Коми кывтӧдӧм

Автор: Попова Э. Н.

Небӧгса йӧзӧдӧм: Ӧнія коми кыв. Морфология. Сыктывкар, 2000. Лб. 519-524.

Сёрникосткыв вермӧ лоны сёрникузяӧн либӧ петкӧдчыны сёрникузя тэчасын, но век сулалӧ аслас местаын.

Синтаксис тэчасын сёрникосткывъяс мукӧд кывъяскӧд йитчӧны шуанног отсӧгӧн. Сёрникосткывъяслӧн эм асланыс сӧвман вын, коді петӧ сёрникузялӧн синтаксическӧй тэчаскӧд налӧн топыд йитӧдысь.

Ӧткымын сёрникосткыв вермӧ йитчыны мукӧд кывсикасъяскӧд синтаксис боксянь ӧтувъя тэчасӧ, примеръяс пыдди:

• — Ноко марш уліас да пӧсьӧдчывлы! Сэн тэныд абу пӧрысь пӧльястӧ ӧбӧдитӧмыд кодь! (М. Игнатов).

Овлӧ, мый сёрникосткыв мунӧ сёрникузяса членъяс пыдди:

• «Ура» (дополнение) горзігтыр челядь разӧдчисны пес корсьны, а ме перйи вещмешӧкысь чайник, кружка, чай банка (С. Раевский),
• — Но? Тэ нӧ сідзкӧ аминь-кымынь-гатш-пук (сказуемӧй)? (М. Игнатов),
• А коли ӧд сысянь кадыс — ой-ой-ой (обстоятельство). . . (А. Дёмин),
• Миян ӧд могъясыс — ого (сказуемӧй)! (В. Тимин).

Сёрникосткывъяс кокниа йитчӧны кывторъяскӧд, примеръяс пыдди:

• Лӧсьыд тадз мӧвпавны, ас пытшкад пестыны-ломзьӧдны югыд би чут. Ок и лӧсьыд! (В. Тимин),
• Анна Николаевна менӧ на велӧдліс, ой и стрӧг (В. Тимин),
• Аттӧ жӧ, мися — аслым моз шуи (Г. Юшков),
• Окма жӧ эськӧ да! Йӧзыдлы тай абу жаль, кӧть и сійӧ жӧ Виталей коддьӧмыслы. . . (И. Торопов).