Поп да сылӧн казак Мӧмӧт

Важӧн олісны-вылісны поп гозъя. Вот ӧтчыд поп мӧдӧдчис казакӧс корсьны. Видзӧдӧ, а сылы паныд Мӧмӧт локтӧ.
— Кытчӧ, батюшкоыс, мӧдӧдчӧма?
— Казакӧс корсьны.
А Мӧмӧт сылы и шуӧ:
— Босьт менӧ казачитнытӧ, донтӧг медася: куим во служитӧмысь — куим печик. Первой во бӧрын чаль чуньӧн печикта, мӧд во помасьӧм бӧрын нимтӧм чуньӧн печикта, а коймӧд во помасьӧм бӧрын водз чуньӧн печикта.
А поплы нимкодьыд, мый йӧй мужик куим во кежлӧ куим печикысь медасьӧ.
Печикыд печик и эм: деньга мынтыны оз ков.
— Медала, — шуӧ поп. — Удж менам абу сьӧкыд: нянь изны, скӧт вӧдитны, пес керавны, войын вӧръясысь амбар видзны.
Ӧтчыд поп казакӧс ыстӧ вӧрӧ:
— Мун, — шуӧ, — Мӧмӧт, ветлы пес керавны.
Муніс Мӧмӧт вӧрӧ, кераліс сыв кузьта вит краж, сэсся югыдӧн на и гортас воис. А поп сылысь и юалӧ:
— Уна-ӧ нӧ, Мӧмӧт, пестӧ кералін?
— Талун вит сыв кералі.
Коркӧ поп Мӧмӧтӧс и песла ыстас. А Мӧмӧт сылысь юалӧ:
— Ставсӧ, витнан сывсӧ вая, али ог ставсӧ?
— Дерт, ставсӧ.
Муніс Мӧмӧт, сӧвтіс вӧв доддьӧ витнан кражсӧ да поп ӧшинь улӧ грымкылӧ додьсӧ пӧрӧдіс.
— Петав, — шуӧ, — батюшко, пестӧ примитны.
Петіс поп да Мӧмӧтӧс видӧ:
— Ак, тэ, Мӧмӧт! Кӧн нӧ тэнад вит сыв пескыд?
— А Мӧмӧт сылы шуӧ:
— Кыдзи нӧ абу вит сыв? Стӧч вит сыв кералӧма.
Узисны да аскинас поп бара ыстӧ Мӧмӧтӧс пес керавны.
— Ӧні, — шуӧ, — тадзи эн нин керав.
Муніс Мӧмӧт вӧрӧ. Пӧрӧдіс дас вершӧка нэмӧвӧйя пожӧм, увйис, мурталіс ӧкмыс сыв кузьта, сэсся чинтіс йылӧдыс.
— Но, — шуӧ, — батюшко, талун ӧти лунӧн ӧкмыс сыв кералі. Ӧні дзик прамӧй пес кералі.
Мӧд луннас поп ачыс доддясис да казаккӧд тшӧтш кайис вӧрӧ песла.
— Кӧні нӧ, казак, пескыд?
— Тані, батюшко, стӧч ӧкмыс сыв, — индіс казак ӧкмыс сывъя кер вылӧ.
Бара поп пинясьӧ:
— Ак, тэ, Мӧмӧт, тэ, Мӧмӧт! Пукты вӧв вылас да лэччӧд.
Мӧмӧт петкӧдіс ӧкмыс сывъя керсӧ ас пельпом вылас да сэсся шыбитіс вӧв мышку вылӧ. Вӧлыс сэтчӧ и лязалі да кулі.
— Ак, тэ, Мӧмӧт, тэ, Мӧмӧт! — пинясьӧ поп, — код йӧй нӧ вӧв мышку вылӧ кер сӧвтлывлӧ. Колі ӧд доддяс пуктыны.
А Мӧмӧт балябӧжсӧ гыжъялӧ да шуӧ:
— Мед тэ, батюшко, водзджык сідз висьталін, мый доддяс колӧ пуктыны. Тэ шуин, вӧв вылас пӧ пукты. Кыдзи кӧзяин тшӧктіс, ме сідзи и вӧчи.
Но мый сэсся Мӧмӧткӧд вӧчан? Скӧраліс, скӧраліс поп дай шуӧ:
— Виин кӧ менсьым вӧлӧс, ӧні ас вылад и лэччӧд!
Мӧмӧт зэв кокнипырысь босьтіс пельпом вылас ӧкмыс сывъя кертӧ да мӧдӧдчис гортӧ. Мунігас бергӧдчыліс да поплысь юалӧ:
— Кытчӧ нӧ, батюшко, пестӧ ректа, керка дорад али ыж гид дорад?
Поп сылы ылысянь нин горӧдіс:
— Ыж гид дорас ректы.
Казак вайис кертӧ поп керка дорӧдз да зымкылӧ сувтӧдіс ыж гид стен бокӧ. Ыж гидыд киссис. Поплӧн став ыжъясыс лязалісны.
Воис поп да пинясьӧ казак вылӧ:
— Ак, тэ, Мӧмӧт! Мыйла кӧ ыж гидсӧ кисьтін?
— Ме эг кисьт, ме сӧмын пестӧ стен бокас сувтӧді.
Олісны-олісны, дай поп шуӧ казаклы:
— Мун, Мӧмӧт, посводзӧ чуж изны петав, аски матушка сур пуны кӧсйӧ.
Изіс да изіс, изіс да изіс Мӧмӧт, мый изӧ, сійӧс вочасӧн и сёйӧ. Став изӧм пызьсӧ сёйис. Сэсся пырис керкаӧ да шуӧ поплы:
— Батюшко, чужйыд изсис.
Петісны чуж видлыны, а чужйыд абу.
— Кӧні нӧ, Мӧмӧт, тэнад чужйыд?
— Ме посни пызьӧдз изі. Сэтшӧма изі, ставыс бусӧ пӧри.
Поп сетіс Момотлы ещӧ ӧти мешӧк чуж изны. Изігмозыс Мӧмӧт бара сёйис став чужтӧ. Поп скӧрмис:
— Мӧмӧт, тэ, Мӧмӧт! Чуж изны он куж! Сэсся поплы аслыс лои пуксьыны изки дорӧ да чуж изны.
Олісны, олісны, дай попӧс беда суис: поплӧн пачсьыс сёяныс мӧдіс вошласьны, пачын пыр сӧмын тыртӧм кашникъяс кольӧны.
Вот поп казакыслы и шуӧ:
— Кывзы, Мӧмӧт, тэ бурджыка кильчӧ ӧдзӧстӧ караулит. Кутшӧмкӧ вӧръяс волывлӧны миянӧ да пачысь став сёянсӧ ректӧны. Конюшняысь вудж узьлыны посводзӧ.
Мӧмӧт мӧдіс лун и вой караулитны, коді поп пачысь сёян гусявлӧ. А ачыс стрӧка кыйӧдас, пыралас керкаӧ да став сёянсӧ пачсьыд здукӧн ректыштас.
Коркӧ ӧти асылын поп да Мӧмӧт вартны петісны, а сэк попаддя чукӧстіс ассьыс мусуксӧ — кузь юрсиа дьякӧнӧс, — да мӧдісны койтны да гӧститӧдчыны.
Мӧмӧт босьтіс чап, ӧтчыд шеныштіс — ӧти чап кӧв ори, мӧдысь шеныштіс — мӧд чап кӧв ори.
— Вай, — шуӧ, — батюшко, гортӧ котӧртлам чап кӧв вурыштны: тані шыла ни нырагез абу.
Локтісны гортӧ, а попаддялӧн кильчӧсӧ игналӧма. Мӧдісны игӧдчыны. Казак ӧшиньӧд кыйкнитліс да аддзис, кыдзи попаддя нуис пызан вылысь чӧскыд сёянъяс, а дьякӧнӧс дзебис шкапӧ. Пырисны керкаӧ.
— Вай, — шуӧ, — матушка, ме ӧбӧдайтышта, а казак сы коста чап кӧвъяс вурыштас.
Кватитчисны, а пачын сёяныд абу.
— Ак, тэ, Мӧмӧт, тэ, Мӧмӧт! Омӧля тэ вӧръясысь керка видзан. Бара нин вӧръяс волӧмаӧсь, — шуӧ поп.
А Мӧмӧт поплы шуӧ:
— Ме талун, батюшко, вӧтӧн аддзылі, быттьӧкӧ вӧрыд воліс, кыскаліс пачсьыд став сёянтӧ да шкапад пукталіс и ачыс тшӧтш шкапад пуксис.
Восьтісны шкапсӧ, и збыльысь сэні сёянтыра гырничьяс, и пирӧг-шаньгаяс, и кузь юрсиа дьяк сэні жӧ пукалӧ. Поп аддзис дьякӧнӧс да уськӧдчис:
— Ак, — шуӧ, — коді вӧлӧма сёян гусявлысьыд!
И мӧдісны поп да дьяк юрси-юрси воча пачесайтчыны. Дьякӧн томджык да вермӧ попӧс. Поп мӧдіс казаклы горзыны:
— Эй, Мӧмӧт, мый тэ чӧв сулалан? Босьт укватсӧ да кучкав тшӧтш.
Мӧмӧт кватитіс укват да мӧдіс попӧс и дьякӧнӧс кыкнансӧ ӧтмоз тувкӧдны да ойкӧдны. Ӧдйӧн тай янсалісны.
— Ак, — шуӧ поп, — Мӧмӧт, тэ, Мӧмӧт! Ме тшӧкті дьякӧнӧс кучкавны, а тэ менӧ тшӧтш кучкалін!
— А мем кыдз кӧзяин шуис, сідзи и вӧчи. Тэ ӧд ачыд кучкавны тшӧктін да эн урчит, кодӧс кучкавнысӧ.
Дзонь вежон чӧж поп куйліс вольпасьын, гыжъяліс ассьыс нӧйтӧм бокъяссӧ.
Олісны, олісны да коркӧ поп да попаддя гӧститны мӧдӧдчисны. Поп шуӧ казаклы:
— Тэ, Мӧмӧт, ми гӧститігкості ов лючки да ӧдзӧсъястӧ бура видз, а медся нин амбар ӧдзӧстӧ бура видз, медым вӧръяс менсьым няньӧс оз гусявны.
Мыйӧн поп гозъя мунісны гӧститны, Мӧмӧт восьтіс амбар ӧдзӧстӧ, корис сиктысь мужикъясӧс да тшӧктіс став няньсӧ и эмбурсӧ новлыны. Сэсся перйис амбар ӧдзӧссӧ да амбар ӧдзӧснас котӧртіс попӧс корсьны. Поп сійӧс аддзис да юалӧ:
— Мый нин лои, Мӧмӧт? Кыдзи лысьтін амбар ӧдзӧстӧ эновтны?
— Амбар пытшкад, батюшко, шыръяс кышӧдчӧны. Ме котӧрӧн локті юавны, мый вӧчны. А амбар ӧдзӧстӧ бура тшӧктін кранитны да, мед мися татчӧ волігкості некод сійӧс эз гусяв, сьӧрысь вайи.
— Ак, тэ. Мӧмӧт, тэ, Мӧмӧт! Колӧ ӧд амбарсьыд сюсӧ кранитны, а оз амбар ӧдзӧссӧ!
Котӧртісны амбар видзӧдлыны: збыльысь, нинӧм абу кольӧма, ставсӧ гусялӧмаӧсь.
Скӧралӧ поп гӧгӧрвотӧм казак вылӧ, а Мӧмӧт правдайтчӧ:
— Тэ ӧд, батюшко, эн амбартӧ, а амбар ӧдзӧстӧ тшӧктін видзны. Кыдз кӧзяин тшӧктіс, ме сідзи и вӧчи.
Вот коркӧ воис казачитӧмлы срок. Колӧ казаккӧд рӧщӧт вӧчны ӧти во уджалӧмысь. Мӧмӧт соссӧ пуджис дай шуӧ:
— Кад, батюшко, меным первой воысь уджалӧм дон мынтыны. Вай лӧсьӧдлы плештӧ. Кодар бокас печикта?
Лӧсьӧдіс поп шуйга плешсӧ. Мӧмӧт колс печиктіс да сэтшӧма печиктіс, мый поп вылӧ-вылӧ качліс да кӧтшас улӧдз тумбыльтчис.
— Но, — шуӧ, — батюшко, ӧти во уджалӧмысь прӧст.
А поп, гашкӧ, и куим сутки чӧж садьтӧгыс куйліс тайӧ печиктӧмысь.
Пукалӧ поп да думайтӧ, кыдзи мездысьны казакысь? Кыдзи мездысьны ещӧ кык печикысь?
Вот чукӧстіс казакӧс поп дай шуӧ:
— Мун, Мӧмӧт, ветлы да Вӧрсалысь мӧссӧ вайӧд: сійӧ меным кык во чӧж нин руга эз мынтыв.
Муніс Мӧмӧт, пырис сьӧд вӧр шӧрӧ, кераліс медся ыджыд пожӧм пусӧ да мӧдіс кырссьыны.
— Кутшӧм могӧн, Мӧмӧт, локтін менам прикодӧ? Мыйла тайӧ пусӧ кырссян?
— Ме локті тіянӧс, вӧрса челядьӧс, поплы руга мынтытӧмысь пывсьӧдыштны. Со, — индіс сійӧ пожӧм кер вылӧ, — вӧча татысь аслым бедь, медым тайӧ бедьнас тіянӧс пывсьӧдны.
Повзис Вӧрса да шуӧ казаклы:
— Вай первой выннымӧс бертам. Кодным лоам ёнджык, сылы и руга мынтыны. Кыкнанным шутёвтам. Кодным ёнджыка вермам шутёвтны, сылы и руга мынтыны.
Шутёвтіс Вӧрса, став вӧрыс быдсӧн тӧвзьыштліс и Мӧмӧт муртса кок йывсьыс эз усь — сэтшӧм гораа сійӧ шутёвтіс.
— Но, — шуӧ, — ӧні сэсся тэ, Мӧмӧт, шутёвт.
А Мӧмӧт шуӧ:
— Ме кӧ, Вӧрса, шутёвта, тэнад сингурансьыд синмыд чеччыштас. Синмыд кӧ жаль, кӧртав синтӧ.
Кӧрталіс Вӧрса ассьыс синъяссӧ да мӧдіс виччысьны Мӧмӧтлысь шутёвтӧм. Мӧмӧт босьтіс муысь зор да кыдз тай свиснитас Вӧрсалы юрбӧрас, сылӧн синсьыс быдсӧн би петаліс.
— Но, — шуӧ Мӧмӧт, — ӧтчыд шутёвті, мӧдысь шутёвта ог?
— Эн сэсся шутёвт, — шуӧ Вӧрса, — ӧтчыд шутёвтӧмысь менам синъясӧй муртса нин эз чеччыштны.
Сетіс Вӧрса Мӧмӧтлы ассьыс кык скӧтина — кык ошкӧс. Воис Мӧмӧт поп ордӧ, ӧти ошсӧ йӧртіс вӧвъяс конюшняӧ, а мӧдсӧ — мӧс картаӧ. Попыд эськӧ абу нин рад, мый Мӧмӧт гортӧ ловйӧн воис.
— Но, — шуӧ, — Мӧмӧт, вайӧдін Вӧрсалысь скӧтсӧ?
— Вайӧді, конюшняад да картаад йӧрті.
Мӧд лунас лэччисны карта вылад, а ошъясыд поплысь став мӧсъяссӧ и вӧвъяссӧ косявлӧмаӧсь.
Бара поп пуксис да шогсьӧ, думайтӧ, кытчӧ казакӧс ыстыны, мед ловйӧн бӧр оз во.
— Ветлы, — шуӧ, — Мӧмӧт, Ыджыд Вад дорӧ чӧртъяслысь оброк перйыны. Куим во нин оброк ни руга мем эз мынтывны.
Муніс Мӧмӧт Ыджыд Вад дорӧ, пуксис берег дорас да мӧдіс нырагез гартны. Сэки Вад пытшкӧсысь быйкнитіс чӧртпи да юалӧ:
— Мый тэ, Мӧмӧт, вӧчан?
— Ме нырагез гарта, тіянлысь ваднытӧ кӧсъя шыръявны да тіянӧс, васа бесъясӧс, пывсьӧдыштны, мыйла поплы оброк ни руга он мынтӧй.
Чегсис беспи да васа дедыс дінӧ котӧртіс:
— Ой, дедӧ! Мӧмӧт локтӧма да оброк корӧ, шуӧ: он кӧ пӧ шапка тыр деньга сетӧй, ваднытӧ пӧ шыръяла да став васа бесъяссӧ пӧ пывсьӧда.
Петіс беспи Мӧмӧт дорӧ дай шуӧ:
— Дедӧ тшӧктӧ тэныд мекӧд бертчыны. Кодным коднымӧс вермам, сылы и оброк лоӧ мынтыны.
Мӧмӧт сылы шуӧ:
— Тэкӧд нӧ, чӧрт кусынькӧд, ачым ог жӧ мӧд вермасьны. Со эстӧн пу дорас менам шӧркост вокӧй куйлӧ. Мунӧ сыкӧд бертчӧй. Сӧмын сійӧ неуна пельтӧм да оз кыв, сёрнитны заводиттӧдз колӧ сылы кучкыны. Мӧмӧт индіс пу улын куйлысь ош вылӧ.
Чӧртпи муніс, кучкис куйлысь ошлы да горӧдіс:
— Вай, — шуӧ, — вермасям.
Ошкыд тай кыдзи сы вылӧ уськӧдчас. Парсалас да курччалас, парсалас да курччалас, беспилӧн ӧдва лолыс кольӧ да котӧрӧн лэччас дедыслы норасьны:
— Мӧмӧтыд ачыс эз бертчы, шӧркост воксӧ меным паныд ыстыліс.
Бара беспи петіс берегӧ, а оброк деньга эз петкӧд.
— Дедӧ, — шуӧ-тшӧктіс панъясьны. Кодным ӧдйӧджык вад гӧгӧр кытшовтам, сылы и оброк мынтыны.
— Тэкӧд, чӧрт кусынькӧд, ачым ог жӧ мӧд панъясьны! Тэнӧ менам ичӧт вокӧй на панъяс, — шуӧ Мӧмӧт.
Сэсся пыраліс вӧрӧ, кыйис кык кӧчӧс, ӧтисӧ мешӧкӧ сюйис, а мӧдсӧ моздорас босьтіс.
— Но, -шуӧ, — чӧрткусынь, панъясь менам ичӧт воккӧд, — и лэдзис ӧтик кӧчсӧ да кинас швач-швачкерис. Кӧч котӧртіс. А чӧртпи кывсӧ ӧшӧдӧмӧн кашкӧ-котӧртӧ, мед эськӧ сійӧс оз панйыны. Вот кытшовтіс чӧртпи вад гӧгӧрыс, а сэк коста Мӧмӧт кыскис мешӧксьыс мӧд кӧчсӧ да мышкас тапкӧдӧ:
— Молодеч, — шуӧ, — менам ичӧт вокӧй, чӧртпиӧс панйин.
Бара чӧртпи котӧрӧн лэччис дедыс дінӧ да висьталӧ:
— Менӧ панйис Мӧмӧтлӧн ичӧт вокыс.
Вот петіс беспи дай бара на оброк деньга оз вай.
— Со, — шуӧ, — дед менам ыстіс ассьыс комын пудъя бедьсӧ, кодным вылӧджык качӧдлам, сылы и оброк.
Мӧмӧт сувтіс комын пудъя кӧрт бедь дорӧ да кымӧр вылӧ видзӧдӧ, а шыбитны оз шыбит.
— Мый нӧ, Мӧмӧт, виччысян, он шыбит?
— Час, — шуӧ, — эсійӧ кымӧр пластсӧ виччысьышта да сэтчӧ бедьсӧ шыбита, мед сэсся бӧрсӧ оз усь.
Чегсис чӧртпи, кватитіс паличсӧ да вадйӧ лэччис дедлы норасьны:
— Тэнсьыд бедьтӧ, дедӧ, Мӧмӧтыд кутліс кымӧр вылӧ шыбитны. Муртса вевъялі пышйӧдны.
Аддзӧ пӧрысь васа, мый Мӧмӧткӧд силаӧн бертчыны он вермы, да тшӧктіс петкӧдны оброк деньга.
Сэк кості Мӧмӧт розьӧдіс шапка пыдӧссӧ, улысас гу кодйис да мешӧк пуктіс. Ӧти мешӧк деньга петкӧдіс да кисьтіс чӧртпи Мӧмӧт шапкаӧ — эз тыр, мӧд мешӧк кисьтіс — эз тыр, коймӧд мешӧк петкӧдіс да вӧлисти тырис.
— Но, — шуӧ Мӧмӧт чӧртпилы, — ну поп ордӧдз тайӧ деньга мӧшӧксӧ.
Вот мӧдӧдчисны Мӧмӧт да чӧртпи поп ордӧ. Туй вывсьыс аддзисны ыджыд изки.
Беспи Мӧмӧтлысь юалӧ:
— Мый нӧ тайӧ татшӧм гӧгрӧсыс?
— Тайӧ менам дедӧлӧн сикӧтш молльыс.
Мунісны, мунісны, да беспи агас аддзис.
— Мый нӧ, Мӧмӧт, татшӧмыс?
— Тайӧ менам дедӧлӧн сикӧтшыс.
Мунісны, мунісны, да беспи рыныш аддзис.
— Висьтав, Мӧмӧт, тайӧ мый татшӧмыс?
— Тайӧ менам дедӧлӧн вӧралан шапкаыс.
Сэсся воны кутісны поп ордӧ да Мӧмӧт беспиӧс гортас ыстіс.
Гортас мунігӧн беспи рыныштӧ шапкааліс, агастӧ сьыліас сикӧтш пыдди сюйис, а изкитӧ сьыліас жӧ кӧрталіс да вадйӧ мӧдіс дедыс дорӧ лэччыны. Изкиыд ва пыдӧсӧ кыскӧ, рынышыд да агасыд ва веркӧсӧ кыпӧдӧны. Пессис, пессис беспи да сэтчӧ и джагаліс.
Воис Мӧмӧт поп ордӧ да деньга мешӧктӧ крапкылӧ джодж шӧрӧ чӧвтіс.
— Вайи, — шуӧ, — чӧртъясыдлысь оброктӧ.
Попыд и деньга вылад нин абу рад, думайтӧ сӧмын сы йылысь, кыдзи казак печикысь плешсӧ мездыны. Кӧть кытчӧ сійӧс эз ыстыв, некытчӧ Мӧмӧт оз йӧрмы.
Сэсся поп да попаддя думайтісны пышйыны. Поп вӧчис аслыс зэв ыджыд пестер, став дона кӧлуйсӧ сӧвтіс сэтчӧ да шуӧ попаддялы:
— Тайӧ Мӧмӧтысь ловъя юрӧн он мын. Аски жӧ сыысь гусьӧн кытчӧкӧ пышъям.
А Мӧмӧт кывліс налысь сёрнисӧ. Мыйӧн поп да попаддя унмовсисны, ректіс поп пестерысь став эмбурсӧ да няньсӧ, сэсся ачыс пырис сэтчӧ да вевттьысис.
Асывнас зэв водз поп да попаддя мӧдісны гортысь пышйыны. Пышйисны-пышйисны да кӧсйисны пуксьывны шойччыштны. Ӧні пӧ казакыд оз нин суӧд.
А Мӧмӧт сэк пестер пытшсянь горӧдіс:
— Батюшко, менӧ тай колинныд!
— Со ӧд, Мӧмӧтыд, тыдалӧ, казялӧма пышйӧмнымӧс да вӧччӧ ми бӧрся.
Пышйисны да пышйисны, пышйисны да пышйисны, поводнӧя мудзисны.
— Но, матушка, вай жӧ пуксьыштлам шойччыштны да сёйыштны. Ӧні ӧд казакыд оз нин суӧд.
А Мӧмӧт бара горӧдіс пестер пытшкӧссянь:
— Батюшко, эн коль! Тайӧ ме, Мӧмӧт, локта!
Котӧртісны да котӧртісны, джуджыд кыркӧтша ю дорӧ воисны, сэтчӧ найӧс вой суис. Попыд пестерсӧ пӧрччис да бужӧд дорӧ шойччыны пуксис и шуӧ:
— Но, Мӧмӧтлы миянӧс не суӧдны.
А Мӧмӧт сэккоста петіс пестерысь да шуӧ:
— Но, батюшко, ӧдва ме тіянӧс верми суӧдны. Ме чайтлі, мый менӧ дзикӧдз нин колинныд.
Поп да попаддя шогӧ воисны: бара Мӧмӧтысь эз мынны.
Вот поп, попаддя да казак лӧсьӧдчӧны ю дорӧ узьны водны. Поп и шуӧ:
— Тэ, Мӧмӧт, ю дорланьыс водан, матушка — вӧрладорланьыс, а ме — шӧракостаныд.
Мудзӧм бӧрад поп да попаддя зэв чорыда унмовсисны да немтор эз кывлыны, кыдзи Мӧмӧт попӧс ю дорланьыс вештыштіс, а ачыс поп да попаддя костӧ водіс.
Коркӧ садьмис попаддя, думайтӧ, мый сы бокын куйлӧ аслас попыс, да сылы бокас тувкӧдӧ:
— Тойышт сійӧс ваас да мынам сыысь!
Мӧмӧт тойыштіс попӧс кыркӧтш йывсянь ваӧ.
Асывнас садьмис попаддя да юалӧ Мӧмӧтлысь:
— Кӧн нӧ, казак, миян батюшконым?
— Ме сійӧс ваӧ быгыльті. Ачыд тай войнас тшӧктін сійӧс ваӧ йӧткыны.
Мӧмӧт чеччис да шуӧ сэсся попаддялы:
— Но, менам ӧні кежлӧ казакалан срок помасис. Поплы казачиті, а попаддялы казачитны ог кӧсйы.
Сэсся Мӧмӧт шапкасӧ лэптыліс да водзӧ мӧдӧдчис.

Комментируйтны да содтавны ыстӧгъяс оз позь