Коми кывтӧдӧм

Небӧгса йӧзӧдӧм:

Коми орфографическӧй словарь. Сыктывкар, Коми книжнӧй издательство, 1959. Лб. 5-30.

 

ОРФОГРАФИЧЕСКӦЙ ПРАВИЛӦЯС

Алфавит

1. Коми алфавитын 35 буква:

Аа, Бб, Вв, Гг, Дд,

а, бэ, вэ, гэ, дэ,

Ее, Ёё, Жж, Зз, Ии,

е, ё, жэ, зэ, и,

Іі, Йй, Кк, Лл, Мм,

точкаа и, и краткӧй, ка, эль, эм,

Ни, Оо, Ӧӧ, Пп, Рр.

эн, о, ӧ, пэ, эр,

Сс, Тт, Уу, фф, Хх,

эс, тэ, у, эф, ха,

Цц, Чч, Шш, Щщ, Ъъ,

цэ, че, ша, ща, твёрдӧй знак,

Ыы, Ьь, Ээ, Юю, Яя.

ы, мягкӧй знак, э оборотнӧй, ю, я.

Звукъяс да букваяс

2. Гласнӧй звукъяс: а, и, о, ӧ, у, ы, э.

Гласнӧй букваяс: а, я, и, і, о, ӧ, э, е, ё, у, ю, ы.

3. Согласнӧй звукъяс: б, в, г, д, дь, дж, дз, ж, з, зь, й, к, л, ль, м, н, нь, п, р, с, сь, т, ть, тш, ф, х, ц, ч, ш, щ.

Согласнӧй букваяс: б, в, г, д, ж, з, й, к, л, м, н, п, р, с, т, ф, х, ц, ч, ш, щ.

4. Дж, дз, тш звукъяс пасйыссьӧны дж, дз,тш букваяс сочетаниеӧн: джадж, джодж, дзоридз, кодзув, тшӧтш, тшак. Кор кывйын орччӧн сулалӧны кык дз, сэк найӧ пасйыссьӧны ддз пыр: кыддза, соддзӧн, воддза.

5. ъ (твёрдӧй знак) да ь (мягкӧй знак) оз обозначайтны некутшӧм звук.

6. Согласнӧй звукъяс чорыдлун да небыдлун серти юксьӧны:

а) звукъяс вылӧ, кодъяс вермӧны лоны чорыдӧн и небыдӧн. Найӧ шусьӧны парнӧй согласнӧйясӧн.

Чорыд парнӧй согласнӧйясӧн лоӧны д, з, л, н, с, т звукъяс: сад, доз, кодӧс; зэв, оз; лок, олӧ, вӧла; нӧб, джын, дона; сім, тас; тулыс, потан, топыд.

Небыд парнӧй согласнӧйясӧн лоӧны дь, зь, ль, нь, сь, ть звукъяс: бадь, дьӧгӧдь, дивӧ, дерт; зеп, позьӧ, зильгыны; лёк, вӧля, плеть, кольны; нянь, ньӧв, ниа, небыд; сям, сюмӧд, усьны, син; тёпкан, тертука;

б) чорыд непарнӧй согласнӧйяс вылӧ, кытчӧ пырӧны б, в, г, дж, ж, к, м, п, р, тш, ф, х, ц, ш звукъяс;

в) небыд непарнӧй согласнӧйяс вылӧ, кытчӧ пырӧны дз, ч, й, щ звукъяс: кӧдза, дзав, кыдз; чань, чер, кӧч; вой, кыйны; пищаль, ящик.

Примечание, дж, тш звукъяс лоӧны чорыд парнӧй согласнӧйясӧн жӧ, а дз, ч — небыд парнӧй согласнӧйясӧн, но найӧс ми условнӧ (практическӧй могъяс понда) лыддям непарнӧйӧн сы понда, мый тайӧ нёльнан звукъяслы эм аслыспӧлӧс буква.

Букваяс употребляйтӧм

7. е, ё, ю, я букваяс гижсьӧны кыв заводитчигӧн, гласнӧйяс бӧрын да ъ и ь бӧрын кык звук пасйӧм вылӧ: я — йа (яг, пиян, кӧсъя, кӧчьяс), ю — йу (юр, июль), е — йэ (ем, боец, медъеджыд), ё — йо (ёль, медъён, заём).

Тайӧ жӧ букваяс петкӧдлӧны д, з, л, н, с, т парнӧй согласнӧйяслысь небыдлунсӧ да обозначайтӧны а, о, у, э гласнӧйясӧс: дядь, нюр, нёль, тешкодь, лёк, сюмӧд.

8. ч, щ да дз небыд непарнӧй согласнӧйяс бӧрын гижсьӧны а, о, у гласнӧйяс, а оз ю, я, ё: чаг, чом, чужӧм, дзав, дзор, кодзув, площадь, Щорс, Щукин.

Примечание. Заимствуйтӧм кывъясын ч да щ бӧрын вермас гижсьыны и ё: зачёт, учёт, отчёт, сокращённӧй,

9. э буква гижсьӧ:

а) кыв заводитчигӧн: эжа, эськӧ, эм, энька, эжӧр, эскыны;

б) д, з, л, н, с, т чорыд парнӧй согласнӧйяс бӧрын, медым петкӧдлыны налысь чорыдлунсӧ: дэбыд, зэв, лэч, нэм, сэтӧр, тэ;

в) заимствуйтӧм кывъясын гласнӧйяс бӧрын: поэт, поэма, аэроплан.

Мукӧд став согласнӧйяс бӧрын гижсьӧ е буква: кер, берд, ме, чери, дзескыд, общество.

10. и, і букваяс обозначайтӧны ӧти и сійӧ жӧ гласнӧй звук.

і буква гижсьӧ д, з, л, н, с, т чорыд парнӧй согласнӧйяс бӧрын, медым петкӧдлыны налысь чорыдлунсӧ: ді, зі, вӧлі, сім, ті, муніс.

Став мукӧд согласнӧйяс бӧрын, гласнӧйяс бӧрын да кыв водзын гижсьӧ и: ӧзим, син, ӧти, диван, видз, гид, ки, чир, дзир, иган, идзас, кӧин.

11. ь гижсьӧ, мед петкӧдлыны согласнӧйяслысь небыдлунсӧ:

а) кыв помын: бедь, визь, сись, пель, нянь, бать;

б) кыв шӧрын, д, з, л, н, с, т небыд парнӧй согласнӧйяс бӧрын, чорыд согласнӧйяс водзвылын: босьтны, разьны, пельса, садьмыны, паськӧм;

в) кыв шӧрын, д, з, л, н, с, т небыд парнӧй согласнӧйяс бӧрын, ӧ да ы гласнӧйяс водзын: тьӧс, льӧм, ньӧв, сьӧм, ньылӧм, сьылӧм;

г) кыв шӧрын кык разнӧй небыд согласнӧйяс костын: разьсьыны, кольча, визьнитны, мельнича.

Примечание 1. Кыв шӧрын кык ӧткодь небыд парнӧй согласнӧйяс костӧ ь оз гижсьы: мыссьыны, лыддьыны, быттьӧ, вевттьыны.

Но ӧткымын кывйын ь вермӧ лоны кык небыд с согласнӧй костын, медым торйӧдны найӧс мӧд значениеа кывйысь: пасьсянь ср. пассянь; косьсянь ср. коссянь.

Примечание 2. сть, ндз, нч сочетаниеяс костӧ ь оз гижсьы: мысти, вӧлисти, кындзи, тӧндзи, кринча, пӧдӧнча.

12. Заимствуйтӧм кывйын кӧ небыд р бӧрын эм ь, коми кывйын сійӧ гижсьӧ жӧ: букварь, лагерь, токарь, октябрь, октябрьскӧй, ноябрьскӧй.

Примечание. Основа бӧрын окончаниеяс да личнӧй суффиксъяс водзын р бӧрын ь оз гижсьы: букварын, букварӧ, букваркӧд; лагерсянь, лагерным, лагерӧ.

13. Заимствуйтӧм кывъясын, кодъяс помасьӧны сть вылӧ, ть звуклӧн небыдлуныс пыр пасйыссьӧ: область, областьын, областьсянь, областяс (областьас), областяд (областьад).

14. Торйӧдан знакъяс (ъ, ь) гижсьӧны:

а) торйӧдан твёрдӧй знак (ъ) гижсьӧ чорыд согласнӧйяс бӧрын е, ё, ю, я букваяс водзвылын: козъя, асъя, тшӧтшъя, джаджъя, кӧсъя, ошъяс, медъён, яръюгыд, медъеджыд;

б) торйӧдан мягкӧй знак (ь) гижсьӧ небыд согласнӧйяс бӧрын я буква водзвылын: кӧчьяс, пиньяс, кыдзьяс, додьяс.

Примечание 1. Заимствуйтӧм кывъясын кӧ эмӧсь торйӧдан знакъяс (ъ, ь), найӧ гижсьӧны жӧ: объявление, съезд, адъютант; семья.

Примечание 2. й согласнӧй бӧрын я буква водзын торйӧдан ъ да ь оз гижсьыны: туйяс, войяс, сойяс, чойяс.

15. ф, х, ц, щ букваяс гижсьӧны заимствуйтӧм кывъясын: ферма, физика, флот, фотография, футбол; революция, социализм, станция, циркуль, лекция; химия, колхоз, совхоз, техникум; клещи, сдельщина, общество, ящик, щӧка, пищаль, щель, щӧть.

Примечание. Важӧн заимствуйтӧм ӧткымын кывъясын ф, х, ц букваяс пыдди гижсьӧны п, к, ч букваяс: пӧнар, партук, шкап, кампет, картупель, шарп, сарапан; петук, укват, жӧник, плака, ӧклупень, кӧзяин, лӧкань, сакар, сукар, кӧть; купеч, мельнича, кузнеч, кузнеча, больнича, свинеч, ситеч, горнича, гӧбӧч, гӧснеч, дӧвеч, кӧсича, купальнича, клянича, чеп, пӧдӧнча, ножич, улича, чӧлкӧвӧй, яеснича, кольча, молодеч.

Звукъяс аскодялігӧн кывъяс гижанног

16. Кор небыд согласнӧй аскодялӧ сы бӧрвылын сулалысь и согласнӧйӧс, сэк гижсьӧ кык ӧткодь небыд согласнӧй: беддя, доддя, колльӧдны, лыддьыны, мырддьыны, вевттьыны, лёддзӧн, соддзӧн.

Примечание 1. Заимствуйтӧм общественно-политическӧй, официальнӧй (делӧвӧй) да с. в. кывъяс гижсьӧны аскодявтӧг: правление, объявление, заседание, звание, соревнование, учреждение, занятие, предприятие, мероприятие, орудие, судья.

Примечание 2. Заимствуйтӧм важся бытӧвӧй кывъяс гижсьӧны аскодялӧмӧн: зелля, каллян, ускӧттьӧ, пӧпуттьӧ, угоддьӧ, платтьӧ, печенньӧ, варенньӧ, белльӧ, жалӧванньӧ, рӧзӧренньӧ.

17. Кор бӧрын сулалысь согласнӧй аскодялӧ водзын сулалысь согласнӧйӧс, сэк гижсьӧ сэтшӧм согласнӧй, коді должен лоны кыв вужъяс либӧ основаас. Тайӧс позьӧ тӧдмавны кыв вуж либӧ основа дінас гласнӧйӧн заводитчысь окончаниеяс либӧ суффиксъяс вайӧдӧмӧн, например: вӧтчыны (вӧтӧдіс), сотчыны (сотӧ), вотчыны (вотӧс), кытчӧ (кыті), содтыны (содӧ), велӧдчыны (велӧдӧ), пӧрӧдчыны (пӧрӧдіс), кылӧдчыны (кылӧдіс).

Кыв вуж либӧ основа значение сертиыс кӧ оз тӧдчы, кутшӧм согласнӧй должен лоны кыв вужъяс либӧ основаас, сэк гижсьӧ кык ӧткодь согласнӧй: чеччыны, мыччыны, шойччыны, кольччыны, тувччыны, орччӧн, пӧрччысьны, мӧрччыны.

Примечание. Заимствуйтӧм кывъяс гижсьӧны аскодявтӧг: кажитчыны, надейтчыны, бритчыны, рисуйтчыны, пилитчыны, докладчик, лётчик, разведчик, пулемётчик.

Звукъяс употребляйтӧм

18. Кыв помын да кыв шӧрын согласнӧй водзын шусьӧ да гижсьӧ в, а гласнӧйяс водзын л: ныв, нывлӧн, нылӧй; вӧв, вӧвным, вӧлӧн; сьыв, сьывны, сьылыштны.

Примечание. Изобразительнӧй да заимствуйтӧм кывъясын, а сідз жӧ -ов суффикса прилагательнӧйясын вермӧны лоны согласнӧй водзын л да гласнӧй водзын в: колскыны, калскыны, равӧстны, нявӧстны, лӧзовӧсь, гӧрдовӧсь, чулки, мел, боевӧй.

19. Кыв заводитчигӧн и да е водзвылын шусьӧ да гижсьӧ г, а оз д: гид, гижны, гез, но дерт; к, а оз т: ки, кер, кепысь.

Примечание. Тайӧ правилӧ улӧ оз пырны заимствуйтӧм кывъяс: деньга, дивӧ, телега, телефон.

20. Кыв основа помын шусьӧ да гижсьӧ дь, а оз йд: додь, бадь, садь, гадь, но мойд — мойдны; йт, а оз ть: няйт, квайт, войт, шайт.

Примечание. Заимствуйтӧм кывъяс тайӧ правилӧ улӧ оз пырны: пӧлать, крӧвать.

21. Кывйын мӧд, коймӧд да мукӧд слогъясын шусьӧ да гижсьӧ ӧ, а оз э (е): пельӧс, майӧг, вайӧ, котӧрӧн, мунӧ, кайӧ.

Примечание. Сложнӧй да заимствуйтӧм кывъясын э (е) вермас лоны мӧд да бӧръяджык слогъясын: буретш, ягсер, вабергач, море, кудель, радейтӧм, енэж, поэт.

22. Кык слога существительнӧйяслӧн, прилагательнӧйяслӧн, наречиеяслӧн да кывбӧръяслӧн основаяс помын шусьӧ да гижсьӧ и (і), а оз ы: чери, шабді, шонді, ёді, шобді, йики; вӧсни, посни, кокни, мелі; сэні, тані, маті, сэті, таті, пыді, кӧні, кыті; бӧрти, серти, пыдди; зури-зари.

23. Кыв вуж бӧрын гласнӧйяс водзын кӧ кылӧны содтысян й, к, м, т согласнӧйяс, найӧ гижсьӧны: ошкӧс, нитшкӧс, нӧшкӧс, мӧскӧн, роскӧн; зонмыс, синмыс; зептысь, гӧптын, шептысь; керйӧ, горйыс, чомйын, гезйӧн.

Кыв вуж бӧрын согласнӧйяс водзын содтысян й, к, м, т согласнӧйяс оз кывны ни оз гижсьыны: зепсӧ, шепсӧ.

24. Кыв вужйын кӧ эм й, сійӧ век гижсьӧ: койис (кой-ны), вайис (вай-ны), кыйис (кый-ны).

Примечание 1. Пӧим, куим, кӧин, туис, тоин кывъясын й оз гижсьы.

Примечание 2. Кор кыв вужйыс помассьӧ гласнӧйӧн да окончаниеыс либӧ суффиксыс заводитчӧ гласнӧйсянь жӧ, сэк на костӧ и буква оз гижсьы: нуис (нуны), шуис (шу-ны), лоис (ло-ны).

Сложнӧй кывъяс гижанног

25. Сложнӧй кывъяс гижсьӧны ӧтлаын:

а) кор кык кывйысь артмӧ выль кыв (выль понятие): балябӧж, дурпоп, катшасин, катшашыдӧс, турипув, урбӧж, ужпинь, шырби, ыжнёнь, зӧртусь, мусин, катшакок (дзугсьӧм сунис) , кӧкакань, кӧктоин, кӧчйӧла (тшак ним), кӧчвӧнь, порськок (турун ним), нырборд, сойборд, бобӧнянь, сьӧлаоз, кульчунь, вижъюр, ракпань, морӧспань, туйвеж, посводз, шомкор, киподтуй, кӧртвом, войтӧв (судорога), кузьныр (инструмент), сьӧдбӧж, мырпом, нырагез, чуньлыс, пельпом;

б) кор сложнӧй кывъяслӧн ӧти либӧ кыкнан юкӧныс торйӧнсӧ сёрниын оз употребляйтчыны: дозмук, зарава, коляоз, кӧмкот, кунва, кунсук, понпуш, сэрапом, тшайпод, ордлы, ыжкарс, сикӧтш, вомкӧтш, кимӧдз, кодзувкот, синкым, кокмӧдз, сунлабич, чӧжйӧв, чӧжрысь, малямуш, малязі, палюр, корадодь, кокчӧр, черлы, чӧрвӧнь, вабергач, юрсигусь, кобув, киняув, кӧнтар, кӧндозмӧр, кӧнтусь, килутш.

26. Сложнӧй кывъяс гижсьӧны черточка пыр:

а) кор найӧ артмӧмаӧсь повторяйтчысь кывъясысь: вой-вой, лун-лун; муртса-муртса, ӧдва-ӧдва, гозйӧн-гозйӧн, ылӧ-ылӧ, радӧн-радӧн; пӧла-пӧла, мича-мича; ыджыдысь-ыджыд, гажаысь-гажа; лунысь-лун;

б) кор сэтчӧ пырысь кывъясыс паныд значениеаӧсь: бӧрӧ-водзӧ, улӧ-вылӧ, ӧтарӧ-мӧдарӧ, бура-лёка; гуга-бана, кузя-дженьыда; пырны-петны, мунны-локны, кывтны-катны; лун-вой, пырысь-петысь;

в) кор найӧ петкӧдлӧны ӧтвыв босьтӧм кык либӧ некымын предмет, а сідз жӧ кык признак: ая-ныла, ая-пиа, вӧла-доддя, вӧла-мӧска, зятя-тестя, киа-кока, лӧддза-номъя, мама-ныла, ныла-зонма, ӧшка-мӧска, тэа-меа, уска-тошка, чӧдъя-пувъя, шыра-каня, лӧза-гӧрда, сьӧда-еджыда;

г) кор кык кыв ӧтлаын сетӧны собирательнӧй значение: ус-тош, ки-кок, вӧр-ва, видз-му, вир-яй, гут-гаг, дӧрӧм-гач, катша-рака, керка-карта, му-ва, ныв-зон, ныр-вом, нянь-сов, пуля-порок, ты-мус, чай-сакар, чой-вок, гӧрны-кӧдзны, кӧмасьны-пасьтасьны, пуны-пӧжавны, сёйны-юны, сёян-юан, батьтӧм-мамтӧм;

д) кор сэтчӧ пырысь кывъясыс ӧткодь либӧ матын значениеаӧсь: керны-вӧчны, содны-быдмыны, овны-вывны, ветлысь-мунысь, сьӧрсьӧн-бӧрсьӧн, вужыня-вежыня, гыжъя-вежъя, кыла-вора, сюрӧсь-пельӧсь;

е) кор джынйӧн кыв сулалӧ -ӧн окончаниеа существительнӧй бӧрын: ведраӧн-джынйӧн, арӧн-джынйӧн, литрӧн-джынйӧн, метрӧн-джынйӧн.

Существительнӧйяс гижанног

27, Роч нимъяс, вичьяс да овъяс официальнӧй (делӧвӧй) гижӧдъясын гижсьӧны сідз жӧ, кыдзи примитӧма роч орфографияын: Маяковский, Горький, Алексей, Дмитрий, Космодемьянская, Иван Грозный, Илья, Игорь, Дарья, Ильич.

Примечание. Художественнӧй произведениеясын нимъяс вермӧны гижсьыны сідз, кыдз шусьӧны коми сёрниын: Ӧльӧш, Ӧльӧксан, Ӧстап, Митрей, Пролӧ, Ладимер, Ӧсип, Ӧгаш, Ӧнись, Ӧпрӧсся, Анӧ, Парась, Ӧгрӧ.

28. Существительнӧйяс, кодъяс обозначайтӧны книгаяслысь, газетъяслысь, журналъяслысь, колхозъяслысь да с. в. нимъяс, босьтсьӧны кавычкаяс пытшкӧ: «Алӧй лента» роман, «Коми колхозник» газет, «Выль олӧм» колхоз, «Войвыв кодзув» журнал.

Примечание. Нима кыв дырйи предприятиеяслӧн, учреждениеяслӧн, колхозъяслӧн да с. в. нимъяс кавычкаяс пытшкӧ оз босьтсьыны, например: В. И. Ленин нима Коми республиканскӧй библиотека.

29. Книга, газет, журнал, колхоз, пароход да мукӧд нимъяскӧд падежнӧй окончаниеяс да личнӧй суффиксъяс гижсьӧны ӧтлаын: «Правдаысь», «Войвыв кодзулысь», «Шевченкоӧн», «Коми колхозниксьыс».

30. Заимствуйтӧм сложнӧй сокращённӧй существительнӧйясын, кодъяс артмӧмаӧсь кывъяслӧн первой букваясысь падежнӧй окончаниеяс, личнӧй да уна лыд петкӧдлысь суффиксъяс гижсьӧны черточка пыр: ЦК-ын, МТФ-ӧ, РСФСР-ын, Коми АССР-ын, РТС-яс, ГЭС-лӧн.

31. Заимствуйтӧм существительнӧйясын кӧ орччӧн сулалӧны кык ӧткодь согласнӧй, гижсьӧны кыкнанныс жӧ, например: класс, металл, вӧжжи, сессия, коммунизм, килограмм.

Примечание. Падежнӧй окончаниеяс содігӧн кӧ орччӧн лоӧ куим ӧткодь согласнӧй буква, сэк сідз жӧ гижсьӧ кык ӧткодь согласнӧй буква, например: классянь, металлӧн.

32. Ин (ін), лун, пи, тор, пу кывъяс, кор найӧ мунӧны суффиксъяс пыдди да артмӧдӧны существительнӧйяс, гижсьӧны ӧтлаын: косін, васӧдін, вӧраин, ворсанін, оланін; бурлун, ёнлун, кыпыдлун, сюсьлун, коланлун, кужанлун, гажлун, мичлун, томлун; кӧчпи, сирпи; буртор, лёктор, унатор; моньпу, зятьпу, дӧрӧмпу.

33. Ичӧтмӧдан значениеа -тор суффикс да пренебрежительнӧй значениеа -шой суффикс существительнӧйяскӧд гижсьӧны ӧтлаын: ватор, йӧвтор, вурунтор; гӧршой, дӧрӧмшой, пасьшой.

34. Существительнӧйяс, кодъяс петкӧдлӧны горизонтлысь основнӧй сторона нимъяс, гижсьӧны ӧтлаын: асыввыв, войвыв, лунвыв, рытыввыв, а промежуточнӧй сторона нимъяс — черточка пыр: асыв-войвыв, асыв-лунвыв, рытыв-войвыв, рытыв-лунвыв.

35. Ув, дор, выв, сай, берд, дін, бӧр, йыв, пом, весьт, шӧр, кост, бок, водз, пытшк (пытшкӧс) кывъяс на водзвылын сулалысь существительнӧйяскӧд гижсьӧны торйӧн*: пызан ув, пызан дор, керка дор, пызан вывсӧ, пывсян сай, вӧр берд, пу дін, улӧс бӧр, пу йывсӧ, кер пом, пу кост, керка водз, туй бок, вой бок, ю шӧр, джодж шӧрсӧ, юр весьт, керка пытшкӧс.

* Ув, дор, выв, сай, берд, дін, бӧр, йыв, пом, весьт, шӧр, кост, бок, водз, пытшк (пытшкӧс) кывъяс нимтан да керан падежъясын лоӧны существительнӧйясӧн, мукӧд падежъясас — кывбӧръясӧн.

Определительнӧй сочетаниеясын найӧ гижсьӧны торйӧн жӧ: град выв пуктас, ӧшинь ув йӧр, ӧшинь ув потшӧс, ва дор видз, ю сай видз.

Примечание. Татшӧм сочетаниеяссӧ оз ков сорлавны сложнӧй кывъяскӧд, кодъяс гижсьӧны ӧтлаын: кобув, подув, киняув, посводз, войвыв, асыввыв, рытыввыв, лунвыв.

36. Существительнӧйяс кывбӧръяскӧд гижсьӧны торйӧн: пызан вылын, вӧр дорын, туй кузя, кыр йывсянь, ӧшинь пыр, ты дорын, юр весьтын, керка джуджда, ош кодь, дум вылӧ, ведра тыр.

37. Существительнӧй джын мукӧд существительнӧйяскӧд гижсьӧ торйӧн: ведра джын, лун джын, во джын, лист джын, джын олӧм, джын тӧлысь.

38. Петан да пыран падежъясын орччӧн сулалысь существительнӧйяс гижсьӧны торйӧн: пуысь пуӧ, лунысь лунӧ, арысь арӧ, кадысь кадӧ, садйысь садйӧ.

Прилагательнӧйясӧс гижанног

39. Сложнӧй прилагательнӧйяс, кодъяс петкӧдлӧны предметлысь цвет либӧ цветлысь оттенокъяс, гижсьӧны ӧтлаын: алӧйгӧрд, пемыдгӧрд, кельыдвиж, пемыдлӧз, югыдгӧрд, яръюгыд, еджговлӧз, кольквиж, турунвиж.

Примечание. Существительнӧйяс, кодъяс сулалӧны прилагательнӧйяс водзын да кутӧны усилительнӧй значение, гижсьӧны торйӧн: би гӧрд кыа, вир гӧрд чышъян, лым еджыд дӧрӧм.

40. Прилагательнӧйяс, кодъяс артмӧмаӧсь ас да аслас местоимениеясысь сяма, ныра, нога, руа, пӧлӧс кывъясӧн, гижсьӧны ӧтлаын: аслыссяма, аслысныра, аслыснога, аслыспӧлӧс, аслысруа, асныра, асруа.

41. Прилагательнӧйяс, кодъяс артмӧмаӧсь существительнӧйысь суффикс пыдди мунысь вывса, бердса, дорса, дінса, весьтса, бокса, водзса, костса, помся, сайса, чӧжся, бӧрся, шӧрса, гӧгӧрса, увса, дырся, пытшса (пытшкӧсса) кывъясӧн, гижсьӧны ӧтлаын: берегдорса, видзвывса, вогӧгӧрся, войнабӧрся, вӧрбердса, вӧршӧрса, гожводзса, гӧрабокса, гӧраувса, йӧзкостса, карвесьтса, катыдпомса, кырйывса, тӧвсайса.

Примечание. Собственнӧй нимъяскӧд, личнӧй да ас местоимениеяскӧд бокса, бердса, дорса, гӧгӧрса да с. в. кывъяс гижсьӧны торйӧн: Сыктывкар бердса, Эжва дорса, Иван дінса, ас гӧгӧрса, миян дорса, ме бердса, сы дінса.

42. Предметлысь неполнӧй признак петкӧдлысь -кодь суффикс прилагательнӧйяскӧд гижсьӧ ӧтлаын: мичакодь, гажакодь, лӧсьыдкодь, ёнкодь, кӧдзыдкодь, руакодь, тӧлакодь.

Примечание. Существительнӧй пыдди мунысь прилагательнӧйяскӧд кодь кывбӧр, кыдзи и существительнӧйяскӧд, гижсьӧ торйӧн: тӧрытъя кодь (ср. тӧрытъя лун кодь), карса кодь (ср. карса морт кодь), коркӧя кодь (ср. коркӧя олӧм кодь).

43. Мед частица, коді петкӧдлӧ превосходнӧй степень, прилагательнӧйяскӧд гижсьӧ ӧтлаын, а медся частица — торйӧн: медбур, медмича, медъён, медыджыд; медся бур, медся муса, медся ыджыд.

44. Степень петкӧдлысь наречиеяс зэв, сап, вель, дзурс, вывті да с. в. прилагательнӧйяскӧд гижсьӧны торйӧн: зэв ыджыд, вывті мича, сап пемыд, вель ыджыд, дзурс пемыд.

45. -ик, -ник, -иник ичӧтмӧдан да ласкательнӧй суффиксъясын гижсьӧ и, а оз ы: ичӧтик, мичаник, томиник, косіник.

46. Прилагательнӧйлӧн -ыд суффиксын гижсьӧ ы, а оз и: кокньыд, веськыд, лӧсьыд, паськыд, посньыд.

47. Заимствуйтӧм прилагательнӧйясын гижсьӧны -ӧй, -ӧвӧй да -евӧй: великӧй, сӧветскӧй, средньӧй; трудӧвӧй, классӧвӧй, передӧвӧй; боевӧй, строевӧй, коричневӧй.

Числительнӧйяс гижанног

48. Числительнӧйяс, кодъяс обозначайтӧны дасъяс да сёяс, гижсьӧны ӧтлаын: сизимдас, кӧкъямысдас, ӧкмысдас, кыксё, куимсё, нёльсё, витсё, квайтсё, сизимсё, кӧкъямыссё, ӧкмыссё, а став мукӧд числительнӧйяс гижсьӧны торйӧн: дас ӧти, дас вит, кызь сизим, ӧкмысдас вит, кыксё дас, ветымын вит да с. в.

49. Приблизительнӧй количество петкӧдлігӧн количественнӧй числительнӧй сы водзын сулалысь существительнӧйысь гижсьӧ торйӧн: лун кык, керка дас, во куим, ар ветымын кымын, недель кык, а порядкӧвӧй числительнӧй — черточка пыр: лун-мӧд, морт-мӧд, час-мӧд-коймӧд, кыв-мӧд-коймӧд.

50. Порядкӧвӧй числительнӧйяслӧн -ӧд суффикс цифраяскӧд гижсьӧ черточка пыр: 5-ӧд, 30-ӧд, 1959-ӧд.

51. Приблизительнӧй количество петкӧдлігӧн орччӧн сулалысь кык количественнӧй числительнӧй гижсьӧны черточка пыр: кык-куим лун, нёль-вит морт, кызь-комын керка.

Примечание. Орччӧн сулалысь кык количественнӧй числительнӧй костын кӧ эм ӧ частица, сэк черточкаыс пуктыссьӧ ӧ частица водзвылас и бӧрвылас: вит-ӧ-квайт керка, нёль-ӧ-вит морт.

52. -ным, -ныд, -ныс личнӧй суффиксъяса собирательнӧй числительнӧйясын гижсьӧ кык н: кыкнанным, кыкнанныд, кыкнанныс, ӧтнанныс.

53. Числительнӧйяс кывбӧръяскӧд гижсьӧны торйӧн: сё гӧгӧр, вит вылӧ, дас сайӧ, вит кымын, дас пӧв, кык пӧрйӧ, нёль пельӧ, дас ногӧн.

Местоимениеяс гижанног

54. Неопределённӧй местоимениеяс артмӧдысь кӧ, не да сюрӧ частицаяс гижсьӧны ӧтлаын: кодкӧ, кодъяскӧ, кутшӧмкӧ, мыйкӧ, мыйӧнкӧ, мыйлакӧ, кымынкӧ; некымын, некымынӧн; мыйсюрӧ, кодсюрӧ, кодсюрӧлы, кутшӧмсюрӧ.

Примечание. Кӧ частица гижсьӧ торйӧн, сійӧ кӧ кутас сулавны кывбӧр бӧрын: код вылӧ кӧ, мый йылысь кӧ, код вӧсна кӧ.

55. Отрицательнӧй местоимение артмӧдысь не частица гижсьӧ ӧтлаын: некод, некодлы, некодсянь, некоднанным, некутшӧм.

56. Обобщительнӧй да указательнӧй местоимениеяскӧд -тор суффикс гижсьӧ ӧтлаын: быдтор, ставторсӧ, мукӧдтор, сэтшӧмтор, татшӧмтор, этатшӧмтор.

57. Указательнӧй местоимениеяскӧд -ин (~ін) суффикс гижсьӧ ӧтлаын: татшӧмин, сэтшӧмин, этатшӧмин.

58. Взаимно-личнӧй местоимениеяс гижсьӧны черточка пыр: ӧта-мӧдӧс, ӧта-мӧднымӧс, мӧда-мӧдӧс, мӧда-мӧднымӧс.

59. Сійӧ, найӧ, эсійӧ, тайӧ личнӧй да указательнӧй местоимениеясын гижсьӧ ӧ, а оз е либӧ я.

60. Местоимениеяс кывбӧръяскӧд гижсьӧны торйӧн: ме дінӧ, тэ дорын, сы вӧсна, ас йылысь, ас ногӧн, тэ ног, на кодь, эта ыджда, кодкӧ вӧсна, став понда, татшӧм ногӧн, сэтшӧм ногӧн, кымынкӧ пӧрйӧ, миян дінын, тіян дорысь, некымын пӧвстӧн.

Глаголъяс гижанног

61. Первой колян када глаголъяслӧн личнӧй окончаниеясын гижсьӧ и (і), а оз ы; муні, мунін, муніс, мунім; лыдди, лыддин, лыддис, лыддим.

62. Мӧд колян када глаголъяслӧн личнӧй окончаниеясын гижсьӧ -ӧмыд, -ӧма, -ӧмныд, -ӧмаӧсь: мунӧмыд, мунӧма, мунӧмныд, мунӧмаӧсь.

63. Уна лыда глаголъяслӧн 2-ӧд лицоын окончаниеас гижсьӧ -ныд: мунанныд, локтанныд, мунінныд, локтінныд, мунӧмныд, локтӧмныд.

64. 3-ӧд лицоа глаголъяслӧн уна лыд петкӧдлысь окончание помын гижсьӧ ы, а оз и: мунӧны, мунісны, вайӧны, вайисны, лыддьысьӧны.

65. Неопределённӧй формаа глаголъяслӧн суффиксын гижсьӧ ы, а оз и (і): гижны, вайны, мунны, мыссьыны, велӧдчыны.

66. Первой колян када отрицательнӧй вспомогательнӧй глаголъясын гижсьӧ э, а оз и: эг гиж, эз куж.

67. Ӧтка лыда отрицательнӧй глаголъяс помын, кор кык орчча согласнӧй бӧрын вермӧ лоны гласнӧй, гижсьӧ ы, а оз и: ог лыддьы, ог лэччы, оз пукты, эн ветлы, эз эшты.

68. Ӧнія, локтан да первой колян када отрицательнӧй глаголъяслӧн 1-й да 2-ӧд лицоын уна лыда окончаниеас гижсьӧ -ӧй, а оз -ей (-эй): эг (эгӧ) гижӧй; эн (энӧ) гижӧй, ог (огӧ) гижӧй, он (онӧ) гижӧй.

69. Ӧнія, локтан да первой колян када отрицательнӧй глаголъяслӧн уна лыдын 3-ӧд лицоын личнӧй окончаниеас гижсьӧ ы, а оз и: оз гижны, эз мунны, оз локны, эз локны.

70. Ӧтка лыда 2-ӧд лицоа повелительнӧй глаголъяс помын, кор орчча согласнӧй бӧрын вермӧ лоны гласнӧй, гижсьӧ ы: пуксьы, мыссьы, чеччы, велӧдчы, лыддьы.

71. Возвратнӧй глаголъясын д, т бӧрын гижсьӧ ч, а оз сь: велӧдчӧ, пӧрӧдчӧ, купайтчӧ, стрӧитчӧ, славитчӧ, а страдательнӧй значениеа возвратнӧй глаголъясын д, т, дз да ч бӧрын гижсьӧ сь: пуръяс кылӧдсьӧны; выль магистральяс нуӧдсьӧны; школа стрӧитсьӧ; сӧптыс шыбитсьӧ; лымйыс зыртсьӧ; няньыс вартсьӧ; урожай босьтсьӧ; косаыс тӧчитсьӧ; сю кӧдзсьӧ; сёрӧмыс тэчсьӧ; уджыс вӧчсьӧ.

72. Глаголъяс, кодъяс артмӧмаӧсь изобразительнӧй наречиеысь мунны, видзны, вартны, кывны, керны суффиксъяс пыдди мунысь глаголъясӧн, гижсьӧны ӧтлаын: зильмунны, шковмунны, колсмунны; жервидзны, сярвидзны; пасьвартны, чашвартны; кышакывны, клёнакывны; шлочкерны.

Примечание. Мукӧд глаголъяс изобразительнӧй наречиеяскӧд гижсьӧны торйӧн: грым уси, жбыр лэбзис, шков лыйис, звирк чеччис.

73. Изобразительнӧй глаголъяс прӧстӧй глаголъяскӧд, кор найӧ обозначайтӧны ӧти действие, гижсьӧны черточка пыр: жбыръявны-лэбавны, камгыны-дорны, тёпкыны-виявны, гигзьыны-серавны, варгыны-пуны, шливгыны-зэрны, дзольгыны-визувтны, шуньгыны-мунны; зёльмунны-жугавны, пасьвартны-жугӧдны, куткырвидзны-пукавны, жбыракылісны-лэбисны, грымакыліс-муніс.

74. Изобразительнӧй глаголлӧн парнӧй изобразительнӧй основаыс гижсьӧ черточка пыр: тринь-троньмуні, гыма-гамакылӧ, пусь-пасьмуні, швуч-швачкерис.

75. Глаголъяс, кодъяс артмӧмаӧсь числительнӧйясысь да пӧвста, мында кывбӧръясысь, гижсьӧны ӧтлаын: кыкмындаавны, кыкпӧвстаавны.

76. -кодь суффикс глаголъяскӧд гижсьӧ ӧтлаын: вешйыштіскодь, муныштіскодь, вӧрзьыштіскодь.

77. Мед частица глаголкӧд гижсьӧ торйӧн: Мед дзирдалас шонді! Мед олас миян Рӧдина!

78. Причастие артмӧдысь -ысь суффиксын шусьӧ да гижсьӧ ы, а оз и (і): мунысь морт, йирсьысь вӧв, бӧрдысь кага, лыддьысьысь детинка.

79. -иг суффикса деепричастиеяс суффикс пыдди мунысь тыр, тырйи, моз, чӧж, кості да кежлӧ кывъяскӧд гижсьӧны ӧтлаын: сьылігтырйи, мунігмоз, сёйигчӧж, сёйигкості, водігкежлӧ.

Наречиеяс гижанног

80. а) Наречиеяс, кодъяс артмӧмаӧсь существительнӧйысь суффикс пыдди мунысь быд, тыр, йыв, выв кывъясӧн, гижсьӧны ӧтлаын: войбыд, тӧвбыд, арбыд, гожӧмбыд, тулысбыд, рытывбыд, асывбыд; гурйыв, кокйыв, тшынйыв; бӧрвыв, водзвыв, боквыв, бӧжвыв, дорвыв, кивыв, помвыв, дорышвыв, нырвыв, серамвыв.

б) Наречиеяс, кодъяс артмӧмаӧсь прилагательнӧйысь суффикс пыдди мунысь выв, дор кывъясӧн да причастиеысь дор кывйӧн, гижсьӧны ӧтлаын: аръявыв, асъявыв, бӧръявывнас, рытъявыв, тулысъявыв, веськыдвыв, шуйгавыв, асъядор, рытъядор; рӧмдандор, пемдандор, югдандор, водандор, чеччандор.

в) Наречиеяс, кодъяс артмӧмаӧсь прилагательнӧйысь либӧ наречиеысь суффикс пыдди мунысь пырысь кывйӧн, гижсьӧны ӧтлаын: лёкпырысь, кокньыдпырысь, сьӧкыдпырысь, збойпырысь, гажапырысь; дышапырысь, гӧльпырысь; нимкодьпырысь, веськодьпырысь, окотапырысь, жальпырысь, радпырысь.

г) Наречиеяс, кодъяс артмӧмаӧсь кык кывйысь либӧ некымын кывйысь, гижсьӧны ӧтлаын: гӧгӧрбок, рытсёр, войдӧрлун, лунтыр, матігӧгӧр, кыккирудз, рытгорув, вомгорулын, весьшӧрӧ, тырвыйӧ, джынвыйӧ, шӧрвыйӧ.

д) Ӧт кыв вужйысь выв, моз, ног, тшӧтш, вылысь, дор, сямӧн, ув, сор да с. в. кывъясӧн артмысь наречиеяс гижсьӧны ӧтлаын: ӧтвыв, ӧтмоз, ӧтногӧн, ӧттшӧтш, ӧтвылысь, ӧтдор, ӧтсямӧн, ӧтув, ӧтсор, ӧтмында.

81. Неопределённӧй наречиеяс артмӧдысь кӧ, не да сюрӧ частицаяс гижсьӧны ӧтлаын: кӧнкӧ, кыськӧ, коркӧ, кытчӧкӧ; некыдзи, неважӧн, некӧн, неылын, некутшӧма; корсюрӧ, кытчӧсюрӧ, кӧнсюрӧ, кыдзсюрӧ.

82. -кодь суффикс наречиеяскӧд гижсьӧ ӧтлаын: матынкодь, ылынкодь, ёнакодь, буракодь, дышакодь.

83. Мед частица, коді петкӧдлӧ превосходнӧй степень, наречиеяскӧд гижсьӧ ӧтлаын: медъёна, медлӧсьыда, медылӧ, медвылӧ, медбура, медматын, а частица медся — торйӧн: медся бура, медся ёна, медся чӧскыда.

84. Гласнӧй звукъяс вежсьӧмӧн повторяйтчысь изобразительнӧй наречиеяс гижсьӧны черточка пыр: зиль-зёль, тур-тар, шкув-шков, туп-тап.

85. Степень петкӧдлысь зэв, вель, вывті да с. в. наречиеяс мукӧд наречиеяскӧд гижсьӧны торйӧн: зэв лӧсьыда, вывті уна, вывті гырыся, вель ылын.

86. Наречиеяс кывбӧръяскӧд гижсьӧны торйӧн: недыр мысти, регыд кежлӧ, аски кежлӧ, талун кежлӧ, мӧдысь кежлӧ, век кежлӧ, дыр кежлӧ, водзӧ кежлӧ, водзӧ вылӧ, сэк кості.

Кывбӧръяс гижанног

87. Кывбӧръяс существительнӧйяскӧд, местоимениеяскӧд, числительнӧйяскӧд да наречиеяскӧд гижсьӧны торйӧн: ӧшинь дорын, вӧр сайын, ош кодь, во чӧж, керш тыр, ас кежысь, тэ ног, ме ногӧн, кутшӧмкӧ ногӧн, кык пельӧ, кык пӧрйӧ, кык кымын, дыр кежлӧ, водзӧ кежлӧ.

Примечание. Кывбӧръяс оз ков сорлавны сложнӧй существительнӧйяскӧд (войвылын, лунвылын, рытыввылын, подувсянь, киняулын, посводзын, гижанног), сложнӧй наречиеяскӧд (веськыдвылын, шуйгавылын, бӧрвылӧ, водзвылӧ).

Союзъяс гижанног

88. Сложнӧй союзъяс гижсьӧны торйӧн: сы мында —мый, сы вӧсна — мый, не сӧмын — но и, сы мында — мыйта да с. в.

Частицаяс гижанног

89. Частицаяс нӧ, жӧ, но, да, и, тай, кӧ, пӧ, ӧмӧй, ли, на, нин, инӧ да с. в. гижсьӧны торйӧн, а ӧ да а частицаяс гижсьӧны черточка пыр.

90. Отрицательнӧй местоимениеяс да наречиеяс артмӧдысь не частица гижсьӧ ӧтлаын: некод, некутшӧм; некор, некыдз.

91. Неопределённӧй местоимениеяс да наречиеяс артмӧдысь кӧ да сюрӧ частицаяс гижсьӧны ӧтлаын: кодкӧ, мыйкӧ; кӧнкӧ, коркӧ; мыйсюрӧ, кӧнсюрӧ.

92. Кӧ частица порядкӧвӧй числительнӧйяскӧд гижсьӧ черточка пыр: ӧти-кӧ, мӧд-кӧ, коймӧд-кӧ.

Междометиеяс гижанног

93. Повторяйтчысь междометиеяс гижсьӧны черточка пыр: ой-ой-ой, ок-ок-ок, ха-ха-ха, крав-крав, ку-ку, но-о-о, ура-а-а, тс-с.

Ыджыд буква гижӧм

94. Текст заводитчигӧн первой кывйыс гижсьӧ ыджыд буквасянь.

95. Точка, многоточие, восклицательнӧй да вопросительнӧй знакъяс бӧрын быд выль предложение заводитчӧ ыджыд буквасянь.

Примечание 1. Стихотворениеын быд выль строка гижсьӧ ыджыд буквасянь, кӧть и некутшӧм знак абу воддза строка помас.

Примечание 2. Прямӧй сёрни бӧрын авторлӧн кывъяс гижсьӧны ичӧт буквасянь, например: «Лагерад он мун, сідзкӧ?» — юаліс Сеня.

96. Двоеточие бӧрын ыджыд буквасянь гижсьӧны:

а) прямӧй сёрниысь первой кывйыс: Гриша юаліс: «Кажитчӧ тэныд миян уджыс?»

б) цитатаысь первой кывйыс, мунӧ кӧ цитатаыс кыдзи торъя предложение.

Примечание. Цитатасӧ кӧ пыртӧма предложение пытшкӧ предложениесӧ водзӧ нуӧдӧм могысь, сэк сійӧ гижсьӧ ичӧт буквасянь.

97. Ыджыд буквасянь гижсьӧны:

а) Йӧзлӧн нимъяс, вичьяс, овъяс, прӧзвищеяс: Иван Алексеевич Куратов, Нёбдінса Виттор, Йӧрш Ёгор, Кӧч Закар.

б) Животнӧйяслӧн кличкаяс: Рыжко (вӧв), Буско (пон), Сьӧд пель (мӧс).

в) Географическӧй нимъяс (страна, кар, сикт, ю, ты, море, гӧра нимъяс, сідз жӧ улича, площадь нимъяс да с. в.): Азия, Сыктывкар, Эжва, Ухта, Каспийскӧй море, Уральскӧй гӧраяс, Сӧветскӧй улича, Краснӧй площадь.

Примечание 1. Географическӧй ним кӧ артмӧма кык кывйысь, кыкнан кывйыс гижсьӧ ыджыд буквасянь: Дальньӧй Восток, Великӧй Устюг, Кривӧй Рог, Новӧй Земля.

Примечание 2. Географическӧй нимысь кӧ -са суффиксӧн артмӧма прилагательнӧй, сійӧ гижсьӧ ичӧт буквасянь: сыктывкарса, ижмаса, печораса, уралса.

г) Высшӧй должностьяслӧн нимъяс да почётнӧй званиеяс: СССР-са Верховнӧй Сӧвет Президиумса Председатель, Сӧветскӧй Союзса Маршал, Сӧветскӧй Союзса Герой, Социалистическӧй Уджвывса Герой.

98. Революционнӧй праздник да памятнӧй лун нимъясын первой кывйыс гижсьӧ ыджыд буквасянь: Май первой лун, Нывбабаяслӧн международнӧй коммунистическӧй лун, Выль во.

99. Историческӧй событие нимъясын ыджыд буквасянь гижсьӧ первой кывйыс да собственнӧй нимыс: Великӧй Октябрьскӧй социалистическӧй революция, Великӧй Отечественнӧй война.

100. Орден нимъясын став кывйыс, орден да степень кывъясысь кындзи, гижсьӧны ыджыд буквасянь: Ленин орден, Трудӧвӧй Краснӧй Знамя орден, Мӧд степеня Слава орден.

101. Газет, журнал, книга нимъясын ыджыд букваӧн гижсьӧ сӧмын первой кывйыс: «Коми колхозник» (газет), «Войвыв кодзув» (журнал), «Алӧй лента» (роман).

102. Государственнӧй властьлӧн да государственнӧй управлениелӧн высшӧй орган нимъясын да высшӧй партийнӧй орган нимъясын став кывйыс гижсьӧ ыджыд буквасянь, партия кыв кындзи:

СССР-са Верховнӧй Сӧветлӧн Президиум.

Сӧветскӧй Союзса Коммунистическӧй партиялӧн Центральнӧй Комитет.

Коми АССР-са Верховнӧй Сӧвет.

Сӧветскӧй Армия да Военно-Морскӧй Флот.

103. Общественнӧй учреждение, организация, предприятие, учебнӧй заведение нимъясын ыджыд буквасянь гижсьӧ первой кывйыс: Коми государственнӧй педагогическӧй институт, Коми государственнӧй издательство.

104. Область, округ, район, сельсӧвет нимъясын ыджыд буквасянь гижсьӧ сӧмын первой кывйыс: Архангельскӧй область, Ненецкӧй округ, Усть-Куломскӧй район да с. в.

Строкаысь строкаӧ кыв вуджӧдӧм

105. Ӧти строкаысь мӧд строкаӧ кыв вуджӧдсьӧ слогъяс серти: ве-лӧд-чы-ны, бӧр-йысь-ны, гиж-ны, шко-ла-ын, вӧ-рын, ву-рыс, ту-рун, кӧ-рым, го-жӧм, ад-дзы-ны, ӧд-дзы-ны.

106. Торъя буква строкаысь строкаӧ вуджӧдны оз позь, кӧть и сійӧ лоӧ слогӧн. Оз позь торйӧдны тадзи: кы-а, у-на, Ю-лия.

107. Строкаысь строкаӧ вуджӧдігӧн й оз торйӧдсьы сы бӧрвылын сулалысь гласнӧйыс: дор-йыны, мы-йысь, сё-йим, ва-йим.

Кор й бӧрвылын сулалӧ согласнӧй, сэк сійӧ оз торйӧдсьы водзвылас сулалысь гласнӧйыс: кый-ны, сёй-ны, вай-ны.

108. Орччӧн кӧ сулалӧ кык ӧткодь согласнӧй, то ӧтиыс кольӧ воддза строкаас, а мӧд согласнӧйыс вуджӧдсьӧ: мас-са, чеч-чӧ, кольч-чыны, клас-сӧ.

109. Кывйын кӧ орччӧн сулалӧ куим согласнӧй буква, сэк кык воддза согласнӧйыс оз торйӧдсьы: ворс-ны, пырт-ны, берт-ны.

110. ъ, ь букваяс на водзвывса согласнӧйясысь оз позь торйӧдны: понъ-яс, торъ-явны, кӧчь-яс.

111. дз, дж, тш сочетаниеяс мӧд строкаӧ вуджӧдігӧн торйӧдны оз позь: потш-сьӧ, кыдз-сӧ, кы-дзи, джу-джыд, со-ддзӧн, кы-ддзӧн.

Приложение

КОМИ ОРФОЭПИЯ КУЗЯ ПРАВИЛӦЯС

1. Гласнӧй звукъяс быд слогын шусьӧны яснӧя. Кузьта серти найӧ пӧшти ӧткодьӧсь, роч гласнӧйяс дорысь кузьджыкӧсь. Ударениеа слогъясын гласнӧйясыс вылынджык тонаӧсь и сӧмын неуна шусьӧны кузьджыка да ёнджыка. Сы вӧсна коми сёрниыс плавнӧй. Кывйын ударение вермӧ лоны разнӧй местаын, но сійӧ векджык вӧчсьӧ первой слог вылӧ.

2. Прӧстӧй коми кывъясын мӧд да мукӧд слогъясын, а сідз жӧ частицаясын, шусьӧ ӧ звук, а оз э: пельӧс — пель(ӧ)с, ӧдзӧс — ӧдз(ӧ)с, вольӧс — воль(ӧ)с, пельӧн — пель(ӧ)н, водзӧс — водз(ӧ)с, ог жӧ кӧ пӧ ӧд-а — ог ж(ӧ) к(ӧ) п(ӧ) (ӧ)д-а. Первой слогын кындзи, э звук вермас лоны сӧмын сложнӧй кывъясын да роч кывйысь пырӧм кывъясын: буретш — бур(э)тш, ягсер — ягс(э)р, сӧвет — сӧв(э)т, деревня — дер(э)вня.

3. Кыв основаяслӧн мӧд слогын, ыль, ын, ыр, ыс, ыль, ынь, ысь, ыш сочетаниеясын, чорыд согласнӧйяс бӧрын, шусьӧ ы звук, а оз и: кӧрым — кӧр(ым), эшкын — эшк(ын), дзибыр — дзиб(ыр), вурыс — вур(ыс), гӧгыль — гӧг(ыль), кусынь — кус(ынь), кымынь — кым(ынь), пелысь — пел(ысь), тамыш — там(ыш); но: ӧшинь — ӧш(инь), берин— бер(ин).

Кыв основаяслӧн мӧд слогын, им, ин, ис, ись сочетаниеясын, небыд согласнӧйяс бӧрын, шусьӧ и звук, а оз ы: нёкчим — нёкч(им), сизим— сиз(им), козин — коз(ин), сунис — сун(ис), вӧлись — вӧл(ись) да с. в. Татчӧ жӧ пырӧны пӧим — пӧ(им), куим — ку(им), тоин — то(ин), кӧин — кӧ(ин), туис — ту(ис) кывъяс.

Кыв основаяслӧн мӧд слогын, идз, ин, ик, иг сочетаниеясын, шусьӧ и, а оз ы: дзоридз — дзор(идз), пыридз — пыр(идз), ӧмидз — ӧм(идз), саридз — сар(идз), палич — пал(ич), калич — кал(ич), вирич — вир(ич), курич — кур(ич), лабич — лаб(ич), лудік — луд(ік), сӧнік — сӧн(ік), кучик — куч(ик), чутік — чут(ік), пыриг — пыр(иг), весиг — вес(иг).

Кык слога кывъясын, существительнӧйяслӧн, прилагательнӧйяслӧн, наречиеяслӧн, кывбӧръяслӧн основа помын, шусьӧ и, а оз ы: чери — чер(и), шабді — шабд(і), тури — тур(и), тасьті — тасьт(і), ёді — ёд(і), кельчи — кельч(и), часі — час(і), вӧсни — вӧсн(и), кокни— кокн(и), мелі — мел(і), сэні — сэн(і), маті — мат(і), таті — тат(і), кӧні — кӧн(і), сідзи — сідз(и), гири-люки — гир(и)-люк(и), серти — серт(и), пыдди — пыдд(и), дырйи — дырй(и), мысти — мыст(и) .

Примечание. Суффиксъясын да окончаниеясын ы либӧ і шусьӧм мунӧ гижанног серти: мунны — мун(ны), муніс — мун(іс), дзебсьы — дзебсь(ы), пӧрччысь— пӧрчч(ысь), пыксьыны — пыксь(ыны), воклы — вок(лы), пельысь — пель(ысь), лӧзіник — лӧз(іник) да с. в.

4. Кыв помын да согласнӧйяс водзын шусьӧ в согласнӧй, гласнӧй водзын — л: кыв — кы(в), сьыв — сьы(в), висьтав — висьта(в), пывсян — пы(в)сян, кывлӧн — кы(в)лӧн, вӧлӧн — вӧ(л)ӧн, кылӧдны — кыл(ӧ)дны.

Изобразительнӧй кывъясын да роч кывйысь пырӧм кывъясын согласнӧйяс водзын вермӧ лоны л звук, а гласнӧй водзын — в: колснитны — ко(л)снитны, шалсйыны — ша(л)сйыны, чулки — чу(л)ки, вилки — ви(л)ки, колхоз — ко(л)хоз, тявӧстны — тя(в)ӧстны, равӧстны — равӧстны, боевӧй — бое(в)ӧй. Ӧткымын мукӧд кывъясын гласнӧй водзын вермӧ лоны в, кыв помын — л: ставыс — ста(в)ыс, гӧрдовӧсь — гӧрдӧ(в)ӧсь, варовӧсь — варӧ(в)ӧсь, Озёл — Озё(л).

5. Коми кывъясын кыв заводитчигӧн и да е гласнӧйяс водзын шусьӧ г, а оз дь; к, а оз ть: гид — (г)ид, геб — (г)еб, гижны — (г)ижкны, керка — (к)ерка, кепысь — (к)епысь, ки — (к)и; но: дерт. Роч кывйысь пырӧм кывъясын шусьӧны рочын моз жӧ дь да ть звукъяс: деньга, десятник, делӧ, тетрадь, телега, теш. Изобразительнӧй кывъясын вермӧ лоны ть звук: тиньгыны, теньгыны.

6. Коми кывъясын основа помын шусьӧ дь, а оз йд; йт, а оз ть: додь — до(дь), дадь — да(дь), бадь — ба(дь), но: мойд — мо(йд), эн дойд — эн до(йд); квайт — ква(йт), няйт — ня(йт), войт — во(йт). Роч кывйысь пырӧм кывъясын шусьӧ ть звук: крӧвать, пӧлать.

7. Кыв вуж бӧрын гласнӧйяссянь заводитчысь суффиксъяс либӧ окончаниеяс водзын частӧ шусьӧны й, к, м, т звукъяс.

й звук шусьӧ б, в, г, д, ж, з, к, л, м, н, р звукъяс бӧрын унджыклаас: нӧбйыс — нӧб(й)ыс, гебйӧн — геб(й)ӧн, пувйыс — пув(й)ыс, кывйӧн — кыв(й)ӧн, быгйыс — быг(й)ыс, жугйӧн — жуг(й)ӧн, зудйыс — зуд(й)ыс, кудйӧн — куд(й)ӧн, вожйыс — вож(й)ыс, изйӧн — из(й)ӧн, джекйыс — джек(й)ыс, нӧкйӧн — нӧк(й)ӧн, валйыс — вал(й)ыс, льӧмйыс — льӧм(й)ыс, лымйӧн — лым(й)ӧн, джынйӧн — джын(й)ӧн, керйыс — кер(й)ыс, пурйӧн — пур(й)ӧн.

к звук шусьӧ с, сь, тш, ч, щ звукъяс бӧрын унджыклаас: лыскыс — лыс(к)ыс, пескӧн — пес(к)ӧн, тэськыс — тэсь(к)ыс, вутшкыс — вутш(к)ыс, потшкӧн — потш(к)ӧн, лэчкӧн — лэч(к)ӧн, ошкыс — ош(к)ыс, нӧшкӧн — нӧшкӧн.

т звук шусьӧ п звук бӧрын: шептыс — шеп(т)ыс, гӧптын — гӧп(т)ын, зептӧ — зеп(т)ӧ, сӧптыс — сӧп(т)ыс.

м звук шусьӧ н бӧрын унджыклаас: синмыс — син(м)ыс, зонмыс — зон(м)ыс, унмыс — ун(м)ыс.

8. Кор й пырӧ кыв вужйӧ, сэк сійӧ шусьӧ: сёйис — сё(й)ис, вайис — ва(й)ис, лыйис — лы(й)ис, кыйис зверӧс — кы(й)ис зверӧс, й вермӧ не шусьыны татшӧм основаясын: куим, тоин, кӧин, пӧим, туис, ниа.

Примечание. Кык гласнӧй костӧ, кор кыв вужйыс помасьӧ гласнӧй звукӧн да суффиксыс либӧ окончаниеыс заводитчӧ гласнӧйӧн жӧ, ӧткымынлаын шуӧны й либӧ в звукъяс. Тайӧ звукъясыс литературнӧй кывйын оз шусьыны (дай оз гижсьыны): виис, шуис, кыис тыв, шондіа, биа; лыа ваявны, шуӧ, нуӧ.

9. Гора гласнӧйяс водзын гортӧм согласнӧйяс гижсянінӧ вермӧны шусьыны гора согласнӧйяс: ӧтдортны — ӧ(д)дортны, сюсьджык — сю(зь)джык, пӧсьджык — пӧ(зь) джык, кушджык — ку(ж)джык, гӧгрӧсджык — гӧгрӧ(ж)джык, тулысбыд — тулы(з)быд, гӧп-гуран — гӧ(б)-гуран, пӧлать дор — пола(дь) дор, кӧч джын — кӧ(дз) джын, мӧс баксӧ — мӧ(з) баксӧ, юсь борд — ю(зь) борд, кӧч гӧн — кӧ(дз) гӧн, нитш дорын — ни(дж) дорын, ас дор — а(з) дор.

10. дж да ж водзын с, з букваяс гижсянінӧ шусьӧ ж звук: лӧзджык — лӧ(ж)джык, кызджык — кы(ж)джык, косджык — ко(ж)джык, кыз жӧч — кы(ж) жӧч, кос жуг — ко(ж) жуг.

тш да ш водзын с буква гижсянінӧ шусьӧ ш звук, а з гижсянінӧ — ж звук: кос тшак — ко(ш) тшак, пос тшупӧд — по(ш) тшупӧд, пос шӧр — по(ш) шӧр; кыз тшын — кы(ж) тшын, из шом — и(ж) шом.

11. д, б гора согласнӧйяс пыдди гортӧм согласнӧй водзын шусьӧны т, п гортӧм согласнӧйяс: содтыны — со(т)тыны, пӧдтыны — пӧ(т)тыны, водтӧдны — во(т) тӧдны, тӧдтӧм — тӧ(т)тӧм, шедтӧм вӧв — ше(т)тӧм вӧв, кодтӧг — ко(т)тӧг, медтыкӧ — ме(т)тыкӧ, быдтор — бы(т) тор; ӧдӧбтыны — ӧдӧ(п)гыны, вильскӧбтыны — вильскӧ(п)тыны, троньӧбтыны — троньӧ(п)тыны.

12. дч, тч, чч гижсянінӧ шусьӧны тч либӧ чч сочетаниеяс: велӧдчыны — велӧ(тч)ыны, велӧ(чч)ыны; бергӧдчыны — бергӧ(тч) ыны, бергӧ(чч)ыны; мӧдӧдчыны — мӧдӧ(тч)ыны, мӧдӧ(чч)ыны; поткӧдчыны — поткӧ(тч)ыны, поткӧ(чч)ыны; кылӧдчыны — кылӧ(тч)ыны, кылӧ(чч)ыны; сотчыны — со(тч)ыны, со(чч)ыны; вотчыны — во(тч)ыны, во(чч)ыны; кытчӧ — кы(тч)ӧ, кы(чч)ӧ; сэтчӧ — сэ(тч)ӧ, сэ(чч)ӧ; дорччыны — дор(тч)ыны, дор(чч)ыны; чеччыны — че(тч)ыны, че(чч)ыны.

ддз гижсянінӧ шусьӧны д да дз звукъяс либӧ кык дз: коддзыны — ко(ддз)ыны, ко(дздз)ыны; луддзыны—лу(ддз)ыны, лу(дздз)ыны; ӧддзыны — ӧ(ддз)ыны, ӧ(дздз)ыны; аддзыны — а(ддз)ыны, а(дздз)ыны, ддж гижсянінӧ шусьӧ ддж сочетание либӧ кык дж: курыдджык — куры(ддж)ык, куры(дждж)ык.

13. Рочысь пырӧм кывъясын тч гижсянінӧ шусьӧны тч либӧ чч сочетаниеяс, дч гижсянінӧ— дч либӧ чч сочетаниеяс: лётчик — лё(тч)ик, лё(чч)ик; вотчина — во(тч)ина, во(чч)ина; притча — при(тч)а, при(чч)а; пулемётчик — пулемё(тч)ик, пулемё(чч)ик; автоматчик — автома(тч)ик, автома(чч)ик; ӧтчаяннӧй — ӧ(тч)аяннӧй, ӧ(чч)аяннӧй; отчёт — о(тч)ёт, о(чч)ёт; разведчик — разве(дч)ик, разве(чч)ик; подчинённӧй — по(дч)инённӧй, по(чч)инённӧй; складчина — скла(дч)ина, скла(чч)ина, переводчик — перево(дч)ик, перево(чч)ик; докладчик — докла(дч)ик, докла(чч)ик.

Примечание, ӧткымын кывъясын дч гижсянінӧ шусьӧны дтш либӧ дш сочетаниеяс: подрядчик — пӧдра(дтш)ик, пӧдра(дш)ик; нарядчик — нара(дтш)ик, нара(дш)ик.

14. Коми кывъясын да рочысь пырӧм кывъясын небыд согласнӧй бӧрын й звук пыдди шусьӧ сэтшӧм жӧ небыд согласнӧй, кутшӧм сулалӧ й водзас (аскодяссьӧ): молльӧн — моль(ль)ӧн, желльӧн — жель(ль)ӧн, соддзӧн — содз(дз)ӧн, лӧддзыс — лӧдз(дз)ыс, кыддзыс — кыдз(дз)ыс, доддьыс — додь(дь)ыс, шпыннявны — шпынь(нь)авны, шыннявны — шынь(нь)авны, каттьыны — кать(ть)ыны, лыддьыны — лыдь(дь)ыны, вевттьыны — вевть(ть)ыны, улльӧв — уль(ль)ӧв; каллян — каль(ль)ан, зелля — зель(ль)а; платтьӧ — плать(ть)ӧ, судья — судь(дь)а, Илья — Иль(ль)а, собрание — собрань(нь)ӧ, заявление — заявлень(нь)ӧ, задание — задань(нь)ӧ, звание — звань(нь)ӧ, статья — стать(ть)а, дознание — дознань(нь)ӧ.

Примечание. 1. Роч кывйын моз гижсян кывъяс вермӧны шусьыны и аскодявтӧг: орудие — оруд(ие), предприятие — предприят(ие), управление — управлен(ие), совещание — совещан(ие).

2. Уна лыд петкӧдлысь -яс суффиксын й оз аскодяссьы: паньяс — пань(йас), кыдзьяс — кыдз(йас), кӧчьяс — кӧчь(йас), кольяс — коль(йас).

15. Роч кывйысь пырӧм кывъясын, кор роч кывъяс гижсьӧны ф, х, ц, букваяс, шусьӧны ф,х, ц звукъяс, но важӧн пырӧм кывъясын шусьӧны п, к, ч звукъяс: физкультура — (ф)изкультура, физика — (ф)изика, ферма — (ф)ерма, химия— (х)имия, хирург — (х)ирург, центр — (ц)ентр, цех — (ц)ех; но: шкап — шка(п), пӧнар — (п)ӧнар, кӧзяин — (к)ӧзяин, сакар — са(к)ар, петук — пету(к), улича — ули(ч)а, чеп — (ч)еп, сарапан — сара(п)ан, свинеч — свине(ч).

16. Роч кывйысь пырӧм кывъясын щ буква гижсянінӧ шусьӧ:

а) кыв заводитчигӧн тш звук: щӧка — (тш)ӧка, щель —(тш)ель, щӧть — (тш)ӧть, щӧтка — (тш)ӧтка, щӧгӧль — (тш)оголь;

б) кыв шӧрын гласнӧйяс костын — шш либӧ штш сочетание: ящик — я(шш)ик, я(штш)ик; клещи — кле(шш)и, кле(штш)и; пӧщада — пӧ(шш)ада, пӧ(штш)ада; ещӧ — е(шш)ӧ, е(штш)ӧ; помещик — поме(шш)ик, поме(штш)ик; училище — учили(шш)ӧ, учили(штш)ӧ; вещество — ве(шш)ество, ве(штш)ество; гуща — гу(шш)а, гу(штш)а; тьӧща — тьӧ(шш)а, тьӧ(штш)а; площадь — пло(шш)адь, плӧ(штш)адь; пищаль — пи(шш)аль, пи(штш)аль;

в) кыв шӧрын согласнӧй бӧрын — ш либӧ штш сочетание: ямщик — ям(ш)ик, ям(штш)ик; общество — об(ш)ество, об(штш)ество; браковщик — браков(ш)ик, браков(штш)ик; кладовщик — кладов(ш)ик, кладов(штш)ик; сплавщик — сплав(ш)ик, сплав(штш)ик;

г) кыв шӧрын согласнӧй водзын — ш: жилищнӧй — жили(ш)нӧй, мощнӧй — мо(ш)нӧй, хищнӧй — хи(ш)нӧй, сокровищница — сокрови(ш)ница, помощник — помо(ш)ник; д) кыв помын — ш: плащ — пла(ш), вещь — ве(ш), плющ — плю(ш), тӧварыш — тӧвары(ш).

17. Роч кывйысь пырӧм кывъясын кыв заводитчигӧн сч сочетание местаӧ шусьӧ тш звук: счёт, тшӧт — (тш)ӧт, счетовод —(тш)ӧтовод; но: (ч)ассьӧ.

Кыв шӧрын гласнӧйяс костын сч местаӧ шусьӧ штш либӧ шш сочетание: расчёт — рӧ(штш)ӧт, рӧ(шш)ӧт; переписчик — перепи(штш)ик, перепи(шш)ик; подписчик — подпи(штш) ик, подпи(шш)ик.

18. Роч кывйысь пырӧм кывъясын зч местаӧ шусьӧ жш либӧ жтш сочетаниеяс: приказчик—прика(жш)ик, прика(жтш)ик; указчик — ука(жш)ик, ука(жтш)ик; извозчик — изво(жш)ик, изво(жтш)ик; заказчик — зака(жш)ик, зака(жтш)ик; перевозчик — перево(жш)ик, перево (жтш) ик; грузчик — гру(жш)ик, гру(жтш)ик.

19. Рочысь пырӧм кывъясын, кор роч кывйын кыв помъясын эмӧсь пь, бь, вь, фь вомдорса небыд согласнӧйяс, коми кывйын найӧ шусьӧны чорыда: степ — сте(п), насып — насьы(п), дроб (мат.) — дро(б), морков — морко(в), судоверф — судовер(ф).

20. Рочысь пырӧм кывъясын, кор роч кывйын эм небыд р, коми кывйын сійӧ звукыс шусьӧ чорыда (кӧть и ӧткымын кывъясын вермӧ шусьыны и небыда, кыдз например: Горький, Корякин, Боря, зарядка, отряднӧй, порядкӧвӧй числительнӧй, спрягайтны, октябрьскӧй, моряк да с. в.): зверь — зве(р), букварь — буква(р), лагерь — лаге(р), пӧрадок — пӧ(р)адок, пӧнар — пӧна(р), крук — к(р)ук, гира — ги(р)а.

21. Рочысь пырӧм кывъясын т, д, с, з зубнӧй согласнӧйяс шусьӧны небыда, кор роч кывъяс найӧ сулалӧны п, б, м, в вомдорса небыд согласнӧйяс водзын: зверь — (зь)вер, звенитны — (зь)венитны, звиркнитны —(зь)виркнитны, четверг — че(ть)верг, Матвей — Ма(ть)вей, звезда — (зь)везда, свежӧй — (сь)вежӧй, спирт — (сь)пирт, свиснитны — (сь)виснитны, смел — (сь)мел, смекайтчыны (сь)мекайтчыны, свекла — (сь)векла, свинеч — (сь)винеч, свидетель — (сь)видетель, измена — и(зь)мена, смек — (сь)мек, смена —(сь)мена, свет — (сь)вет.

22. Рочысь пырӧм кывъясын с да з согласнӧйяс ть, дь, сь, нь, ль водзын шусьӧны небыда: стеклӧ — (сь)теклӧ, стен — (сь)тен, стих — (сь)тих, гӧститны — гӧ(сь)титны, социалистическӧй — социали(сь)тическӧй, честь — че(сь)т, гӧсть — гӧ(сь)т, костюм — ко(сь)тюм, лесник— ле(сь)ник, мясник — мя(сь)ник, градусник — граду(сь)ник, кузнеч — ку(зь)неч, ясли — я(сь)ли, числительнӧй — чи(сь)лительнӧй, кассир — ка(сь)сир.

23. Роч кывйысь пырӧм кывъясын ш бӧрын шусьӧ ы звук: шыла — ш(ы)ла, аршын — арш(ы)н, шынель — ш(ы)нель, шына — ш(ы)на, ӧшыбка — ӧш(ы)бка, шынкуйтны — ш(ы)нкуйтны, но: машина — маш(и)на.

24. шт, ст, сьт сочетаниеясын т звук шусьӧ: мунышт — муныш(т), сёйышт — сёйыш(т), кост — кос(т), лист — лис(т), чукӧст — чукӧс(т), ог лысьт — ог лысь(т), босьт — бось(т), весьт —весь(т), пласьт — плась(т).

25. Роч кывйысь пырӧм кывъясын сть сочетание пыдди шусьӧ сьт сочетание: власть — вла(сьт), тесть — те(сьт), милӧсть — милӧ(сьт), крепость — крепо(сьт), ведомость — ведомо(сьт), промышленность — промышленно(сьт), снасть — сна(сьт).

26. Рочысь пырӧм кывъясын стн сочетаниеын т звук оз шусьы: честнӧй — че(сн)ӧй, местнӧй — ме(сн)ӧй, областнӧй — обла(сн)ӧй, устнӧй — у(сн)ой, частнӧй — ча(сн)ӧй, крепостнӧй — крепо(сн)ӧй.

Рочысь пырӧм кывъясын здн сочетаниеын д звук оз шусьы: праздник — пра(зьн)ик, уезднӧй — уе(зн)ӧй.