Иван-салдат да Смерть

Вот гортӧ мӧдӧдчис Иван-салдат кызь вит во служитӧм бӧрын. Мунӧ сійӧ код тӧдас кыті, дай думайтӧ: «Аттӧ, — шуас, — кызь вит во служиті, быдтор аддзылі, а господьӧс эг аддзыв. Мый нӧ ме понда гортын висьтавлыны?»
Сӧмын тайӧ думыштіс, сылы старик воча лоис. Шуӧ: лок пӧ мекӧд, ме пӧ тэнӧ господь дорад нула.
Мунісны, мунісны найӧ кыкӧн дай локтісны сэтшӧм местаӧ — пос кайӧ вывлань. Кай пӧ таті пос кузяыс, шуӧ старикыд.
Иван-салдат пос кузяыс кайис, кайис дай воис рай ӧдзӧс дорӧ. А сэні сулалӧ апостол Павел. Сійӧ тай кыдз уськӧдчас Иван вылӧ, Иван чуть эз усь пос кузяыс. Мый пӧ тэд, служивӧй, колӧ? Ме пӧ локті господьӧс видзӧдлыны, а тэ пӧ эн сэтшӧма горзы. Господь дорӧ пӧ тэнӧ оз позь лэдзны, паськӧмыд лёк да, а вот сулавлы пӧ ме пыдди тан пӧсь ӧбӧс дорас, сэки пӧ тэ аддзылан господьтӧ. Толькӧ пӧ быд шляйтчысьсӧ эн лэдз господь дорас.
Ладнӧ. Иван-салдат кутчысис сулавны. Сулалӧ лун, мӧд, унджык. Табак ӧтарӧ чушкӧ.
Вот локтіс сэтчӧ Смерть — куш лыыс голякылӧ, паськӧмыс ротӧс вылын ротӧс. Локтіс да веськыда кӧсйӧ пырны господь ордӧ. Салдат потшис сылы туйсӧ. Кытчӧ пӧ тэ татшӧм лёк паськӧмнад да мисьтӧм чужӧмнад? Менам пӧ тэысь бурджык, да оз лэдзны-а, тэныд кысь.
Эз лэдз Смертьтӧ. Ачыс пырис. Господь сылы воча лои да шуӧ: но мый нин пӧ, служивӧй, кутшӧма олан? Месӧ эськӧ бура пӧ ола да, Смерть пӧ тай воис да юасьӧ, кутшӧм удж пӧ индан сылы таво кежлӧ.
Господь шуӧ: мед пӧ таво кагаясӧс виалас.
Салдат петны кутіс дай думыштчис: мый пӧ талы, лёк Смертьлы, гортам пӧ вокъяслысь медбӧръя кагаястӧ виалас, семьясӧ бӧрддзӧдас.
Петіс тадзи думыштігтырйи Смерть дорӧ. Но мый пӧ меным таво вылӧ тшӧктіс господьыд? Нэриник понӧльяс пӧ тшӧктіс нетшкавны вӧрысь.
Шензьӧ Смерть: мый нин пӧ лоӧма господьыд? Нэмӧн на пӧ татшӧм уджъяс эз сетлы. И муніс Смерть нёрласигтырйи, понӧльяс кутіс нетшкавны вужнас.
Салдат олӧ рай ӧдзӧс дорын дай думайтӧ: кутшӧм нин пӧ тан олӧм, табакӧй быри-а. Лэччыла пӧ, час, адӧ.
Лэччас Иван, служивӧй морт, адӧ. Ад вомыс самӧй восьса. Пырис веськыда Сӧтана дорӧ да шуӧ: вай пӧ, Сӧтана, картіӧн ворсам. Куимысь кӧ пӧ ворссян, став дявӧлыс пӧ лоӧ ме ки улын. Ворсам пӧ, шуӧ Сӧтанаыд. Толькӧ пӧ куимысь кӧ ворссян, нэмыд кежлӧ йӧрта.
Ворсісны ӧти колода, мӧдӧс дай коймӧдӧс. Сӧтана ставсӧ ворссис. И кутіс салдат адын кӧзяинавны. Видзӧдӧ: бесъяс лун-лун весь олӧны, толькӧ чиклясьӧны. «Час ме найӧс босьтла киӧ, — думайтӧ салдат. — Велӧда салдатскӧй служба нуны».
Босьтчис ӧд! Бесъясыдлы салдатскӧй службаыд омӧля вӧлӧм сетчӧ. Чорыда лоӧ найӧс пеславны: кодлӧн сюрыс чегӧ, кодлӧн бӧжыс орӧ, кодлӧн коксьыс гыжъясыс чуктӧмаӧсь. И кутісны беспиян Сӧтаналы жалуйтчыны: пӧгибӧ пӧ кутім воны салдатнад, ставнымӧс пӧ укӧдитӧ. Он-ӧ пӧ тэ кыдзкӧ вермы мездыны? Сӧтана шуӧ, ог пӧ ме вермы, картіӧн пӧ ворсси да. Ті пӧ асьныд кыдзкӧ мездысьӧ сыысь, мыйкӧ думайтӧй сэтшӧмтор, мед сійӧ мунас татысь.
И думайтісны беспиян татшӧмтор: юктӧдісны сійӧс садьтӧм кодӧдз, сэсся, кор сійӧ унмовсис, ад ӧдзӧс саяс тревога вӧчисны. Шум вылад садьмис салдатыд дай уськӧдчис на дорӧ. А беспиян Иван-салдаттӧ аддзисны да, бӧр адад, ад ӧдзӧстӧ клоп сиптісны дай.
Колис салдат ад сайын. Мый вӧчны? Кая пӧ бӧр райӧ.
Кайис мортыд бӧр райӧ, сувтіс рай ӧдзӧс дорӧ. Сулалӧ сэн лун, мӧд. Коркӧ, во тырӧм бӧрын нин, бара локтӧ Смерть нёдзмасигтырйи — важсяысь лёк да мисьтӧм. И пыр жӧ кӧсйӧ господь дорӧ пырны. Салдат тувкис приклад помнас морӧспаняс да сувтӧдіс:
— Сулав, — шуӧ, — кытчӧ тэ сэтшӧм лёкысь сюйсян?
— Ме, — шуӧ Смерть, — господь дорӧ локті юавны, кутшӧм удж сетас таво кежлӧ.
Салдат шуӧ: мед пӧ сідзи и висьталін, а тэ веськыда ӧдзӧсӧ. Господьыс пӧ талун некодӧс эз тшӧкты ас ордас лэдзны. Ме пӧ ачым пырала. Пырис салдат, а господь воча и локтӧ. Но мый нин пӧ, служивӧй, кутшӧма нин олан да мый висьталан? Ме пӧ эськӧ бура ола да, шуӧ салдат. Смерть пӧ тай воӧма да удж корӧ, мый пӧ сылы прикажитанныд таво вылӧ уджавны. Таво пӧ мед, господь шуӧ, шӧр арлыда войтырӧс виалас во чӧж.
Салдат петӧ дай думайтӧ: вокъясӧй пӧ менам буретш шӧр арлыда войтыр, виалас, дай ог и аддзыв найӧс.
Воис Смерть дорӧ:
— Но, — шуӧ, — Смертьӧ, господьыд тшӧктіс шӧр арлыда пуяс вужнас нетшкавны во чӧж.
Смерть юрсӧ гыжъялӧ. Мый пӧ господьыс лоӧма? Бара нин тшӧктӧ пуяс нетшкавны.
Муніс нёрласигтырйи Смерть. Муніс да нетшкавны кутіс шӧр арлыда пуяс вуж выйӧныс.
Во мысти бара Смерть локтӧ господь дорӧ. Куш лыясыс голякылӧны. Важсяысь лёкджык да скӧр. Ӧні нин салдаткӧд венӧ воисны. Смерть кӧсйӧ ачыс пырны господь дорӧ, а салдат оз лэдз, шуӧ: ачым пӧ ме пырала. Тэ кодь лёксьыд пӧ повзяс господьыд да меным пӧ дас сутки арест сетас.
Салдат ачыс пырис. Бара господь воча лои. Служивӧй пӧ, мый нин висьталан? Смертьыд пӧ тай бара локтӧма да, тшӧктіс юавны: кутшӧмӧс пӧ таво кежлӧ прикажитанныд вӧчны сылы удж?
Господь шуӧ: мед пӧ сійӧ таво пӧрысь войтырӧс виалас.
Салдат петӧ дай думайтӧ: вот пӧ лёк мортыд. Тайӧ пӧ ӧд и батьӧтӧ менсьым виас, ловъя кӧ на.
Смерть юалӧ: «Но мый нин, салдат, тшӧктіс меным господьыд вӧчны?» Э-э, тэныд пӧ таво господьыд тшӧктіс зэв кыз пуяс вужнас нетшкавны. Ёна шензьӧ Смерть. Мый пӧ бара лоӧма господьыд? Ӧнӧдз пӧ нэмӧн на пу дорын эг уджавлы. Муніс да быдса во сійӧ лякис-пӧрлӧдліс сывтыръя кыз пуястӧ. Во мысти бара локтӧ Смерть. Смерть ещӧ нин лёк, нёрласьӧ, куш лыясыс голякылӧны. Воис да бара пондіс нӧйтчыны-пырны господь дорӧ. Нинӧм нин эз вермы вӧчны салдат: Смерть пырис господь дорӧ. «Но, — думайтӧ салдат, — ӧні меным Смерть оз прӧстит. Час, — шуӧ, — кувтӧдз кӧть горт закажита».
Чукӧстіс сійӧ святӧй Никодимӧс, коді черӧн вӧдитчӧ да быд дозмукъяс вӧчалӧ. Шуӧ сылы: вот, шуӧ, Кодьӧ, вӧч тэ меным горт полнӧй формаӧн, мед сэні вӧлі вевт и, чветъяс и, вывсӧ и пытшкӧссӧ мед краситӧма гӧрд краскаӧн. Гӧгӧрвоин?
— Гӧгӧрвои, — шуӧ Никодим.
— Гӧгӧрвоин кӧ, сідзкӧ, исполняйт, мед пыр жӧ горт вӧлі тані.
Эз удит салдат табактӧ нюшкыштны, сылы горттӧ, кылӧ, вайӧны нин.
Салдат ошкис бура уджалӧмысь Никодимлысь плӧтникъяссӧ, пуктіс ружьетӧ бокӧ дай нюжӧдчис гортъяд Смерть виччысигмоз.
А Смерть пырис господь дорӧ дай кутіс норасьны, мый нӧ пӧ, господьӧ, татшӧм уджъяс кутін сетавны? Кутшӧм пӧ сэтшӧм уджъяс, юалӧ господь. А вот пӧ кутшӧм уджъяс тэ меным сеталін: первой вонас пӧ ме нэр понӧльяс нетшкалі увнас и вужнас, мӧд вонас — шӧр арлыда пуяс вылын вийси, а коймӧднас — сывтыръя кыз пуяс нетшкалі.
— Чӧв, чӧв, — шуӧ господь, ачыс куснясьӧмӧн сералӧ. — Коді нӧ тадзисӧ тэнӧ нарадитліс?
Смертьлӧн яндзимысла став лыыс голякылӧ, кӧдзыд пӧсь лы кузяыс лэччӧ. Салдатыд пӧ менӧ тадзи вӧчис, коді тай пӧсь ӧбӧс дорад сулалӧ.
Господь сераліс, сераліс дай шуӧ: но, шуас, тэ кодь Смертьнад пӧ меным аслым лоӧ кувны. Мун пӧ да асьсӧ ви.
Смерть петіс салдат дорӧ. Видзӧдӧ, салдат водӧма гортйӧ гатшӧн, кияссӧ морӧс вылас кресталӧма да.
Смерть шуӧ: мый нӧ пӧ тэ тані вӧчан? Тайӧ пӧ менам горт, шуӧ салдат. Во пом кежлас пӧ ме татчӧ шойччыны водла.
Вай жӧ пӧ ме видла, лӧсьыд абу сэні куйлынысӧ? Пӧжалуйста, шуӧ салдат. Зэв пӧ небыд, тӧран пӧ и.
Водіс Смерть гортйӧ дай шуӧ: лӧсьыд пӧ и эм. А эсійӧ нӧ пӧ мый, индӧ Смерть горт пӧв вылас. Тайӧ пӧ вевт, вой кежлас пӧ ме сійӧн пӧдласьла.
— Ноко пӧдлавлы, — шуӧ Смерть.
Салдат босьтіс вевттӧ да клёпкылӧ и пӧдлаліс. Пӧдлаліс да гезйӧн и гартіс. Смертьыд эськӧ гӧгӧрвоис жӧ да, кысь, он, буракӧ, пет. А салдат босьтіс горттӧ, лэччӧдіс мореӧ да брун шыбитіс ваӧ.
Плавайтіс сійӧ ва вылын, гашкӧ, дзонь во, кытчӧдз пӧвъясыс эз тыбзьыны. Коркӧ сэсся морскӧй гы швачкис горттӧ берегас, тыбзьӧм пӧвъяс паськалісны да Смерть бара петіс.
Но и локтіс сійӧ бара рай ӧдзӧс дорад.
Бара салдаткӧд венӧ воисны. Смерть пырӧ господь ордӧ, а салдат оз лэдз. Ёна вермасисны, но салдат эз вермы кутны Смертьӧс. Кольччис салдат, шогӧ уси, табак чушкӧ.
Господь аддзис Смертьтӧ да юалӧ: мый нин пӧ, Смерть, вӧчин? Виин салдаттӧ?
Смертьлӧн стыдысла лы кузяыс кӧдзыд пӧсь киссьӧ.
— Эг, — шуӧ, — вермы ме салдаттӧ вины. Йӧртіс, — шуӧ, — сійӧ менӧ гортйӧ, шыбитіс мореӧ да во чӧж плавайті, кытчӧдз горт пӧвъясыс эз тыбзьыны.
Господьыд сэки эз нин серав. Скӧрмӧмӧн шуӧ: кыдз пӧ тэ он вермы вины салдатӧс? Мун пӧ да эн явитчы, кытчӧдз сійӧс он изведит.
Петіс Смерть салдат дорӧ, а сійӧ табак чушкӧ. Мый пӧ тайӧ татшӧм чӧскыдыс? Оз-ӧ пӧ позь видлыны?
Салдат шуӧ: тайӧ пӧ, Смерть, табак. А колӧ кӧ видлыны, пӧжалуйста. Со нӧ табак да дозйыс. Пыр нӧ сэтчӧ да мыйда гажыд нюшкы.
Смерть тӧрӧдчис, тӧрӧдчис дай пырис табак дозйӧ. А салдат вештіс вевтсӧ дай клоп игналіс. Дзонь во сэні видзис салдат Смертьӧс. Дырджык на эськӧ видзис, да терпенньӧыс эз ло: окота лои табаксӧ чушкыштны. Смерть петіс табак дозсьыд да веськыда господь дорӧ.
Господь шуӧ: но мый нин пӧ, Смертьӧ, салдатӧс виин?
Смертьлӧн стыдысла яй-лы кузяыс кӧдзыд пӧсь киссьӧ. Эг пӧ вермы, господьӧ, салдаттӧ вины. Йӧртіс пӧ сійӧ менӧ табак дозйӧ да во чӧж видзис.
Скӧрмис сэки господь да ачыс петіс салдат дорӧ. А салдат пуктӧма кисӧ морӧс вылас — преставитчӧма.

Комментируйтны да содтавны ыстӧгъяс оз позь