Коми кывтӧдӧм

Небӧгса йӧзӧдӧм:

Мошегова А. Т. Орфографическӧй правилоэз // Грибанов С. Ф. Коми-пермяцкӧй орфографическӧй словарь. Кудымкар: Комипермгиз., 1945. Лб. 6-40.

ОРФОГРАФИЧЕСКӦЙ ПРАВИЛОЭЗ

 

I. Букваэз да нійӧ гижӧм.

§ 1. Коми-пермяцкӧй алфавитӧ пырӧны то кытшӧм букваэз:

Аа, Бб, Вв, Гг, Дд, Ее, Жж, Зз, Ии, Йй, Кк, Лл, Мм, Нн, Оо, Пп, Рр, Сс, Тт, Уу, Фф, Хх, Цц, Чч, Шш, Щщ, ъ, Ыы, ь, Ээ, Юю, Яя, Ёё, і, Ӧӧ.

§ 2. Шыэз сьӧрті коми-пермяцкӧй кыв торйӧтсьӧ то кыдз:

• 1) Тыргортӧм шыэз: б, в, г, д, ж, з, к, л, м, н, п, р, с, т, ф, х, ц, ч, ш, щ, дз, дж, тш. Нія торйӧтсьӧны то кытшӧм группаэз вылӧ:

а) Парнӧй тыргортӧм шыэз (д, т, з, с, л, н) вермӧны лоны чорытӧн, например: дӧра, дуга, тор, туй, зон, замок, сад, сук, лым, лог, ныв, нора, и небытӧн, например: дядь, тять, кузя, сяркан, пуля, нянь.

б) Чорыт непарнӧй тыргортӧммез (б, в, г, ж, к, м, п, р, ф, х, ц, дж, тш) быд положеннёын чорытӧсь, например: баб, вӧр, гу, жонь, кушак, мӧс, пурт, фартук, джодж, тшын.

в) Небыт непарнӧйез (ч, щ, дз) быд положеннёын небытӧсь, например: чань, чунь, чожа, чер, площадь, ящик, щука, дзодзог, дзут, дзав, кӧдзис, дзӧдзыв, дзир.

• 2) Тыргора шыэз: а, и, і, о, у, ы, э, ӧ.
• 3) Джынгора шы: й.

§ 3. Букваэз ё, я, ю гижсьӧны:

• 1) Кыв пондӧтчикӧ, медбы мыччавны йотируйтӧм тыргора шыэз (йо, йа, йу), например: ёг, ён, юр, юкмӧс, яй, яг.

Примечаннё: Буква ё вылӧ точкаэз колӧ сувтӧтны быд пораӧ.

• 2) Кыв шӧрын слог пондӧтчикӧ, медбы петкӧтны йотируйтӧм шыэз, например: заём, приём, пиян, тіян, кыян, лыян, сёян, коян.

Примечаннё 1: Мукӧд заимствованнӧй кыввезын тыргора шыэз бӧрын ё местаӧ колӧ гижны йо, например: район, майор, а ь бӧрын гижны о, например: батальон, бульон.

• 3) Небыт парнӧй тыргортӧм букваэз бӧрын (д, з, с, л, н, т), медбы мыччавны нылісь небытсӧ, например: сёйны, лён, кузя, тӧвся, сюр, нюр, дядь, нять, син, нёль.

Примечаннё 1: Небыт непарнӧй тыргортӧм букваэз ч, щ, дз, дзз бӧрын гижсьӧны а, о, у, например: чаг, чужӧм, чожа, Щорс, площадь, лэдза, дзодзог, одзза, дзав, дзольгӧ, дзуртӧ.

Примечаннё 2: Но заимствованнӧй кыввезын гижны сідз: Чёрнӧй море, щётка, брошюра, парашют, жюри.

§ 4. Буква е гижсьӧ:

• 1) Кыв пондӧтчикӧ, медбы мыччавны йотированнӧй тыргортӧм шы, например: ем, етша, ешта, Егор, Ермаков, единӧй, единица.
• 2) Небыт парнӧй тыргортӧммез бӧрын (д, т, з, с, л, н бӧрын), медбы мыччавны нылісь небытсӧ, например: пионер, неделя, зеп, сетны, некӧр, телега, телефон.
• 3) Быдӧс непарнӧй тыргортӧм шыэз бӧрын, например: бедь, вевт, гез, кер, шеп, пель, велӧтісь, торрез, пӧввез. 

§ 5. Буква э гижсьӧ:

• 1) Слог пондӧтчикӧ, медбы мыччавны нейотируйтӧм е шысӧ, например: эз, эта, эттшӧм, этадз, эстӧн, эг, эн, эшӧ.
• 2) Кыв шӧрын тыргора шыэз бӧрын, медбы мыччавны нейотируйтӧм шы э, например: поэт, поэма, ваэз, киэз, юэз.
• 3) Чорыт парнӧй тыргортӧммез бӧрын, например: сэт, лэдз, зэр, лэбны, тэныт, зэлыт, ёрттэз, кӧззэз, мӧссэз, журналлэз, годдэз, воннэз.

§ 6. Буква і гижсьӧ, медбы мыччавны шы и чорыт парнӧй тыргортӧммез бӧрын, например: зіль, нія, сі, зі, сылісь, тӧдіс, локтіс, сім, вӧлі, ӧні, олі, куті.

§ 7. Буква и гижсьӧ:

• 1) Слог пондӧтчикӧ, медбы мыччавны нейотируйтӧм и шы, например: изны, идзас, ид, иган.
• 2) Кыв шӧрын тыргора шыэз бӧрын, медбы мыччавны нейотируйтӧм и, например: пуис, нуис, юис, туис, кӧин, пӧим.
• 3) Небыт парнӧй тыргортӧммез бӧрын (д, т, з, с, л, н бӧрын), медбы мыччавны нылісь небытсӧ, например: ним, син, козин, ӧзим, коли, диво, дисциплина, типография.
• 4) Быдӧс тыргортӧммез бӧрын, например: пинь, видз, гижӧт, би, ки, кино, гири.

§ 8. Буква й гижсьӧ:

• 1) Кыв пондӧтчикӧ букваэз и, ӧ, ы одзын, медбы мыччавны нылісь йотациясӧ, например: йиджны, йи, йӧн, йӧв, йыв, йылісь.
• 2) Кыв шӧрын чорыт тыргортӧммез бӧрын, медбы мыччавны йотация букваэз и, ӧ да ы одзын, например: бӧрйыны, дорйыны, гарйи, бӧрйӧ, новйӧ, дорйӧ.
• 3) Кыв конецын тыргора букваэз бӧрын, медбы мыччавны дженыт й, например: вай, сёй, мый, туй, яй, рой, советскӧй, боевӧй.

Примечаннё: Буква й кольччӧ ӧ, ы, и одзын, кӧр й сулалӧ кыв основаын, например: вайӧ, вайис, яйӧн, яйын, кыйӧ, кыйис, но: сёй— сёя, вай— вая, лый— лыя.

§ 9. Буква ӧ гижсьӧ, медбы мыччавны шӧрӧт рядісь шӧрӧт подъёма тыргора шы, например: гӧгӧр, уджалӧны, тӧдны, ӧні, велӧтӧ, мунӧ, локтӧ, ӧм, котӧртӧ.

§ 10. Буква ь гижсьӧ:

• 1) Кыв конецын, медбы небзьӧтны сы одзся парнӧй тыргортӧм шысӧ, например: кузь, бедь, гадь, челядь, нёль, пель, нять, кӧть, юсь, усь, порсь.
• 2) Кыв шӧрын, медбы небзьӧтны парнӧй тыргортӧмсӧ, например: инька, вильса, узьны, разьны, кольны, асьным, пасьта.
• 3) Кыв шӧрын ӧ да ы букваэз одзын, медбы небзьӧтйы ны одзись парнӧй тыргортӧмсӧ, например: сьӧд, ньыв, кольӧм, лӧсьӧтны, пуксьыны, шырсьыны.
• 4) Кыв конецын сулалӧ кӧ парнӧй тыргортӧм шы, а сы бӧрын мунӧ кывйыв либо суффикс, например: кульсьӧ, нильзьӧ, куньсьӧ, разьсьӧ.

Примечаннё. Кӧр ордчӧн сулалӧны кык ӧткодь парнӧй тыргортӧм шы, сэк первӧй тыргортӧмыслӧ небытыс некыдз оз мыччассьы (буква ь сэк гижны оз ков), например: доддя, полля, вевттьыны, мырддьыны.

§ 11. Янсӧтан знаккез:

• 1) Буква ъ гижсьӧ, кыдз янсӧтан знак, чорыт парнӧй тыргортӧммез бӧрын я, е, ё, ю букваэз одзын, например: гозъя, розъя, изъя, адъютант, асъя, лӧсъя, съезд, съёмка, банъяв.
• 2) Заимствованнӧй кыввезын ъ гижсьӧ и мӧдік тыргортӧммез бӧрын, например: объект, объявленнё, объясненнё, объём.
• 3) Буква ь, кыдз янсӧтан знак, гижсьӧ непарнӧй тыргортӧммез бӧрын, а заимствованнӧй кыввезын сэтчин жӧ, кытӧн и русскӧй кылас, например: ловья, увья, шогья, кыкьямыс, пыжьян, чышьян, Дарья, семья, мырья, дорья, бӧрья, сырьё.

§ 12. Дж сочетаннё обозначайтӧ гора шипящӧй африкат, например: джодж, джадж, ыджыт, йиджны, удж.

§ 13. Дз сочетаннё обозначайтӧ небыт свистящӧй африкат, например: дзут, идзас, кыдз, видзны, кӧдзыт.

§ 14. Тш сочетаннё обозначайтӧ гуся шипящӧй африкат, например: нитш, тшын, тшӧтш, кытшӧм, ытшкыны.

Примечаннё: Ежели кык африкат сулалӧны ордчӧн, то гижсьӧны сочетаннёэз: джж, дзз, тшш, например: уджжез, джыджжез, джоджжез, кыдззез, видззез, адзза, вӧрӧдззис, нитшшез, потшшез.

§ 15. Букваэз ф, х, ц, щ гижсьӧны заимствованнӧй кыввезын, например: фронт, телефон, колхоз, совхоз, воздух, станция, центнер, улица, огурец, общество, площадь, ямщик, совещаннё.

 

ІІ. Шыэз аскодялӧм.

§ 16. Ежели кылын одзланься тыргортӧм шыыс аскодялӧ ас бӧрсис тыргортӧм шысӧ, колӧ адззыны кылыслісь вужсӧ либо основасӧ. Ежели адззӧм вужыс либо основаыс лоасӧ быдса значеннёаӧсь, сэк кылыс гижсьӧ аскодявтӧг (без уподобления), например: вӧтча (вӧт — вӧта), чорытжык (чорыта — чорытӧсь), шедтыны (шедіс — шедас), вежтыны (вежа — вежис), серӧмтчыны (серӧмтӧт).

§ 17. Ежели суффикс бердісь либо кывйыв бердісь торйӧтӧм кывлӧн вужыс ӧштіс ассис значеннёсӧ, сэк кылыс гижсьӧ аскодялӧмӧн, например: кольччыны, чеччыны, мыччыны, пӧрччасьны, тальччыны, курччавны, шоччисьны, адззыны (кыввез: кольч, чеч, мыч, пӧрч, тальч, курч, шоч, адз озӧ мыччалӧ некытшӧм значеннё).

§ 18. Быд небыт тыргортӧм шы аскодялӧ ас одзсис йотсӧ и медбы этӧ мыччавны, гижикӧ сувтӧтсьӧны кык буква ӧткодьӧсь, например: воть — воття, додь — доддя, киль — килля, поль — полля.

§ 19. Заимствованнӧй кыввезын, кӧднаын основаыс кончайтчӧ буква н вылӧ, аскодялӧмсӧ мыччалӧны кык н гижӧмӧн, например: собраннё, заседаннё, правленнё, совещаннё.

Примечаннё: Нія кыввез, кӧдналӧн основаыс оз кончайтчы буква н вылӧ, гижсьӧны русскӧй орфография сьӧрті, например: Илья, Ильич, эскадрилья, судья, условие, наречие.

§ 20. Уналыда эманиммезын быдӧс тыргортӧммез, кӧдна сулалӧны суффикс одзын, гижсьӧны кыкпӧв, например: кок — коккез, вӧв — вӧввез, вон — воннэз, шыр — шыррез, тетрадь — тетраддез, жонь — жоннез, кыдз — кыдззез.

§ 21. Глагол основаын буква ш аскодялӧ одзсис йотсӧ и гижсьӧ кыкпӧв, например: пышшыны, вешшыны, кошшыны.

§ 22. Мукӧд пораӧ коми-пермяцкӧй кыввезын овлӧ кыкпӧвса аскодялӧм: чорыт парнӧй тыргортӧм шы аскодялӧ одзсис йотсӧ и сы влияннё увтын небзьӧ ачыс. Эта овлӧ кываркмӧтан глагольнӧй суффикссэз дырни, а сідзжӧ мукӧд наречиеэзын, сэк гижсьӧны кык буква ӧткодьӧсь да ны бӧрын гижсьӧ ь либо буква я, например: мырддьыны, мырддьӧны, лыддьыны, лыддьӧны, лыддя, пессьыны, пессьӧны, песся, вевттьыны, вевттьӧны, ӧння, ӧддьӧн, джыння, тӧння, талуння, ашыння.

 

ІІІ. Диалекттэзын шыэзлӧн чередованнё.

§ 23. Буква л, кӧда мыччалӧ чорыт шы л, гижсьӧ то кӧр:

• 1) Кыв шӧрын тыргора шыэз одзын, например: вӧлыс, уджалӧ, пукала, ветлі, полӧ, кылыс, кылӧ, талун.
• 2)  Кыв пондӧтчӧмын то кытшӧм коми-пермяцкӧй кыввужжезын: лаб, лаж, ланьтны, лӧдз, ло, лов, лок, лонт, лӧг, лӧз, лӧнь, луд, лун, лы, лый, лым, лыс, лысьт, лабич, лайкыт, лапыт, лог, лонтны, лоп, лыд, лэб, лэдз, лэчыт, лӧсйи, лӧсьыт, лӧсьӧт.
• 3) Заимствованнӧй кыввезын буква л гижсьӧ сэтчин жӧ, кытӧн и русскӧй кыввезын, например: солдат, чулки, дело, полоз, журнал, прогул, металл, квартал.

§ 24. Кыв конецын, кыв шӧрын тыргортӧм шыэз одзын, й одзын да уна лыд мыччалан суффикс одзын гижсьӧ буква в, например: ныв, кыв, сьыв, пӧв, кӧв, вӧвныс, нывнат, кывкӧт, ловйӧн, ловья, ныввез, вӧввез, пӧввез.

§ 25. Коми-пермяцкӧй кыввезын первӧй слогын букваэз е да и одзын быд пораӧ гижсьӧны букваэз г да к, например: керку, кепись, гез, гид, гижны, но заимствованнӧй кыввез гижсьӧны то кыдз: техника, телеграф, типография, деньга, дисциплина, дело, диво.

 

IV. Шыэз йылісь мукӧд правилоэз.

§ 26. Кыввуж бӧрын, кӧда кончайтчӧ чорыт тыргортӧм шыӧн, буква я-сянь пондӧтчан суффикссэз одзын мукӧд пырся гижсьӧ ь, а букваэз ӧ, ы, и одзын гижсьӧ й, например: лов — ловья, ловйӧн, кор — корья, гар — гарья, гарйӧ, гарйы, гарйи; дор — дорья, дорйы, дорйи. Этадз гижсьӧ то кытшӧм кыввужжеза кыввезын: бан, быг, гаг, гар, гез, гоз, гыж, гыр, дзир, доз, зор, зыр, зуд, ид, из, кор, дор, куд, кыв, кӧв, кӧз, лов, лым, мыльк, мыр, ньӧр, нӧк, пож, поз, пруд, пуж, пыж, пӧрт, роз, сыр, сюр, сяр, таг, тор, тув, ув, чаг, чуж, тшыг, тшын.

Примечаннё: Кыввезӧ, кӧдна кончайтчӧны буква в вылӧ, ь да й колӧ гижны только то кытшӧм формаэзын: лов— ловья, ловйӧн, тув — тувйын.

§ 27. Буква и бӧрын суффикссэз гижны а, о буквасянь, например: би — биасьны, чери — чериавны, чериок, ки — киас, киок.

§ 28. Гижны буква й-тӧг кыввез: кӧин, тоин, пӧим, куим, баит, туис.

§ 29. Ежели ордчӧн сулалӧны кык небыт тыргортӧм буква, сэк небзьӧтӧмсӧ мыччалӧны только мӧдыслісь, например: килля, аттестат, лыддьыни, кузница, Абиссиния, уннявны, степь, стекло.

Примечаннё 1: л небзьӧтӧмсӧ мӧдік небыт тыргортӧммез одзын колӧ непременно мыччавны, например: больница, кольть, кольччыны.

Примечаннё 2: Парнӧй тыргортӧммезлісь небзьӧтӧмсӧ колӧ мыччавны и вежан кывйыввез одзын, кӧдна пондӧтчӧны небыт тыргортӧмсянь, например: дадьсис, кольтьсис, польсис, дадьсим, дадьсянь, дадься.

 

V. Кыдз гижны заимствованнӧй кыввез.

§ 30. Русскӧй кылісь заимствованнӧй кыввезын, географическӧй терминнэзын да асниммезын колӧ гижны букваэз: ф, х, ц, щ сідз жӧ, кыдз русскӧй кылас, например: фонарь, сарафан, фабрика, ферма, профсоюз, Франция, Анфиса, Фёдор, хозяин, сахар, пароход, колхоз, совхоз, стахановец, химия, Архангельск, Захар, центр, партиец, комсомолец, колхозница, ударница, щётка, щука, щит, ямщик, площадь, вещество, общество, совещаннё.

§ 31. Ежели заимствованнӧй кыв конецын непарнӧй тыргортӧм бӧрын сулалӧ небыт знак, сэк эна кыввес гижсьӧны русскӧй орфография сьӧрті, например: молодёжь, степь, дробь, вещь, тушь, сентябрь, октябрь, ноябрь, букварь, фонарь, слесарь, токарь, Сибирь.

Примечаннё 1: Кыв шӧрын буква р бӧрын небыт знакыс сідзжӧ кольччӧ, например: Харьков, Горький, сентябрьскӧй, октябрьскӧй, декабрьскӧй.

Примечаннё 2: Ежели кылын нимтан вежанын буква р бӧрын эм небыт знак, сэк сія кольччӧ и мукӧд вежаннэзын, например: сентябрьын, фонарьӧн, букварьын, Сибирьӧ, букварьлӧ, Сибирьсянь. Но кыввезын р букватӧг небыт знак оз кольччы, например: молодёжлӧн, степсянь, дробтӧг, вещлӧн, тушсӧ.

§ 32. Кӧр заимствованнӧй кыввезын букваэз б, в, г, м, п, ф, р бӧрын сулалӧны я, е, ю, сэк и коми-пермяцкӧй кылын гижсьӧны эна жӧ букваэз и буква ё весьтын кӧть кӧр сувтӧтчӧны точкаэз, например: бюро, ряд, обязательство, пятилетка, знамя, рюмка, Гюго, Вячеслав, Фёдор, Боря.

§ ЗЗ. Заимствованнӧй кыввезын ж да ш букваэз бӧрын гижсьӧ и и коми-пермяцкӧй кылын, например: мужик, машина, ворошиловец.

§ 34. Ежели русскӧй кылын гижӧма буква о, сэк и коми-пермяцкӧй кылын гижсьӧ буква о, например: совет, пароход, паровоз, сапог, колхоз, солдат, диво, полоз, но ягӧд, гӧсь.

§ 35. Буква э-ӧн заимствованнӧй кыввез гижсьӧны русскӧй орфография сьӧрті, например: эвакуация, электричество, эпоха, экипаж, Энгельс, поэт, этаж.

§ 36. Ордчӧн сулалан кык ӧткодь буква коми-пермяцкӧй кылын гижсьӧны сідз жӧ, например: класс, касса, масса, Одесса, металл, аттестат, кристалл, грамм, грамматика.

Примечаннё: Кӧр кык ӧткодь тыргортӧм дынӧ содтісьӧ куимӧт сэтшӧм жӧ тыргортӧм, сэк ӧткодь букваэс гижсьӧны кыка, а не куима, например: классянь, металлӧн.

§ 37. Русскӧй кылісь заимствованнӧй кыввез, кӧдналӧн кывйылыс ий, ия коми-пермяцкӧй кылын гижсьӧны русскӧй орфография сьӧрті, например: сценарий, Везувий, Горький, Василий, революция, армия, Мария.

Примечаннё: Сэтшӧм эманиммезын, кӧдна русскӧй кылын овлӧны ӧтдруг и тӧдчанниммезӧн, коми-пермяцкӧй кылын кывйылыс лоӧ — ӧй, кыдз и тӧдчанниммезлӧн, например: рабочӧй, служащӧй.

§ 38. Кыввез, кӧдналӧн кывйылыс русскӧй кылын лоӧ сть, коми-пермяцкӧй кылын гижсьӧны сідз жӧ, например: промышленность, ведомость, область, власть, часть, но коми-пермяцкӧй кылын гижсьӧ гӧсь (а не гость).

§ 39. Кыввез: метр, километр, кубометр, сантиметр, литр, грамм, килограмм гижсьӧны русскӧй орфография сьӧрті.

 

VI. Кыдз гижсьӧны сложнӧй кыввез. 

§ 40. Сложнӧй кыввез гижсьӧны ӧтлаын то кӧр:

• 1) Кӧр ӧтыс либо кыкнан составнӧй частьыс ӧштісӧ самостоятельнӧй значеннё, например: синкым, чальпод, понпуш, паськӧм, вунданпод, сюпод, рудзӧгпод, горпод, кепись, кокшы, кӧмкӧт, нёльподӧн, ловпу, пипу, нинпу, жовпу, льӧмпу, тӧдвылын.
• 2) Кӧр кык кыв ӧтлаын сетӧны паськытжык понятие либо мӧдік понятие, например: нырӧм, аймам, тымус, кикок, вирветлӧм, виркисьтӧм, кикутӧм, кайпоз, совдоз, порохдоз, чайдоз, турунчир, вугыршать, кокпыдӧс, кипод, кисадь, пельсадь, коксадь, кидолонь, капустайӧр, карчйӧр, горӧм, горлыс, шӧмйӧв, рисьва, няньшӧм, кӧрттуй, кӧрттув, черинянь, кӧртзыр.

Примечаннё: Гижны торйын: зӧр йӧр, рудзӧг йӧр, пар йӧр.

• 3) Кӧр кык кылісь лоӧ мӧдік значеннёа кыв, например: бипур, даркаюр, капустаюр, осьтаӧм, пышкай, упышму, турунюр, пӧттурун, ситурун, ошсьӧктан, ошпу, йӧвтурун, чераньвез, юракыв, эманим, тӧдчанним, нимвежтас, лыданим, кывбӧр, кыввуж, кывйыв, енӧшка, порськок, йӧвтшак, черива, гуяма, черигадя, зуси, кайварыш, курӧгварыш, ойтӧв, биаиз, вӧрмӧс, кӧзъягӧд, озъягӧд, гуткулантшак, пельпон, шырби, урбӧж, туримоль, синва, бикыв, юрси, сьӧдкай, сьӧдрака, бабапель, кӧрымкай, пуягӧд.
• 4) Кыввез, кӧдна мыччалӧны профессияэз либо социальнӧй категорияэз, например: вӧркералісь, вакыскалісь, вакайӧтлісь, вановйись, мууджалісь, мууджалӧм, подавӧдитісь, бикерись, матегпуись, матегпуӧм, одзынмунісь, гортэчись, подӧнмунісь, мошвӧдитӧм, мошвӧдитісь, черикыйись, черикыйӧм, сапогвурись, порсьвӧдитӧм, подавӧдитӧм, смолапуӧм, смолакерӧм, вурунвартісь, няньпӧжалӧм.

Примечаннё: Ежели эттшӧм кыввез дынын эм тӧдмӧтан кыв, сэк колӧ гижны нійӧ торйын, например: бур сапог бурись, но знатнӧй вӧркералісь.

• 5) Кывбӧррез вежан кывйыввезкӧт нимтан да керӧтан вежаннэзын гижсьӧны ӧтлаын, например: кыкпӧв, кырасйыв, кокувт, почваувт, ойшӧр, вавыв, васай, туйтор, пуйыв, лунтыр, додьтыр, косви, пидзӧсви.
• 6) Тӧдчанниммез, кӧдна аркмӧны эманиммезісь, нимвежтассэзісь, лыданиммезісь да мӧдіккезісь кывбӧррезкӧт сетӧны мӧдік оттенок, сідзжӧ гижсьӧны ӧтлаын, например: ваувтся, вавывся, керӧсдорся, лунодзся, васайся, вашӧрся, керкудынся, вавесьтся, мукӧдпырися, мукӧдпырись, мукӧдпыр, куимӧтпырся, вапанытся, ваньылатся, сьӧдвевья, сьӧдсора, ӧтпӧвса, куимпӧвса.
• 7) Наречиеэз, кӧдна аркмӧны глагольнӧй эманимись, тӧдчанниммезісь кывбӧррезкӧт: увья, сорӧн, пӧвсӧн гижсьӧны ӧтлаын, например: горзӧмувья, радувья, ӧтпӧвсӧн, куимпӧвсӧн, горзӧмсорӧн, видӧмсорӧн.
• 8) Кывбӧр сувда, кӧр мыччалӧ этажжез, гижсьӧ ӧтлаын, например: ӧтсувда, кыксувда, куимсувда, но гижны торйӧн: морт сувда, керку сувда, метр сувда.
• 9) Тӧдчанниммез, кӧдна аркмисӧ эманиммезісь, тӧдчанниммезісь да наречиеэзісь ӧтлаын причастиекӧт, гижсьӧны ӧтлаын, например: вӧрпилитан, шучтыдалан, бельвидзӧ, сьӧдвидзӧ, виркисьтан, синбытшкан, шучадззись, шучнӧбӧтана, кучиккеран, викеран.
• 10) Тӧдчанниммез, кӧдна сулалӧны ордчӧн да мыччалӧны рӧм да оттеноккез, гижсьӧны ӧтлаын, например: вежчочком, югытвеж, сьӧдсера, сьӧдлӧз.
• 11) Тӧдчанниммез, кӧдна аркмӧны ас нимвежтасісь кыввезкӧт: коддя, сяма, ныра, гижсьӧны ӧтлаын,например: аскоддя, ассяма, асныра.
• 12) Кывбӧр кодь тӧдчанниммезкӧт, глаголлэзкӧт, причастиеэзкӧт да наречиеэзкӧт гижсьӧ ӧтлаын, например: ыджыткодь, сёркодь, висьталіскодь, пӧдналӧмкодь.
• 13) Кывбӧр моз глаголлэзкӧт да наречиеэзкӧт, кӧдна аркмӧны тӧдчанниммезісь, гижсьӧны ӧтлаын, например: мунісмоз, важмоз, одззамоз, горӧтісмоз.
• 14) Наречиеэз да тӧдчанниммез ӧт основакӧт гижсьӧны ӧтлаын, например: ӧтмоз, ӧтчожа, ӧтвына.
• 15) Кӧр кыв джын сулалӧ эманим бӧрын, сэк гижсьӧ ӧтлаын, например: годджын, листджын, кругджын, но гижсьӧ торйын то кӧр: джын километр.

Примечаннё: Колӧ гижны ведраджыння чугун.

• 16) Кыв пиян гижсьӧ ӧтлаын то кытшӧм кыввезын: каньпиян, ошпиян, порсьпиян, но морт пиян.

§ 41. Сложнӧй кыввез гижсьӧны дженыт кырӧлӧн то кӧр:

• 1) Вынӧнжык висьталан значеннёын повторяйтчан кыввез, например: рядӧн-рядӧн, рыт-рыт, чукӧрӧн-чукӧрӧн, ылын-ылын, матын-матын, лун-лун.
• 2) Синонимическӧй парнӧй кыввез, например: ветлӧ-мунӧ, мунӧ-локтӧ, пырӧ-петӧ, сьывны-модьны, лэдзчӧ-кайӧ.
• 3) Сложнӧй кыввез, кӧдналӧн кыкнан частяс суффикссэз а-я, например: мама-ныла, ая-зона, соя-вона, чаня-вӧла.
• 4) Сёрникосткыв значеннёа парнӧй кыввез, кӧдна шыэз сьӧрті ӧтамӧд дынӧ матынӧсь, например: дзиль-дзоль, туп-тап, рез паз, нюв-няв, сюр-сяр, чукыль-мукыль.
• 5) Кыввез, кӧдна мыччалӧны неопределённӧй количество, например: куим-нёль, вит-квать, морт-мӧд, вӧв-мӧд, лунмӧд.

 

VІІ. Эманим.

§ 42. Тӧдмӧтантӧм вежлалӧм.

Субъектно-объектнӧй вежаннэз. 

• 1. Нимтан (именительный). Кин? Мый? ки, вӧр, дадь.
• 2. Асалан (родительный). Кинлӧн? Мыйлӧн? килӧн, вӧрлӧн, керкулӧн.
• 3. Босьтан (притяжательный). Кинлісь? Мыйлісь? вӧрлісь, бадьлісь.
• 4. Сетан (дательный). Кинлӧ? Мыйлӧ? Мӧслӧ, колхозлӧ, дадьлӧ.
• 5. Керӧтан (винительный). Кинӧс? Мыйӧс? вонӧс, вӧлӧс, ошӧс.
• 6. Керан (творительный). Кинӧн? Мыйӧн? киӧн, вӧрӧн, дадьӧн.
• 7. Ӧтлаӧтан (соединительный). Кинкӧт? Мыйкӧт? шыркӧт, колхозкӧт, вонкӧт.
• 8. Эмтӧмтан (лишительный). Кинтӧг? Мыйтӧг? китӧг, вӧртӧг, дадьтӧг.
• 9. Ордчалан (сравнительный). Кинся? Мыйся? кися, вӧрся, ошся.
• 10. Локтан (достигательный). Кинла? Мыйла? вӧрла, мӧсла, пиканла.

 Внутриместнӧй вежаннэз.

• 11. Инса (местный). Кинын? Мыйын? Кытӧн? киын, колхозын, вӧрын, керкуын.

• 12. Петан (исходный). Кинісь? Мыйись? Кытісь? киись, колхозісь, вӧрись, керкуись.
• 13. Пыран (вступительный). Кинӧ? Мыйӧ? Кытчӧ? киӧ, вӧрӧ, колхозӧ, муӧ.

Внешнеместнӧй вежаннэз.

• 14. Сибӧтан (приблизительный). Кинлань? Мыйлань? килань, вӧрлань, вонлань.
• 15. Ылынтан (отдалительный). Кинсянь? Мыйсянь? Кысянь? кисянь, вӧрсянь, вонсянь.
• 16. Вуджан (перехедный). Кинӧт? Мынӧт? (кыті), киӧт, вӧрӧт, туйӧт.
• 17. Тӧдмӧтан (предельный). Кинӧдз? Мыйӧдз? Мыйви? (кытчӧдз) вӧрӧдз, вонӧдз, пидзӧсви.

§ 43. Тӧдмӧтантӧм вежлалӧмӧн эманиммезлӧн эм эшӧ тӧдмӧтана-асалан вежлалӧм, кӧда мыччалӧ, что предметыс тӧдса ни, сы йылісь висьталӧм ни либо эта предметыс кытшӧм-либо лицолӧн, например: киӧ, кокӧ, сойӧ, айним, мамныт, вонныс, киӧттям, вонсиным.

§ 44. Сложносокращённӧй кыввезын, кӧдна аркмӧмась медодзза букваэзісь, а сідзжӧ условнӧй ниммезын, кӧдна босьтсьӧны кавычкаэзӧ, вежан кывйыввес гижсьӧны дефис-пыр, например: СНК-лӧн, МТС-лісь, СССР-ись, Окроно-ӧдз. 

Мукӧд сложносокращённӧй кыввезын вежан кывйыв гижсьӧ ӧтлаын: вузлӧн, риклісь, райкомын.

§ 45. Уналыда эманиммезлӧн суффикссэз ез да эз сувтӧтсьӧны основа бӧрын асалан суффикссэз да вежан кывйыввез одзын.

Суффикс эз гижсьӧ то кӧр:

• 1) Кыввезын, кӧдналӧн конецас тыргора шы, например: киэз, керкуэз, пимиэз, туриэз, фабрикаэз, семьяэз, собраннёэз, революцияэз.
• 2) Эманиммезын, кӧдналӧн конецас чорыт парнӧй тыргортӧм шы и эта шыыс шусьӧ кыкпӧв: воннэз, городдэз, саддэз, докладдэз, вопроссэз, мӧссэз, колхоззэз, морттэз, журналлэз, курссэз, совхоззэз.

Суффикс ез гижсьӧ то кӧр:

• 1) Эманиммезын, кӧдналӧн конецас тыргортӧм шы и эта шыыс шусьӧ кыкпӧв, например: доддез, беддез, тетраддез, полаттез, воттез, вӧввез, шыррез, ошшез, коккез, видззез, джоджжез, потшшез.
• 2) Эманиммезын, кӧдналӧн конецас й, например: туйез, кайез, сарайез, санаторийез.

§46. Эманиммезлӧн кываркмӧтан суффикссэз:

• 1. Ас — вердас, быдмас, петас, шебрас, висьтас, вежӧртас.
• 2. Ӧт — гижӧт, йӧртӧт, юкӧт, кӧртӧт.
• 3. Ись — вурись, гӧрись, велӧтчись, узись, гижись.

Примечаннё: Чорыт парнӧйез бӧрын суффикс гижсьӧ сідз — ісь, например: велӧтісь, уджалісь.

• 4. Ӧм — велӧтчӧм, велӧтӧм, вурӧм, аско- дялӧм.
• 5. Ан — юан, вартан, вежан.

Примечаннё: Кыввезын, кӧдналӧн конецас сулалӧ й, гижсьӧ суффикс ян, например: сёян, кыян.

• 6. Тор — йӧвтор, яйтор, няньтор, сёрнитор.
• 7. Ин — керӧсаин, пожумаин, мунанін.
• 8. Ӧс — пуртӧс, пытшкӧс, шӧмӧс.
• 9. Ка — зонка, инька, нывка, ичмонька, айка.
• 10. А, я — кузя, вылына, пасьта, ыжда, кыза.
• 11. Ок— мӧсок, вӧлок, керкуок, кагаок.

Примечаннё: Кыввезын, кӧдналӧн конецас сулалӧ ь либо й, суффикс лоас ёк, например: дадёк, порсёк, панёк, каёк, туёк.

• 12. Жуг — мӧсжуг, понжуг, керкужуг.
• 13. Иньӧй — вӧриньӧй, ыбиньӧй, но вӧліньӧй, ёртіньӧй, мӧсіньӧй.
• 14. У — ю— вону, бабу, деду, Маню, сою.
• 15. Заимствованнӧй кыввез гижсьӧны русскӧй орфография сьӧрті, например: коммунист, комсомолец, ударник, богатство.

§ 47. Сочетаннёэз эманимись эманимкӧт жӧ, кӧр первӧйыс лоӧ тӧдмӧтан кылӧн, гижсьӧны торйын, например: пызан кок, мӧс сюр, пон бӧж, нянь зыр, вӧр утка, баня гор, бадь лист, керку крыша.

 

VIII. Тӧдчанним.

§ 48. Сложнӧй тӧдчанниммез, кӧдна мыччалӧны ӧтік цвет, гижсьӧны ӧтлаын, например: кельыдлӧз, югытгӧрд, кельыдвеж, чимсьӧд, бельчочком, югытлӧз, пемытрусӧй.

Примечаннё 1: Кык ӧткодь тӧдчанним, кӧдна употребляйтчӧны ыджыт значеннё мыччалӧм понда, гижсьӧны кырӧлокӧн, например: ыджыт-ыджыт, вына-вына, вылын-вылын, ыджытся-ыджыт, вылынся-вылын.

Примечаннё 2: Кывторрез вель, зэв, дзирс, дзар, медся, стрась, куш тӧдчанниммезкӧт гижсьӧны торйын, например: дзар югыт, вель бур, дзирс, пемыт, зэв вына, медся бур, стрась ыджыт, куш чочком.

§ 49. Суффикс кодь тӧдчанниммезкӧт гижсьӧ ӧтлаын, например: ыджыткодь, гӧрдкодь, вежкодь, зелёнӧйкодь.

§ 50. Ас нимвежтасісь да коддя, ныра, сяма кыввезісь аркмӧтӧм тӧдчанниммез гижсьӧны ӧтлаын, например: аскоддя, асныра, ассяма.

§ 51. Тӧдчанниммезлӧн кываркмӧтан суффикссэз:

• 1)  Ӧв — лӧз — лӧзӧв — лӧзӧвӧсь, гӧрд — гӧрдӧв — гӧрдӧвӧсь, сьӧд — сьӧдӧв — сьӧдӧвӧсь.

Примечаннё: Эна кыввезын л да в оз чередуйтчӧ, быдлаын гижсьӧ в.

• 2) Жык — кузьжык, буржык, басӧкжык.
• 3) Ыник — гажыник, кӧсыник.
• 4) Ик — лажмытик, векнитик, кокнитик.
• 5) Ыт — курыт, дженыт, кӧдзыт.
• 6) А, я — гажа, ловья, мырья, изъя, увья.
• 7) Том — пурттӧм, сапогтӧм, китӧм.
• 8) Ся — гожумся, тулысся, тӧвся, арся.
• 9) Ӧвӧй — пуовӧй, пӧловӧй, кыдзовӧй.
• 10) Ӧсь — няньӧсь, нятьӧсь.

§ 52. Заимствованнӧй кыввезын тӧдчанниммезлӧн кывйылыс лоас ӧй, например: советскӧй, культурнӧй, Краснӧй Армия, социалистическӧй, чугуннӧй, стальнӧй.

§ 53. Суффикссэз: вывся, гӧгӧрся, костся, увтся, дорся, бокся, бердся, пытшкся, сайся гижсьӧны ӧтлаын, например: туйвывся, годгӧгӧрся, сыкостся, ваувтся, туйдорся, вӧрбердся, вапытшкся.

§ 54. Суффикссэз: вевья, пӧвса, сора гижсьӧны ӧтлаын, например: гӧрдвевья, сьӧдвевья, ӧтпӧвса, кыкпӧвса, куимсора, нёльсора.

 

IX. Лыданим.

§ 55. 1) Лыданиммез кыкдасӧдз, а сідзжӧ десятоккез, сотняэз гижсьӧны ӧтлаын, например: даснёль, дассизим, даскыкьямыс, кыкдас, нёльдас, ӧкмысдас, кыксто, куимсто, нёльсто, сизимсто.

2) Сэтшӧм лыданиммез, кӧдна сулалӧны сёрникузяас эманимтӧг, вермӧны вежласьны вежаннэз сьӧрті сідз жӧ, кыдз и эманиммез, например: асалан вежанын — пельлӧн, нёльӧлӧн, нёльытлӧн.

Примечаннё: Кӧр лыданимыс сулалӧ ордчӧн эманимкӧт, сэк сія оз вежлась, а вежлалӧ ассис кывйывсӧ только эманимыс, например: асалан вежанын лоас — квать книгалӧн, тӧдмӧтанын — квать книгаӧдз.

§ 56. Лыданиммез, кӧдна мыччалӧны приблизительнӧя лыдсӧ, гижсьӧны кырӧлокӧн, например, кык-куим морт, нёль-вит книга, морт нёль-вит, вӧв кык-куим, сотня кык-куим потш, книгаэс, сотня куим-нёль.

Примечаннё 1: Мукӧд тӧдмӧтантӧм лыданиммез гижсьӧны торйын, например: дас мымда, вит кынымись, керку кыкын.

Примечаннё 2: Порядковӧй лыданиммез, кӧдналӧн медбӧрья кылыс сотӧй, тысячнӧй, миллионнӧй, миллиарднӧй, гижсьӧны ӧтік кылӧн, например: кыксотӧй, кватьтысячнӧй, нёльмиллионнӧй, стокыкдасмиллиарднӧй.

Лыданиммезлӧн суффикссэз:

• 1) Ӧт — нёльӧт, витӧт, сто кыкдас кватьӧт.
• 2) А-я — нёля, вита, кыка, кватя.
• 3) Ӧн — нёльӧн, витӧн, кватьӧн.

Асалан суффикссэз: нам, нат, нас — витнам, кватьнат, сизимнас.

Чукӧртан лыданимлӧн суффикссэз: нанным, нанныт, нанныс. — Кыкнанным, нёльнанным, куимнанныс.

 

X. Нимвежтас.

§ 57. Ӧтка лыдын куимӧт лицоа личнӧй нимвежтассэзлӧн нимтан да керӧтан вежаннэзын основаыс лоас сі, а мӧдік вежаннэзын — сы, например: сылань, сылісь, сыӧн, сытӧг, сыись.

§ 58. Личнӧй нимвежтассэзлӧн уна лыдын первӧй да мӧдік лицоын вежан кывйыв одзын содтіссьӧ суффикс ян, например: миянӧс, тіянӧс, миянӧн, тіянӧн, миянлань, тіянсянь, тіянтӧг, миян, тіян.

§ 59. Иньдӧтан нимвежтассэз: этія, сія, нія косвеннӧй вежаннэзын вежласьӧны кыдз личнӧй нимвежтассэз: сія, нія, а эта, эна, этна нимвежтассэзын вежан кывйылыс сувтӧтсьӧ нимвежтас бердӧ, например: этналӧ, этасянь, этнакӧт.

Примечаннё: Керӧтан вежанын лоас: этӧ, энӧ. Нимвежтассэзлӧн основаэз сы, ны гижсьӧны кыввезкӧт торйын, например: сы одзын, сы моз, ны коласын, ны книгаӧн.

§ 60. Суськисян нимвежтассэз не кывторкӧт гижсьӧны ӧтлаын: некин, некытшӧм, некытӧн.

§ 61. Тӧдтӧмтан нимвежтассэз кӧ кывторкӧт гижсьӧны ӧтлаын, например: кинкӧ, кытшӧмкӧ, кынымкӧ, кынымӧткӧ, кӧдакӧ.

 

ХІ. Глагол.

§ 62. Ӧння кадісь да лоан кадісь глаголлэзлӧн кывйыввес то кытшӧмӧсь:

• ӧтка лыдын 1-ӧй лицолӧн:а, я — муна, коля, вая, уна лыдын —ам, ям— мунам, колям, ваям;
• ӧтка лыдын 2-ік лицолӧн ан, ян — мунан, колян, ваян, уна лыдын — ат, ят — мунат, колят, ваят;
• ӧтка лыдын 3-ӧт лицолӧн — ӧ — мунӧ, кольӧ, вайӧ, уна лыдын — ӧны — мунӧны, кольӧны, вайӧны;
• лоан кадісь ӧтка лыдын 3-ӧт лицолӧн — ас, яс — мунас, коляс, ваяс, уна лыдын — асӧ, ясӧ — мунасӧ, колясӧ, ваясӧ.

Примечаннё: Сэтшӧм глаголлэз, кытӧн основа конецас сулалӧ й, гижсьӧны то кыдз: вая, кыя, лыя.

§ 63. Син одзын чулалӧм кадісь глаголлэзлӧн кывйыввес то кытшӧмӧсь: ӧтка лыдын — коли, вайи, муні; колин, вайин, мунін; колис, вайис, муніс, уна лыдын: колит, вайит, муніт; колисӧ, вайисӧ, мунісӧ.

§ 64. Тшӧктан формаа глаголлэзлӧн ӧтка лыдын кывйылыс лоас ы, например: пуксьы, вурсьы, пессьы, гижсьы.

Примечаннё: Тшӧктан формаа глаголлэз овлӧны и кывйывтӧг, например: гиж, кый, лый, вай, мун, пет, рисуйт; уна лыдын — мунӧ, петӧ, пырӧ, гижӧ, лыддьӧтӧ.

§ 65 Безличнӧй глаголлӧн суффикс, кӧда мыччалӧ, что действиеыс кончайтчӧ ни, лоӧ — сь, например: петсьӧ, мунсьӧ, уджавсьӧ.

§ 66. Невуджан глаголлӧн суффиксыс д да т бӧрын дз — ч, а мӧдік букваэз бӧрын сь, например: купайтчӧ, велӧтчӧ, лэдзчӧ, но — миссьӧ, кыссьӧ, вежсьӧ, вурсьӧ.

§ 67. Бертан глаголлӧн суффиксыс ись — кутчисьны, шоччисьны, мыччисьны.

§ 68. Унаись керӧм мыччалан суффикс  —  лывл — гижсьывліс, сьывлывліс, ветлывліс.

§ 69. Глаголлэзын: шуны, пуны, нуны, юны, некӧр оз содтісь л, а быд производнӧй формаын лоас: шуа, пуа, нуа; шуис, пуис, нуис; шуӧны, пуӧны, нуӧны.

§ 70. Тӧдмӧтантӧм формаа глаголлӧн кывйыв ны, например: мунны, пыравны, котӧртны, осьтны, босьтны, ветлыны, гижсьыны, рисуйтчыны, серӧмтчыны.

§ 71. Глаголісь аркмӧм ниммезлӧн суффикссэз то кытшӧмӧсь: ись (ісь), ӧм, тӧм, ан (ян), например: уджалісь морт, велӧтӧм морт, гижтӧм письмо, юан ва, вурсян ем.

§ 72. Кодь, жык и моз глаголлэзкӧт гижсьӧны ӧтлаын, например: муныштісмоз, юыштіскодь, серӧмтчыштіскодь, коласжык.

Примечаннё 1: Быдкодь оттенок сетан кыввез гижсьӧны глаголлэзкӧт торйын, например: бель видзӧ, сьӧд тыдалӧ, дзар югдіс, дзар керис, гым-йирк пырис.

Примечаннё 2: Глагол керны, кӧда употребляйтчӧ мӧдік глаголлэз бӧрын, пыр гижсьӧ кырӧлокӧн, например: уджаліс-керис, уджалӧв-керис, сёйис-керис, сёйӧв-керис.

§ 73. Сэтшӧм глаголлэзын, кӧдна кончайтчӧны буква т вылӧ, эта букваыс кольччӧ быд кылын, кӧр мӧдкодьсьӧтамӧ кывсӧ, например: осьт, осьта, осьті, осьтыштны, осьтышті; босьт, босьта, босьті, босьтыштны, босьтышті; кисьт, кисьта, кисьті, кисьтыштны, кисьтышті, мунышт, муныштны, мунышта; видзӧтышт, видзӧтыштны, видзӧтышта; гижышт, гижыштны, гижыштышта.

 

ХІІ. Причастие.

§ 74. Ӧння када причастиеэз аркмӧны суффикссэзӧн: ись (ісь), ан (ян), например: уджалісь морт, сёйись вӧв, косьман турун, лыддьӧтан книга.

§ 75. Чулалӧм када причастиеэз аркмӧны суффиксӧн -ӧм, например: уджалӧм му, косьмӧм турун, лыддьӧтӧм книга.

§ 76. Суськисян формаа причастиеэз аркмӧны кывторрезӧн не, абу да суффиксӧн тӧм, например: Мортыс сія не кольччись. Пызаныс абу краситӧм. Велӧтчытӧм морт — топ синтӧм.

§ 77. Причастие одзын эм кӧ вежӧртӧтан кыв, сэк кывтор не гижсьӧ торйын. Например: Омӧн сулаліс зелёнӧй, эшӧ пилаӧн не павкӧтӧм вӧр.

§ 78. Причастие одзын вежӧртӧтан кылыс кӧ абу, сэк кывтор не гижсьӧ ӧтлаын. Например: Пызан вылын куйліс непӧдналӧм книга.

§ 79. Кӧр причастие лоӧ висьтасӧн, кывтор не гижсьӧ торйын. Например: Муыс эшӧ не гӧрӧм.

 

XIII. Деепричастие.

§ 80. Деепричастиеэз аркмӧны то кытшӧм суффикссэзӧн:

• икӧ (ікӧ), например: мунікӧ, уджалікӧ, быдмикӧ, дорсикӧ, кайикӧ;
• тӧн, например: мунтӧн, уджавтӧн, быдмытӧн, дорсьытӧн, кайтӧн;
• тӧдз, например: мунтӧдз, уджавтӧдз, быдмытӧдз, дорсьытӧдз, кайтӧдз;
• тӧг, например: мунтӧг, уджавтӧг, быдмытӧг, дорсьытӧг, кайтӧг;
• ӧмӧн, например: мунӧмӧн, уджалӧмӧн, быдмӧмӧн, дорсьӧмӧн, кайӧмӧн
• мӧн, например: ваймӧн, сёймӧн.

§ 81. Деепричастиеэзкӧт кывтор не гижсьӧ торйын. Например: Старик не тэрмасьӧмӧн петіс керкуись.

§ 82. Кыввез: моз, коста, дырни деепричастиеэзкӧт гижсьӧны ӧтлаын, например: мунікмоз, гижиккоста, гӧриккоста, велӧтчикдырни.

 

XIV. Наречие.

§ 83. А суффикса тӧдчанниммезісь аркмӧм наречиеэзын гижсьӧ аа, например: гажаа, мичаа.

§ 84. Эманиммезісь аркмӧм наречиеэзын кыввез: быд, тыр, йыв, кузь гижсьӧны ӧтлаын, например: ойбыт, тӧвбыт, китыр, содзтыр, лунтыр, кокйыв, кузьой, кузьлун.

§ 85. Тӧдчанниммезісь аркмӧм наречиеэзын кыввез: кузя, шогӧн, пырись, увья гижсьӧны ӧтлаын, например: буркузя, лёкшогӧн, лёккузя, кокнитпырись, полӧмпырись, смевпырись, повзьӧмувья, горзӧмувья.

§ 86. Лыданиммезісь аркмӧм наречиеэзын кыввез: пӧв, пырья, пырись гижсьӧны ӧтлаын, например: кыкпӧв, нёльпӧв.

§ 87. Кыв кодь наречиеэзкӧт гижсьӧ ӧтлаын, например: ылынкодь, матынкодь.

§ 88. Ӧт да мӧд основакӧт наречиеэз гижсьӧны ӧтлаын, например: ӧтпырись, мӧдпырись, ӧтвылісь, ӧтмоз, мӧдмоз, ӧтнёж, ӧткоста.

 

XV. Кывбӧррез.

§ 89. Эманиммезкӧт, тӧдчанниммезкӧт, лыданиммезкӧт да нимвежтассэзкӧт кывбӧррез кӧть кӧр гижсьӧны торйын, например: керку дынын, ӧшин увтын, пызан вылын, ю сайын, тэ дынын, сы ордын, куимсто витдас гӧгӧр.

§ 90. К ывбӧррез ви, пӧв, етш гижсьӧны ӧтлаын, например: пидзӧсв/stroemngи, унапӧв, грамметш.

§ 91. Кывбӧр пыр гижсьӧ кырӧлокӧн, например: стена-пыр, би-пыр.

Примечаннё: Но кывбӧррез виӧн, пырйӧт гижсьӧны торйын, например: кос виӧн, ва пырйӧт.

§ 92. Кывбӧррез, кӧдна аркмӧтӧны мӧдік кыввезкӧт виль кыввез либо лоӧны суффикссэзӧн, гижсьӧны ӧтлаын, например: ӧтмоз, мӧднёж, тӧдвылын, вадор, одззамоз, ӧтпасьтаӧсь.

 

XVI. Кывторрез.

§ 93. Кывтор кӧ тӧдтӧмтан нимвежтассэзкӧт да наречиеэзкӧт гижсьӧ ӧтлаын и сетӧ нылӧ тӧдтӧмтан значеннё, например: мыйкӧ, кинкӧ, кытшӧмкӧ, кытчӧкӧ, кыткӧ, кынымкӧ, кӧркӧ.

Примечаннё: Вводнӧй кыввезкӧт эта кывторыс гижсьӧ сідзжӧ ӧтлаын: сідзкӧ, кыдзкӧ.

§ 94. Условнӧй значеннёын кывтор кӧ гижсьӧ торйын, например: мунан кӧ, локтан кӧ, гижан кӧ, лыддьӧтін кӧ, вурин кӧ.

§ 95. Кывторрез: пӧ, тай, ли, ни, эд, инӧ, да, и, я, жӧ, а, вӧлись, бы гижсьӧны торйын, например: тэ пӧ локтін ни; локтан жӧ; гижин ни эд.

§ 96. Эманиммезкӧт, лыданиммезкӧт да глаголлэзкӧт кывтор не кӧть кӧр гижсьӧ торйын, например: не пызан, а джек; не кык, а куим; не петӧмыт, а пырӧмыт.

§ 97. Суськисян нимвежтассэзкӧт да суськисян наречиеэзкӧт кывтор не гижсьӧ ӧтлаын, например: некин, некытӧн, некӧр, некытчӧ, некытісь, некытшӧм, некӧда.

§ 98. Кывтор не тӧдчанниммезкӧт да наречиеэзкӧт гижсьӧ ӧтлаын сэк, кӧр нія эта кывторкӧт аркмӧтӧны ӧтік вежӧртӧм (понятие) и этӧ виль кывсӧ позьӧ вежны сы кодь жӧ значеннёа мӧдік кылӧн, например: нылӧн неыджыт (учӧтик) керкуок; неылын (матын) кыліс сьылӧм.

Примечаннё: Ежели эта вежӧртӧмлӧ сувтӧтсьӧ паныта вежӧртӧм, сэк кывтор не гижсьӧ тӧдчаннимкӧт либо наречиекӧт торйын, например: нылӧн не ыджыт, а учӧтик керкуок. Матын, а не ылын сьылӧны.

§ 99. Кывтор мед тӧдчанниммезкӧт да наречиеэзкӧт гижсьӧ ӧтлаын сэк, кӧр сія мыччалӧ степень, например: медыджыт, медбур, медъён, медбура.

Примечаннё: Оз ков соравны кывтор мед целевӧй союзкӧт мед, кӧда гижсьӧ торйын, например: мед бура уджавны, колӧ тӧдны уджсӧ.

§ 100. Кывторрез ко, нибудь (ненабудь), либо гижсьӧны кырӧлокӧн, например: мун-ко, сет-ко, мый-нибудь, кытшӧм-либо, кытӧн-нибудь, кытчӧ-либо.

§ 101. Кывторрез неужели, сётаки, сёжӧ, мыйнӧ, ножӧ, некӧ гижсьӧны ӧтік кылӧн.

 

XVII. Йитӧттэз.

§ 102. Йитӧттэз да, а, и, но, мый, мед, медбы пыр гижсьӧны торйын, например: ыджыт да бур; ми бура уджалім, а нія эшӧ буржыка.

§ 103. Йитӧттэз медбы, кӧбы, нето, тожӧ, сідзжӧ, сідзкӧ гижсьӧны ӧтік кылӧн.

§ 104. Сложнӧй йитӧттэз сійӧн что, сійӧн мыля, сійӧн медбы, сідз кыдз, сідз что, сэк кӧр кӧть кӧр гижсьӧны торйын.

 

XVIII. Кыввез вуджӧтӧм.

§ 105.

• 1) Ӧтік строчкаись мӧдік строчкаӧ кыввез вуджӧтікӧ, колӧ нійӧ вуджӧтны слоггез сьӧрті, например: ка-ран-даш, кер-ку, заводсянь, са-мо-лё-тын.
• 2) Ӧтік буква озӧ кольӧ и озӧ вуджӧтӧ мӧдік строчкаӧ, например: ре-во-лю-ция, а не ре-во-лю-ци-я.
• 3) Кыввез вуджӧтӧм дырни й оз позь торйӧтны сы одзся тыргора буква бердісь, например: вай-ны, сёй-ны, кай-ны, лый-ны. Ежели й одзын сулалӧ тыргортӧм буква, сэк мӧдік строчкаӧ вуджӧтӧм дырни й оз позь торйӧтны сы бӧрся тыргора бердісь, например: дор-йы-ны, бӧр-йы-ны, гар-йы-ны, дор-йис, бӧр-йис.
• 4) Букваэз ь да ъ оз позь торйӧтны ны одзся буква бердісь, например: подъ-езд, пась-тась-ны, кӧ-мась-ны.
• 5) Кык ӧткодь буква, кӧдна мыччалӧны тыргортӧм шыэз, вуджӧтікӧ колӧ торйӧтны, например: мас-са, кас-са, кол-лек-тив, шин-ня-лӧ, пес-сис, вон-ныс.

Примечаннё: Сочетаннёэз: дз, дж, тш, дзз, джж, тшш вуджӧтікӧ оз торйӧтсьӧ, например: видз-сӧ, джыдж-лӧ, пытш-кас, джы-джжез, ни-тшшез, ви-дззез.

• 6) Сложнӧй джендӧтӧм кыввез вуджӧтікӧ колӧ торйӧтны сідз, медбы строчкаас кольччис значитан частьыс быдсӧн, а мукӧдсӧ вуджӧтны мӧдік строчкаӧ, например: Окр-испол-ком, Сверд-пище-трест.
• 7) Оз позь вуджӧтны мӧдік строчкаӧ:
• а) Суффикссэз: ӧдз, ӧт, ись, ісь, кӧдна сулалӧны цифраэз бӧрын: 48-ӧдз, 5-ӧт, 4-ись, 50-ісь.
• б) Суффикссэз, кӧдна сулалӧны абревиатураэз бӧрын: СССР-ись, Окроно-лӧ, ЦК-ись, МТС-ӧдз.