Коми кывтӧдӧм

Автор: Попова Э. Н.

Небӧгса йӧзӧдӧм: Ӧнія коми кыв. Морфология. Сыктывкар, 2000. Лб. 519-524.

Эмоциональнӧй сёрникосткывъяс петкӧдлӧны уна пӧлӧс сьӧлӧмкылӧм да этш вылысь вӧрзьӧм.

а!, о!, ах!, ай!, ай-ай-ай!, ок!, ой!, о-го!, но!, но-о-о!, эх!, эк!, экма!, окма!, ойя да ойя!, ага-а!, да!, у!, у-ук!, уф!, ы-ы!, ха-ха-ха!, хи-хи-хи!, ы-гы-гы!, оть-оть-оть!, оль-льоль-оль!, ура!, тьпу!, господи!да с. в.

Ӧти и сійӧ жӧ сёрникосткывйыс вермӧ петкӧдлыны ошкӧм и дивитӧм, повзьӧм и долыдасьӧм, нимкодясьӧм и зывӧктӧм. Уна сикас сьӧлӧмкылӧм петкӧдлан сямыс урчитсьӧ сійӧн, мый сёрникосткывлӧн кыввора вежӧртас петкӧдлӧмын зэв ыджыд тӧдчанлун ворсӧны контекст, сёрни ситуация, шуанног, чужӧмлӧн вежсьӧм, киӧн шеныштӧм. Найӧ вермӧны петкӧдлыны нимкодясьӧм, шензьӧм, повзьӧм, шогсьӧм, дивитӧм, скӧралӧм, вермӧм, ыджыдалӧм, ошйысьӧм, лӧглун, лёк вылӧ радлӧм, ёна кӧсйӧм, мудзӧм, серам, мелілун, олӧм дорӧ веськодьлун да с. в., сідзкӧ петкӧдлӧны висьталысьыслысь лов кылӧмсӧ. Коми кывйын тайӧ чукӧрыс зэв озыр, и кызыс на пиысь уна вежӧртаса. Эмоциональнӧй сёрникосткывъяс пиысь позьӧ торйӧдны нӧшта татшӧмъясӧс:

1. сёрникосткывъяс, кодъяс петкӧдлӧны бур сьӧлӧмкылӧм — нимкодясьӧм, гӧрдитчӧм, мелілун, ошкӧм, вермӧм, долыдлун да с. в: а-а!, ак!, о!, о-о!, ок!, ого!, ого-го!, ай-да!, ура!, оть-оть-оть!, оль-оль-оль!, аттӧ! да с. в. Примеръяс: — О-о! — ефрейтор бара серӧктіс гажаа и лэптіс чуньсӧ. — Военнӧй гусятор (В. Тимин), О, мичаысь-мича лэбачьяс! (С. Раевский), — Ок, ӧд сюсь асланьыс! — нимкодя вочавидзис Лыткин (Г. Юшков), Сӧлӧ бабыс видзӧдіс нывка вылӧ да нюмвидзис. — Ай да нывка! Ай да бобӧ! (Н. Куратова), Аттӧ лӧсьыд ныв! Овлӧны тай, небось! (В. Тимин);
2. сёрникосткывъяс, кодъяс петкӧдлӧны лёк сьӧлӧмкылӧм — дивитӧм, скӧралӧм, дӧзмӧм, лӧглун, лёк вылӧ радлӧм, веськодьлун да с. в. : ак!, о-о!, ок!, но-но, тьпу, тьфу, фи, чӧрту да с. в. Примеръяс: — О-о! Зэв тай сӧстӧм кылан! Чери сьӧмӧсь на нырыд. Мыссьы да вӧлись тадзтӧ сёрнит (Г. Юшков), Энӧ кисьталӧй кыдзсюрӧ кизьӧр мавтассӧ. Ковмас на. . . Ак, разбойникъяс! (В. Тимин), Ок, вот пӧ! — ырыштчӧмӧн уськӧдчис Епрем Ӧльӧшыд (Г. Юшков), — Но-но, — нурбыльтіс Поликарп. — Америкаӧ оз на лэбзьыны (Г. Юшков), — Тьпу! Мед тэнӧ морыс лыяс! Со деньгаыд! — Чёрный петӧ, веськӧдчӧ, кык чунь костас кутӧ уна кусыньӧн чукралӧм деньгасӧ, быттьӧ полӧ ляксьӧмысь, да мыччӧ Фукслы (М. Игнатов), — Ой! — дойдана шпыньмуніс Саяна (Г. Юшков), Ок, виччысь, Стас, бесыд матын гӧгралӧ. Эн сетчы. — Тьфу тэ! (В. Тимин), — Чӧрту! Тат оз позь вуджнысӧ! — пӧшти горзіс тракторсьыс петігмоз Карпов,. . . (М. Игнатов);
3. сёрникосткывъяс, кодъяс петкӧдлӧны шензьӧм, майшасьӧм, чуймӧм, думайтӧм, жалитӧм, повзьӧм да с. в. : а-а!, ак-ак-ак, ой!, ой-ой-ой!, ой-я да ой-я!, уп!, ак, трасича!, ок!, ок-ок-ок!, м-да!, но-о!, о господи!, сё дивӧ!, сё мокасьтӧ!, чӧв!, э-э! экма! да с. в. Примеръяс: Ак, ак, ак! Видзӧдлӧй, кыдзи тшыкӧдӧ мортӧс ошкӧмыс (В. Тимин), А кымын морт сэні тшыглысӧ, пыкталӧмнас, куліс! Ой-ой! (Г. Юшков), — Ой-ой-ой! —равӧстіс Ӧгрӧ. — Петя!! Петя!! Мамтӧ ӧд нин со нӧйтӧ (Г. Юшков), — Кывлін, Анфиса, Даръя тьӧтлӧн куканьыс вошӧма. Дерт, кӧнкӧ, ошъяс косявлісны, ой-я жӧ да ой-я. Семен лун ӧд (И. Коданёв), — Уп! Тайӧ ті?! Тайкӧ весьӧпӧртанныд (М. Игнатов), Ак, трасича!. . Ме гымньӧв моз чепӧсйи ас койка вылысь, исковті чуньясӧн тасма сайті и, унзіля на, устав серти лэдзи киясӧс (В. Тимин), Ок-ок-ок! Унаысь жӧ эськӧ шулі челядьыслы, гашкӧ пӧ огӧ на жӧ рӧзвал вылӧ лэдзӧй бать горттӧ! (Н. Куратова), Ой, сылӧн тай зэв уна юрыс лоӧма, менам бара петас оз сы мындаыс! (Г. Юшков), Мороз ышловзис: — М-да. . . Ворсси великӧй комбинаторысь на регыдджык (В. Тимин), И друг. . . менам табйӧй вӧйи. «Эк-ма, сакӧс вунӧді. . . » — думышті да лэпті берегӧ чаль кузя йӧрш (С. Раевский), — Но-о! Сідзкӧ, гӧгӧрвоана, мыйла сійӧ сёрмис, — тӧдчӧдӧ Василий Петрович пиньнас шӧрт кутігмоз (М. Игнатов), Но-о?! — чуймӧма нюркнитіс Лыткин. — Володьлы, лешаклы, бара масьт! (Г. Юшков), Видзӧда. Но сё дивӧ! Кольӧм вося нылыд! И нӧшта на шаньмӧма (В. Тимин), Сё мокасьтӧ, да тайӧ жӧ жоньяс! (С. Раевский), — Чӧв!! — сӧмын и артмис Насталӧн (Г. Юшков), — Чӧв, чӧв! — Аддзылі ӧд, аддзылі (Г. Юшков), «Э-э, — думайта, — тадзитӧ верман тэ, Бойко ёрт, кытчӧкӧ мӧдлаӧ веськавны. . . » (М. Игнатов), — О, господи! — пӧчӧ моз шай-паймуні Рая (Г. Юшков), — Мый, сё господи! — чуймис Наста (Г. Юшков), — . . . Ва веркӧсӧ польснитіс-кайліс неыджыд кельчи, мыні вугырсьыс да уйыштіс лапкоръяс улӧ. — Хо, и меным шедлӧма. . . . (В. Безносиков). Мукӧддырйи эмоциональнӧй сёрникосткывъяс кутӧны вынсьӧдан либӧ тӧдчӧдан вежӧртас. Татшӧмъяснас ёнджыкасӧ овлӧны ак!, ок!, ой!, о-о!, у!, ук! сёрникосткывъяс. Примеръяс пыдди: Ак, эськӧ ӧні кӧдзыд йӧв кружка. А! (В. Тимин), Ок, кыдз ме сылы сэк эски, кутшӧм ыджыд лача сы вылӧ куті! (Г. Юшков), Ок, и чӧскыд. Сэтшӧма вӧлі горшӧй косьмӧ, да пыр и веськаліс (И. Коданёв), Ой, сійӧ тай зэв нин уна ытшкӧма (Г. Юшков).