RSS Автор: Попова Э. Н.
Небӧгса йӧзӧдӧм: Ӧнія коми кыв. Морфология. Сыктывкар, 2000. Лб. 519-524.
Тэчасног серти сёрникосткывъяс юксьӧны подув да артмӧмаяс (кытчӧ пырӧны и тэчаса сёрникосткывъяс) вылӧ.
Подув сёрникосткывъяс артмӧмаӧсь:
- ӧти гора шыысь: а!, о!, у!, э!
- кык или некымын шыысь: ай!, ом!, эм!, ак!, ок!, ук!, эк!, ик!,уф!, но!, фу!, ау!, ого!, ага!, экма!, окма!, ойя! да с. в.
Подув сёрникосткывъяс вермӧны шусьыны кыкысь либӧ куимысь. Та дырйи тшӧкыда (но оз век) артмӧны выль вежӧртаса сёрникосткывъяс, ӧткодялӧй кӧть: ам! и ай-ай-ай! (ай-яй-яй!). Ай! сёрникосткыв петкӧдлӧ дой, повзьӧм да с. в. ; Ай-ай-ай (ай-яй-яй) сёрникосткыв кутӧ нин мӧд вежӧртас — дивитӧм, чирыштӧм: Кыдз нӧ мый? Ай-яй, Холопов! Найӧ тэнӧ, по идее, пӧръявлӧны, а тэ эскан быдторйӧ, мый висьталасны, эскан кос пуйывса туриӧ! (М. Игнатов).
Артмӧм сёрникосткывъяс вуджӧмаӧсь асшӧр кывсикасъясысь, шуам, пом! (эмакывлӧн кын форма), шань! (кывберд) да с. в. — Вот чӧртыд! — артмӧ Иван Алексеевичлӧн, сійӧ босьтлӧ ныр вывсьыс ӧчкисӧ, сэсся бӧр ӧчкиасьӧ (М. Игнатов).
Артмӧмаясӧн жӧ лоӧны сёрникосткывъяс, кодъяс петкӧдчӧны кыдзи зумыд фразеологическӧй тэчасъяс: аттӧ дивӧ, вот и дивӧ, сё мат, сё збыль, сё майбырӧй, сё мокасьт, сё морӧ да с. в. Примеръяс пыдди: Бурӧн шуӧмыд нӧ кодлы оз лӧсяв. Но, сё морӧ, рӧбӧта! —Вианныд пӧ, шуӧ! Сё морӧ баруня! Но и чудеса тэ висьталан, Домна! (Г. Фёдоров), Сё мокасьтӧ, да тайӧ жӧ жоньяс! (С. Раевский), Видзӧда. Но сё дивӧ! Кольӧм вося нылыд (В. Тимин), — Мый, сё господи! — чуймис Наста (Г. Юшков), Егули гач! Эк раскудрались, сӧтана пызь (В. Тимин). Мӧд ног татшӧм сёрникосткывъяссӧ позьӧ шуны тэчаса сёрникосткывъясӧн.
Йӧзӧдӧм