Коми кывтӧдӧм

Урасьӧм тӧлысьын кызьӧд лунӧ пасйӧ ассьыс юбилей пыдди пуктана кывтуялысь, Коми наука шӧринысь кыв секторса научнӧй сотрудник, коми кыв морфология да синтаксис туялысь Попова Элеонора Николаевна.

Элеонора Николаевна чужлӧма Кӧрткерӧс районса важъя Маджа сиктын. Ӧнӧдз на юбиляр бур кывъясӧн казьтылӧ чужанін йылысь, тшӧкыда волывлӧ гортӧ, медым карса олӧмсӧ неуна сорлалыштны татысь серпасъясӧн: лӧнь Маджа ю, Юрка ты да сы пӧлӧн пожӧма ягъяслӧн мичлуныс, озырлуныс, паськыдлуныс да сӧстӧмлуныс.

1967 воӧ Маджаысь кӧкъямысӧд класс помалӧм бӧрын нылыс пырӧма велӧдчыны Кӧрткерӧсса шӧр школаӧ. Шӧр школа помалӧм бӧрын Элеонора Николаевна кӧсйӧма пырны велӧдчыны Ленинградса канму университетӧ журналист факультетӧ. Но тані велӧдчыны корӧмъяс вӧлӧмаӧсь вывті вылыс тшупӧдаӧсь, и медым лоны студентӧн, ковмӧма бура тӧдны суйӧрсайса кыв. Тайӧ тырмытӧмторйысла Элеонора Николаевна абу вермӧма пырны велӧдчыны. Во чӧжӧн кӧсйӧма содтыны ассьыс тӧдӧмлунъяссӧ да выльысь видлыны. Но сы дыра виччысьнысӧ абу вӧлӧма сӧглас Элеонора Поповалӧн мамыс, и ковмӧма том мортлы босьтны выль сикас тӧдӧмлунъяс Перымса университетын, химия факультетас. Недыр мысти, студентка гӧгӧрвоӧма, мый тайӧ велӧдчӧмыс абу сылӧн, оз лӧсяв сылы пытшкӧсса кылӧм серти, босьтӧма документъяссӧ да мӧдӧдчӧма бӧр гортӧ, муса чужанінӧ.

Сӧмын 1979 воын велӧдчыны кӧсйӧмыс лои пӧртӧма олӧмӧ: Элеонора Николаевна пырӧма Сыктывкарса канму университетӧ, филология факультетас. Коми кыв да литература юкӧн помалӧм бӧрын куим во чӧж уджалӧма велӧдысьӧн Сыктывдінса Сёськаын. Куим во, 1987 восянь 1989 воӧдз, вӧлі лаборантӧн Сыктывкарса канму университетысь финн-йӧгра кафедраын, лыддьӧма курсъяс заочникъяслы да абитуриентъяслы. 1989 вося ноябрсянь лаборанталӧма ИЯЛИ-са кыв юкӧнын, 1993 восянь — ичӧтджык научнӧй сотрудник, а 1996 восянь и ӧнія кадӧдз уджалӧ научнӧй сотрудникӧн.

Элеонора Николаевна — коми кывлӧн морфология да синтаксис тшупӧдъясын специалист. Тайӧ туйвизь кузя туялысь йӧзӧдӧма комын витысь унджык удж. На пӧвстын 16 статья — «Коми язык. Энциклопедия» небӧгын, дасьтӧма торъя разделъяс научнӧй грамматикаын «Ӧнія коми кыв. Морфология». Тайӧ уджъясыс талунъя лунӧдз зэв коланаӧсь. Медтӧдчана да тырвыйӧ лӧсялана туялӧмӧн Элеонора Николаевналӧн лои «Союзы и союзные средства в коми языке» монография (2015). Небӧгын шымыртӧма зэв ыджыд фактическӧй материал, видлалӧма йитӧдъяслысь артмӧмсӧ да сӧвмӧмсӧ, пырӧдчӧма семантикаӧ, структураӧ. Уджыс колана, вӧчӧма ас кадӧ.

Дерт, Элеонора Николаевна Попова аслас уджъясӧн пыртӧ коми кыв туялӧмӧ ыджыд да колана пай, найӧн вӧдитчӧны студентъяс, учёнӧйяс миян Коми Республикаын да Роч му пасьтала, а сідз жӧ суйӧрсайса нималана финно-угроведъяс.

Элеонора Николаевнаыс — пыдди пуктана коми кывтуялысь, госпремияа лауреат, уджвывса ветеран, сылӧн вель уна быдсикас грамота.

Уджъёртъяс сьӧлӧмсянь чолӧмалӧны Элеонора Николаевнаӧс чужан лунӧн, сиӧны кузь нэм да бур шуд!