RSS Автор: Попова Э. Н.
Небӧгса йӧзӧдӧм:
Ӧнія коми кыв. Морфология. Сыктывкар, 2000. Лб. 506-516.
Тайӧ чукӧрас пырысь кывторъяс оз пыртны висьталанторъяс содтӧд смыслӧвӧй рӧмъяс. Найӧ сӧмын ёнмӧдӧны висьталанторйыслысь выразительностьсӧ, эмоциональностьсӧ. Эмоционально-экспрессивнӧйясӧн вермӧны лоны вот, вот вед, кыдз, кыдз сӧмын, кыдз тай, мый сэн, кутшӧм, мыйта да с. в. кывторъяс. Примеръяс:
— Вот, вот, сідзи и шуис, пеж лов пӧ, нарошнӧ пӧ, смекайтчыны да мед мыждыны — пыравлӧма (Б. Шахов),
— Вот тадз! (Тайӧ сылӧн печать пыдди нин) (В. Тимин),
— . . . Пеж: лов тэ, пеж: лов. . . И кыдзи сӧмын тэнӧ муыс кутӧ!? (Б. Шахов),
Кыдз тай гыпнитас-клопкысяс пач пытшкас. Йиркмунӧ пачыс (И. Пыстин).
Кутшӧм, мыйта кывъяс горӧдан сёрникузяын воштӧны колана нимвежтасъяслысь вежӧртассӧ да горӧдан шуанногкӧд ӧтлаын тӧдчӧдӧны, ёнмӧдӧны семантикасӧ сійӧ кывйыслысь, кодкӧд йитчӧны, сетӧны висьталанторйыслы уна сикас эмоциональнӧй рӧм: нимкодясьӧм, шензьӧм, скӧрмӧм да с. в. Примеръяс пыдди:
О, кутшӧм сьӧкыд, кор тэ мыжман, Оз тупкы зэрысь козйыс (Ю. Васютов),
Кутшӧм абу прӧстӧй ставыс тайӧ, сьӧкыда вежӧртана, и. . . кутшӧм мича да кыпыд, кор заводитан гӧгӧрвоны, аддзыны мичлунсӧ, казявны кыпыдлунсӧ (И. Изъюров).
Йӧзӧдӧм