RSS Автор: Попова Э. Н.
Небӧгса йӧзӧдӧм: Ӧнія коми кыв. Морфология. Сыктывкар, 2000. Лб. 519-524.
Сёрникосткыв — вежласьтӧм кывъяслӧн лексика-грамматика чукӧр, кодъяс оз лоны асшӧр ни отсасян кывъясӧн, да кодъяс отсӧгӧн сёрнитысь петкӧдлӧ ассьыс сьӧлӧмкылӧмсӧ, пытшкӧсса тӧждъяссӧ, кӧсйӧмъяссӧ, керӧм вылӧ кодӧскӧ ышӧдӧм да с. в.
Примеръяс:
— Мый нӧ, ноко! . . . А-А, — нюжӧдӧ сэсся дышпырысь (М. Игнатов),
Ыш! — тӧдлытӧг яндысьтӧма артмис Павеллӧн (Г. Юшков),
Э-э?! — друг горӧдіс батьыс (Г. Юшков).
Сёрникосткыв оз вежлась, сылӧн абуӧсь торъя грамматика формаяс, но сылӧн эм грамматика тӧдчанлун и аслыспӧлӧслун. Сёрникосткыв пырӧ кывлӧн грамматика тэчасас, бергалӧ быд кывлы лӧсялана оланпасъяс да индӧдъяс серти.
Сёрникосткывъяс чужӧны да сӧвмӧны кызвыннас ас кыв подув вылын. Медтӧдчанаӧн та дырйи лоӧ налӧн синтаксис боксянь петкӧдчӧм, кор тайӧ либӧ мӧд кывсикаса кыв босьтӧ ас вылас содтӧд эмоциональнӧй рӧм да пондӧ петкӧдлыны сёрнитысьлысь пытшкӧсса аскылӧмсӧ. Уна сёрникосткыв коми кывйӧ пырис роч кывйысь: марш!, стоп!, караул!, господи!, пока! да с. в.
Сёрникосткывъяс мичмӧдӧны, озырмӧдӧны йӧзлысь сёрнисӧ, сетӧны сёрниыслы эмоциональность. Сёрникосткывъяс отсӧгӧн посни челядьӧс кокни велӧдны сёрнитны (пон увтӧ: «ув-ув-ув», мӧс баксӧ: «му-у»), горзӧм-сьылӧм сертиыс аддзытӧг тӧдмавны зверь-пӧткаӧс («кот-кот-кот» — тар, «пить-пить-пить» — сьӧла).
- Сёрникосткыв вежӧртасъяс
- Сёрникосткыв тэчасног
- Сёрникосткыв синтаксис тэчасын
- Коми сёрникосткывъяс (лыддьӧг)
Йӧзӧдӧм