Орфография туйдöт (1992)

Небöгса йöзöдöм:

Коми-пермяцкöй орфографиялöн общöй принциппез / ред. Ботева Е. В. // Коми-пермяцкöй орфографическöй словарь. Кудымкар: Издательство «Пермская книга», Коми-пермяцкöй отделеннё, 1992. Лб. 11-29.


КОМИ-ПЕРМЯЦКӦЙ ОРФОГРАФИЯЛӦН ОБЩӦЙ ПРИНЦИППЕЗ

 

Коми-пермяцкӧй орфографиялӧн кык основнӧй принцип: фонетическӧй да морфологическӧй. Фонетическӧй принцип сьӧрті кыввез гижсьӧны сідз, кыдз нія шусьӧны: лыддьыны, талуння, ашыння, пессьыны, киссьыны.

Морфологическӧй принцип сьӧрті кыввез гижӧмын учитывайтчӧны нылӧн морфемаэз (значимӧй часттез). Быд случайын нія сетсьӧны ӧтмоза, нылӧн гижӧмыс оз зависит шуӧмсянь: вӧтны — вӧтчыны [вӧч’ч’ыны]; сотны — сотчыны [соч’ч’ыны].

Эна кыввезын ч аскодялӧ т, но гижсьӧны нія морфологическӧй принцип сьӧрті.

Фонетическӧй принцип сьӧрті коми-пермяцкӧй кылын гижсьӧны быдӧс кыввез, кӧднаын эм прогрессивнӧй ассимиляция. Прогрессивнӧй ассимиляция пыр отмечайтчӧ гижӧмын: килля < кил’йа, полля < пол’йа, беддя < бед’йа, лыддьыны < лыд’йыны.

Унажык роч заимствованнёэз гижсьӧны оригиналыс принцип сьӧрті: журнал, класс, колхоз, больница, атом, объект, философия, химия, физика, шинель, счёт, молодёжь, степь, дробь, вещь, тушь, съёмка; пенал, комсомол, число, география, ферма, фартук, букварь, фонарь, лагерь, сахар, щётка, телефон.

Коми-пермяцкӧй орфографиялӧн эмӧсь эшӧ сэтшӧм принциппез: историческӧй, различительно-условнӧй. Но нія пантасьлӧны шочжыка.

Различительно-условнӧй принцип применяйтчӧ сы понда, медбы разграничивайтны морфологическӧй, лексическӧй да синтаксическӧй категорияэз. Сідз, орфография средствоэзӧн коми-пермяцкӧй кылын сложнӧй кыв торйӧтчӧ определительнӧй сочетаннёсянь сэтшӧм случайезын: порськок (быдмас) и порсь кок (порсьлӧн кок), урбӧж (быдмас) и ур бӧж (урлӧн бӧж), кушборд (животнӧй) и куш борд (бордыс кушмӧм), катшасин (ромашка) и катша син (катшалӧн син).

Условнӧй принцип основа вылын гижсьӧны, например, ыджыт буквасянь собственнӧй ниммез: Тамара, Леонид, Отинов, Кудымкар, миноносец «Стерегущий», журнал «Би кинь», песня «Кыдзок», книга «Бичирок», Весляна ю.

 

I. ГЛАСНӦЙЕЗ ГИЖӦМ

Гласнӧй звуккез 7: а, э, ӧ, о, и, ы, у.

Гласнӧй букваэз 12: а, я, и, і, о, ё, ӧ, э, е, у, ю, ы.

1. Букваэз е, я, ю, ё гижсьӧны:

а) кӧр звук й йитсьӧ э, у, а, о звуккезкӧт: ёг, ён, яг, юкмӧс, яй, юр, ваяс, каяс, соёк, ем, етша, юны;

б) небыт парнӧй согласнӧйез бӧрын, медбы мыччавны нылісь небытсӧ: дядь, зять, нёль, сёй, нюр, кузяыс, сюр, тятюӧ, лёк, люлльӧтны, летны, некин, тёп.

2. Небыт парнӧй согласнӧй ч, дз бӧрын гижсьӧны а, о, у букваэз: чаг, чужӧм, чом, дзав, дзуртӧ, дзоля.

3. Буква е гижсьӧ небыт парнӧй да быдӧс непарнӧй согласнӧйез бӧрын: чери, чер, дзескыт, дзель, щель, челядь, медбы, берегитны, верӧс, керны, чаггез, вез, пев, сетны, зелля.

4. Буква э гижсьӧ:

а) кыв пондӧтчикӧ, медбы мыччавны йотируйттӧм э звук: эз, эта, эн, эшӧ, эттшӧм, этадз, эстӧн, эна, этӧ;

б) кыв шӧрын гласнӧй букваэз бӧрын, медбы мыччавны звук э: поэт, поэма, муэз, ваэз, партаэз, юэз, сюэз;

в) чорыт парнӧй согласнӧйез бӧрын, медбы мыччавны нылісь чорытсӧ: зэлыт, сэтӧр, сэтшӧм, лэдзны, тэ, тэныт, ёрттэз, зороддэз, воннэз, поссэз, журналлэз.

5. Буква и гижсьӧ:

а) гласнӧй букваэз бӧрын: кӧин, пӧим, туис, нуис, юис;

б) небыт парнӧй согласнӧйез бӧрын, медбы мыччавны нылісь небытсӧ: ним, син, ӧзим, колис, ӧксисӧ, пилитны, винитны, диван;

в) быдӧс непарнӧй согласнӧйез бӧрын: пинь, рись, гижны, видзны, ки, би, читкыля, мича, йи, вайис, гожйим.

6. Буква і гижсьӧ чорыт парнӧй согласнӧйез бӧрын, медбы мыччавны нылісь чорытсӧ: зі, дуді, вӧлі, мунім, куті, сійӧн.

 

ІІ. СОГЛАСНӦЙЕЗ ГИЖӦМ

Коми-пермяцкӧй кылын 26 согласнӧй звук: б, в, г, д, дь, дж, дз, ж, з, зь, и, к, л, ль, м, н, нь, п, р, с, сь, т, ть, тш, ч, ш.

Роч кылісь заимствуйтӧм кыввезын употребляйтчӧны эшӧ 4 согласнӧй: ф, х, ц, щ. Быд согласнӧй звук обозначайтчӧ торья букваӧн.

Согласнӧй букваэз 21: б, в, г, д, ж, з, й, к, л, м, н, п, р, с, т, ф, х, ц, ч, ш, щ.

Согласнӧй звуккез коми-пермяцкӧй кылын торйӧтсьӧны то кытшӧм группаэз вылӧ:

а) согласнӧй звуккез д, т, з, с, л, н, тш, дж, р вермӧны лоны чорыттэзӧн и небыттэзӧн, этасянь нійӧ шуӧны парнӧйезӧн. Небыт р’ пантасьӧ только заимствуйтӧм кыввезын.

  • Чорыт парнӧй согласнӧйез: д, т, з, с, л, н, тш, дж, р —  дон, мӧді, зі, коліс, муніс, сэті, тіян, кусіс, лым, лабич, нія, нуис, дуді, тшак, тшын, джӧмдіс, рас.
  • Небыт парнӧй согласнӧйез: дь, ть, зь, сь, ль, нь, ч, дз, рьдодь, деркйыны, узис, зять, нёль, нянь, сер, сьӧлӧм, челядь, чаль, лёк, кольта, пасёк, воть, дзескыт, дзик, букварь, лагеряс.

б) Чорыт непарнӧй согласнӧйез: б, в, г, ж, к, м, п, ф, х, ц, ш.

 

Й, ъ, ь гижӧм

1. Буква й гижсьӧ:

а) букваэз и, ӧ, ы одзын, медбы мыччавны нылісь йотациясӧ: йи, йики, йӧв, йӧктыны, йыв, йылісь, бӧрйис, бӧрйыны, бӧрйӧ, суййи, оййӧны;

б) кыв конецын и кыв шӧрын гласнӧй букваэз бӧрын, медбы мыччавны дженыт й: вай, мый, морскӧй, майскӧй, войско;

в) суффикс -ез одзын: сойез, туйез, ойез.

2. Буква ь гижсьӧ:

а) кыв конецын, медбы небзьӧтны сы одзись парнӧй согласнӧй звуксӧ: бедь, пась, кизь, пинь, пель, нять, кодь;

б) кыв шӧрын, небыт парнӧй согласнӧй бӧрын: инька, вильса, пальто, узьны, вӧтьны, асьным;

в) кыв шӧрын ӧ да ы гласнӧйез одзын, медбы небзьӧтны ны одзись парнӧй согласнӧйсӧ: сьӧд, ньыв, сьывны, лӧсьӧтны, кӧньӧс.

3. Разделительнӧй знаккез (ъ да ь) гижсьӧны:

а) разделительнӧй чорыт знак (ъ) гижсьӧ чорыт согласнӧйез бӧрын е, ё, ю, я букваэз одзын: асъяпон, розъя, изъя, объект, объявленнё, съезд, озъягӧд, медъён, медъюгыт;

б) разделительнӧй небыт знак (ь) гижсьӧ непарнӧй согласнӧйез бӧрын е, ё, ю, я букваэз одзын: ловья, шогья, кыкьямыс, пыжьян, чышьян, лымьялӧ, ружьё.

 

Л да в гижӧм

1. Коми-пермяцкӧй кылын л да в звуккез чередуйтчӧны. Эта чередуйтчӧмыс заключайтчӧ сыын, что л звукыс кыв шӧрын согласнӧй одзын да кыв конецын мукӧд коми-пермяцкӧй кыввезын вежсьӧ в звукӧн: сьылӧ, сьылам, сьылӧны, но: сьывны, сьывлывлӧ, сьыв; нылыс, нылок, нылӧн, но: нывлӧн, нывтӧг, ныв. Кыдз тыдалӧ, кыв шӧрын гласнӧй одзын в звукыс оз пантась.

2. Эта чередуйтчӧмыс оз пантасьлы сэтшӧм случайезын:

а) звукоподражательнӧй кыввезын: нявзыны, нявӧстіс, кивӧстіс;

б) сложнӧй кыввезын: синва, лысва, туйвеж;

в) множественнӧй числоа существительнӧйезын гижсьӧ кык в: кыввез, пӧввез, вӧввез, ныввез, кӧввез, джоджуввез, певвез, уввез, тӧввез, взрыввез, роввез;

г) заимствуйтӧм кыввезын: стул, столб, колхоз, буква, жалоба, совет, готовӧй, совхоз, лак, кулак, деловӧй, заголовок, зал, заплыв, заслуга, затвор, канава, караван, кровать, кружева, площадь, бутылка и с. одз.

 

ІІІ. АССИМИЛЯЦИЯ ДЫРНИ КЫВВЕЗ ГИЖӦМ

1. Кыввез, кӧднаын эм прогрессивнӧй ассимиляция, гижсьӧны фонетическӧй принцип сьӧрті. Прогрессивнӧй ассимиляция дырни гижсьӧ сэтшӧм согласнӧй, кӧда кылӧ шуикӧ, эта согласнӧйыс сэк кыкпӧвсасьӧ: килля, полля, воття, песся, уннявны, шыннявны, лыддьыны, мырддьыны.

2. Глагол основаын буква ш ассимилируйтӧ сы бӧрын сулалан йотсӧ и гижсьӧ кыкпӧв: пышшыны, вешшыны, кошшыны, но: вешьян (вешшан), чышьян (чышшан).

3. Словообразовательнӧй глагольнӧй суффикссэзын да мукӧд наречиеэзын гижсьӧ кык согласнӧй да ны бӧрын ь либо буква я, либо и: мырддьыны, мырддя, мырдди, лыддя, лыдди, лыддьӧтны, лыддьыны, пессьӧны, пессьыны, песси, песся, вевттьыны, вевттьӧны, вевтти, вевття, ӧддьӧн, ӧння, джыння, тӧння, талуння, ашыння.

4. Регрессивнӧй ассимиляция дырни гижсьӧны сэтшӧм согласнӧйез, кӧдна эмӧсь кыв кореняс либо кыв основаас. Кыввез, кӧднаын эм регрессивнӧй ассимиляция, гижсьӧны морфологическӧй принцип сьӧрті: вӧтча, велӧтчыны, пондӧтчыны, шедтыны, кӧсжык, лӧзжык, кызжык, серӧмтчыны, гажтӧмтчыны, пӧрӧтчыны, пӧліньтчыны, бергӧтчыны, сайӧвтчыны, песжуг, кӧньӧсжуг.

5. Кыввезын, кӧднаын кореньыслӧн значеннёыс яснӧя оз тӧдчы, гижсьӧны кык ӧткодь согласнӧй: тальччыны, мыччыны, кольччыны, чеччыны, пӧрччасьны, курччасьны, шоччисьны, мыччисьны, пӧрччавны, тальччавны, мыччавны, чеччавны, курччӧвтны, горӧтчыны, гыччан, гормӧччан, гӧрдззисьны, гӧрдззыны, вӧджжыны.

 

IV. ЗАИМСТВУЙТӦМ КЫВВЕЗ ГИЖӦМ

1. Роч кылісь важын заимствуйтӧм кыввез гижсьӧны сідз, кыдз шусьӧны комиӧн: боёк, гов, говня, гуна, гӧбеч, гӧстинеч (гӧснеч), гӧстя, гӧсь, дӧва, дӧвеч, дьӧгӧдь, крӧшки, крӧшитны, кӧш, лиснич, лукав, лукавӧсь, макайтны, макнитны, ножнич, нюкайтны, огородеч, пирӧг, пирӧжок, погоддя, погода, пӧлать, проса, разь, редитны, редитчыны, рубечавны, сапнитны, смев, тӧчила, тӧчитны, ягӧд, ӧвин, ӧвчина, ӧдва, ӧдва-ӧдва, тешитны, тешитчыны.

2. Бӧрынжык заимствуйтӧм кыввезын да собственнӧй ниммезын колӧ гижны ф, х, ц, щ букваэз сідз жӧ, кыдз русскӧй кылын: фонарь, ферма, Анфиса, Фёдор, хозяин, сахар, Архангельск, центр, центнер, ударница, щётка, совещаннё, Щербинин.

3. Заимствуйтӧм кыввезын небыт знак (ь) сохраняйтчӧ: молодёжь, степь, дробь, вещь, тушь, морковь, словарь.

Но падежнӧй окончаннёэз да личнӧй суффикссэз одзын ь оз гижсьы: тушсӧ, тушыс, вещыс, морковнас, степӧ, дробтӧг, казанскӧй.

4. Ежели кылын именительнӧй падежын р буква бӧрын эм небыт знак, сэк сія кольччӧ и мӧдік падежжезын: сентябрь — сентябрьын; фонарь — фонарьтӧг; букварь — букварьӧ; Сибирь — Сибирьӧ, Сибирьсянь, но: сибирскӧй.

Кыв шӧрын р буква бӧрын небыт знак сідзжӧ кольччӧ: Харьков, Горький, сентябрьскӧй, октябрьскӧй, ноябрьскӧй, декабрьскӧй, но: январскӧй.

5. Роч кылісь заимствуйтӧм кыввез гижсьӧны роч кыв орфография сьӧрті: класс, грамм, область, метр, литр, армия, пролетарий, химия, геометрия, география, коридор, тренер, волейбол, опека, магазин, портфель, предмет, председатель, колхоз, счетовод, кладовщик, электричество, этаж, поэма, эра, Эстония, июнь, февраль, ноябрь.

6. Заимствуйтӧм прилагательнӧйез конецӧ пыр гижсьӧ -ӧй: местнӧй, меднӧй, уральскӧй, московскӧй, рабочӧй, служащӧй, колхознӧй, но: Маяковский, Островский, Твардовский, Крупская, Кошевая, Толстой, Полевой, Циолковский.

 

V. СЛОЖНӦЙ КЫВВЕЗ ГИЖӦМ

Ӧтлаын гижсьӧны:

1. Кыввез, кӧдналӧн мӧдік торӧн лоӧны важмӧм нето етша употребляйтчана кыввез:

  • -пон: пельпон, посӧдзпон, потшпон, чуньпон, асъяпон, туйпон;
  • -под: кипод, кушмупод, горпод, рудзӧгпод;
  • -чир: ончир, турунчир, тӧвчир, лымчир, бичир.

2. Кыввез, кӧдналӧн мӧд торыс — самостоятельнӧя употребляйтчан кыв, но ӧтлаын компоненттэс мыччалӧны виль понятие:

  • -кай: кӧрымкай, пышкай, уркай, сьӧдкай, рудкай;
  • -турун: вӧйтурун, йӧвтурун, ёгтурун, каттисянтурун, сьӧктантурун, ситурун, жилатурун, пӧдтурун;
  • -ва: лысва, синва, рисьва, вотьва, чужва, сёрва, черива, но: ключ ва, малина ва, лым ва, ен ва, нять ва;
  • -ягӧд: озъягӧд, сьӧдъягӧд, сьӧлаягӧд;
  • -пиян: ошпиян, ручпиян, говпиян, понпиян;
  • -кытш: чунькытш, анькытш, юркытш;
  • -юр: турунъюр, капустаюр, но: мӧс юр, керку юр;
  • -варыш: кайварыш, тарварыш, курӧгварыш;
  • -лыс: чуньлыс, горлыс, синлыс;
  • -йӧв: шӧмйӧв, чижйӧв, нӧкьяйӧв, но: мӧс йӧв, коза йӧв;
  • -пу: нинпу, пипу, ловпу, сэтӧрпу, черпу, роспу, коссёпу;
  • -дор, -шӧр, -ув, -ӧдз, -ӧр: пемдандор, югдандор, луншӧр, сьӧлӧмшӧр, джоджув, подув, горӧдз, посӧдз, мӧдӧр, вевдӧр, но: вӧр дор (вӧр дорын, вӧр дорӧт), ва дор, видз шӧр;

3.

а) тшаккезлӧн названнёэз: йӧвтшак, мӧсгриб, гуткулантшак, гӧстшак, пипудзурк, бабапель;

б) сложнӧй кыввез, кӧдналӧн мӧд торыс самостоятельнӧя оз ни употребляйтчы: туримоль, синкым, нинкӧм, паськӧм, понпутш, чарньӧв;

в) мукӧд кыввез: енӧшка, гуяма, вӧрмӧс, кокададь, мамкокпӧв, ньӧввуж, бимороз, тшынмороз, тшынбус, сикӧдж, сирньылӧм.

Гижсьӧны торйын:

а) словосочетаннёэз кыввезкӧт:

  • туй: пинь туй, морт туй, пода туй;
  • тӧв: лун тӧв, асыв тӧв, рыт тӧв, ой тӧв, но: ойтӧв (судорога);
  • пыдӧс: ки пыдӧс, юр пыдӧс, кок пыдӧс, вӧр пыдӧс (ср.: вӧрлісь пыдӧссӧ, ведраыслӧн пыдӧсыс);
  • долонь: ки долонь, гуна долонь;
  • тусь: ид тусь, анькытш тусь, вӧр тусь, зӧр тусь, но: зӧртусь (бородавка);
  • йыв: шор йыв, пу йыв, бедь йыв, ныр йыв;
  • кок: пу кок, вешьян кок, пызан кок, курӧг кок; но: порськок (турун);
  • чунь: кок чунь, жатка чунь, но кульчунь (турун);
  • пинь: шыр пинь, куран пинь;

б) словосочетаннёэз, кӧдна мыччалӧны профессияэз да занятиеэз: чери кыйись, сапог вурись, пода вӧдитӧм, сур керан, вӧр заптӧм.

 

VI. СУЩЕСТВИТЕЛЬНӦЙЕЗ ГИЖӦМ

1. Сложнӧй джендӧтӧм кыввез, кӧднӧ аркмӧтӧны кыввезлӧн медодзза звуккез, быдсӧн гижсьӧны ыджыт букваэзӧн, например: МИД, ТЮЗ, но: вуз, втуз, роно, дот.

Ыджыт букваэзӧн гижсяна сложнӧй джендӧтӧм кыввезлӧн окончаннёэз да множественнӧй числоа суффикссэз гижсьӧны кырӧлокӧн: МИД-ын, ТЮЗ-лӧн, но: вузлӧн, гуноын, вуззэзісь.

2. Существительнӧйезкӧт послелоггез гижсьӧны торйын, например: вӧр дорын, керӧс сайын, ӧшын увтын, керку бердын, стена пыр, стена пырйӧт, ведра тӧрик, кырым етш.

3. Предельнӧй падежын окончаннё -ви (-виӧн) существительнӧйезкӧт гижсьӧ пыр ӧтлаын, например: пидзӧсви, косви, косвиӧн.

4. Послелоггез кодь, моз существительнӧйезкӧт гижсьӧны торйын: шонді кодь, трактор кодь, сойыс кодь, чавкан кодь, ош кодь, пу кодь, мамӧ моз, Маша моз, ур моз, кань моз.

5. Кык существительнӧй, кӧдна оформитӧмӧсь суффиксӧн и мыччалӧны сочинительнӧй отношеннёэз, гижсьӧны кырӧлок пыр: аня-моня, соя-вона, ая-ныла, мама-ныла, ая-зона, мама-зона.

6. Множественнӧй числоа суффикссэз -эз да -ез одзын гижсьӧны кык согласнӧй: вӧррез, ыббез, ӧшыннэз, воннэз, кӧввез, карандашшез, журналлэз, кыдззез.

Суффикс -эз гижсьӧ:

а) существительнӧйезын, кӧдналӧн конецас гласнӧй: ваэз, муэз, шыэз, кайлоэз, семьяэз, сюэз, мореэз, зданнёэз;

б) существительнӧйезын, кӧдналӧн конецас чорыт парнӧй согласнӧй: саддэз, кӧззэз, мӧссэз, плоттэз, пеналлэз, доннэз.

Суффикс -ез гижсьӧ:

а) существительнӧйезын, кӧдналӧн конецас небыт согласнӧй либо непарнӧй согласнӧй: даддез, киззез, поллез, пассез, каннез, воттез, вӧввез, мыррез, мошшез, видззез, кӧччез, джыджжез, потшшез;

б) существительнӧйезын, кӧдналӧн конецас й: туйез, сойез, кайез, сарайез, санаторийез, геройез.

7. Существительнӧйезлӧн мукӧд словообразовательнӧй суффикссэз :

  • -ас — вердас, быдмас, петас, шебрас, кырас, соровтас, мавтас;
  • -ан (-ян) — юан, олан, вартан, пиксан, кыян, сёян, вӧтян, киссян;
  • -ӧт — гижӧт, йӧртӧт, кӧртӧт, чышкӧт, сьӧвтӧт, вапукӧт, пыкӧт;
  • -ись (-ісь) — гӧрись, велӧтчись, узись, гижись, уджалісь, пинялісь, куртісь, орсісь;
  • -ӧс — пуртӧс, вевтӧс, шӧмӧс, шыдӧс, пыкӧс;
  • -ӧв — оськӧв, юкӧв, кырӧв, бӧбӧв, чарньӧв, кытшӧв;
  • -ин (-ін) — керӧсаин, пожумаин, умӧлин, лажмытін, мырьяин;
  • -ань — серань, гӧрдань, сьӧдань;
  • -кельӧп — челядькельӧп, пӧриськельӧп, орсіськельӧп;
  • -пӧв — иньпӧв, айпӧв, мамкокпӧв, мӧдлапӧв;
  • -пӧлӧс — иньпӧлӧс, мужикпӧлӧс, зонкапӧлӧс, нывпӧлӧс, старикпӧлӧс;
  • -са — деревенса, панинса, отевса, пикановса, лупьинса, учӧтзоновса, марапальниковса;
  • -чи — деревенчи, гришинчи, отёвчи, юсьвинчи, кудымкарчи, юрлинчи;
  • -тор — тӧвтор, яйтор, пизьтор, колантор, быдтор.

Существительнӧйезлӧн уменьшительно-ласкательнӧй да пренебрежительнӧй суффикссэз:

  • -ок (-ёк) — пызанок, мӧсок, вӧрок, дадёк, канёк, каёк, соёк, туёк, полёк, чунёк;
  • -очка — зоночка, нылочка, кагочка;
  • -иньӧй (-іньӧй) — маминьӧй, воніньӧй, ёртіньӧй, вӧриньӧй, ыбиньӧй, вӧліньӧй, мӧсіньӧй, поніньӧй;
  • -у (-ю), -ук (-юк) — маму, бабу, Ваню, Таню, дедук, Надюк, дзуту, кутю, дзелю;
  • -ач — визлач, вабергач, пугач;
  • -ушко (-юшко) — вонушко, зонушко, союшко;
  • -жуг — мӧсжуг, понжуг, керкужуг, курӧгжуг, вӧвжуг, каньжуг, чержуг, ведражуг.

 

VII. ПРИЛАГАТЕЛЬНӦЙЕЗ ГИЖӦМ

Сложнӧй прилагательнӧйез гижсьӧны ӧтлаын:

а) прилагательнӧйез, кӧдна аркмӧмась существительнӧйезісь ӧтлаын -рӧма кывкӧт: мурӧма, льӧмрӧма, виррӧма, вирӧма, сарӧма;

б) сложнӧй прилагательнӧйез, кӧдна аркмӧмась ас местоименнӧй коренись ӧтлаын -коддя, -ныра, -сяма кыввезкӧт: аскоддя, асныра, ассяма;

в) прилагательнӧйез, кӧдна аркмӧмась самостоятельнӧй сёрни торрезісь послелоггезӧн -увтся, -дорся, -вывся, -весьтся, -сайся, -кадся, -сувда, -сора, -пӧвса: ваувтся, туйдорся, вавывся, васайся, шондівесьтся, томкадся, челядькадся, важкадся, сьӧдсора, куимпӧвса, сизимсувда;

г) прилагательнӧйез, кӧдна аркмӧмась ӧт коренись -кузя, -гора, -кыза кыввезкӧт: ӧткузя, ӧткыза, ӧтпасьта, ӧтвына, ӧтгора;

д) прилагательнӧйез, кӧдна аркмӧмась числительнӧйезісь -годся кывкӧт: кыкгодся, куимгодся, нёльгодся, витгодся;

е) прилагательнӧйезлӧн суффикссэз -кодь, -вевья пыр гижсьӧны ӧтлаын: ыджыткодь, басӧккодь, улькодь, мичакодь, сьӧдкодь, быдкодь, лӧзвевья, сьӧдвевья;

ж) прилагательнӧйез мед- приставкакӧт, кӧда аркмӧтӧ превосходнӧй степень: медбасӧк, медъён, медъюгыт, медучӧт, мединтереснӧй, мединертнӧй;

з) прилагательнӧйез, кӧдна аркмӧмась сложнӧй географическӧй названнёэзісь: вильшулайскӧй, васькингарскӧй, важгортскӧй.

Кырӧлокӧн гижсьӧны:

а) сложнӧй прилагательнӧйез, кӧдна аркмӧмась кык прилагательнӧйись и мыччалӧны виль рӧм: веж-чочком, югыт-гӧрд, пемыт-руд, сьӧд-лӧз, лӧзӧвкодь-сьӧд;

б) кык ӧткодь прилагательнӧй, кӧдна употребляйтчӧны значеннёсӧ вынсьӧтӧм понда: ыджыт-ыджыт, кузь-кузь, пемыт-пемыт, вылын-вылын, вылынся-вылын, учӧт-учӧт, небыт-небыт, небытся-небыт, курыт-курыт, курытся-курыт, пымся-пым, визывся-визыв, вилься-виль, пашмӧм-пашмӧм.

в) кык собирательнӧй значеннёа прилагательнӧй: идъя-зӧрья, идзаса-туруна, сюра-пеля, шабура-отопкиа, йыла-ёся.

 

VIII. МЕСТОИМЕННЁЭЗ ГИЖӦМ

1. Послелоггезкӧт местоименнёэз гижсьӧны торйын: сы йылісь, ны понда, ме дырни, тіян кузя, ас йывсим, миян дынӧ, ны вылын, миян моз, ас мозӧн, ас кежас.

2. Неопределённӧй местоименнёэзлӧн частица -кӧ гижсьӧ ӧтлаын: кинкӧ, мыйкӧ, кӧдакӧ.

3. Частицаэз -либо, -нибудь гижсьӧны кырӧлокӧн: кин-нибудь, мый-либо, мый-нибудь, кинӧс-либо, мыйӧн-нибудь.

4. Отрицательнӧй местоименнёэзын частица не гижсьӧ ӧтлаын: некин, некӧда.

5. Личнӧй местоименнёэзкӧт частица не гижсьӧ торйын: не ме, не тэныт, не сія, не миянлӧ, не тійӧ, не нылӧн, не миян, не тіян.

6. Послелоггез кодь, моз местоименнёэзкӧт гижсьӧны торйын: тэ кодь, сы кодь, тіян моз, ны моз, миян кодь, ны кодь, ме моз, сы моз.

 

ІХ. ЧИСЛИТЕЛЬНӦЙЕЗ ГИЖӦМ

1. Ӧні коми-пермяккез лыддикӧ употребляйтӧны роч числительнӧйез: одиннадцать, двенадцать, тринадцать, четырнадцать, пятнадцать, шестнадцать, семнадцать, восемнадцать, девятнадцать, двадцать, тридцать, тридцать шесть, сорок, пятьдесят, пятьдесят пять, шестьдесят, шестьдесят семь, семьдесят, восемьдесят, девяносто, девяносто пять, сто, двести, двести сорок четыре, триста пятьдесят восемь. Примеррез: Колхоз кӧдзис шестьсот пятнадцать гектар шогді. Тулыснас фермаын чужисӧ сто двадцать семь кукань. Чулаліс тысяча девятьсот шестьдесят пятӧй год. Миян школаын велӧтчиссес двести шестьдесятся унажык. Кыв сьӧрті кружокӧ ветлӧны сорок два челядёк. Мийӧ шоччисим двадцать минута. Колхознӧй вӧввез двадцатя. Экскурсия вылӧ ветлім двадцатьӧн. Учӧтик соёкӧ кужӧ ни лыддьӧтны двадцатьӧдз.

Мукӧд числительнӧйез ӧнӧдз употребляйтчӧны комиӧсь, унажыксӧ дасӧдз: ӧтік, кык, куим, нёль, вит, квать, сизим, кыкьямыс, ӧкмыс, дас. Примеррез: Куим морт лыддьӧтісӧ ни этӧ виль книгасӧ. Школаас заллэс кыка. Семьяас вит морт. Керкуас кыкьямыс ӧшын. Районісь колхоззэз вузалісӧ кык миллион кольть да куим тысяча центнер яй.

2. Числительнӧйез одиннадцатьсянь двадцатьӧдз и быдса десятоккез да сотняэз гижсьӧны ӧтік кылӧн: дасӧтік, даскык, дасӧкмыс, кыкдас, кватьдас, кыксто, куимсто.

3. Составнӧй числительнӧйез гижсьӧны кык и унажык кылӧн: кыкдас ӧтік, витдас кык, кватьдас куим.

4. Числительнӧйезын одиннадцатьсянь двадцатьӧдз и числительнӧйын тридцать конецас гижсьӧ ь: одиннадцать, тринадцать, шестнадцать, тридцать.

5. Сложнӧй числительнӧйезын -десят да -сот вылӧ шӧрас гижсьӧ ь: пятьдесят, шестьдесят, восемьдесят, восемьсот, девятьсот.

6. Числительнӧйын одиннадцать гижсьӧ кык н.

7. Числительнӧйезын миллион, миллиард гижсьӧ кык л.

8. Порядковӧй числительнӧйез, кӧдналӧн медбӧрья кылыс -сотӧй, -тысячнӧй, -миллионнӧй, -миллиарднӧй, гижсьӧны ӧтік кылӧн: двухсотӧй, пятитысячнӧй, стодвадцатимиллионнӧй.

9. Собирательнӧй числительнӧйезын, кӧднаын эм притяжательнӧй суффикс, гижсьӧ кык н: кыкнанным, куимнанным, нёльнанным, витнанныс, но: ӧтнаным, ӧтнаныт, ӧтнаныс.

10. Повтореннёӧн аркмӧм неопределённӧй количество мыччалан числительнӧйез гижсьӧны кырӧлокӧн: кык-кум, нёль-вит, квать-сизим, сизим-кыкьямыс.

Мукӧд неопределённӧй количество мыччалан числительнӧйез гижсьӧны торйын: дас мымда, вит кынымись, керку кыкын, книга куим, тетрадь вит, морт сизим, нёль сотня гӧгӧр.

11. Цифраэзӧн гижӧм числительнӧйез бӧрӧ окончаннёэз да суффикссэз одзӧ сувтӧтсьӧ кырӧлок: 3-ись, 4-ӧт, 25-ӧй, 20-ын, 145-ӧдз.

12. Кырӧлокӧн гижсьӧны кык числительнӧй либо существительнӧй да числительнӧй, кӧдна мыччалӧны неопределённӧй количество: куим-нёль, вит-квать, лун-мӧд, вӧв-мӧд, ведра-мӧд, кык-куим.

 

X. ГЛАГОЛЛЭЗ ДА ГЛАГОЛЬНӦЙ ФОРМАЭЗ ГИЖӦМ

1. Ӧння кадісь да лоан кадісь глаголлэзын, кӧдналӧн основа конецас сулалӧ небыт согласнӧй да й, йы, ййы, гижсьӧны окончаннёэз -я — -ям, -ян — -ят, -яс — -ясӧ, -ӧ — -ӧны: каття — каттям, каттян — каттят, уян — уят, тӧвьяс — тӧвьясӧ, тӧвьян — тӧвьят, суййӧ — суййыны, ойян — ойят, оййӧ — оййыны, дорйӧ — дорйыны, лунйӧ — лунйыны, вайӧ — вайӧны, лыддьӧ — лыддьӧны.

Примечаннёэз:

  • 1) -ӧ — -ӧны окончаннёэз одзын небыт согласнӧйез бӧрын гижсьӧ ь: кольӧ, каттьӧ, лыддьӧны, воттьӧны;
  • 2) глаголлэзын, кӧдналӧн основа конецас сулалӧ й, й ӧтлаасьӧ окончаннёыскӧт: вая, сёям, каят, уясӧ, кыям, но  и -ӧны окончаннёэз одзын й кольччӧ: вайӧ — вайӧны, сёйӧ — сёйӧны, кайӧ — кайӧны, уйӧ — уйӧны, кыйӧ — кыйӧны;
  • 3) глаголлэзын, кӧдналӧн основа конецас сулалӧ -йы, -я — -ям, -ян — -ят, -яс — -ясӧ, окончаннёэз одзын чорыт согласнӧйез бӧрын гижсьӧ ъ: лӧсъя, пасъям, банъят, ӧзъяс, годъясӧ, а мӧдік согласнӧйез бӧрын — ь: гожья, тӧвьям, бӧрьян, дорьят, пуркьясӧ. Но и -ӧны окончаннёэз одзын й кольччӧ: гожйӧ, тӧвйӧ, дорйыны, пуркйӧны, сьӧмйӧны;
  • 4) глаголлэзын, кӧдналӧн основа конецын -ййы, окончаннёэз -я — -ям, -ян, — -ят, -яс — -ясӧ одзын ӧтік й кольччӧ: ойя, ойям, суйям, суйясӧ. Но и -ӧны окончаннёэз одзын кольччӧны кык й: оййӧ, суййӧны.

2. Син сайын чулалӧм кадісь глаголлэзлӧн окончаннёэз — -ӧмыт, -ӧма, -ӧмась: кольӧмыт, велалӧмыт, вайӧма — вайӧмась, кылӧма — кылӧмась, пукалӧма — пукалӧмась, локтӧма — локтӧмась.

3. Повелительнӧй наклоненнёа глаголлэзын (ед. ч.) гижсьӧ : осьт, кисьт, босьт.

4. Действиелісь законченность мыччалан -ышт суффиксын гижсьӧ т. Сэк удареннё усьӧ суффикс вылӧ: вештыштны, сетыштны, гарйыштны. Действиелісь уменьшительность да перыта мунӧм мыччалан -ышт суффиксын тожӧ гижсьӧ т. Сэк удареннё суффикс вылӧ оз усь: вештыштны, сетыштны, гарйыштны, юыштны, шонтыштны, пуксьыштны.

Уменьшительнӧй значеннёа -ӧвт суффиксын гижсьӧ т: песӧвтны, югйӧвтны, ванйӧвтны, кытсӧвтны. Удареннё усьӧ суффикс вылӧ.

Действиелісь уменьшительность мыччалӧм понда мукӧдпырся употребляйтчӧны ордчӧн кык -ышт суффикс: сетыштышт, кисьтыштышт, висьтыштышт, кольыштышт, видзӧтыштышт.

5. Действительнӧй глаголлэзын т да д бӧрын гижсьӧ суффикс -ч(ы): пӧліньтчыны, бӧрдчыны. Суффикс -ч(ы) гижсьӧ и занятие мыччалан глаголлэзын: весӧтчыны, садитчыны.

6. Страдательнӧй значеннёа (действиелісь непроизвольность мыччалӧм) да безличнӧй глаголлэзын гижсьӧ суффикс -сь(ы): велӧтсьыны, садитсьыны, вердсьыны, думайтсьыны. Примеррез: Сюыс бура вартсьӧ. Асывсянь кокнитжыка велӧтсьӧны стихотвореннёэз. Буржык туруныс вердсьӧ ни.

7. Глаголлэзкӧт сравнительнӧй частицаэз моз, кодь гижсьӧны торйын: муніс моз, томмис кодь, мыдзис кодь, тэрмасис кодь, сьыліс моз, сёрмис моз.

8. Глаголлэзкӧт -жык гижсьӧ ӧтлаын: тыдалӧжык, воасжык, шоналасжык, сайкаласжык, петаласжык, косьмасжык.

9. Кырӧлокӧн гижсьӧны парнӧй кыввез:

а) кык матына значеннёа глагол (ныын мукӧдпырсяс ӧтыс лоӧ изобразительнӧй глаголӧн): нимкодясьны-видчыны, буавны-горзыны, чавйыны-виявны, чавкйыны-кыйны, чарлавны-гымавны, чывкьявны-бергавны, шентны-мунны, пӧлявны-котӧртны, чышкыны-йӧктыны, пильскыны-серавны, быксыны-горзыны, пызитны-зэрны, дзарнитны-видзӧтны, вежны-панны, быздыны-баитны;

б) кык глагол, кӧдналӧн торрес имейтӧны паныта значеннё (лоӧны антониммезӧн): мунны-локны, пырны-петны, лэдзчыны-кайны, вузавны-небны;

в) кӧр кык глагол коласісь ӧтыс — глагол керны, кӧда употребляйтчӧ суффикс туйӧ: баитны-керны, уджавны-керны, думайтны-керны;

г) глаголлэз, кӧдналӧн первӧй торыс имейтӧ суффикс -ӧв, а мӧдік торӧн лоӧ глагол керны (керны эта значеннёын употребляйтчӧ суффикс туйӧ): уджалӧв-керны, баитӧв-керны, йӧктӧв-керны, гижӧв-керны;

10. Кырӧлокӧн гижсьӧны кык ӧткодь глагол значеннёсӧ вынсьӧтӧм понда: пырасӧ-пырасӧ, горӧтласӧ-горӧтласӧ, мунасӧ-мунасӧ, кывзасӧ-кывзасӧ, сьыласӧ-сьыласӧ.

11. Изобразительнӧй кыввез да быдкодь оттенок мыччалан частицаэз глаголлэзкӧт гижсьӧны торйын: бель видзны, сьӧд тыдавны, кыш-паш чӧвтчыны, дзар керны, дзирс пемдыны, стрась горӧтны, тон-тон кынмыны, гып усьны, зітш пуксьыны, чер-бар таравны, дыв вашӧтны, шлёп вачкыны, тяк сувтны, кроп лыйны, чывк бергӧтчыны, курк кусӧтны, пырк лэбзьыны, жер керсьыны, сярк локны, сяр сулавны, йирк керны, ыш ловзисьны, кур сидзны, лич лэдзны.

12. Öння када причастиеэз аркмӧны -ись (-ісь), -ан (-ян) суффикссэзӧн: мунісь морт, велӧтчись зонка, лэбзись кай, велӧтчан кад, олан жыр, пизян ва, быдман пу, цветитан турун, горзісь кага.

13. Чулалӧм када причастиеэз аркмӧны -ӧм суффиксӧн: гижӧм сочиненнё, велӧтӧм урок, косьтӧм турун, кӧдзӧм сю, быдмӧм пу, цветитӧм турун, велӧтчӧм морт, строитсьӧм керку, лӧсьӧтӧм додь, ытшкӧм видз, лэбзьӧм кай, пизьӧм ва.

14. Причастиеэзлӧн отрицательнӧй форма аркмӧ не, абу частицаэзӧн да -тӧм суффиксӧн: Сія урокыс эшӧ велӧттӧм. Туруныс абу ытшкӧм. Мортыс абу дышӧтчись. Мортыс не дышӧтчись.

15. Причастиеэзлісь множественнӧй числосӧ мыччалӧ суффикс -ӧсь: додьыс лӧсьӧтӧм — доддез лӧсьӧтӧмӧсь, видзыс ытшкӧм — видззез ытшкӧмӧсь, диктантыс гижӧм — диктанттэз гижӧмӧсь, книга лыддьӧтӧм — книгаэз лыддьӧтӧмӧсь, сю кӧдзӧм — сюэз кӧдзӧмӧсь.

16. Причастиеэз одзын эм кӧ пояснительнӧй кыв, сэк частица не гижсьӧ торйын: Синӧн не судзӧтан колхознӧй ыб вылын окласьӧ воӧм сю. Талун не ытшкисись морт лӧсьӧтіс косаэз.

17. Причастие одзын пояснительнӧй кылыс абу кӧ, сэк частица не гижсьӧ ӧтлаын: Мийӧ кылім нетыдалан морттэзлісь голоссэз.

18. Причастиеэзкӧт да деепричастиеэзкӧт сравнительнӧй частицаэз кодь, моз гижсьӧны торйын: Вежӧтӧм кодь туруныс ӧдва сайлаліс быдкодь каёккезӧс. Чорзьӧм кодь муыс кузя мунны вӧлі кокнитжык. Сылӧн шыннялан кодь чужӧмыс вӧлі блед. Сія тэрмасьӧмӧн моз локтіс ю дорас.

19. Деепричастиеэз аркмӧны то кытшӧм суффикссэзӧн:

  • -икӧ (-ікӧ) — мунікӧ, уджалікӧ, быдмикӧ, дорсикӧ, кайикӧ;
  • -тӧн (не  тöнь) — мунтӧн, уджавтӧн, быдмытӧн, дортӧн, кайтӧн, узьтӧн, чеччавтӧн;
  • -тӧдз — мунтӧдз, уджавтӧдз, быдмытӧдз, дортӧдз, кайтӧдз, узьтӧдз, чеччавтӧдз;
  • -тӧг — мунтӧг, гижтӧг, лыддьӧттӧг, видзӧттӧг, быдмытӧг, кайтӧг, узьтӧг, чеччавтӧг;
  • -ӧмӧн — мунӧмӧн, уджалӧмӧн, керӧмӧн, сьылӧмӧн, баитӧмӧн, кывзӧмӧн, ветлӧмӧн, узьӧмӧн, чеччалӧмӧн.

20. Деепричастиеэзкӧт частица не гижсьӧ торйын: Муні не тэрмасьӧмӧн. Олӧны не радуйтчӧмӧн. Локтіс талун не сьылӧмӧн.

21. Деепричастиеэзкӧт -жык гижсьӧ ӧтлаын: мыкталӧмӧнжык, тэрмасьӧмӧнжык.

22. -тӧн да -тӧдз суффикссэза деепричастиеэз дынӧ вермасӧ содтіссьыны притяжательнӧй суффикссэз, сэк суффикслӧн медбӧрья согласнӧйыс кыкпӧвсассьӧ: мунтӧн — мунтӧнням, мунтӧннят, мунтӧнняс, мунтӧдз — мунтӧдззам.

 

ХІ. НАРЕЧИЕЭЗ ГИЖӦМ

1. Послелоггезӧн да торья кыввезӧн аркмӧм наречиеэз гижсьӧны ӧтік кылӧн: тӧвбыт, рытывбыт, лунтыр, домйылын, ӧтлаын, быдлаын, мӧдлун, удерлун, мӧдгод, мӧдігод, сэсьудерлун, таво, кӧдковну, размӧд, мукӧдпырся, аскадӧ, пыркеж, порогувтасмоз, тӧдвылам.

2. Наречиеэзкӧт кодь, моз гижсьӧны ӧтлаын: буракодь, одзкодь, сёрӧнкодь, ылынкодь, матынкодь, горӧнкодь, гусьӧнкодь, югытакодь, гажӧнкодь, перытакодь, важынсянькодь, татӧнкодь, ылынсянькодь, ордчӧнмоз, увтімоз, перытамоз, одзланьмоз, ӧтмоз. Эстӧн нія лоӧны суффикссэзӧн.

3. Послелоггез наречиеэзкӧт гижсьӧны торйын: ашын кежӧ, талун кежӧ, мӧдгод понда, таво сьӧрті, мӧдлун гӧгӧр, недыр мыйись.

4. Приставка мед- да частица -кӧ наречиеэзкӧт гижсьӧны ӧтлаын: медбура, медматын, кытӧнкӧ, кытіськӧ, кыдзкӧ, кӧркӧ, ӧткӧ, мӧдкӧ, медумӧля, медвеськыта, медлажмыта.

5. Частицаэз -либо, -нибудь наречиеэзкӧт гижсьӧны кырӧлокӧн: кытӧн-либо, кытчӧ-нибудь, кысянь-либо, кӧр-либо, кыдз-нибудь.

6. Усилительнӧй значеннёа парнӧй наречиеэз гижсьӧны кырӧлокӧн: ӧдва-ӧдва, вылӧ-вылӧ, ылын-ылын, матын-матын, перыта-перыта, жагӧна-жагӧна, рыт-рыт, лун-лун, улӧ-улӧ, чуть-чуть, сёрӧн-сёрӧн, пыма-пыма.

7. Кырӧлокӧн гижсьӧны:

а) парнӧй наречиеэз: бура-долыта, пӧта-чӧскыта, одз-бӧр, улӧ-вылӧ, сьӧрсьӧн-бӧрсьӧн, лӧня-гуся;

б) кӧр кык ӧткодь наречие повторяйтчӧны значеннёсӧ вынсьӧтӧм понда: рядӧн-рядӧн, чукӧрӧн-чукӧрӧн, ылын-ылын, матын-матын, басӧк-басӧк.

8. суффикса прилагательнӧйезісь аркмӧм наречиеэзын гижсьӧ кык а: гажаа, мичаа.

9. Прилагательнӧйезісь аркмӧм наречиеэзын кыввез кузя, шогӧн, увья гижсьӧны ӧтлаын: буркузя, лёкшогӧн, мыдзувья, радкузя, лӧгувья, томувья, пӧрисьувья, лёккузя.

10. Существительнӧйезісь да кузь кылісь аркмӧм наречиеэз гижсьӧны ӧтлаын: кузьгод, кузьтулыс, кузьой, кузьтуй, кузьлун.

11. Ӧт коренись аркмӧм наречиеэз послелоггезӧн дор, нёж, выв гижсьӧны ӧтлаын: ӧтдор, ӧтвыв, ӧтнёж.

12. Прилагательнӧйезісь да причастиеэзісь аркмӧм наречиеэз дор послелогӧн гижсьӧны ӧтлаын: асъядор, рытъявдор, водандор.

13. Существительнӧйезісь аркмӧм наречиеэз тыр(ьяс), сорӧн кыввезкӧт гижсьӧны ӧтлаын: моростыр, банятыр, керкутыр, ӧмтырьяс, содзтырьяс, вужсорӧн, ёгсорӧн.

 

ХІІ. ПОСЛЕЛОГГЕЗ ГИЖӦМ

1. Послелоггез существительнӧйезкӧт гижсьӧны торйын: счастье понда, гожум кежӧ, керку дынын, ю сайын, вӧр весьтын, мир йылісь, пызан вылын, юр вевдӧрын.

2. Послелоггез числительнӧйезкӧт гижсьӧны торйын: дас гӧгӧр, кыкнанныс йылісь, куимнанныс понда, нёльӧтыс вылӧ.

3. Местоименнёэзкӧт послелоггез гижсьӧны торйын: ме дынӧ, тэ йылісь, ме сувда, тіян понда, ны йылісь.

4. Наречиеэзкӧт послелоггез гижсьӧны торйын: ашын кежӧ, мӧдлун гӧгӧр.

5. Послелог кодь существительнӧйезкӧт, местоименнёэзкӧт гижсьӧ торйын (видзӧт VI, VIII гл.).

6. Послелог йылын быдӧс падежнӧй формаэзын существительнӧйезкӧт гижсьӧ торйын: кок йылын, кок йывсим, но: домйылын.

7. Послелоггез, кӧднаӧн существительнӧйезісь, прилагательнӧйезісь, числительнӧйезісь, местоименнёэзісь аркмӧны мӧдік сёрни торрез, гижсьӧны ӧтлаын: тӧдвылын, ӧткоста, быдмозӧн, важмоз.

 

XIII. СОЮЗЗЭЗ ГИЖӦМ

1. Союззэз да, и, а, но, мый, мед, медбы, нето гижсьӧны мӧдік кыввезкӧт торйын: Перво нія ӧктісӧ тшак, а сыбӧрын пондісӧ ӧктыны озъягӧд. Челядьлӧ колӧ чожажык мунны, нето нія сёрмасӧ школаӧ. Миян вӧрын быдмӧны рыжиккез и ниндуллез.

2. Союззэз медбы, кӧбы, нето, тожӧ, сідзжӧ, сідзкӧ гижсьӧны ӧтік кылӧн: Велӧтчиссез локтісӧ Москваӧ, медбы участвуйтны соревнованнёэзын. Выходнӧй лунӧ мунім бы город сайӧ, кӧбы не сэтшӧм мороз.

3. Сложнӧй союззэз сійӧн что, сійӧн, что; сійӧн мыля, сійӧн, мыля; сійӧн медбы, сійӧн, медбы; сідз кыдз, сідз, кыдз; сэк кӧр, сэк, кӧр гижсьӧны торйын: Эта книгаыс гленитчис быдӧнныслӧ, сійӧн что сыын гижӧма миян округ йылісь. Мийӧ лэбзим самолётӧн, сідз кыдз кадыс вӧлі ӧддьӧн етша.

4. Союззэз сідзжӧ, сідзкӧ оз ков соравны частицаэза сідз наречиекӧт, кӧда частицаэзкӧт гижсьӧ торйын: сідз кӧ, сідз жӧ. Примеррез: Тӧлыс унняліс талун сідз жӧ, кыдз и тӧн. Сідз кӧ пондам мунны, то гортӧ локтам одзжык.

 

XIV. ЧАСТИЦАЭЗ ГИЖӦМ

1. Частицаэз -ко, -нибудь, -либо гижсьӧны мӧдік сёрни торрезкӧт кырӧлокӧн: мый-либо, кин-нибудь, кытшӧм-нибудь, кӧр-либо, вай-ко, сьылышт-ко, сет-ко.

2. Условнӧй значеннёа глаголлэзкӧт кӧ частица гижсьӧ торйын: Оз ветлы кӧ сія талун врач дынӧ, ашын сёр ни лоас. Локтас кӧ сія месся одзжык, сет сылӧ книгасӧ.

3. Частицаэз пӧ, тай, ли, ни, эд, инӧ, да, и, я, жӧ, а, вӧлись, бы гижсьӧны торйын: Важын ни эд пӧ нія олӧны эта городын. Адззывлін я тэ виль стройканымлісь биэсӧ?

4. Повелительнӧй наклоненнёа глаголлэзкӧт да целевӧй союззэз туйӧ употребляйтчикӧ частица мед гижсьӧ торйын: Мед бура велӧтчыны, колӧ уна занимайтчыны. Мед нія кывзасӧ миянлісь висьтасьӧмсӧ.

5. Частицаэз дзирс, дзар, медся, стрась, чим, вель, куш, зэв, бель прилагательнӧйезкӧт, наречиеэзкӧт да глаголлэзкӧт гижсьӧны торйын: чим гӧрд, дзирс пемыт, дзар югдіс, бель чочком, вель ылын, зэв ыджыт, зэв паськыт, медся вылын, стрась чӧскыт, зэв бура, куш сьӧд, вель уна, медся басӧк, чим сьӧд, вель тума.

 

Частица не гижӧм

1. Частица не гижсьӧ ӧтлаын сэк, кӧр кылыс сытӧг оз употребляйтчы: неуклюжӧй, небрежнӧй, несчастнӧй, нерушимӧй, непобедимӧй, невна, нечаяннӧя, незгӧдь, неудобича, нетолишто, нетель, нетопыр.

2. Частица не гижсьӧ ӧтлаын отрицательнӧй местоименнёэзкӧт да отрицательнӧй наречиеэзкӧт: некин, некытшӧм, немымда, некӧда, некытӧн, некытчӧ, некытісь, некысянь, некыт, некытчӧдз, некӧр, некыдз.

3. Частица не глаголлэзкӧт да деепричастиеэзкӧт гижсьӧ торйын: не мунны, не сьывны, не видзны, не уськӧтны, не велӧтчыны, не кольны, не пукавны; не орсӧмӧн, не сьылӧмӧн, не радуйтчӧмӧн, не мунӧмӧн, не пукалӧмӧн.

4. Частица не гижсьӧ ӧтлаын существительнӧйезкӧт, прилагательнӧйезкӧт да наречиеэзкӧт, кӧр нія частицакӧт мыччалӧны виль понятие: приятель — неприятель, ыджыт — неыджыт, ылын — неылын. Эттшӧм кыввесӧ позьӧ вежны сэтшӧм кодь жӧ значеннёа, но не частицатӧг кыввезӧн: неприятель — враг, неыджыт — учӧт, неылын — матын.

5. Частица не гижсьӧ торйын сэк, кӧр являйтчӧ отрицаннёӧн, а оз аркмӧт виль кыввез: Сія миянлӧ не приятель, а просто тӧдса. Керкуыс не ыджыт, а учӧт. Отирыс тыдалісӧ не ылын, а матын. Юыс вӧлі не паськыт, не векнит.

6. Причастиеэзкӧт частица не гижсьӧ ӧтлаын: Миян колхозас абу невелӧтчись челядь. Некывзісь вӧлыс понда ме запті шатёк.

7. Частица не наречиеэзкӧт гижсьӧ ӧтлаын, кӧр нія эта частицакӧт мыччалӧны виль понятие, кӧр энӧ наречиеэсӧ позьӧ вежны сэтшӧм кодь жӧ значеннёа, но не частицатӧг наречиеэзӧн: негорӧн (гусьӧн), неумӧля (бура), небасӧка (нёштӧма).

Мӧдік случайезын частица не наречиеэзкӧт гижсьӧ торйын: Не сэк эта вӧлі. Лёня баитіс не ӧддьӧн горӧн. Баитісӧ не горӧн, а гусьӧн.

 

XV. ИЗОБРАЗИТЕЛЬНӦЙ КЫВВЕЗ

1. Повторяйтчан изобразительнӧй кыввез гижсьӧны кырӧлокӧн: вак-вак, тон-тон, вик-вик, чуп-чуп, лег-лег.

2. Повторяйтчан изобразительнӧй кыввез звуккез чередованнёӧн гижсьӧны кырӧлокӧн: куж-каж, тірс-торс, жиль-жоль, трина-брана, кыша-паша, шувк-шовк.

3. Кык коренись парнӧй изобразительнӧй кыввез гижсьӧны кырӧлокӧн: чер-бар, гыма-йирка.

4. Глаголлэзкӧт изобразительнӧй кыввез гижсьӧны торйын: дзуз видзӧ, дзар керис, шынь мунісӧ, швыч да швыч керис, лич лэдзис, пым сидзны, чӧс видзны, питкыль-питкыль сибӧтчис, чер-бар усьны, кур сидзис.

5. Прилагательнӧйкӧт изобразительнӧй кыввез гижсьӧны торйын: дрин-дрин пӧт, люзь ва, ляп код.

 

XVI. КЫВВЕЗ ВУДЖӦТӦМ

1. Ӧтік строкаись мӧдік строкаӧ кыввез вуджӧтсьӧны слоггез сьӧрті: ве-лӧ-та, шко-ла, ки-эз-нас, да-дёк-нас, кер-ку-ок-кез-ным-лісь, вон-нэ-зӧ, мун-ны.

2. Слог аркмӧма кӧ ӧтік гласнӧй букваись, сэк сійӧ оз позь кольны строка конецӧ и оз позь вуджӧтны. Сэтшӧм кыввез вуджӧтсьӧны сідз: уна-ись, яма-ын, уче-ник.

3. Кӧр буква й сулалӧ слог конецын, то сія кольччӧ сія жӧ строкаӧ: кый-ны, кый-тӧм, мӧй-му, туй-ез, сой-ез, ой-ез. Кӧр й сулалӧ слог пондӧтчӧмын, сэк сія вуджӧтсьӧ мӧд строкаӧ: бӧрйыны, дор-йис, ма-йӧг, сё-йим, ва-йисӧ, кы-йис.

4. Букваэз ъ, ь оз туй янсӧтны ны одзись букваэзсянь: пась-кӧм, воть-ва, вись-тась-ны, объ-явленнё, подъ-езд, озъ-ягӧд, медъ-югыт, тӧвь-ям.

5. Кык ӧткодь согласнӧй колӧ торйӧтны: кас-са, пес-сис, зон-нэз, кол-лектив, шын-нялӧ, клас-сісь, вӧр-рез, ой-йис, суй-йыны.

6. Оз позь торйӧтны сочетаннёэз дз, дж, тш, дзз, джж, шш: кыдз-сӧ, потш-ла, пытш-кас, кы-дззез, джо-джжез, вӧ-джжӧ, нё-джжасьны, по-тшшуйтны.

7. Сложнӧй кыввез вуджӧттӧн оз позь кольны строка конецӧ мӧдік основаэзісь первӧй буквасӧ, оз кӧ сія ло слогӧн: гор-ӧм, кузь-ой, йӧз-ай, сьӧд-кай, бекӧр-пань, куш-му-под, гут-кулан-тшак.

8. Сложнӧй джендӧтӧм кыввесӧ вуджӧтікӧ колӧ торйӧтны сідз, медбы строкаас кольччис значимӧй торыс быдсӧн, а остальнӧйес вуджисӧ мӧдік строкаӧ: окр-испол-ком, пед-училище, сель-хоз-техникум, рай-испол-ком, сель-совет.

9. Кыв вуджӧттӧн мед частицаись оз позь янсӧтны медбӧрья буквасӧ: мед-умӧля, мед-ылӧ, мед-ыджыт, мед-учӧт.

10. Эм кӧ кылын частица не, то кывсӧ вуджӧттӧн оз позь кольны сы дынӧ мӧд слогись первӧй буквасӧ: не-ылӧ, не-чожа, не-здоровӧй, не-грамотнӧй, не-правда, не-приятель, не-удача, не-ӧтпыр, не-погодь, не-кытшӧм, не-уна, не-етша.

11. Оз позь вуджӧтны мӧдік строкаӧ суффикссэз -ӧдз, -ӧт да падежнӧй окончаннёэз, кӧдна сулалӧны цифраэз да абревиатураэз бӧрын: 58-ӧй, 5-ӧдз, 41-ись; МИД-лӧн, ТЮЗ-ын, РТС-ӧ.

12. Заимствуйтӧм кыввез вуджӧтсьӧны сідз жӧ, кыдз русскӧй кылын.

 

XVII. ЫДЖЫТ БУКВАСЯНЬ КЫВВЕЗ ГИЖӦМ

Быд предложеннё пондӧтчӧ ыджыт буквасянь.

Ыджыт буквасянь гижсьӧны:

а) мортлӧн фамиллё, ним, айним, прозвищеэз, псевдониммез: Лихачёв Михаил Павлович, Сырчик Анна, Питю Ӧньӧ;

б) животнӧйезлӧн кличкаэз: Рыжко (вӧв), Серанька (мӧс), Шарик (пон);

в) географическӧй ниммез: Европа, Урал, Кудымкар, Кама, Каспийскӧй море, Коми-Пермяцкӧй автономнӧй округ, Юсьва, Коса, Чӧвпан мыс;

г) газетаэзлӧн, журналлэзлӧн, книгаэзлӧн, кинофильммезлӧн, печатнӧй органнэзлӧн ниммез: газета «Парма», журнал «Би кинь», книга «Пармаын асыв», кинофильм «Ми петім тшынісь», издательство «Пермская книга»;

д) астрономическӧй ниммез (планетаэз): Шонді, Му, Тӧлісь, Марс (му, шонді, тӧлісь кыввез озӧ кӧ лоӧ планеталӧн астрономическӧй нимӧн, гижсьӧны учӧт буквасянь. Асывсянь гажӧн югьяліс шонді);

е) событиеэзлӧн да праздниккезлӧн ниммез: Великӧй Отечественнӧй война, Победа лун, Микола, Петыр лун, Урожай лун;

ж) учрежденнёэзлӧн да организацияэзлӧн ниммез: Культура керку, Кад чулӧтӧм понда Центр, «Кудымкарлес» объединеннё, телерадиокомпания «Коми-Пермяцкая»;

з) обществоэзлӧн (чукӧррезлӧн), кооперативвезлӧн да ассоциацияэзлӧн ниммез: «Парма» общество, «Югӧр» общество, «Алтер» страховӧй агентство, «Ош-экспресс» кооператив, «Иньва» кооператив, Фермерскӧй да крестьянскӧй хозяйствоэзлӧн ассоциация;

и) сложносокращённӧй кыввез, кӧдна лоӧны учрежденнёэзлӧн да организацияэзлӧн ниммез: Госплан, Уралмаш.

 

Комментируйтны да содтавны ыстӧгъяс оз позь