Коми кывтӧдӧм

Рака тӧлысьын ӧкмысӧд лунӧ пасйӧ ассьыс юбилей пыдди пуктана кывтуялысь, филология кандидат, тӧдса коми лексиколог да лексикограф Айбабина Евгения Авенировна.

Евгения Авенировна чужлӧма Сыктывкарын. Карса нёльӧд номера школа помалӧм бӧрын пырӧма велӧдчыны Ленинградса канму универ-ситетӧ филология факультетӧ мадьяр кыв да литература юкӧнӧ. 1974-ӧд воын тайӧ велӧдчанінсӧ Евгения Авенировна бура помалӧма да локтӧма уджавны Сыктывкарса канму университетӧ. Медводз коми кыв да литература кафедра вылын, сэсся роч кыв да литература кафедра вылын лыддьӧма мадьяр кывйысь курсъяс студентъяслы да аспирантъяслы. 1978-ӧд воын локтӧма уджавны Кыв, литература да история институтӧ социология туялан секторӧ. 1980-ӧд воын пырӧма велӧдчыны аспирантураӧ «Общее языкознание, социолингвистика, психолингвистика» специальносьт кузя. 1988-ӧд вося рака тӧлысьӧ Е. А. Айбабина дорйӧма кандидатскӧй диссертация «Интерференция на лексическом уровне в условиях национально-русского двуязычия (на материале коми и русского языков)» тема вылӧ. Уджсӧ лои вӧчӧма тӧдса ученӧй, филология доктор, профессор Ю. Д. Дешериев веськӧдлӧм улын. 1984-ӧд восянь Е. А. Айбабина уджалӧ кыв, литература да история Институтын кыв секторын.

Е. А. Айбабина — коми кывлӧн лексикология да лексикография тшупӧдъясын специалист, коми да роч кывъяс костын йитӧдъяс туялысь.

Е. А. Айбабина дасьтӧма кӧкъямысдасысь унджык научнӧй удж да статья, найӧс публикуйтӧма Роч муын, Эст муын, Мадьяр муын да Суомиын. Сійӧ пырӧ авторъяс лыдӧ, кодъяс дасьтісны коми кыв кузя статьяяс «Коми язык» (1998), «Республика Коми» (1997, 1999) да мукӧд энциклопедияӧ.

Евгения Авенировна аслас уджъёртъяскӧд, коми кывкудъяс дасьтан чукӧркӧд, козьналісны миян войтырлы уна выль кывчукӧр, шуам, «Словарь эпитетов коми языка» (1994), «Школьный этимологический словарь коми языка» (1996), «Словарь синонимов коми языка» (2002), «Коми-русский словарь» (2000), «Коми сёрнисикасъясын рӧдвуж нимъяслӧн кывчукӧр» (2011), «Словарь диалектов коми языка: в 2-х томах». Т. 1 (2013), Т.2 (2014) да мукӧд.

Дерт, Евгения Авенировна Айбабина аслас уджъясӧн пыртӧ коми кыв туялӧмӧ ыджыд да колана пай, найӧс вылӧ донъялӧны миян Коми Республикаын, Россияса да суйӧрсайса пыдди пуктана финно-угроведъяс.

Евгения Авенировна — нималана туялысь, сылӧн вель уна быдсикас грамота, кыкысь вӧвлӧма госпремияа лауреатӧн (2001, 2015).

Уджъёртъяс сьӧлӧмсянь чолӧмалӧны Евгения Авенировнаӧс чужан лунӧн, сиӧны кузь нэм да бур шуд!