Коми кывтӧдӧм

Автор: Попова Э. Н.

Небӧгса йӧзӧдӧм: Ӧнія коми кыв. Морфология. Сыктывкар, 2000. Лб. 519-524.

Императивнӧй (ышӧдана) сёрникосткывъяс петкӧдлӧны тшӧктӧмыслысь уна сикас рӧм

ау!, ого-го!, э-э-э!, эм!, но!, но-о!, ноко!, марш!, брысь!, кыш!, шыть!, тпру!, тс-с!, ш-ш-ш!да с. в.

Найӧ юксьӧны некымын чукӧр вылӧ:

1. Тшӧктӧм, корӧм, ышӧдӧм ӧтув вежӧртаса сёрникосткывъяс: тс-с!, ш-ш-ш!, но!, но-но-но!, ноко!, нолы!, нолӧ!, нолтӧ!, нолтӧсь!, на!, тпру!, шы-шы-шы! да с. в. Примеръяс: — Но-но, но! — тэрмӧдліс Кочев Лыткинӧс (Г. Юшков), Ноко, зон, вод да гожъялышт, а ме видзӧдла (В. Тимин), Ноко, волӧй! — горӧдіс Степан здук-мӧд мысти (Г. Юшков), Вай пӧ, ноко! Тэ пӧ ӧд сы пыдди колин (Г. Юшков), Тпру! — ныв весьтӧ тшапа сувтӧдіс вӧвсӧ зон (И. Изъюров), — Шы-шы-шы! — ӧлӧдана пушкыштіс Поликарп (Г. Юшков).
2. Чуксалысь сёрникосткывъяс: эм!, -э-э-э!, ау!, о-о-о!, о-го-го!, алло!, караул! да с. в. Примеръяс: — Эй, ефрейтор ёрт! А дыр-ӧ мем тан ковмас пукавны! (В. Тимин), — Эй-эй! Мый вӧчан! Ноко, пукты бӧр! (М. Игнатов), — Коля! Э-э-э. . . (И. Коданёв), Татчӧ локтӧй! Татчӧ! О-о-о. . . (И. Коданёв).
3. Сёрникосткывъяс, кодъяс отсӧгӧн вӧтлӧны либӧ корӧны матыстчыны кутшӧмкӧ ловъя лолӧс: кысь-сь-сь! (вӧтлӧны ыжъясӧс), шыть! (вӧтлӧны понъясӧс), брысь! (вӧтлӧны каньясӧс), марш! (вӧтлӧны мортӧс) да с. в. ; пруть-пруть-пруть! (корӧны куканьясӧс), чиб-чиб-чиб! (корӧны чаньясӧс); баль-баль-баль! (корӧны ыжъясӧс), кыс-кыс-кыс! (корӧны каньясӧс), цып-цып-цып! (корӧны чипанъясӧс), гуль-гуль-гуль! (корӧны гулюясӧс) да с. в. Примеръяс: Понйыс уськӧдчыліс вӧтчыны, но Микулай удитіс горӧдны сылы: «Шыть!» (Г. Юшков), — Шыть, — гусьӧник ӧлӧдіс Микулай понсӧ и, мед оз уськӧдчы бӧрсьыс, эз весиг лэдз волыс йывсьыс пищальсӧ, сідз пырыштіс понӧляинас (Г. Юшков).