварь, морковь, крӧвать, ӧчередь, вещь.

Примечание. Кор кывдіныс помассьӧ непарнӧй согласнӧй вылӧ, падежнӧй кывйыв да морта суффикс водзын ь оз гижсьы: букварӧ, букварыс, букварсӧ, букварас, речыс.

24. Заимствуйтӧм кывъяс гижигӧн ж да ш бӧрын шусьӧ ы, но гижсьӧ и: шинель, житник, ужин, шила, ӧшибка.

25. Заимствуйтӧм кывъясын, кодъяс помассьӧны -сть вылӧ (ведомость, власть, вӧлӧсть, гӧсть), т бӧрын ь кольӧ быд падеж формаын, ина падежын II да III морта формаысь кындзи: промышленность, промышленностьын, промышленностькӧд, но: промышленностяс, промышленностяд.

26. Заимствуйтӧм кывъясын, орччӧн кӧ сулалӧны кык ӧткодь согласнӧй, гижсьӧны кыкнанныс жӧ: металл, металлысь, грамм, касса, классӧ.

27. Роч нимъяс да овъяс официальнӧй да переводнӧй литератураын гижсьӧны сідз жӧ, кыдзи и рочын: Горький, Маяковский, Салтыков-Щедрин, Василий, Алексей.

28. -ние вылӧ помассян заимствуйтӧм кывъяс гижсьӧны сідз жӧ, кыдзи и рочын: собрание, правление, объявление.

Сложнӧй кывъяс гижанног.

29. Сложнӧй кывъяс гижсьӧны ӧтлаӧ:

а) Кор ӧти либӧ кыкнан кывйыс, кодъясысь артмӧма сложнӧй кывйыс, воштӧмаӧсь ассьыныс самостоятельнӧй значениенысӧ: понпуш, зарава, коляоз, тшайпод.

б) Кор кык кыв ӧтлаын сетӧны выль паськыдджык понятие: нырвом (лицо), тымус (внутренность), паськӧм (одежда).

в) Кор кык кыв ӧтлаасьӧмӧн сетӧны выль понятие: синва, юрси, вабергач, няньшом, лунтӧв, коктуй, кипыдӧс, кӧрттуй, черинянь.

Примечание.

1. Определительнӧй сочетаниеа кывъяс, кодъяс оз артмӧдны выль понятие, гижсьӧны торйӧн: вӧв ку, пыж ныр, пызан кок, кӧрт пач, пу керка, вӧр туй, вурыс туй, гӧлӧс шы, кок пыдӧс, шор ва, додь вож, сёрӧм йӧр, ки кучик, пожӧм пу, но: пипу, ловпу, жовпу.

2. Вӧрлэдзысь, скӧтвидзысь кывъяс гижсьӧны ӧтлаӧ. Мукӧд татшӧм сочетаниеяс гижсьӧны торйӧн: пес поткӧдлысь, мӧс видзысь, кага видзысь, сапӧг вурысь, чери кыйысь.

г) Кор кык кывйысь артмӧ переноснӧй значениеа выль кыв: катшасин (ромашка), мырпом (морошка), урбӧж (хвощ), уджйӧз (долг), балябӧж (затылок), турипув (клюква), войтӧв (судорога), сьӧлаоз (поленика).

д) Кор джын кыв сулалӧ существительнӧй бӧрын: воджын, лунджын, ведраджын.

е) Кор джынъя кыв сулалӧ существительнӧй бӧрын да ӧтлаын сыкӧд артмӧдӧ прилагательнӧй: ведраджынъя чугун, арджынъя кага, но: джынъя чугун, ведраӧй джынъя.

30. Сложнӧй кывъяс гижсьӧны дефис пыр:

а) Кор кык кыв сетӧны собирательнӧй значение: му-ва, чой-вок, керка-карта, сьӧла-тар, нянь-сов, кӧмкот-паськӧм, катша-рака.

Примечание. Исключениеӧн лоӧны: аймам, нывзон, видзму.

б) Кор ӧти кывйыс шусьӧ мӧдпӧв кывйыслысь значениесӧ ёнмӧдӧм могысь: лун-лун, ылын-ылын, бурысь-бур, муртса-муртса, мичаысь-мича.

в) Ӧткодь значениеа парнӧй кывъяс: олан-вылан, ветлысь-мунысь, чукыль-мукыль, керӧм-вӧчӧм, сідз-тадз.

г) Паныд значениеа кывъяс: улӧ-вылӧ, бӧрӧ-водзӧ, лун-вой, кузя-дженьыда, ӧтарӧ-мӧдарӧ.

д) Совместность петкӧдлысь кывъяс: лӧза-гӧрда, ая-пиа, тэа-меа, ныла-зонма, киа-кока.

е) Парнӧй изобразительнӧй кывъяс: зиль-зёль, сюр-сяр, гыма-гамакылӧ, сюв-сявмуні, шувк-шавккерис.

ж) Кор джынйӧн (джынйӧна) кыв согласуйтчӧ водзвылас сулалысь существительнӧйкӧд падежын: ведраӧн-джынйӧн, воӧн-джынйӧн, арӧн-джынйӧна.

Существительнӧйяс гижанног.

31. Падеж кывйывъяс да морта суффиксъяс гижсьӧны дефис пыр:

а) Заимствуйтӧм сложнӧй сокращённӧй кывъяскӧд, кодъяс артмӧмаӧсь первой согласнӧй букваысь: ЦК-ын, СНК-лӧн, МТС-лы, но: вузын, риклы.

б) Торъя букваяскӧд: в-тӧгыс, у-ыслы.

в) Книга, газета, журнал, колхоз нимъяскӧд: «Вӧрлэдзысь»-лӧн, «Ударник»-ысь, «Гӧрд знамя»-лы.

32. Ув, дор, выв, сай, берд, дін, йыв, весьт, шӧр, кост, водз, пом, бок кывъяс существительнӧйкӧд гижсьӧны разнӧя:

а) Нимтан да керан падежъясын найӧ гижсьӧны ӧтлаын: пызанвыв, пызанвывсӧ, керкасай, туйвыв, керкавесьт, пудін, ӧшинюв, пызандор, пызандорсӧ, туйшӧр, пачбок, керпом.

б) Тайӧ кывъяс быд падежын гижсьӧны ӧтлаын, кор найӧ артмӧдӧны существительнӧйяскӧд сложнӧй кывъяс: войвыв, лунвыв, асыввыв, подув, вадор, посводз, верӧссайӧ да с. в.

в) Кор найӧ местнӧй падежъяс формааӧсь мунӧны кывбӧръяс пыдди, сэк гижсьӧны торйӧн: керка весьтын, колхоз бердӧ, вӧр дорті, сьӧлӧм вылӧ, дум вылысь, миян дінын да с. в.

33. Ин, лун, пи, пу, тор, туй кывъяс гижсьӧны ӧтлаӧ, кор найӧ мунӧны суффиксъяс пыдди и артмӧдӧны выль значениеа существительнӧйяс: кыйсянін, оланін, вӧраин, турунаин; бурлун, зільлун, коланлун; кӧчпи, сирпи, ӧшпи; черпу, гӧтырпу, зятьпу; буртор, чӧскыдтор, вӧчантор; морттуй, киподтуй.

Прилагательнӧйяс гижанног.

34. Сложнӧй прилагательнӧйяс, кодъяс петкӧдлӧны ӧтик цвет, гижсьӧны ӧтлаын: кельыдлӧз дӧрӧм, яръюгыд би, турунвиж краска, кольквиж краска, лӧзовгӧрд, пемыдлӧз.

35. Кодь суффикс прилагательнӧйяскӧд гижсьӧ ӧтлаын: ыджыдкодь гуран, улькодь турун, важкодь пинжак, мичакодь лун.

36. Прилагательнӧйяс, кодъяс артмӧмаӧсь существительнӧйысь: ув, дор, выв, сай, чӧж, берд, дін, весьт да мукӧд кывъяскӧд са да ся суффиксӧн, гижсьӧны ӧтлаӧ: районувса, съездвывса, карбердса, туйдорса, вочӧжся, зорӧдвесьтса, туйсайса, пурдінса.

37. Сложнӧй прилагательнӧйяс, кодъяс артмӧмаӧсь числительнӧйясысь либӧ быд, ас да аслыс местоимениеясысь пӧлӧс, сяма, нога, сикас, руа кывъясӧн, гижсьӧны ӧтлаӧ: кыкпӧлӧс нянь, кыкнога сёрни, куимсикас турун, быдсяма пӧтка, аслыспӧлӧс морт, аслыснога висьталӧм.

38. Превосходнӧй степень петкӧдлысь мед кыв прилагательнӧйяскӧд гижсьӧ пыр ӧтлаын: медбур, медъён, медыджыд, медъюгыд.

39. Медся, зэв, сап, дзурс, вель, сім, чим, вывті превосходнӧй степень петкӧдлысь кывъяс гижсьӧны прилагательнӧйяскӧд торйӧн: медся ыджыд, зэв ён, вель мича, чим гӧрд, сап пемыд, сім сьӧд, вывті гажа.

40. Паныд да совместность значениеа прилагательнӧйяс гижсьӧны дефис пыр: лӧза-гӧрда, сьӧда-еджыда, синма-пеля, чера-пищаля.

41. Кор прилагательнӧйыс шусьӧ мӧдпӧв воддза кывйыслысь значениесӧ ёнмӧдӧм могысь, гижсьӧ дефис пыр жӧ: мича-мича, выльысь-выль, ыджыд-ыджыд.

42. Заимствуйтӧм прилагательнӧйяс помӧ гижсьӧ -ӧй, -ӧвӧй: большевистскӧй партия, трудӧвӧй интеллигенция, средньӧй школа.

43. вылӧ помассьысь прилагательнӧйяс помӧ пыр гижсьӧ -ыд: пемыд, кӧдзыд.

Числительнӧйяс гижанног.

44. Тыр дасъяс да сёяс петкӧдлысь количественнӧй числительнӧйяс гижсьӧны ӧтлаӧ: сизимдас, кӧкъямысдас, ӧкмысдас, куимсё, кӧкъямыссё, а став мукӧд числительнӧйясыс гижсьӧны торйӧн: дас ӧти, дас вит, кызь квайт, ветымын сизим, сизимдас вит, кык тысяча, куим миллион, вит миллиард.

45. Неопределённӧй числительнӧйяс гижсьӧны дефис пыр: вит-ӧ-квайт, куим-ӧ-нёль, кык-куим, морт-мӧд, гоз-мӧд-коймӧд, но: морт кык, километр нёль.

46. Числительнӧйяс кывбӧркӧд гижсьӧны торйӧн: сё кымын, квайтымын гӧгӧр, тысяча сайӧ.

47. Порядкӧвӧй числительнӧйяслӧн —ӧд суффикс цифраяскӧд гижсьӧ дефис пыр: 5-ӧд, 25-ӧд, 101-ӧд.

48. Коллективнӧй формаа собирательнӧй числительнӧйясын гижсьӧ кык н: кыкнанным, кыкнанныд, кыкнанныс.

Местоимениеяс гижанног.

49. Неопределённӧй местоимениеясын кӧ частица гижсьӧ ӧтлаын: кодкӧ, кодъяскӧ, кодлӧнкӧ, мыйкӧ, кутшӧмкӧ. Мукӧд местоимениеяскӧд кӧ частица гижсьӧ торйӧн: сійӧ кӧ, ме кӧ, тайӧ кӧ.

50. Отрицательнӧй местоимениеын не частица гижсьӧ ӧтлаын: некодныс, некутшӧм. Мукӧд местоимениеяскӧд не частицаыс гижсьӧ торйӧн: не сійӧ, не ме, не быдӧн, не татшӧм.

51. Местоимениеяс кывбӧръяскӧд гижсьӧны торйӧн: эсы ордын, сы водзын, эта понда, на кодь, ми дорын, та йылысь, та моз.

52. Парнӧй значениеа местоимениеяс гижсьӧны дефис пыр: тэа-меа, сэтшӧм-татшӧм.

53. Сложнӧй неопределённӧй местоимениеяс гижсьӧны ӧтлаӧ: мыйсюрӧ, кутшӧмсюрӧ.

Примечание. Сюрӧ кывйыс кӧ мунӧ глагол значениеын, сэк мукӧд кывъяскӧд гижсьӧ торйӧн: мый сюрӧ, сійӧс и вай.

Глаголъяс гижанног.

54. Первой колян када кывйывъясын колӧ гижны и (і), а оз ы: лыдди, муні, сёйи, мунін, сёйин, лыддин; сёйис, муніс, лыддис.

55. Ӧтка лыда мӧд морта формаын тшӧктан глагол помын гижсьӧ ы, а оз и: пуксьы, велӧдчы, пышйы.

56. Первой колян када отрицательнӧй глаголъясын отрицательнӧй частицаясын гижсьӧ э, а оз и: эг дур, энӧ дурӧй, эз дур.

57. Возвратнӧй глаголъясын д да т бӧрын гижсьӧ ч, а оз сь: купайтчӧ, велӧдчӧ, но: мыссьӧ, тышкасьӧ.

Неопределённӧй, страдательнӧй да помассян значение петкӧдлысь возвратнӧй глаголъясын пыр гижсьӧ сь: петсьӧ, мунсьӧ, лыддьыссьӧ, вартсьӧ, стрӧитсьӧ, гижсьӧ.

58. Кык ӧткодь значениеа глаголъяс гижсьӧны дефис пыр: паськалӧ-разалӧ, керис-вӧчис, олӧ-вылӧ, дзужгӧ-кыскӧ.

59. Паныд значениеа глаголъяс гижсьӧны дефис пыр жӧ: кывтӧ-катӧ, мунӧ-локтӧ, лэччӧ-кайӧ.

60. Мунны, кывны, вартны, видзны глаголъяс изобразительнӧй кывъяскӧд гижсьӧны ӧтлаӧ: зильмунны, зилякывны, жервидзны, пасьвартны, кув-ковмунны да с. в.

61. Глаголъяскӧд кодь частица гижсьӧ ӧтлаӧ: вӧрзьыштіскодь, вешйыштіскодь, банйыштіскодь.

62. Сложнӧй изобразительнӧй глаголъяс, кодъяс артмӧмаӧсь изобразительнӧй кывйысь да мунӧ, кылӧ, вартӧ да видзӧ глаголъясысь, прӧстӧй глаголъяскӧд гижсьӧны торйӧн: зёльмуні жугалі, грымкылӧ уси, сюв-сявкылӧ зэрмис, куткырвидзӧ пукалӧ.

63. Глаголъяс, кодъяс артмӧмаӧсь кывбӧра числительнӧйясысь, гижсьӧны ӧтлаӧ: кыкмындаавны, кыкпӧвставны.

64. Глагол кывдінысь артмӧм причастиеясын век гижсьӧ -ысь, а оз -ись: мунысь морт, йирсьысь вӧв, сёйысь мӧс, бӧрдысь кага, лыддьысьысь детинка.

65. -иг суффикса деепричастиеяс тыр, тырйи, моз, чӧж, кості, кежлӧ кывъяскӧд гижсьӧны ӧтлаын: сёйигмоз, вурсигчӧж, мунігтырйи, висьталігкості, кывтігкежлӧ.

Наречиеяс гижанног.

66. Наречиеяс гижсьӧны ӧтлаӧ:

а) Кодъяс артмӧмаӧсь существительнӧйысь быд, тыр, йыв, выв кывъясӧн: войбыд, арбыд, китыр, кокйыв, кивыв, дорвыв, водзвыв.

б) Кодъяс артмӧмаӧсь прилагательнӧйысь пырысь, кузя, ногӧн, моз, пӧв кывъясӧн: радпырысь, лёккузя, выльногӧн, важмоз, выльпӧв.

в) Кодъяс артмӧмаӧсь числительнӧйысь ног, ногӧн, пӧв, пӧрйӧ, пӧвстӧн кывъясӧн: кыкногӧн, мӧдногӧн, кыкпӧв, кыкпӧрйӧ, кыкпӧвстӧн.

г) Кодь частицакӧд: ылынкодь, ёнакодь, унакодь, матынкодь, дыркодь.

д) Кӧ да не частицаяскӧд: кӧнкӧ, кыткӧ, кыськӧ, коркӧ, кытчӧкӧ, сідзкӧ, гашкӧ, буракӧ; некор, некыдзи, некӧн, неылын, но: не ылын, а матын.

е) Кодъяс артмӧмаӧсь вопросительнӧй кывъясысь сюрӧ кывйӧн: кыдзсюрӧ, корсюрӧ, кӧнсюрӧ, кытчӧсюрӧ.

ж) Кодъяс артмӧмаӧсь кык кывйысь ни частицаӧн: сійӧ куйлӧ сінисадь, найӧ пукалӧны шынитӧв, ывлаыс лёкмис синнипель.

Примечание. Татшӧм наречиеяссӧ оз ков сорлавны однороднӧй членъяскӧд, кодъяс йитчӧмаӧсь ни союзӧн: кильчӧ пос уланыд абу зыр ни рос; сылӧн оз тыдав син ни пель.

з) Ӧт кыввужъя сложнӧй наречиеяс: ӧтпырйӧ, ӧттшӧтш, ӧтвылысь, ӧтмоз.

67. Гижсьӧны дефис пыр:

а) Паныд да усилительнӧй значениеа парнӧй кывъя наречиеяс: ӧтарӧ-мӧдарӧ, сідз-тадз, бӧра-водза, пырысь-пыр.

б) Изобразительнӧй наречиеяс: шувк-шавк, тур-тар.

в) Наречие ӧ частицакӧд: дыр-ӧ, ёна-ӧ.

68. Гижсьӧны торйӧн:

а) Наречиеяс кывбӧръяскӧд: недыр мысти, недыр кежлӧ, талун кежлӧ.

б) Наречиеяс медся, зэв, вель кывъяскӧд: медся ёна, зэв мича, вель дыр, но: медъёна, медмичаа.

Кывбӧръяс гижанног.

69. Кывбӧръяс существительнӧйяскӧд, местоимениеяскӧд, числительнӧйяскӧд да наречиеяскӧд век гижсьӧны торйӧн: туй пӧлӧн, бӧчка кыза, во чӧж, лун кежлӧ, керка бердын, ва моз, сы кузя, ас моз, та кодь, миян пӧвстын, ас кежысь, ме ног, тіян ног, кык дінӧ, дас мында, вит пельӧ, мунӧм бӧрын, велӧдчысь дор, велӧдчӧм мысти, ош кодь, недыр мысти.

Примечание. а) Чӧж, кежлӧ, кості, тыр, тырйи кывъяс -иг суффикса деепричастиекӧд гижсьӧны ӧтлаын: мунігкежлӧ, локтігчӧж, йӧктігтырйи, сьылігмоз.

б) Кодь, моз, ног кывъяс, кыдзи кывбӧръяс, гижсьӧны торйӧн сӧмын существительнӧйкӧд да местоимениекӧд, а мукӧд кывсикаскӧд, кыдзи суффиксъяс, гижсьӧны ӧтлаӧ: кыкног, унаног, важмоз, вылькодь, унакодь.

Союзъяс гижанног.

70. Гижсьӧны ӧтлаӧ союзъяс:

а) Нето: нето вӧв, нето мӧс.

б) Сідзжӧ да тадзжӧ: Гижисны быдӧн, и Ваня сідзжӧ гижис. Сідзжӧ да тадзжӧ союзъясӧс оз ков сорлавны частицаа наречиеяскӧд: ме диктант гижи сідз жӧ, кыдзи и Ваня. Тані сідз— наречие, а жӧ— частица.

Частицаяс гижанног.

71. Частицаяс гижсьӧны торйӧн:

а) Ӧмӧй, ли, нӧ, со, вот, и, инӧ, тай, ни, абу, ог, оз, он, эг, эз, эн, эськӧ, да, нин, на, нӧшта, бара, весиг, сӧмын да мукӧд: Он жӧ пӧ мун. Важӧн ӧд нин мунісны.

б) Кӧ частица условнӧй глаголъяскӧд: Эшта кӧ, ветла иславны.

в) Не частица существительнӧйяскӧд, числительнӧйяскӧд, глаголъяскӧд: Не морт моз горӧдіс. Не вуджны тайӧ юсӧ.

72. Частицаяс гижсьӧны дефис пыр:

а) Ӧ да а частицаяс: Ветла кӧ-а? Ветлін-ӧ?

б) Кӧ частица порядок петкӧдлысь вводнӧй кывъяскӧд: ӧтик-кӧ, мӧд-кӧ, коймӧд-кӧ.

73. Частицаяс гижсьӧны ӧтлаын:

а) Кӧ частица неопределённӧй местоимениеяскӧд да наречиеяскӧд: кодкӧ, кӧнкӧ, кытчӧкӧ.

Примечание. Вводнӧй кывъяскӧд тайӧ частицаыс гижсьӧ ӧтлаын жӧ: кыдзкӧ, вӧлӧмкӧ, быттьӧкӧ.

б) Не частица отрицательнӧй местоимениеяскӧд да наречиеяскӧд: некод, некутшӧм, некор, некытчӧ.

в) Не частица прилагательнӧйяскӧд, кор сійӧ артмӧдӧ выль кыв, кодӧс позьӧ вежны мӧд кывйӧн: неыджыд— ичӧт, негырысь— посни, но: не ыджыд, а ичӧт.

г) Мед частица прилагательнӧйяскӧд да наречиеяскӧд: медбур, медбура, но глаголъяскӧд торйӧн: мед бурасяс, мед гижас.

Комментируйтны да содтавны ыстӧгъяс оз позь